KAHON SA IMPORMASYON 1B
Sumaryo sa Ezequiel
Ang basahon sa Ezequiel mahimong bahinon sa mosunod:
KAPITULO 1 HANGTOD SA 3
Sa 613 B.C.E., samtang nagpuyo uban sa Hudiyong mga destiyero sa Babilonya, si Ezequiel nakakitag mga panan-awon ni Jehova ug gisugo sa pagpanagna ngadto sa mga Hudiyong namuyo sa daplin sa suba sa Kebar.
KAPITULO 4 HANGTOD SA 24
Tali sa 613 ug 609 B.C.E., si Ezequiel nagpahayag ug mga tagna nga pangunang naghisgot ug paghukom batok sa Jerusalem ug sa rebelyosong katawhan niini nga nagsimbag idolo.
KAPITULO 25 HANGTOD SA 32
Sugod sa 609 B.C.E., ang tuig diin gisugdan sa Babilonya ang kataposang paglikos sa Jerusalem, ang mensahe ni Ezequiel sa paghukom dili na para sa Jerusalem kondili para na sa kaawayng mga nasod sa palibot—Ammon, Edom, Ehipto, Moab, Filistia, Sidon, ug Tiro.
KAPITULO 33 HANGTOD SA 48
Sugod sa 606 B.C.E., samtang gun-ob ang Jerusalem ug ang templo niini nga nahimutang gatosan ka kilometro ang gilay-on, si Ezequiel nagpokus sa mensahe sa paglaom—ang makapahinam nga pagpasig-uli sa putling pagsimba kang Jehova nga Diyos.
Busa ang basahon sa Ezequiel gihan-ay sumala sa pagkasunodsunod sa hitabo ug sumala sa topiko. Ang mga tagna bahin sa kalaglagan sa Jerusalem ug sa templo niini gipahayag una pa sa kadaghanang tagna bahin sa pagpasig-uli sa putling pagsimba. Haom lang gyod kana, kay walay mga tagna bahin sa pagpasig-uli kon wala mahanaw ang pagsimba diha sa templo.
Dugang pa, ang mga tagna ni Ezequiel batok sa kaawayng mga nasod sa palibot (kapitulo 25 hangtod sa 32) mabasa pagkahuman sa iyang mga mensahe sa paghukom batok sa Jerusalem ug una pa sa mga tagna bahin sa pagpasig-uli sa putling pagsimba. Bahin sa mga mensahe ni Ezequiel sa paghukom ngadto sa kanasoran, usa ka eskolar mikomento: “Haom lang ang pagkausab sa pokus, gikan sa pagpahayag sa kasuko sa Diyos ngadto sa Iyang kaluoy sa Iyang katawhan, kay lakip sa pagluwas sa Iyang katawhan ang pagsilot sa ilang mga kaaway.”
