1-3. Sa unsa ta nabilanggo, ug unsaon ta pagpagawas ni Jehova?

HUNAHUNAA nga gisentensiyahan kag tibuok kinabuhi nga pagkabilanggo sa sala nga wala nimo buhata. Wala nay tsansa nga makagawas ka. Daw wala na kay paglaom, ug wala na kay mahimo niini. Pero dihang nawad-an na gyod kag paglaom, imong nahibaloan nga may tawo nga naay gahom sa pagpagawas nimo ug misaad siya nga tabangan ka! Unsay imong bation?

² Kitang tanan nabilanggo sa kamatayon. Bisag unsa pay atong himoon, dili gyod ta makagawas. Pero si Jehova naay gahom sa pagpagawas nato sa kamatayon. Ug nagsaad siya nga “ang kataposang kaaway, ang kamatayon, pagawagtangon.”​—1 Corinto 15:26.

³ Hunahunaa ang kahupayan nga bation nimo dihang dili na ka mabalaka nga mamatay! Pero dili lang kay wad-on ni Jehova ang kamatayon. Banhawon sab niya ang mga patay. Hunahunaa ang epekto niini kanimo. Iyang gisaad nga mabuhi pag-usab “ang mga patay.” (Isaias 26:19) Gitawag ni sa Bibliya ug pagkabanhaw.

4. (a) Unsay makahupay dihang mamatyan tag membro sa pamilya o suod nga higala? (b) Kinsa ang pipila ka suod nga higala ni Jesus?

⁴ Dihang mamatyan tag membro sa pamilya o suod nga higala, maguol kaayo ta ug daw walay mahimo. Dili na nato mabalik ang iyang kinabuhi. Pero ang Bibliya naghupay kanato. (Basaha ang 2 Corinto 1:3, 4.)  Maghisgot tag pananglitan nga nagpakita nga gusto gyong banhawon ni Jehova ug Jesus ang atong mga minahal. Sa dinhi pa si Jesus sa yuta, pirme niyang bisitahon si Lazaro ug ang mga igsoon niini, si Marta ug Maria. Suod sila nga mga higala ni Jesus. Ang Bibliya nag-ingon: “Gihigugma ni Jesus si Marta, Maria, ug Lazaro.” Pero usa ka adlaw niana, namatay si Lazaro.​—Juan 11:3-5.

5, 6. (a) Unsay gibati ni Jesus dihang nakita niya nga naguol ang pamilya ug mga higala ni Lazaro? (b) Nganong makahupay ang pagkahibalo sa pagbati ni Jesus bahin sa kamatayon?

⁵ Giadto ni Jesus si Marta ug Maria aron hupayon. Pagkadungog ni Marta nga nagpadulong si Jesus, migawas siya sa siyudad aron sugaton si Jesus. Nalipay siya nga nakita si Jesus, pero giingnan niya si Jesus: “Kon dinhi pa ka, dili unta mamatay ang akong igsoon.” Para kang Marta, ulahi na kaayo ang pag-abot ni Jesus. Dayon nakita ni Jesus nga naghilak si Maria. Kay nakita ni Jesus nga naguol sila, nasakitan siya ug mihilak. (Juan 11:21, 33, 35) Gibati niya ang grabeng kasakit nga maoy bation nato dihang mamatyan ug minahal.

⁶ Ang pagkahibalo nga si Jesus pareho natog gibati bahin sa kamatayon makahupay nato. Kay si Jesus sama sa iyang Amahan, makaseguro ta nga gibati sab ni Jehova ang atong kasakit. (Juan 14:9) Si Jehova naay gahom sa pagwagtang sa kamatayon hangtod sa hangtod, ug hapit na kaayo niyang himoon kana.

7, 8. Nganong dili gusto ni Marta nga kuhaon ang bato nga gitabon sa lubnganan ni Lazaro, pero unsay gihimo ni Jesus?

⁷ Pag-abot ni Jesus sa lubnganan ni Lazaro, ang entrada niini gitabonan nag dako kaayong bato. Si Jesus  miingon: “Kuhaa ninyo ang bato.” Pero gipugngan sila ni Marta kay upat ka adlaw na sa lubnganan si Lazaro. (Juan 11:39) Wala siyay ideya kon unsay himoon ni Jesus aron tabangan ang iyang igsoon.

⁸ Giingnan ni Jesus si Lazaro: “Gula ngari!” Dayon nakita ni Marta ug Maria ang talagsaong panghitabo. “Ang tawong namatay migula. Ang iyang mga tiil ug kamot binugkosan ug panapton.” (Juan 11:43, 44) Si Lazaro nabuhi! Nakauban niyag balik ang iyang pamilya ug mga higala. Ila na siyang magakos, mahikap, ug maestorya. Pagkadakong milagro! Gibanhaw ni Jesus si Lazaro.

9, 10. (a) Kinsay naghatag kang Jesus ug gahom sa pagbanhaw? (b) Nganong importante kanato ang mga asoy bahin sa pagkabanhaw?

⁹ Namanhaw ba si Jesus pinaagi sa iyang kaugalingong gahom? Wala. Sa wala pa banhawa ni Jesus si Lazaro, miampo siya kang Jehova, ug gihatagan siya ni Jehova ug gahom sa pagbanhaw kang Lazaro. (Basaha ang Juan 11:41, 42.) Naa pay laing gibanhaw gawas kang Lazaro. Ang Bibliya naghisgot bahin sa 12 anyos nga babaye nga grabeng nasakit. Ang iyang amahan, si Jairo, naguol pag-ayo, ug nagpakiluoy kang Jesus nga ayohon ang iyang bugtong nga anak. Samtang nakig-estorya siya kang Jesus, naay nangabot ug miingon: “Patay na ang imong anak nga babaye! Ayaw nag hasola ang Magtutudlo.” Pero giingnan ni Jesus si Jairo: “Ayawg kahadlok, pagbaton lag pagtuo, ug siya mabuhi.” Dayon nag-uban silag adto sa balay ni Jairo. Sa duol na sila sa balay, nakita ug nadunggan ni Jesus nga nanghilak ang mga tawo. Si Jesus miingon kanila: “Ayaw na  mog panghilak, kay wala siya mamatay kondili natulog ra.” Seguradong naglibog niini ang ginikanan sa bata. Gipagawas ni Jesus ang mga tawo ug gikuyog niya ang ginikanan didto sa kuwarto nga gibutangan sa bata. Gigunitan ni Jesus ang iyang kamot ug giingnan: “Inday, bangon!” Hunahunaa ang kalipay sa iyang ginikanan dihang mibangon dayon siya ug milakaw! Gibanhaw ni Jesus ang ilang anak. (Marcos 5:22-24, 35-42; Lucas 8:49-56) Sukad adtong adlawa, dihang makita nila ang ilang anak, mahinumdoman nila ang gihimo ni Jehova para nila pinaagi kang Jesus. *

¹⁰ Ang mga gibanhaw ni Jesus nangamatay ra pod sa ulahi. Pero ang atong nabasa bahin nila importante kaayo kay naghatag ni natog tinuod nga paglaom. Gusto ni Jehova nga banhawon ang mga patay, ug iya gyod nang himoon.

11. Unsay gitudlo kanato sa Ecclesiastes 9:5 bahin kang Lazaro?

¹¹ Ang Bibliya klarong nag-ingon nga “ang mga patay walay nahibaloan nga bisan unsa.” Kanay kahimtang ni Lazaro. (Ecclesiastes 9:5) Sama sa giingon ni Jesus, si Lazaro mora rag natulog. (Juan 11:11) Samtang didto si Lazaro sa lubnganan, siya “walay nahibaloan nga bisan unsa.”

12. Nganong nahibalo ta nga tinuod gyong gibanhaw si Lazaro?

¹² Daghan ang nakakita dihang gibanhaw ni Jesus si Lazaro. Bisan ang mga kaaway ni Jesus nahibalo niini  nga milagro. Buhi si Lazaro, ug pamatuod kini nga nahitabo gyod ang pagkabanhaw. (Juan 11:47) Daghan sab ang mibisita kang Lazaro, ug ingong resulta, mituo na sila nga si Jesus gipadala sa Diyos. Wala malipay niini ang mga kaaway ni Jesus, busa gusto nilang patyon si Jesus ug Lazaro.​—Juan 11:53; 12:9-11.

13. Nganong makaseguro ta nga banhawon ni Jehova ang mga patay?

¹³ Si Jesus miingon nga “ang tanang anaa sa handomanang mga lubnganan” banhawon. (Juan 5:28) Kini nagpasabot nga kadtong naa sa panumdoman ni Jehova mabuhi pag-usab. Pero aron mabanhaw ni Jehova ang usa ka tawo, kinahanglang mahinumdoman niya ang tanang detalye bahin niana nga tawo. Mahimo ba gyod na niya? Aw, binilyon ang bituon sa uniberso. Ang Bibliya nag-ingon nga si Jehova nahibalo sa ngalan sa matag bituon. (Basaha ang Isaias 40:26.) Kon kaya niyang hinumdoman ang ngalan sa matag bituon, seguradong sayon ra kaayo niyang hinumdoman ang tanang detalye sa matag tawo nga iyang banhawon. Labaw sa tanan, si Jehova ang naglalang sa tanan, maong segurado ta nga naa gyod siyay gahom sa pagbanhaw sa mga tawo.

14, 15. Unsay atong makat-onan sa giingon ni Job bahin sa pagkabanhaw?

¹⁴ Ang matinumanong tawo nga si Job mituo sa pagkabanhaw. Siya nangutana: “Kon ang tawo mamatay, mabuhi ba siya pag-usab?” Dayon siya miingon kang Jehova: “Ikaw motawag, ug ako motubag kanimo. Ikaw mangandoy sa buhat sa imong mga kamot.” Oo, nahibalo si Job nga si Jehova eksayted na sa panahon nga iyang banhawon ang mga patay.​—Job 14:13-15.

¹⁵ Unsay imong gibati bahin sa paglaom nga pagkabanhaw?  Tingali makapangutana ka, ‘Banhawon ba sab ang akong pamilya ug mga higala nga nangamatay na?’ Mahupay tang mahibalo nga gusto gyod ni Jehova nga banhawon ang mga patay. Atong sayron ang giingon sa Bibliya kon asa sila mopuyo ug kon kinsa ang banhawon.

16. Unsa unyay kinabuhi niadtong banhawon dinhi sa yuta?

¹⁶ Kaniadto, kadtong mga gibanhaw nakauban ug balik sa ilang pamilya ug mga higala dinhi sa yuta. Pero labaw pa niana ang mahitabo sa umaabot. Ngano? Kay kadtong banhawon dinhi sa yuta dunay paglaom nga mabuhi hangtod sa hangtod ug dili na mamatay pag-usab. Ug ang kalibotan nianang panahona lahi na kaayo sa atong gipuy-an karon. Wala nay gubat, krimen, ug mga sakit.

17. Kinsa ang banhawon?

¹⁷ Kinsa ang banhawon? Si Jesus miingon nga “ang tanang anaa sa handomanang mga lubnganan makadungog sa iyang tingog ug mangabanhaw.” (Juan 5:28, 29) Ug ang Pinadayag 20:13 nag-ingon: “Ang dagat mitugyan sa mga patay nga diha niini, ug ang kamatayon ug ang Lubnganan mitugyan sa mga patay nga diha kanila.” Oo, binilyong tawo ang mabuhi pag-usab. Miingon sab si apostol Pablo nga duna unyay pagkabanhaw “sa mga matarong ug sa mga dili matarong.” (Basaha ang Buhat 24:15.) Unsay ipasabot niana?

18. Kinsay apil sa “mga matarong” nga banhawon?

¹⁸ Apil sa “mga matarong” kadtong matinumanong  mga alagad ni Jehova nga nabuhi sa wala pa moanhi si Jesus sa yuta. Ang mga tawo nga sama ni Noe, Abraham, Sara, Moises, Ruth, ug Ester banhawon dinhi sa yuta. Mabasa nimo ang pipila kanila diha sa Hebreohanon kapitulo 11. Komosta ang matinumanong mga alagad ni Jehova nga nangamatay sa atong panahon? Apil pod sila sa “mga matarong,” maong banhawon sila.

19. Kinsay apil sa “mga dili matarong”? Unsang kahigayonan ang ihatag ni Jehova kanila?

 ¹⁹ Apil sa “mga dili matarong” kadtong binilyong tawo nga wala mahatagig kahigayonan nga makaila kang Jehova. Bisan pag nangamatay sila, si Jehova wala malimot nila. Banhawon niya sila ug hatagag kahigayonan nga makakat-on bahin kaniya ug moalagad niya.

20. Nganong dili tanan ang banhawon?

²⁰ Nagpasabot ba ni nga mabanhaw ang tanang nangamatay? Dili. Si Jesus nag-ingon nga dunay mga tawo nga dili banhawon. (Lucas 12:5) Kinsay modesisyon kon banhawon ba ang usa ka tawo o dili? Si Jehova ang kataposang Maghuhukom, pero gihatagan sab niya si Jesus ug awtoridad nga “mahimong maghuhukom sa mga buhi ug sa mga patay.” (Buhat 10:42) Kadtong gihukman nga daotan ug dili magbag-o dili na banhawon.​—Tan-awa ang Endnote 19.

21, 22. (a) Unsay mahitabo niadtong banhawon ngadto sa langit? (b) Kinsa ang unang gibanhaw ngadto sa langit?

²¹ Nag-ingon sab ang Bibliya nga ang ubang tawo magpuyo sa langit. Kadtong banhawon ngadto sa langit dili banhawon ingong tawo. Banhawon siya ngadto sa langit ingong espiritu.

²² Si Jesus ang unang nakadawat niini nga matang sa pagkabanhaw. (Juan 3:13) Tulo ka adlaw human patya si Jesus, gibanhaw siya ni Jehova. (Salmo 16:10; Buhat 13:34, 35) Wala siya banhawa ingong tawo. Si apostol Pedro miingon nga si Jesus “gipatay ingong tawo ug gibanhaw ingong espiritu.” (1 Pedro 3:18) Si Jesus gibanhaw ingong gamhanang espiritu! (1 Corinto 15: 3-6) Pero ang Bibliya nag-ingon nga gawas niya, naa pay laing makadawat sa maong matang sa pagkabanhaw.

23, 24. Kinsa ang “gamayng panon” nga gihisgotan ni Jesus, ug pila sila ka buok?

²³ Sa wala pa mamatay si Jesus, giingnan niya ang iyang matinumanong mga tinun-an: “Moadto ko sa pag-andam ug dapit alang kaninyo.” (Juan 14:2) Nagpasabot ni nga ang uban niyang sumusunod banhawon ngadto sa langit aron makauban niya. Pila sila ka buok? Si Jesus miingon nga diyutay ra sila, usa ka “gamayng panon.” (Lucas 12:32) Gihatag ni apostol Juan ang eksaktong gidaghanon dihang nakita niya si Jesus nga “nagbarog sa [langitnong] Bukid sa Zion, ug uban kaniya ang 144,000.”​—Pinadayag 14:1.

²⁴ Kanus-a banhawon ang 144,000 ka Kristohanon? Ang Bibliya nag-ingon nga mahitabo ni dihang magmando na sa langit ang Kristo. (1 Corinto 15:23) Nabuhi na ta sa maong panahon, ug kadaghanan sa 144,000 gibanhaw na ngadto sa langit. Kadtong nia pa sa yuta ug mamatay sa atong panahon banhawon dayon ngadto sa langit. Pero ang kadaghanan sa mga tawong banhawon mabuhi sa Paraiso dinhi sa yuta.

25. Unsay atong makat-onan sa sunod kapitulo?

²⁵ Sa dili na madugay, pagawson na ni Jehova ang tanang tawo gikan sa pagkabilanggo sa kamatayon, ug ang kamatayon wagtangon hangtod sa hangtod! (Basaha ang Isaias 25:8.) Pero unsay himoon niadtong moadto sa langit? Ang Bibliya nag-ingon nga sila magmando kauban ni Jesus sa usa ka Gingharian o gobyerno. Makakat-on pa tag dugang bahin niini nga gobyerno sa sunod kapitulo.