1. Unsay gusto sa Diyos para sa mga tawo?

NINDOT kaayo ang katuyoan sa Diyos para sa mga tawo. Gilalang niya ang unang lalaki ug babaye, si Adan ug Eva, aron mopuyo sa nindot kaayong tanaman (garden). Gusto niya nga manganak sila, himoon nilang paraiso ang tibuok yuta, ug atimanon ang mga hayop.​—Genesis 1:28; 2:8, 9, 15; Tan-awa ang Endnote 6.

2. (a) Nganong nahibalo ta nga buhaton sa Diyos ang iyang katuyoan? (b) Unsay giingon sa Bibliya bahin sa pagpuyo sa yuta hangtod sa hangtod?

² Sa imong hunahuna, posible bang makapuyo ta sa paraiso? Si Jehova miingon: “Katuyoan nako kini, ug tumanon usab nako kini.” (Isaias 46:9-11; 55:11) Busa buhaton gyod niya ang iyang katuyoan, ug walay makapugong niya. Miingon si Jehova nga dunay rason nga gilalang niya ang yuta. Siya “wala maglalang niini sa wala lamay kapuslanan.” (Isaias 45:18) Gusto niya nga ang tibuok yuta puy-an sa mga tawo. Unsang matanga sa mga tawo ang gusto sa Diyos nga mopuyo dinhi, ug unsa ka dugay? Ang Bibliya nag-ingon: “Ang mga matarong [o, masinundanon] manag-iya sa yuta, ug sila magpuyo niini hangtod sa hangtod.”​—Salmo 37:29; Pinadayag 21:3, 4.

3. Kay masakit man ug mamatay ang mga tawo, unsang mga pangutana ang motungha tingali sa imong hunahuna?

³ Pero ang mga tawo karon masakit ug mamatay. Sa daghang lugar, sila nagginubatay ug nagpinatyanay. Seguradong dili kini ang gusto sa Diyos. Unsa man diay ang nahitabo? Nganong naingon ani man? Ang Bibliya lang ang makatubag niana.

4, 5. (a) Kinsay nakig-estorya kang Eva didto sa tanaman sa Eden pinaagig halas? (b) Nganong ang usa ka matinud-anong tawo mahimong kawatan?

⁴ Ang Bibliya nag-ingon nga ang Diyos dunay kaaway nga “gitawag ug Yawa ug Satanas.” Migamit si Satanas ug halas sa pagpakig-estorya kang Eva didto sa tanaman sa Eden. (Pinadayag 12:9; Genesis 3:1) Naghimo siyag paagi nga morag halas gyod ang nag-estorya.​—Tan-awa ang Endnote 7.

⁵ Ang Diyos ba ang naglalang kang Satanas nga Yawa? Dili! Dihang giandam sa Diyos ang yuta para kang Adan ug Eva, diha nay mga anghel sa langit. Pero usa sa maong mga anghel nausab ug nahimong Yawa. (Job 38:4, 7) Posible ba na? Hunahunaa kini: Nganong ang usa ka matinud-anong tawo mausab ug mahimong kawatan? Wala siya matawo nga kawatan. Pero naa siyay gitinguha, o nagustohan, nga dili iyaha. Pirme niya kining gihunahuna, ug misamot ang iyang sayop nga tinguha. Dayon, dihang nakakita siyag higayon, gikawat niya kini. Gihimo niyang kawatan ang iyang kaugalingon.​—Basaha ang Santiago 1:13-15; tan-awa ang Endnote 8.

6. Nganong nahimong kaaway sa Diyos ang usa ka anghel?

⁶ Kanay nahitabo sa maong anghel. Human lalanga ni Jehova si Adan ug Eva, gisugo niya sila nga manganak ug ‘pun-on ang yuta.’ (Genesis 1:27, 28) Tingali naghunahuna ang maong anghel nga, ‘Puwedeng ako ang simbahon sa tanang tawo imbes si Jehova!’ Sa sige niyag hunahuna niini, misamot ang iyang pagtinguha sa butang nga iya ni Jehova. Gusto sa anghel nga simbahon siya sa mga tawo. Busa siya namakak ug naglimbong kang Eva. (Basaha ang Genesis 3:1-5.) Tungod niana siya nahimong Satanas nga Yawa, ang kaaway sa Diyos.

7. (a) Nganong namatay si Adan ug Eva? (b) Nganong matigulang ta ug mamatay?

 ⁷ Si Adan ug Eva misupak sa Diyos ug mikaon sa prutas. (Genesis 2:17; 3:6) Nakasala sila kang Jehova ug sa ulahi namatay, nga maoy giingon ni Jehova nga mahitabo kanila. (Genesis 3:17-19) Makasasala ang mga anak ni Adan ug Eva, maong namatay sila. (Basaha ang Roma 5:12.) Aron masabtan nato kon nganong nahimong makasasala usab ang mga anak ni Adan ug Eva, tagda kini nga pananglitan: Nagluto kag pan gamit ang hulmahan nga naay lumping. Siyempre naa poy lumping ang pan. Dihang gisupak ni Adan ang Diyos, si Adan nahimong makasasala. Kay mga anak man ta ni Adan, kitang tanan makasasala pod, o naa tay “lumping” parehas niya. Ug kay makasasala man tang tanan, matigulang ta ug mamatay.​—Roma 3:23; tan-awa ang Endnote 9.

8, 9. (a) Unsay gipatuo ni Satanas kang Adan ug Eva? (b) Nganong wala dayon patya ni Jehova ang mga rebelde?

⁸ Mirebelde si Satanas kang Jehova dihang iyang gitental si Adan ug Eva nga supakon ang Diyos. Gipatuo niya si Adan ug Eva nga bakakon si Jehova, usa ka daotang magmamando nga wala maghunahuna sa ilang kaayohan. Miingon si Satanas nga ang mga tawo wala magkinahanglan ug Diyos nga mosulti nila kon unsay buhaton. Miingon sad siya nga si Adan ug Eva ang angayng modesisyon kon unsay maayo ug daotan para sa ilang kaugalingon. Unsa kahay buhaton ni Jehova? Puwede niyang patyon dayon ang mga rebelde aron mahunong ang rebelyon. Pero kon buhaton niya kana, mapamatud-an ba nga bakakon si Satanas? Dili gayod.

⁹ Busa wala dayon patya ni Jehova ang mga rebelde. Hinuon, gitugotan niya ang mga tawo sa pagmando sa ilang kaugalingon. Pinaagi niini mapamatud-an nga bakakon si Satanas ug nga si Jehova nahibalo kon unsay makaayo sa  mga tawo. Makakat-on tag dugang bahin niana sa Kapitulo 11. Pero unsay imong ikasulti sa desisyon ni Adan ug Eva? Husto ba nga mituo sila kang Satanas ug misupak sa Diyos? Gihatag ni Jehova kang Adan ug Eva ang tanan nga ilang nabatonan​—hingpit nga kinabuhi, nindot nga puy-anan, ug makapalipay nga buluhaton. Pero si Satanas wala gyoy gihimong maayo para nila. Kon didto ka, unsa kahay imong desisyon?

10. Unsang importanteng desisyon ang kinahanglang himoon sa matag usa kanato?

 ¹⁰ Ang matag usa nato kinahanglan pod nga modesisyon, ug ang atong kinabuhi nagdepende niana. Puwede tang mopili nga sundon si Jehova ingong Magmamando aron mapamatud-an nga bakakon si Satanas. O puwede natong pilion si Satanas ingong magmamando. (Salmo 73:28; basaha ang Proverbio 27:11.) Diyutay ra kaayo ang nagsunod sa Diyos. Gani, dili siya ang nagmando sa kalibotan. Kon mao, kinsa diay?

11, 12. (a) Unsay atong makat-onan sa tanyag ni Satanas kang Jesus? (b) Unsang mga teksto ang nagpakita nga si Satanas ang nagmando sa kalibotan?

¹¹ Nahibalo si Jesus kon kinsa gayod ang nagmando sa kalibotan. Dihay higayon nga “gipakita [ni Satanas] kaniya ang tanang gingharian sa kalibotan ug ang himaya niini.” Dayon gisaaran ni Satanas si Jesus: “Kining tanan akong ihatag kanimo kon mohapa ka ug mosimba kanako.” (Mateo 4:8, 9; Lucas 4:5, 6) Hunahunaa kini: ‘Kon dili iya ni Satanas ang maong mga gingharian, iya kaha ning ihatag kang Jesus?’ Dili. Busa ang tanang gobyerno iya ni Satanas.

¹² Tingali maglibog ka: ‘Nganong si Satanas man ang nagmando sa kalibotan? Dili ba si Jehova man ang Labing Gamhanang Diyos nga maoy naglalang sa uniberso?’ (Pinadayag 4:11) Tinuod na, pero klaro kaayo ang giingon ni Jesus nga si Satanas “ang magmamando niining kalibotana.” (Juan 12:31; 14:30; 16:11) Si apostol Pablo nag-ingon nga si Satanas nga Yawa “ang diyos niini nga sistema sa mga butang.” (2 Corinto 4:3, 4) Ug si apostol Juan miingon nga “ang tibuok kalibotan nailalom sa gahom sa usa nga daotan.”​—1 Juan 5:19.

13. Nganong nagkinahanglan tag bag-ong kalibotan?

¹³ Kining kalibotana nagkasamot ka delikado. Bisan asa dunay gubat, korapsiyon, pagpangilad, ug kapintasan. Ang mga tawo dili makasulbad niining tanan bisag unsa pay ilang buhaton. Pero sa dili madugay laglagon sa Diyos kining daotang kalibotan panahon sa iyang gubat sa Armagedon, ug pulihan niya kinig matarong nga bag-ong kalibotan.​—Pinadayag 16:14-16; tan-awa ang Endnote 10.

14. Kinsay gipili sa Diyos nga mahimong Hari sa Iyang Gingharian? Unsay gitagna sa Bibliya bahin kang Jesus?

¹⁴ Si Jehova nagpili kang Jesu-Kristo nga mahimong Hari sa Iyang gobyerno, o Gingharian, sa langit. Linibo ka tuig ang milabay, gitagna sa Bibliya nga si Jesus magmando ingong “Prinsipe sa Pakigdait” ug ang iyang gobyerno walay kataposan. (Isaias 9:6, 7) Gitudloan ni Jesus ang iyang mga sumusunod nga iampo kini nga gobyerno dihang siya miingon: “Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Sa Kapitulo 8, atong makat-onan kon sa unsang paagi pulihan sa Gingharian sa Diyos ang mga gobyerno sa kalibotan. (Basaha ang Daniel 2:44.) Dayon ang Gingharian sa Diyos maghimo sa yuta nga nindot nga paraiso.​—Tan-awa ang Endnote 11.

15. Unsa ang “bag-ong yuta”?

¹⁵ Ang Bibliya nagsaad: “Dunay bag-ong mga langit ug bag-ong yuta nga atong gipaabot,” ug “molungtad niini ang pagkamatarong.” (2 Pedro 3:13; Isaias 65:17) Usahay, dihang maghisgot ang Bibliya bahin sa “yuta,” ang gipasabot niini mao ang mga tawo nga nagpuyo sa yuta. (Genesis 11:1) Busa ang matarong nga “bag-ong yuta” nagtumong sa tanan nga nagsunod sa Diyos ug gipanalanginan niya.

16. Unsang nindot nga regalo ang ihatag sa Diyos niadtong magpuyo sa iyang bag-ong kalibotan, ug unsay atong himoon aron makadawat niini?

 ¹⁶ Misaad si Jesus nga kadtong magpuyo sa bag-ong kalibotan sa Diyos hatagan ug “kinabuhing walay kataposan.” (Marcos 10:30) Unsay atong himoon aron makadawat niini nga regalo? Palihog basaha ang Juan 3:16 ug 17:3 alang sa tubag. Karon atong tan-awon sa Bibliya kon unsay kinabuhi sa tawo dihang ang yuta mahimo nang Paraiso.

17, 18. Nganong nahibalo ta nga duna na unyay kalinaw sa tibuok yuta ug mobati na tang luwas?

¹⁷ Ang pagkadaotan, gubat, krimen, ug kapintasan mawala na. Wala nay daotan nga mabilin sa yuta. (Salmo 37:10, 11) Pahunongon sa Diyos “ang mga gubat sa tibuok yuta.” (Salmo 46:9; Isaias 2:4) Ang yuta mapuno ug mga tawo nga nahigugma sa Diyos ug masinundanon niya. Duna na unyay kalinaw hangtod sa hangtod.​—Salmo 72:7.

¹⁸ Ang katawhan ni Jehova mobati nang luwas. Sa panahon sa Bibliya, dihang gisunod sa mga Israelinhon ang Diyos, mibati silang luwas kay iya silang giproteksiyonan. (Levitico 25:18, 19) Sa Paraiso, wala na tay angayng kahadlokan. Kanunay na tang mobati nga luwas!​—Basaha ang Isaias 32:18; Miqueas 4:4.

19. Nganong makaseguro ta nga daghan nag pagkaon sa bag-ong kalibotan sa Diyos?

¹⁹ Daghan na kaayog pagkaon. “Duna unyay dagayang lugas sa yuta; mosugwak unya kini sa tumoy sa kabukiran.” (Salmo 72:16) Si Jehova, “ang atong Diyos, magpanalangin kanato,” ug “ang yuta magpatungha sa abot niini.”​—Salmo 67:6.

20. Nganong nahibalo ta nga ang yuta mahimong paraiso?

²⁰ Ang tibuok yuta mahimo nang paraiso. Ang mga tawo duna na unyay nindot nga mga balay ug mga garden.  (Basaha ang Isaias 65:21-24; Pinadayag 11:18.) Ang tibuok yuta pareho na unya ka nindot sa tanaman sa Eden. Ihatag ni Jehova ang tanan natong gikinahanglan. Ang Bibliya nag-ingon bahin kaniya: “Imong ibukhad ang imong kamot ug tagbawon ang tinguha sa tanang buhing linalang.”​—Salmo 145:16.

21. Nganong nahibalo ta nga duna na unyay kalinaw tali sa mga tawo ug mga hayop?

²¹ Duna nay kalinaw tali sa mga tawo ug mga hayop. Dili na hilabtan sa mga hayop ang mga tawo. Ang mga bata dili na mahadlok, bisag naa pa sa ilang duol ang mga hayop nga gikahadlokan nato karon.​—Basaha ang Isaias 11:6-9; 65:25.

22. Unsay himoon ni Jesus sa mga nasakit?

²² Wala nay masakit. Dihang dinhi si Jesus sa yuta, daghan siyag giayo nga tawo. (Mateo 9:35; Marcos 1:40-42; Juan 5:5-9) Pero ingong Hari sa Gingharian sa Diyos, iyang ayohon ang tanan. Wala nay moingon: “Masakiton ko.”​—Isaias 33:24; 35:5, 6.

23. Unsay buhaton sa Diyos sa mga namatay?

²³ Mabuhi pag-usab ang mga patay. Ang Diyos nagsaad nga iyang banhawon ang minilyong tawo nga namatay. “Duna unyay pagkabanhaw sa mga matarong ug sa mga dili matarong.”​—Basaha ang Juan 5:28, 29; Buhat 24:15.

24. Ganahan ba kang mopuyo sa Paraiso?

²⁴ Kitang tanan makapili. Puwede tang mopili nga mokat-on bahin kang Jehova ug moalagad niya, o puwede natong himoon kon unsay atong gusto. Kon pilion nato nga moalagad kang Jehova, duna tay nindot nga kaugmaon. Dihang giingnan sa usa ka tawo si Jesus nga hinumdoman siya inigkamatay niya, si Jesus misaad kaniya: “Ikaw makauban nako sa Paraiso.” (Lucas 23:43) Mokat-on tag dugang bahin kang Jesu-Kristo ug kon sa unsang paagi matuman ang nindot nga mga saad sa Diyos pinaagi kaniya.