DIHANG magbasa kag mantalaan, motan-aw ug TV, o maminaw ug radyo, makakita ug makadungog kag mga balita bahin sa krimen, gubat, ug terorismo. Tingali nag-antos ka kay nasakit o namatyag minahal.

Hunahunaa kini:

• Kini ba ang gusto sa Diyos para nako ug sa akong pamilya?

• Unsay makatabang nako kon duna koy mga problema?

• Moabot kaha ang panahon nga magmalinawon na gyod ta?

Ang Bibliya naghatag ug kasaligang tubag nianang mga pangutanaha.

• Ang mga tawo dili na mag-antos, matigulang, o mamatay.​—Pinadayag 21:4

• “Ang bakol molukso sama sa osa.”​—Isaias 35:6

• “Ang mga mata sa buta mabuka.”​—Isaias 35:5

•  Ang mga patay banhawon.​—Juan 5:28, 29

• Wala nay masakit.​—Isaias 33:24

• Ang tanang tawo unya daghan nag pagkaon.​—Salmo 72:16

Tingali maghunahuna ka nga ang imong nabasa sa unang pipila ka panid niining libroha usa lang ka damgo. Pero ang Diyos nagsaad nga hapit na kaayo niyang himoon ang maong mga kausaban sa yuta, ug gipatin-aw sa Bibliya kon unsaon niya kana paghimo.

Gisulti sab sa Bibliya kon unsay angay natong mahibaloan aron tinuod tang magmalipayon karon. Hunahunaa kadiyot ang imong mga gikabalak-an, sama sa kuwarta, pamilya, sakit, o kamatayon sa imong minahal. Ang Bibliya makatabang ug makahupay nimo kay tubagon niini ang mga pangutana nga sama sa:

• Nganong nag-antos ta?

• Unsaon nato pag-atubang ang mga problema?

• Posible bang magmalipayon ang atong pamilya?

• Unsay mahitabo nato dihang mamatay ta?

• Makita pa ba nato pag-usab ang namatay natong mga minahal?

• Nganong makasalig ta nga tumanon sa Diyos ang tanan niyang saad?

 Ang imong pagbasa niining libroha nagpakita nga gusto kang mahibalo kon unsay gitudlo sa Bibliya. Kining libroha makatabang nimo. Dunay mga pangutana para sa mga parapo, nga makatabang nimo nga mas masabtan ang Bibliya. Minilyon ang nakighisgot sa Bibliya uban sa mga Saksi ni Jehova. Unta ikaw pod. Hinaot panalanginan ka sa Diyos samtang nagkat-on ka sa gitudlo sa Bibliya!