1, 2. (a) Kanus-a nimo mas maapresyar ang usa ka regalo? (b) Nganong ang lukat ang pinakamaayong regalo gikan sa Diyos?

UNSA ang pinakamaayong regalo nga imong nadawat sukad? Dili kini kinahanglang mahalon aron imong maapresyar. Kon kini nakapalipay nimo o mao gyoy imong gikinahanglan, mapasalamaton gyod ka niini.

² Sa tanang regalo nga gihatag sa Diyos kanato, dunay usa ka regalo nga mas labaw natong gikinahanglan. Kini ang pinakamaayong regalo sa Diyos para sa mga tawo. Mahibaloan nato niini nga kapitulo nga gipadala ni Jehova ang iyang Anak, si Jesu-Kristo, aron mabuhi ta hangtod sa hangtod. (Basaha ang Mateo 20:28.) Pinaagi sa pagpadala kang Jesus dinhi sa yuta ingong lukat, gipamatud-an ni Jehova ang iyang gugma kanato.

3. Nganong mamatay ang mga tawo?

³ Ang lukat maoy paagi ni Jehova sa pagpagawas sa mga tawo gikan sa pagkaulipon sa sala ug kamatayon. (Efeso 1:7) Aron masabtan kon nganong gikinahanglan ang lukat, atong sayron ang nahitabo didto sa tanaman sa Eden libolibo ka tuig na ang milabay. Ang atong unang ginikanan, si Adan ug Eva, nakasala. Tungod niana sila namatay. Mamatay sab ta kay nakapanunod tag sala gikan kang Adan ug Eva.​—Tan-awa ang Endnote 9.

4. Kinsa si Adan, ug unsay gihatag sa Diyos kaniya?

⁴ Dihang gibuhat ni Jehova ang unang tawo nga si  Adan, duna Siyay gihatag kaniya nga bililhon kaayo. Gihatagan niya si Adan ug hingpit nga kinabuhi. Hingpit ang iyang hunahuna ug lawas. Dili siya masakit, dili matigulang, ug dili mamatay. Kay si Jehova ang naglalang kang Adan, siya samag amahan ni Adan. (Lucas 3:38) Si Jehova kanunayng nakig-estorya niya. Klarong gisulti sa Diyos kang Adan kon unsay Iyang gidahom kaniya. Gihatagan sab niya si Adan ug makapalipayng buluhaton.​—Genesis 1:28-30; 2:16, 17.

5. Unsay ipasabot sa giingon sa Bibliya nga si Adan gibuhat sumala “sa larawan sa Diyos”?

⁵ Si Adan gibuhat sumala “sa larawan sa Diyos.” (Genesis 1:27) Gihatagan siya ni Jehova ug kinaiya nga sama sa Iyaha, apil ang gugma, kaalam, hustisya, ug gahom. Gihatagan niya si Adan ug kagawasan sa pagpili. Dili siya robot. Gibuhat siya sa Diyos nga makapili sa paghimo kon unsay husto o sayop. Kon gipili lang ni Adan nga sundon ang Diyos, makapuyo unta siya sa Paraiso hangtod sa hangtod.

6. Dihang si Adan misupak sa Diyos, unsay nawala kaniya? Unsay epekto niana kanato?

⁶ Dihang si Adan misupak sa Diyos ug gisilotan ug kamatayon, dako kaayo ang nawala kaniya. Nawala ang iyang espesyal nga relasyon kang Jehova, ang iyang hingpit nga kinabuhi, ug ang Paraiso nga iyang gipuy-an. (Genesis 3:17-19) Gipili ni Adan ug Eva nga mosupak sa Diyos, busa wala na silay paglaom nga mabuhi hangtod sa hangtod. Tungod sa gihimo ni Adan, “ang sala misulod sa kalibotan . . . ug ang kamatayon pinaagi sa sala.” Busa “ang kamatayon mikaylap sa tanang tawo tungod kay silang tanan nakasala man.” (Roma 5:12) Dihang nakasala si Adan, “gibaligya” niya ang iyang kaugalingon ngadto sa pagkaulipon sa sala ug kamatayon.  Apil ta sa iyang gibaligya. (Roma 7:14) Naa pa ba tay paglaom? Oo.

7, 8. Unsa ang lukat?

⁷ Unsa ang lukat? Ang lukat maoy kantidad nga ibayad aron buhian ang usa ka tawo o makuhag balik ang usa ka butang. Nagtumong sab ni sa katumbas nga kantidad nga ibayad aron mahulipan ang kadaot nga nahimo.

⁸ Walay tawo nga makabayad sa dako kaayong kadaot nga nahimo ni Adan dihang siya nakasala, nga maoy hinungdan nga kita mamatay. Pero si Jehova naghimog paagi aron maluwas ta gikan sa sala ug kamatayon. Atong sayron kon sa unsang paagi moepekto ang lukat ug sa unsang paagi ta makabenepisyo niini.

9. Unsa nga lukat ang kinahanglang ibayad?

⁹ Walay usa kanato nga makahatag sa lukat para sa hingpit nga kinabuhi nga giwala ni Adan. Ngano? Kay kitang tanan dili hingpit. (Salmo 49:7, 8) Ang lukat nga angayng ibayad maoy hingpit sab nga kinabuhi sa tawo. Busa gitawag kini ug “katugbang nga lukat.” (1 Timoteo 2:6) Ang lukat kinahanglang parehog bili sa kinabuhi nga giwala ni Adan.

10. Giunsa pagtagana ni Jehova ang lukat?

¹⁰ Giunsa pagtagana ni Jehova ang lukat? Gipadala niya sa yuta ang iyang pinangga kaayong Anak. Ang iyang Anak, si Jesus, mao ang una niyang gilalang. (1 Juan 4:9, 10) Si Jesus kinabubut-on nga mibiya sa iyang Amahan ug sa iyang pinuy-anan sa langit. (Filipos 2:7) Gibalhin siya ni Jehova sa yuta gikan sa langit ug gipanganak ingong hingpit nga tawo, walay sala.​—Lucas 1:35.

11. Sa unsang paagi ang usa ka tawo mahimong lukat para sa tanan?

¹¹ Ang unang hingpit nga tawo, si Adan, misupak  kang Jehova. Tungod niana nawad-an ug hingpit nga kinabuhi ang tanang tawo. Duna bay laing hingpit nga tawo nga makawala sa kamatayon para sa tanang anak ni Adan? Oo. (Basaha ang Roma 5:19.) Si Jesus, nga wala gyoy sala, naghatag sa iyang hingpit nga kinabuhi ingong lukat. (1 Corinto 15:45) Ang iyang hingpit nga kinabuhi magamit sa pagwala sa kamatayon para sa tanang anak ni Adan.​—1 Corinto 15:21, 22.

12. Nganong kinahanglang mag-antos pag-ayo si Jesus?

¹² Gihisgotan sa Bibliya ang grabeng pag-antos ni Jesus. Gilatigo siya pag-ayo, gilansang sa estaka sa pagsakit, ug nag-antos sa sakit kaayo ug anam-anam nga kamatayon. (Juan 19:1, 16-18, 30) Nganong kinahanglang mag-antos pag-ayo si Jesus? Kay si Satanas miingon nga walay tawong magmaunongon sa Diyos kon makasinatig grabeng pagsulay. Gipamatud-an ni Jesus nga ang hingpit nga tawo makapabiling maunongon sa Diyos bisan pag grabeng mag-antos. Seguradong nalipay si Jehova kang Jesus!​—Proverbio 27:11; tan-awa ang Endnote 15.

13. Giunsa pagbayad ang lukat?

¹³ Giunsa pagbayad ang lukat? Gihatag ni Jesus sa iyang Amahan ang bili sa iyang kinabuhi. Niadtong tuig 33, sa Nisan 14 sa kalendaryo sa mga Hudiyo, gitugot ni Jehova nga patyon si Jesus sa iyang mga kaaway. (Hebreohanon 10:10) Paglabayg tulo ka adlaw, gibanhaw ni Jehova si Jesus, dili ingong tawo, kondili ingong espiritu. Sa ulahi, pagbalik ni Jesus sa iyang Amahan didto sa langit, gitanyag niya kang Jehova ang bili sa iyang hingpit nga tawhanong kinabuhi ingong lukat. (Hebreohanon 9:24) Kay nabayad na man ang lukat, naa na tay kahigayonan nga maluwas gikan sa sala ug kamatayon.​—Basaha ang Roma 3:23, 24.

14, 15. Unsay kinahanglan natong himoon aron mapasaylo ang atong mga sala?

¹⁴ Nakabenepisyo na ta sa pinakamaayong regalo gikan sa Diyos. Sayron nato ang mga benepisyo niini karon ug sa umaabot.

¹⁵ Mapasaylo ang atong mga sala. Lisod ang paghimog matarong sa tanang panahon. Usahay masayop ta sa atong isulti ug buhaton. (Colosas 1:13, 14) Sa unsang paagi ta mapasaylo? Kinahanglang kinasingkasing tang maghinulsol ug mapaubsanong mangayog pasaylo kang Jehova. Dayon makasalig ta nga pasayloon ang atong sala.​—1 Juan 1:8, 9.

16. Unsay angay natong himoon aron makabaton ug hinlong konsensiya?

¹⁶ Makabaton tag hinlong konsensiya. Kon makahimo tag sayop, hasolon ta sa atong konsensiya, tingali mobati pa gani tang wala nay paglaom ug walay pulos. Pero di ta angayng mawad-an ug paglaom. Kon mangayo tag pasaylo kang Jehova, makasalig ta nga dunggon ta niya ug pasayloon. (Hebreohanon 9:13, 14) Gusto ni Jehova nga isulti nato kaniya ang tanan natong problema ug kahuyangan. (Hebreohanon 4:14-16) Ingong resulta, duna tay maayong relasyon sa Diyos.

17. Kay namatay si Jesus para nato, unsang mga panalangin ang puwede natong madawat?

¹⁷ Duna tay paglaom nga mabuhi hangtod sa hangtod. “Ang bayad sa sala maoy kamatayon, apan ang gasa nga ginahatag sa Diyos maoy kinabuhing walay kataposan pinaagi ni Kristo Jesus nga atong Ginoo.” (Roma 6:23) Kay namatay si Jesus para nato, puwede tang mabuhi sa walay kataposan ug mahimong hingpit. (Pinadayag 21:3, 4) Pero unsay kinahanglan natong himoon aron madawat kini nga mga panalangin?

18. Nganong nahibalo ta nga gihigugma ta ni Jehova?

¹⁸ Tingali natandog kaayo ka dihang gihatagan kag nindot nga regalo. Ang lukat mao ang pinakamaayong regalo, ug angay gyod tang magpasalamat niini kang Jehova. Giingnan ta sa Juan 3:16 nga “gihigugma pag-ayo sa Diyos ang kalibotan mao nga gihatag niya ang iyang bugtong nga Anak.” Oo, gihigugma ta pag-ayo ni Jehova maong gihatag niya ang iyang pinanggang Anak, si Jesus. Ug nahibalo ta nga gihigugma sab ta ni Jesus, kay andam siyang mamatay para nato. (Juan 15:13) Busa ang lukat nagpamatuod nga gihigugma gyod ka ni Jehova ug Jesus.​—Galacia 2:20.

19, 20. (a) Unsay imong himoon aron mahimo kang higala ni Jehova? (b) Unsaon nimo pagpakita nga gipabilhan nimo ang halad lukat ni Jesus?

¹⁹ Karon nga nahibalo na ka bahin sa dakong gugma sa Diyos, gusto pod tingali nimo nga higugmaon siya ug mahimo niyang higala. Pero dili nimo na mahimo kon wala ka makaila niya. Ang Juan 17:3 nag-ingon nga puwede natong mailhan si Jehova. Samtang imo nang himoon, molalom ang imong gugma kaniya, gusto nimong malipay siya, ug mahimo ka niyang higala. Busa padayon sa pagkat-on bahin kang Jehova pinaagi sa pagtuon sa Bibliya.​—1 Juan 5:3.

²⁰ Pabilhi ang halad lukat ni Jesus. Ang Bibliya nag-ingon nga “siya nga magpakitag pagtuo sa Anak makabaton ug kinabuhing walay kataposan.” (Juan 3:36) Unsay ipasabot sa pagpakitag pagtuo? Nagpasabot ni nga sundon nato ang gitudlo ni Jesus kanato. (Juan 13:15) Dili igo ang pag-ingon lang nga mituo ta ni Jesus. Aron mapabilhan nato ang lukat, kinahanglang naa tay himoon  bahin sa atong pagtuo. Ang Santiago 2:26 nag-ingon: ‘Patay ang pagtuo nga walay binuhatan.’

21, 22. (a) Nganong kinahanglan tang motambong kada tuig sa Memoryal sa kamatayon sa Kristo? (b) Unsay hisgotan sa Kapitulo 6 ug 7?

²¹ Tambong sa Memoryal sa kamatayon sa Kristo. Sa gabii sa wala pa mamatay si Jesus, iya tang gitudloan nga kinahanglan natong handomon ang iyang kamatayon. Kini ginahimo kada tuig ug gitawag nga Memoryal o “Panihapon sa Ginoo.” (1 Corinto 11:20; Mateo 26:26-28) Gusto ni Jesus nga hinumdoman nato nga gihatag niya ang iyang hingpit nga kinabuhi ingong lukat para nato. Siya miingon: “Ipadayon ninyo ang pagbuhat niini sa paghandom kanako.” (Basaha ang Lucas 22:19.) Kon motambong ka sa Memoryal, imong gipakita nga gihinumdoman nimo ang lukat ug ang dakong gugma ni Jehova ug Jesus para nato.​—Tan-awa ang Endnote 16.

²² Ang lukat mao ang pinakamaayong regalo nga atong nadawat. (2 Corinto 9:14, 15) Makabenepisyo pa gani niini ang minilyong tawo nga namatay na. Hisgotan sa Kapitulo 6 ug 7 kon sa unsang paagi na mahitabo.