1. Unsang pamilyar nga pag-ampo ang atong hisgotan karon?

MILYONMILYONG tawo ang pamilyar sa pag-ampo nga Amahan Namo, o ang Pag-ampo sa Ginoo. Gigamit kini ni Jesus aron tudloan ang iyang mga tinun-an kon unsaon pag-ampo. Unsay iyang giampo? Ug nganong importante kanato karon ang maong pag-ampo?

2. Unsang tulo ka importanteng butang ang gitudlo ni Jesus nga atong iampo?

² Si Jesus miingon: “Mag-ampo kamo niining paagiha: ‘Amahan namo nga anaa sa mga langit, balaanon unta ang imong ngalan. Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.’” (Basaha ang Mateo 6:9-13.) Nganong gitudloan ta ni Jesus nga iampo kining tulo ka butang?​—Tan-awa ang Endnote 20.

3. Unsay angay natong mahibaloan bahin sa Gingharian sa Diyos?

³ Nahibalo na ta nga Jehova ang ngalan sa Diyos. Nahisgotan na pod nato kon unsay gusto sa Diyos para sa mga tawo ug sa yuta. Pero unsay ipasabot ni Jesus dihang siya miingon: “Paanhia ang imong Gingharian”? Sayron nato kon unsa ang Gingharian sa Diyos, kon unsay buhaton niini, ug kon unsaon niini pagbalaan ang ngalan sa Diyos.

4. Unsa ang Gingharian sa Diyos, ug kinsa ang Hari niini?

⁴ Si Jehova naghimog gobyerno didto sa langit ug nagpili kang Jesus ingong Hari niini. Sa Bibliya, kini nga gobyerno gitawag ug Gingharian sa Diyos. Si Jesus  “ang Hari niadtong nagmando ingong mga hari ug Ginoo niadtong nagmando ingong mga ginoo.” (1 Timoteo 6:15) Mas maayo gyod ang mahimo ni Jesus kay kang bisan kinsang magmamando nga tawo, ug mas gamhanan siya kay kanilang tanan bisan pag mag-alyansa sila.

5. Asa nahimutang ang gobyerno sa Diyos? Unsay mandoan niini?

⁵ Kuwarenta ka adlaw human mabanhaw si Jesus, mibalik siya sa langit. Sa ulahi, gitudlo siya ni Jehova ingong Hari sa Gingharian. (Buhat 2:33) Ang gobyerno sa Diyos nahimutang sa langit ug kini magmando sa yuta. (Pinadayag 11:15) Mao nay rason kon nganong ang Gingharian sa Diyos gitawag sa Bibliya ug “langitnong Gingharian.”​—2 Timoteo 4:18.

6, 7. Nganong si Jesus labaw kang bisan kinsang hari nga tawo?

⁶ Ang Bibliya nag-ingon nga si Jesus mas labaw kang bisan kinsang hari nga tawo kay siya “lang ang nagbaton sa pagkawalay-kamatayon.” (1 Timoteo 6:16) Ang tanang magmamando nga tawo mamatay, pero si Jesus dili gyod mamatay. Ang tanan niyang himoon magpabilin hangtod sa hangtod.

⁷ Gitagna sa Bibliya nga si Jesus walay pinalabi ug maluluy-ong Hari: “Maanaa kaniya ang espiritu ni Jehova, ang espiritu sa kaalam ug sa pagsabot, ang espiritu sa tambag ug sa pagkagamhanan, ang espiritu sa kahibalo ug sa pagkahadlok kang Jehova. Ug siya malipay sa pagkahadlok kang Jehova. Dili siya mohukom sumala sa makita sa iyang mga mata, ug dili siya mobadlong [o, motambag] sumala lang sa madungog sa iyang mga dalunggan. Siya maghukom sa mga timawa [o, kabos] uban ang pagkamatarong.” (Isaias 11:2-4) Gusto ba kag hari nga ingon niana?

8. Nganong nahibalo ta nga dili lang si Jesus ang magmando?

 ⁸ Ang Diyos nagpili ug pipila ka tawo aron magmando kauban ni Jesus sa gobyerno sa langit. Pananglitan, giingnan ni apostol Pablo si Timoteo: “Kon padayon tang molahutay, kita sab magmando ingong mga hari uban kaniya.” (2 Timoteo 2:12) Pila ka buok ang maghari kauban ni Jesus?

9. Pila ang magmando kauban ni Jesus? Kanus-a gisugdan sa Diyos ang pagpili kanila?

⁹ Atong nakat-onan sa Kapitulo 7 nga sa panan-awon ni apostol Juan, nakita niya si Jesus ingong Hari sa langit uban ang 144,000 ka hari. Kinsa man ang 144,000? Si Juan miingon nga sila “nakabaton sa [ngalan ni Jesus] ug sa ngalan sa iyang Amahan nga nasulat sa ilang agtang.” Ug siya midugang: “Kini sila ang padayong nagsunod sa Kordero [nga si Jesus] bisan asa siya moadto. Gipalit sila gikan sa katawhan.” (Basaha ang Pinadayag 14:1, 4.) Ang 144,000 maoy matinumanong mga Kristohanon nga gipili sa Diyos aron “magmando ingong hari ibabaw sa yuta” kauban ni Jesus. Inigkamatay nila, banhawon sila ngadto sa langit. (Pinadayag 5:10) Sukad sa panahon sa mga apostoles, si Jehova nagpili nag matinumanong mga Kristohanon nga mahimong bahin sa 144,000 ka hari.

10. Nganong ang pagpili ni Jehova kang Jesus ug sa 144,000 aron magmando sa mga tawo nagpakita nga iya tang gihigugma?

¹⁰ Kay gihigugma ta pag-ayo ni Jehova, nagpili siyag mga tawo nga magmando kauban ni Jesus. Maayong magmamando si Jesus kay makasabot siya nato. Nakasulay siya nga mahimong tawo ug nakasinatig pag-antos. Si Pablo miingon nga si Jesus maluoy kanato, “makasabot sa atong mga kahuyangan,” ug “nasulayan sa tanang paagi sama kanato.” (Hebreohanon 4:15; 5:8) Ang  144,000 makasabot sab sa kinabuhi sa tawo. Nag-antos pod sila sa pagkadili-hingpit ug nasakit. Busa makaseguro ta nga si Jesus ug ang 144,000 makasabot dili lang sa atong gibati kondili hasta pod sa atong mga problema.

11. Nganong gitudloan ni Jesus ang iyang mga tinun-an nga iampo nga matuman ang kabubut-on sa Diyos didto sa langit?

¹¹ Gitudloan ni Jesus ang iyang mga tinun-an nga iampo nga matuman ang kabubut-on sa Diyos didto sa langit. Ngano? Nakat-onan nato sa Kapitulo 3 nga si Satanas nga Yawa mirebelde kang Jehova. Dihang mirebelde si Satanas, siya ug ang dili matinumanong mga anghel, o mga demonyo, gitugotan pa ni Jehova nga magpabilin sa langit. Busa adtong panahona, dili tanang naa sa langit ang nagbuhat sa kabubut-on sa Diyos. Sa Kapitulo 10, daghan pa tag masayran bahin kang Satanas ug sa mga demonyo.

12. Unsang duha ka hitabo ang gihisgotan sa Pinadayag 12:10?

¹² Ang Bibliya nag-ingon nga inigkahimong Hari ni Jesus sa Gingharian sa Diyos, makiggubat siya kang Satanas. (Basaha ang Pinadayag 12:7-10.) Gihisgotan sa bersikulo 10 ang duha ka importanteng hitabo. Una, ang Gingharian sa Diyos magsugod sa pagmando ug si Jesu-Kristo ang Hari. Ikaduha, si Satanas itambog sa yuta gikan sa langit. Sumala sa atong makat-onan, kini nga mga panghitabo natuman na.

13. Unsa nay kahimtang sa langit human itambog si Satanas?

¹³ Ang Bibliya nag-ingon nga nalipay ang matinumanong mga anghel human itambog sa yuta si Satanas ug ang iyang mga demonyo. Atong mabasa: “Paglipay mong kalangitan ug kamong nagpuyo niini!” (Pinadayag  12:12) Duna nay kalinaw ug panaghiusa sa langit kay ang tanan didto nagbuhat na sa kabubut-on sa Diyos.

14. Unsa nay kahimtang sa yuta human itambog si Satanas?

¹⁴ Pero lahi kaayo ang kahimtang sa yuta. Daotan kaayo ang nahitabo sa mga tawo “kay ang Yawa nanaog” ug may “dakong kasuko, kay nahibalo siya nga mubo na lang ang iyang panahon.” (Pinadayag 12:12) Suko kaayo si Satanas. Gitambog siya sa yuta, ug nahibalo siya nga hapit na gyod siyang laglagon. Gihimo niya ang tanan aron ang mga tawo sa tibuok yuta makasinatig problema, kasakit, ug pag-antos.

15. Unsa ang kabubut-on sa Diyos para sa yuta?

¹⁵ Pero wala mausab ang kabubut-on sa Diyos para sa yuta. Gusto gihapon niya nga ang hingpit nga mga tawo magpuyo sa paraisong yuta hangtod sa hangtod. (Salmo 37:29) Pero unsaon man ni paghimo sa Gingharian sa Diyos?

16, 17. Unsay gitagna sa Daniel 2:44 bahin sa Gingharian sa Diyos?

¹⁶ Ang Daniel 2:44 nagtagna: “Sa mga adlaw nianang mga haria ang Diyos sa langit magtukod ug gingharian nga dili gayod malaglag. Ug kini nga gingharian dili ipasa ngadto sa laing katawhan. Dugmokon ug taposon niini kining tanang gingharian, ug kini ray mobarog hangtod sa hangtod.” Unsay atong makat-onan niini nga tagna bahin sa Gingharian sa Diyos?

¹⁷ Una, ang Gingharian sa Diyos magsugod pagmando “sa mga adlaw nianang mga haria.” Sa ato pa, duna pay mga gobyerno sa yuta inigsugod sa pagmando sa Gingharian. Ikaduha, ang Gingharian sa Diyos magpabilin hangtod sa hangtod ug dili gayod pulihan ug laing gobyerno. Ug ikatulo, dunay mahitabong gubat tali sa  Gingharian sa Diyos ug sa mga gobyerno niining kalibotana. Modaog ang Gingharian sa Diyos ug kini na lang ang magmando sa tibuok yuta. Dayon ang mga tawo mailalom na sa pinakamaayong gobyerno.

18. Unsay tawag sa kataposang gubat tali sa Gingharian sa Diyos ug sa mga gobyerno niining kalibotana?

¹⁸ Unsay mahitabo sa dili pa ang gubat tali sa Gingharian sa Diyos ug sa mga gobyerno niining kalibotana? Ipahisalaag sa mga demonyo ang “mga hari sa tibuok gipuy-ang yuta, aron tigomon sila ngadto sa gubat sa dakong adlaw sa Diyos nga Labing Gamhanan.” Oo, ang mga gobyerno sa tawo makiggubat sa Gingharian sa Diyos. Kining kataposang gubat gitawag ug Armagedon.​—Pinadayag 16:14, 16; tan-awa ang Endnote 10.

19, 20. Nganong kinahanglan nato ang Gingharian sa Diyos?

¹⁹ Nganong kinahanglan nato ang Gingharian sa Diyos? Naay tulo ka rason. Una, makasasala ta, maong masakit ta ug mamatay. Pero ang Bibliya nag-ingon nga ilalom sa Gingharian sa Diyos, mabuhi na ta hangtod sa hangtod. Gani, ang Juan 3:16 nag-ingon: “Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.”

²⁰ Ikaduha, daghan na kaayog daotan karon. Daghan ang bakakon, tikasan, ug imoral. Wala tay mahimo aron mawala sila, pero wad-on sila sa Diyos. Ang mga tawo nga padayong naghimog daotan laglagon panahon sa Armagedon. (Basaha ang Salmo 37:10.) Ikatulo, ang gobyerno sa tawo daotan, korap, o wala kaayoy mahimo. Dili sila interesadong motabang sa mga tawo sa pagsunod sa Diyos. Ang Bibliya nag-ingon nga “ang tawo  nagmando sa tawo alang sa iyang ikadaot.”​—Ecclesiastes 8:9.

21. Unsaon pagtuman sa Gingharian ang kabubut-on sa Diyos dinhi sa yuta?

²¹ Human sa Armagedon, tumanon sa Gingharian ang kabubut-on sa Diyos dinhi sa yuta. Pananglitan, wad-on niini si Satanas ug ang iyang mga demonyo. (Pinadayag 20:1-3) Sa ngadtongadto, wala nay masakit o mamatay. Tungod sa lukat, ang tanang matinumanong tawo may paglaom nang mabuhi sa Paraiso hangtod sa hangtod. (Pinadayag 22:1-3) Balaanon sa Gingharian ang ngalan sa Diyos. Nagpasabot kana nga dihang magmando na sa yuta ang gobyerno sa Diyos, ang tanang tawo maghimaya na sa ngalan ni Jehova.​—Tan-awa ang Endnote 21.

22. Nganong nahibalo ta nga si Jesus wala mahimong Hari samtang dinhi pa sa yuta o pagkabanhaw dayon niya?

²² Gitudloan ni Jesus ang iyang mga tinun-an sa pag-ampo: “Paanhia ang imong Gingharian.” Busa klaro kaayo nga ang gobyerno sa Diyos moabot sa umaabot. Magtukod una si Jehova ug gobyerno ug himoon niyang Hari niini si Jesus. Nahimo ba dayong Hari si  Jesus pagbalik niya sa langit? Wala, naghulat pa siya. Human banhawa si Jesus, giklaro kini ni Pedro ug Pablo dihang ilang gipadapat kang Jesus ang tagna sa Salmo 110:1. Niini nga tagna si Jehova miingon: “Lingkod sa akong tuong kamot hangtod nga ibutang nako ang imong mga kaaway ingong tumbanan sa imong mga tiil.” (Buhat 2:32-35; Hebreohanon 10:12, 13) Unsa ka dugay maghulat si Jesus ayha siya himoong Hari ni Jehova?

23. (a) Kanus-a nagsugod pagmando si Jesus ingong Hari sa gobyerno sa Diyos? (b) Unsay atong masayran sa sunod kapitulo?

²³ Daghang tuig sa wala pa ang 1914, nasabtan sa usa ka grupo sa sinserong mga Kristohanon nga ang 1914 usa ka importanteng tuig sa tagna sa Bibliya. Ang mga hitabo sukad nianang tuiga nagpamatuod nga husto sila. Si Jesus nagsugod pagmando ingong Hari nianang tuiga. (Salmo 110:2) Wa madugay human niana, si Satanas gitambog sa yuta, ug karon “mubo na lang ang iyang panahon.” (Pinadayag 12:12) Sa sunod kapitulo, masayran nato ang dugang pamatuod nga nagkinabuhi na ta nianang panahona. Masayran sab nato nga hapit na gyong tumanon sa Gingharian ang kabubut-on sa Diyos dinhi sa yuta.​—Tan-awa ang Endnote 22.