KAHON SA IMPORMASYON 19B
Ang Dagayday Nahimong Suba!
Gisubay ni Ezequiel ang tubig samtang nagdagayday kini gikan sa sangtuwaryo ni Jehova ug sa milagrosong paagi nahimong lawom nga suba pag-abot lang ug mga dos kilometros! Diha sa mga tampi sa suba, nakakita siyag labong nga mga kahoy nga makapahimsog ug makapaayo. Unsay kahulogan niining tanan?
Ang Suba Nagdalag mga Panalangin
KANIADTO: Dihang namalik ang mga destiyero sa ilang yutang natawhan, ang mga panalangin miagos kanila samtang nakigbahin sila sa pagpasig-uli sa putling pagsimba didto sa templo
KARON: Sa 1919, ang putling pagsimba napasig-uli, nga nag-abli sa kahigayonan para sa mas kusog pa gyod nga pag-agos sa espirituwal nga mga panalangin ngadto sa matinumanong mga alagad sa Diyos
UMAABOT: Human sa Armagedon, ang pag-agos sa mga panalangin gikan kang Jehova maoy pisikal ug espirituwal
Tubig nga Makahatag ug Kinabuhi
KANIADTO: Dagaya ang panalangin ni Jehova sa iyang masinugtanong katawhan bisag nagkadaghan sila, maong miuswag sila sa espirituwal
KARON: Sa nag-uswag nga espirituwal nga paraiso, nagkadaghan ang nakabenepisyo sa nagkakusog nga agos sa espirituwal nga mga panalangin ni Jehova ug nabuhi sa espirituwal
UMAABOT: Ang mga maluwas sa Armagedon madugangan sa milyonmilyong mabanhaw, ug ang mga panalangin ni Jehova mahimong abunda para sa tanan
Mga Kahoy nga Makahatag ug Pagkaon ug Makapaayo
KANIADTO: Sa espirituwal nga diwa, gipakaon ni Jehova ang iyang matinumanong katawhan diha sa ilang napasig-uling yuta; giayo sab niya sila sa espirituwal nga sakit nga dugay nang nagpaantos nila
KARON: Ang abundang espirituwal nga pagkaon nagtabang sa mga tawo nga masuklan ang espirituwal nga sakit ug malikayan ang grabeng espirituwal nga kagutom nga kaylap sa kalibotan karon
UMAABOT: Ang Kristo ug ang 144,000 nga kauban niyang magmamando magtabang sa tanang matinumanong katawhan nga mahimong hingpit, himsog, ug baskog hangtod sa hangtod!