Pag-abot sa Israelinhong mga espiya didto sa siyudad sa Jerico, mipuyo sila sa balay sa babaye nga ginganlag Rahab. Nahibaloan kadto sa hari sa Jerico ug gipaadtoan niyag mga sundalo ang balay ni Rahab. Gitagoan ni Rahab sa atop ang mga espiya ug gisultihan niya ang mga sundalo nga nanggawas na sila. Giingnan niya ang mga espiya: ‘Tabangan ta mo kay nahibalo ko nga si Jehova nagtabang kaninyo ug inyong mapanag-iya kining yutaa. Palihog saari ko nga inyong luwason ang akong pamilya.’

Ang mga espiya miingon kang Rahab: ‘Saaran ka namo nga maluwas ang imong pamilya basta magpabilin sila sa imong balay. Paghikot ug pula nga pisi sa imong bentana, ug walay daotang mahitabo sa imong pamilya.’

Gipakanaog ni Rahab ang mga espiya agi sa bentana pinaagig pisi. Human niadto, tulo ka adlaw silang nanago sa kabukiran ayha sila mibalik kang Josue. Dayon mitabok ang mga Israelinhon sa Suba  sa Jordan ug nangandam aron ilogon ang siyudad. Ang Jerico mao ang unang siyudad nga ilang napildi. Gisugo sila ni Jehova sa pagmartsa libot sa siyudad kausa kada adlaw sulod sa unom ka adlaw. Sa ikapitong adlaw, gilibot nila kini sa pito ka beses. Dayon gipatingog sa mga saserdote ang ilang mga trompeta, ug ang mga sundalo kusog nga naninggit. Nalumpag ang pader sa siyudad! Pero ang balay ni Rahab nga naa sa pader wala maunsa. Si Rahab ug iyang pamilya naluwas kay misalig siya kang Jehova.