1-3. Unsay mga pangutana sa mga tawo bahin sa kamatayon, ug unsay tubag sa ubang relihiyon?

ANG Bibliya nagsaad nga moabot ang panahon nga “ang kamatayon mawala na.” (Pinadayag 21:4) Sa Kapitulo 5, atong nakat-onan nga tungod sa lukat posible na tang mabuhi sa walay kataposan. Pero sa pagkakaron mamatay gihapon ang mga tawo. (Ecclesiastes 9:5) Busa ang pangutana, Unsay mahitabo nato dihang kita mamatay?

² Ang tubag niana nga pangutana importante kaayo ilabina kon namatyan tag minahal. Tingali maglibog ta: ‘Asa siya karon? Nagtan-aw ba siya nato? Makatabang ba siya nato? Makita pa ba nato siya pag-usab?’

³ Lainlain ang tubag sa mga relihiyon niini nga mga pangutana. Ang uban nagtudlo nga kon maayo kang tawo, moadto ka sa langit. Pero kon daotan ka, sunogon ka sa impiyerno. Ang uban moingon nga kon mamatay ka, mahimo kang espiritu ug makauban nimo ang ubang membro sa pamilya nga namatay na. Ug naa poy moingon nga inigkamatay nimo ug human ka hukmi, ipanganak ka pag-usab, o mabuhi pag-usab sa lahi nga lawas, tingali ingong lahi nga tawo o ingong hayop.

4. Unsa nga ideya ang gitudlo sa mga relihiyon bahin sa kamatayon?

⁴ Ang mga relihiyon daw lainlaig gitudlo. Pero ang tinuod, halos silang tanan nagtudlog usa ra ka ideya. Ilang gitudlo nga dihang mamatay ang tawo, dunay bahin niya nga magpabiling buhi. Tinuod ba na?

5, 6. Unsay mahitabo nato dihang kita mamatay?

⁵ Nahibalo si Jehova kon unsay mahitabo nato dihang kita mamatay, ug miingon siya nga kon mamatay ang tawo, matapos na ang iyang kinabuhi. Ang kamatayon maoy kaatbang sa kinabuhi. Busa dihang mamatay ang tawo, wala na siyay pagbati ug wala na siyay mahinumdoman. * Dihang mamatay ta, dili na ta makakita, makadungog, o makahunahuna.

⁶ Si Haring Solomon misulat nga “ang mga patay walay nahibaloan nga bisan unsa.” Ang patay dili mahigugma o magdumot, ug “walay buluhaton o plano o kahibalo o kaalam sa Lubnganan.” (Basaha ang Ecclesiastes 9:5, 6, 10.) Ug ang Bibliya diha sa Salmo 146:4 nag-ingon nga dihang mamatay ang tawo, “mahanaw ang iyang mga hunahuna.”

7. Unsay giingon ni Jesus bahin sa kamatayon?

⁷ Dihang namatay ang suod nga amigo ni Jesus nga si Lazaro, giingnan niya ang iyang mga tinun-an: “Si Lazaro nga atong higala natulog.” Pero wala ipasabot ni Jesus nga si Lazaro nagpahulay ra. Si Jesus midugang: “Si Lazaro namatay.” (Juan 11:11-14) Busa ang kamatayon gipakasama ni Jesus sa pagkatulog. Wala siya moingon nga si Lazaro tua sa langit o kauban sa mga membro sa iyang pamilya nga namatay na. Ug wala siya moingon nga si Lazaro nag-antos sa impiyerno o gipanganak pag-usab ingong lahi nga tawo o ingong hayop. Ang tinuod, si Lazaro sama rag hinanok nga natulog. Sa ubang teksto, ang  kamatayon gipakasama sa hinanok nga pagkatulog. Ang Bibliya nag-ingon nga dihang gipatay si Esteban, “siya nahikatulog sa kamatayon.” (Buhat 7:60) Si apostol Pablo sab misulat nga ang ubang Kristohanon “nangatulog na sa kamatayon.”​—1 Corinto 15:6.

8. Nganong nahibalo ta nga wala lalanga sa Diyos ang tawo aron lang mamatay?

⁸ Gilalang ba sa Diyos si Adan ug Eva aron lang mamatay sa ulahi? Wala! Gilalang sila ni Jehova aron malipayong magkinabuhi hangtod sa hangtod. Gihatagan sab silag hingpit nga panglawas. Dihang gilalang ang mga tawo, gibutang ni Jehova sa ilang kasingkasing ang tinguha nga mabuhi hangtod sa hangtod. (Ecclesiastes 3:11)  Dili gustong makita sa ginikanan nga matigulang ug mamatay ang ilang mga anak, ug mao pod nay gibati ni Jehova para nato. Pero kon gilalang ta sa Diyos aron mabuhi hangtod sa hangtod, nganong mamatay man ta?

9. Nganong makataronganon ang sugo ni Jehova kang Adan ug Eva?

⁹ Didto sa tanaman sa Eden, giingnan ni Jehova si Adan: “Gikan sa tanang kahoy sa tanaman makakaon ka hangtod matagbaw ka. Apan kon bahin sa kahoy sa kahibalo sa maayo ug sa daotan, ayaw gayod ug kaon sa bunga niini, kay sa adlaw nga mokaon ka niini mamatay gyod ka.” (Genesis 2:9, 16, 17) Dili lisod tumanon ang maong klaro nga sugo, ug dunay katungod si Jehova nga sultihan si Adan ug Eva kon unsay maayo ug daotan. Kon ilang sundon si Jehova, gipakita nila nga ilang gitahod ang iyang awtoridad. Magpakita sab na nga mapasalamaton kaayo sila sa tanan nga iyang gihatag kanila.

10, 11. (a) Giunsa pagtental ni Satanas si Adan ug Eva? (b) Nganong wala gyoy ikarason si Adan ug Eva sa ilang gihimo?

¹⁰ Ikasubo, gisupak ni Adan ug Eva si Jehova. Giingnan ni Satanas si Eva: “Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?” Si Eva mitubag: “Makakaon mi sa bunga sa mga kahoy sa tanaman. Apan bahin sa kahoy nga naa sa tunga sa tanaman, ang Diyos nag-ingon: ‘Ayaw gayod ninyog kan-a o hikapa ang bunga niini, kay kon himoon ninyo kini, kamo mamatay.’”​—Genesis 3:1-3.

¹¹ Unya si Satanas miingon: “Dili tinuod nga mamatay mo. Kay nahibalo ang Diyos nga sa mismong adlaw nga mokaon mo sa bunga niini, ang inyong mga mata mabuka ug maparehas mo sa Diyos, nga mahibalo sa maayo ug daotan.” (Genesis 3:4-6) Gipatuo ni Satanas si Eva nga puwede siyang modesisyon para sa iyang kaugalingon kon  unsay maayo ug daotan. Namakak sab si Satanas bahin sa mahitabo kon mosupak si Eva. Miingon si Satanas nga dili mamatay si Eva, maong mikaon siya sa bunga ug gihatagan pod niya ang iyang bana. Klaro kaayo ang giingon ni Jehova kang Adan ug Eva nga dili sila angayng mokaon sa bunga. Dihang mikaon sila, gisupak nila ang klaro ug makataronganong sugo. Gipakita nila nga wala nila tahora ang ilang mahigugmaong Amahan sa langit. Wala gyod silay ikarason kon nganong ila tong gihimo!

12. Nganong makapaguol kaayo nga gisupak ni Adan ug Eva si Jehova?

¹² Makapaguol kaayo nga wala tahora sa atong unang ginikanan ang ilang Maglalalang! Unsay imong bation kon giatiman nimo pag-ayo ang imong anak pero mirebelde siya ug wala ka niya sunda? Di ba sakit kaayo?

13. Unsay gipasabot ni Jehova dihang siya miingon nga “sa abog ka mobalik”?

¹³ Dihang misupak si Adan ug Eva, nawala ang ilang kahigayonan nga mabuhi hangtod sa hangtod. Giingnan ni Jehova si Adan: “Abog ka ug sa abog ka mobalik.” (Basaha ang Genesis 3:19.) Nagpasabot na nga mobalik si Adan sa abog, nga sama rag wala siya lalanga. (Genesis 2:7) Human makasala si Adan, siya namatay ug wala na maglungtad.

14. Nganong mamatay man ta?

¹⁴ Kon si Adan ug Eva misunod pa sa Diyos, buhi pa unta sila hangtod karon. Pero kay misupak man sila, nakasala sila ug sa ulahi namatay.  Ang sala samag makamatayng sakit nga atong napanunod gikan sa atong unang ginikanan. Kitang tanan natawo nga makasasala maong kita mamatay. (Roma 5:12) Pero dili na maoy gusto sa Diyos para sa mga tawo. Dili gyod niya gusto nga mamatay ang mga tawo, ug sa Bibliya, ang kamatayon gitawag ug “kaaway.”​—1 Corinto 15:26.

15. Sa unsang paagi ang kamatuoran bahin sa kamatayon magpagawas nato?

¹⁵ Ang kamatuoran bahin sa kamatayon magpagawas nato gikan sa daghang sayop nga mga ideya. Gitudloan ta sa Bibliya nga ang mga patay dili na mobatig kasakit o kaguol. Dili ta makaestorya nila, ug dili pod sila makaestorya nato. Dili ta makatabang nila, ug dili pod sila makatabang nato. Dili sila makahimog daotan, mao nga dili ta angayng mahadlok nila. Pero daghang relihiyon ang nagtudlo nga ang mga patay buhi pa ug naa ra sa laing dapit, ug makatabang daw ta nila kon magbayad ta sa pari o sa ubang lider sa relihiyon. Pero dili na ta mailad niini kon nahibalo ta sa kamatuoran bahin sa kamatayon.

16. Unsang bakak nga ideya bahin sa patay ang gitudlo sa daghang relihiyon?

¹⁶ Gigamit ni Satanas ang bakak nga relihiyon aron limbongan ta ug patuohon nga ang mga patay buhi pa gihapon. Pananglitan, ang ubang relihiyon nagtudlo nga kon mamatay ta, dunay bahin nato nga magpabiling buhi sa laing dapit. Ang imo bang relihiyon nagtudlo sab niana, o nagtudlo sa kon unsay giingon sa Bibliya bahin sa patay? Si Satanas naggamit ug bakak nga mga ideya aron ang mga tawo dili mosimba kang Jehova.

17. Nganong insulto kang Jehova ang ideya nga sunogon sa impiyerno ang mga tawo?

¹⁷ Dili gyod katuohan ang gitudlo sa daghang relihiyon.  Pananglitan, ang uban nagtudlo nga ang mga daotan sunogon sa impiyerno hangtod sa hangtod. Kini nga ideya insulto kang Jehova. Dili gyod niya tugotan nga mag-antos ang mga tawo nianang paagiha! (Basaha ang 1 Juan 4:8.) Unsay imong bation kon sunogon sa amahan ang kamot sa iyang anak ingong silot? Makaingon gyod ka nga wala siyay kaluoy. Dili gyod ka gustong makaila niya. Ug kanay gusto ni Satanas nga atong bation kang Jehova!

18. Nganong dili ta angayng mahadlok sa patay?

¹⁸ Ang ubang relihiyon nagtudlo nga kon mamatay ang mga tawo, mahimo silang espiritu. Sumala niini nga mga relihiyon ang maong mga espiritu puwedeng mahimong gamhanang higala o bangis nga kaaway, maong angay tang motahod o mahadlok nila. Daghang tawo ang mituo nianang ideyaha. Kay mahadlok man sila sa patay, ila ning gisimba imbes si Jehova. Hinumdomi nga ang mga patay wala nay pagbati, busa dili ta angayng mahadlok nila. Si Jehova ang atong Maglalalang. Siya ang matuod nga Diyos, ug siya lang ang angay natong simbahon.​—Pinadayag 4:11.

19. Nganong makatabang nato ang pagkahibalo sa kamatuoran bahin sa patay?

¹⁹ Kon mahibalo ta sa kamatuoran bahin sa patay, mahigawas ta sa bakak nga mga ideya nga gitudlo sa mga relihiyon. Ug kini nga kamatuoran makatabang nato nga masabtan ang nindot nga mga saad ni Jehova bahin sa atong kinabuhi ug kaugmaon.

20. Unsay atong sayron sa sunod kapitulo?

²⁰ Dugay na kanhi, ang alagad sa Diyos nga si Job nangutana: “Kon ang tawo mamatay, mabuhi ba siya pag-usab?” (Job 14:14) Posible ba gyod nga ang patay mabuhi pag-usab? Makapalipay kaayo ang tubag nga gihatag sa Diyos diha sa Bibliya. Sayron nato kini sa sunod kapitulo.