PANGUTANA 3
Unsaon Nako Pagpakig-estorya sa Akong Ginikanan?
UNSAY IMONG HIMOON?
Handurawa kini: Miyerkoles kadto sa gabii. Si Geoff, nga 17 anyos, nakahuman na sa iyang mga trabaho sa balay ug makarelaks na gyod siya! Iyang gibuksan ang TV ug milingkod.
Dayon miabot ang iyang Papa nga morag nasuko.
“Geoffrey! Nganong nagyampungad na man pod ka diha sa TV? Di ba giingnan ti ka nga tabangi ang imong manghod sa iyang homwork? Kagahi ba nimog ulo!”
“Nagyawyaw na sab,” mibagulbol si Geoff ug nakadungog ang iyang Papa.
Dayon miingon ang iyang Papa: “Unsay imong giyawyaw diha?”
“Wa man,” miingon si Geoff nga nagpasulirat sa iyang mata.
Ang iyang Papa suko na kaayo. “Ayoha nang imong tinubagan ha!” siya miingon.
Kon ikaw si Geoff, unsay imong himoon aron malikayan kini nga situwasyon?
HUNONG UG PAMALANDONG!
Ang pagpakig-estorya sa imong ginikanan samag pagdrayb ug sakyanan. Kon dunay babag ang dalan, puwede kang moagi sa laing dalan.
PANANGLITAN:
“Lisod ikaestorya si Papa,” miingon si Leah. “Usahay kon makig-estorya ko niya, siya moingon, ‘Unsa toy imong giingon?’”
SI LEAH DUNAY TULO KA OPSIYON.
-
Singkahan ang iyang papa.
Si Leah mosingka, “Importante ni, Pa! Paminaw pod!”
-
Dili na makig-estorya sa iyang papa.
Si Leah dili na makig-estorya sa iyang papa bahin sa iyang problema.
-
Maghulat ug maayong panahon ayha makigsulti pag-usab.
Si Leah mahimong makigsulti sa iyang papa sa laing higayon, o sulatan ang iyang papa bahin sa iyang problema.
Unsang opsiyon ang imong isugyot kang Leah?
HUNAHUNAA: Daghag gihunahuna ang papa ni Leah ug busa wala mahibalo ang iyang papa sa iyang problema. Busa kon pilion ni Leah ang Opsiyon A, matingala ang iyang papa kon nganong misingka siya. Kon mosingka siya, dakog purohan nga dili mamati kaniya ang iyang papa, ug pagpakita kinig kawalay-pagtahod. (Efeso 6:2) Busa, dili gyod kini maayo nga opsiyon.
Kon dunay babag ang dalan, wala kini magpasabot nga wala nay kaagian, sa ato pa, duna gyoy paagi sa pagpakigsulti sa imong ginikanan
Bisag morag okey ang Opsiyon B, dili kana maayo. Aron masulbad ang problema ni Leah, kinahanglan siyang makig-estorya sa iyang papa—ug aron makatabang ang iyang papa, kinahanglan siyang mahibalo kon unsay problema ni Leah. Dili solusyon ang pagpakahilom.
Pero kon mopili si Leah sa Opsiyon C, mangita gyod siyag paagi aron makapakig-estorya sa iyang papa. Siya mahimong makig-estorya sa laing higayon. Ug kon mopili siya sa pagsulat, lagmit mogaan dayon ang iyang pagbati.
Kon magsulat siya, makabalay siyag tarong sa iyang gustong isulti. Inigbasa sa iyang papa sa sulat, mahibaloan sa iyang papa kon unsay iyang gustong isulti ug makasabot sa iyang kahimtang. Busa ang Opsiyon C makatabang kanilang duha. Sa personal man nga pagpakig-estorya o pinaagig sulat, kini nga opsiyon nahiuyon sa tambag sa Bibliya sa pagtinguha sa mga butang nga moresultag kalinaw.—Roma 14:19.
Unsa pay ubang opsiyon ni Leah?
Naa ba kay mahunahunaan? Unsa kahay resulta niana?
AYAW PAGSULTIG MGA PULONG NGA MASAYPAG SABOT
Hinumdomi, ang imong isulti mahimong masaypan ug sabot sa imong ginikanan.
PANANGLITAN:
Gipangutana ka sa imong ginikanan kon nganong gisapot ka. Mitubag ka, “Dili ko gustong mag-estorya bahin ana.”
Tingali sabton kini sa imong ginikanan niining paagiha: “Nganong motug-an man ko? Wala koy salig nimo. Mas maayo pag sa akong mga higala nako isulti ang akong problema.”
Ibutang ta nga duna kay lisod nga problema ug ang imong ginikanan gustong motabang nimo. Kon moingon ka: “Ayawg kabalaka. Masulbad ra nako ni.”
-
Unsaon kaha ni pagsabot sa imong ginikanan?
-
Unsa kahay mas maayo nimong isulti?
Basin Ganahan Pod Ka
ANG GIINGON SA UBANG BATAN-ON
Unsaon Nako Pagpakig-estorya sa Akong Ginikanan?
Daghang kaayohan ang inyong mabatonan kay sa inyong gidahom.
MGA BATAN-ON NANGUTANA
Unsay Akong Himoon Aron Ikasinabot Nako ang Akong Ginikanan?
Sayra ang lima ka paagi nga makatabang aron malikayan ang panaglalis o kini dili mosamot.
MGA BATAN-ON NANGUTANA
Unsaon Nako Pagpakig-estorya sa Akong Ginikanan Bahin sa Ilang mga Balaod?
Pagkat-on nga matinahorong makig-estorya sa imong ginikanan ug basin masorpresa ka sa maayong mga resulta.
WHITEBOARD ANIMATION
Unsaon Nako Pagpakig-estorya sa Akong mga Ginikanan?
Unsaon nimo pagpakig-estorya sa imong ginikanan kon wala kay ganang makig-estorya?
MGA BATAN-ON NANGUTANA
Responsable ba Ako?
Ang ubang batan-on gihatagan ug dugang kagawasan kay sa uban. Ngano man?
