1-3. Giunsa pagbiaybiay sa mga Babilonyanhon ang mga magsisimba ni Jehova, ug ngano?

 HUNAHUNAA nga matinumanon ka nga Hudiyo nga nagpuyo sa siyudad sa Babilonya. Ikaw ug ang ubang Hudiyo mga 50 ka tuig nang destiyero, o binihag. Sama sa imong naandan sa adlaw sa Igpapahulay, makigtigom ka uban sa imong mga igsoon sa pagtuo aron mosimba kang Jehova. Miagi ka sa kadalanan nga puno kaayog tawo ug nakalabayg dagkong templo ug daghan kaayong ampoanan. Ang mga tawo nagpanon paingon niana, nga naghalad ug nag-awit alang sa mga diyos sama ni Marduk.

² Layo sa kadaghanan, nakigtigom ka uban sa gamayng grupo sa isigkamagsisimba. * Nakakita mog hilom nga dapit​—tingali duol sa usa sa mga suba sa siyudad—​diin didto mag-ampo, mag-awit ug mga salmo, ug mamalandong sa Pulong sa Diyos. Sa nag-ampo mo, madunggan nimo ang pag-igot sa lansa nga kahoy nga gidunggo sa tampi sa suba. Nalipay ka kay malinawon kanang lugara. Nanghinaot ka nga dili mo makit-an sa mga tawo kay basig baldahon nila ang inyong tigom sama sa sagad nilang ginahimo. Nganong ila nang ginahimo?

³ Ang Babilonya daghan nag nadaog nga gubat, ug gihunahuna sa mga tawo nga ang gahom sa ilang siyudad naggikan sa ilang bakak  nga mga diyos. Para sa mga Babilonyanhon, ang pagkalaglag sa Jerusalem nagpamatuod nga mas gamhanan ang ilang diyos nga si Marduk kay kang Jehova! Busa ilang gibiaybiay ang imong Diyos ug ang iyang katawhan. Usahay magyagayaga sila: “Awiti mi ug usa sa mga awit sa Zion”! (Sal. 137:3) Daghang salmo ang nagpasidungog sa kadaogan sa Zion batok sa mga kaaway ni Jehova. Tingali kana nga mga salmo ang gusto kaayong yagayagaan sa mga Babilonyanhon. Naa poy mga salmo nga naghisgot sa mga Babilonyanhon mismo. Pananglitan, ang usa niana nag-ingon: “Gihimo nila ang Jerusalem ingong tapok sa kagun-oban. . . . Kadtong mga anaa sa among palibot nagyagayaga ug nagyubit kanamo.”​—Sal. 79:1, 3, 4.

4, 5. Unsang paglaom ang gitagna ni Ezequiel, ug unsay atong hisgotan niini nga kapitulo? (Tan-awa ang hulagway sa sinugdan sa kapitulo.)

⁴ Naa poy apostatang mga Hudiyo nga daling mobiaybiay sa imong pagtuo kang Jehova ug sa iyang mga propeta. Bisan pa sa maong pagyagayaga, ang putling pagsimba nakahupay nimo ug sa imong pamilya. Malipay gyod ka dihang mag-uban mo sa pag-ampo ug pag-awit. Ang pagbasa sa Pulong sa Diyos makapalipay. (Sal. 94:19; Roma 15:4) Imadyina nga niining adlawa, ang usa sa imong mga isigkamagsisimba dunay espesyal nga gidala sa tigom​—linukot nga basahon nga naundan sa tagna ni Ezequiel. Ganahan gyod kang makadungog sa saad ni Jehova nga iyang ipasig-uli ang iyang katawhan sa ilang yutang natawhan. Milukso ang imong kasingkasing dihang gibasag kusog ang maong tagna, ug imong gipamalandong ang paglaom nga ikaw ug ang imong pamilya mobalik ug motabang nianang makapalipay nga panahon sa pagpasig-uli!

⁵ Ang tagna ni Ezequiel punog mga saad sa pagpasig-uli. Atong susihon ang maong tema. Sa unsang paagi ang maong mga saad natuman alang sa mga destiyero? Unsay kahulogan sa maong mga saad sa modernong panahon? Konsiderahon sab nato ang mga tagna nga dunay kataposang katumanan sa umaabot.

6. Sa unsang paagi ang Diyos balikbalik nga nagpasidaan sa iyang rebelyosong katawhan?

⁶ Pinaagi kang Ezequiel, si Jehova tin-awng nagpahibalo sa iyang katawhan kon unsaon niya sila pagsilot tungod sa ilang pagkarebelyoso. “Sila madestiyero, sila mahimong binihag,” miingon si Jehova. (Ezeq. 12:11) Base sa atong nahisgotan sa Kapitulo 6 niini nga publikasyon, gimostra pa gani ni Ezequiel ang maong paghukom. Apan dili kana ang unang pasidaan nga ilang nadawat. Sukad sa panahon ni Moises, halos 1,000 ka tuig una pa niana, si Jehova nagpasidaan sa iyang katawhan nga kon sila magpadayon sa ilang pagkarebelyoso, sila madestiyero. (Deut. 28:36, 37) Ang mga propeta nga sama ni Isaias ug Jeremias naghatag sab ug samang mga pasidaan.​—Isa. 39:5-7; Jer. 20:3-6.

7. Sa unsang mga paagi gisilotan ni Jehova ang iyang katawhan?

⁷ Apan ikasubo nga ang maong mga pasidaan milapos lang sa pikas dunggan. Sa ngadtongadto, nasakitan pag-ayo si Jehova sa pagrebelde sa iyang katawhan, sa ilang pagsimbag idolo, sa ilang pagkadili-matinumanon,  ug sa ilang pagkadaotan tungod sa impluwensiya sa daotang mga magbalantay. Busa gitugotan niya nga sila mag-antos sa gutom​—nga usa ka katalagman ug kaulawan, kay ang ilang yuta kaniadto “abunda sa gatas ug dugos.” (Ezeq. 20:6, 7) Unya, sumala sa dugay na niyang gitagna, iyang gitugotan nga madestiyero ang iyang rebelyosong katawhan. Sa kataposan, sa 607 B.C.E., gilaglag ni Nabucodonosor nga hari sa Babilonya ang Jerusalem ug ang templo niini. Linibo sa mga Hudiyo ang gidestiyero sa Babilonya. Didto, sila giyagayagaan ug gisupak, sumala sa gihisgotan sa sinugdan niini nga kapitulo.

8, 9. Giunsa pagpasidaan sa Diyos ang Kristohanong kongregasyon batok sa apostasya?

⁸ Diha pod bay nahitabo sa Kristohanong kongregasyon nga susama sa pagkadestiyero didto sa Babilonya? Oo! Sama sa mga Hudiyo sa karaang panahon, ang mga sumusunod sa Kristo abanteng gipasidan-an. Sa sinugdanan sa ministeryo ni Jesus, siya miingon: “Pagbantay sa bakak nga mga propeta nga manganha kaninyo nga magpakaaron-ingnong karnero, apan sa pagkatinuod sila maoy mga lobo nga manunukob.” (Mat. 7:15) Katuigan sa ulahi, si apostol Pablo mihatag ug susamang pasidaan: “Nahibalo ko nga sa akong pagbiya ang bangis nga mga lobo mosulod sa inyong taliwala ug dili magtratar sa panon uban ang kalumo, ug gikan mismo sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ug danihon ngadto kanila.”​—Buh. 20:29, 30.

⁹ Ang mga Kristohanon gitudloan kon unsaon pag-ila ug paglikay sa maong peligrosong mga tawo. Ang mga ansiyano gisugo sa pagtangtang sa mga apostata sa kongregasyon. (1 Tim. 1:19; 2 Tim. 2:16-19; 2 Ped. 2:1-3; 2 Juan 10) Apan, sama sa kahimtang sa karaang Israel ug Juda, daghang Kristohanon ang anam-anam nga nagpalingoglingog sa maong mahigugmaong mga pasidaan. Sa hinapos sa unang siglo, ang apostasya nakagamot na sa kongregasyon. Si Juan, ang kataposang apostoles nga buhi pa sa hinapos sa unang siglo C.E., nakakita sa grabeng pagkadaotan ug rebelyon sa kongregasyon. Siya na lang ang nabilin nga nagpugong sa padayong pagkadaot niini. (2 Tes. 2:6-8; 1 Juan 2:18) Unsay nahitabo human mamatay si Juan?

10, 11. Unsay katumanan sa sambingay ni Jesus bahin sa mga trigo ug mga bunglayon sukad sa ikaduhang siglo C.E.?

¹⁰ Human mamatay si Juan, ang sambingay ni Jesus sa mga trigo ug mga bunglayon nagsugod pagkatuman. (Basaha ang Mateo 13:24-30.) Sama sa nakita nang daan ni Jesus, ang kongregasyon gipugsan ni Satanas ug “mga bunglayon,” o impostor nga mga Kristohanon, ug mipaspas ang pagkadaot sa kongregasyon. Seguradong nasakitan gyod si Jehova sa pagkakita nga ang kongregasyon nga gitukod sa iyang Anak nahugawan sa idolatriya, paganong mga selebrasyon ug tulumanon, ug bakak nga mga doktrina nga gikuha gikan sa dili motuog Diyos nga mga pilosopo ug sa satanikong mga  relihiyon! Unsay gihimo ni Jehova? Sama sa iyang gihimo sa dili matinumanong Israel, iyang gitugotan nga mabihag ang iyang katawhan. Sukad sa ikaduhang siglo C.E., ang samag trigo nga mga tawo dili na mailhan tungod sa kadaghan sa impostor nga mga Kristohanon. Busa ang matuod nga Kristohanong kongregasyon nabihag sa Bantogang Babilonya, ang tibuok kalibotang imperyo sa bakak nga relihiyon, ug ang impostor nga mga Kristohanon nahimong bahin nianang daotang imperyo. Sa midaghan ang impostor nga mga Kristohanon, mitungha ang Kakristiyanohan.

¹¹ Sulod sa daghang siglo sa espirituwal nga kangitngit dihang ang Kakristiyanohan maoy nagdominar, dihay tinuod nga mga Kristohanon, ang “mga trigo” sa sambingay ni Jesus. Sama sa Hudiyong mga destiyero nga gihisgotan sa Ezequiel 6:9, sila nahinumdom sa matuod nga Diyos. Ang uban maisogong misupak sa bakak nga mga doktrina sa Kakristiyanohan. Sila giyagayagaan ug gilutos. Gipasagdan ba ni Jehova nga magpabilin ang iyang katawhan sa maong espirituwal nga kangitngit hangtod sa hangtod? Wala! Sama sa kahimtang sa karaang Israel, ang kasuko ni Jehova iyang gipakita sa hustong paagi ug sa hustong gitas-on sa panahon. (Jer. 46:28) Dugang pa, wala sila biyai ni Jehova nga walay paglaom. Atong balikan ang Hudiyong  mga destiyero sa karaang Babilonya ug atong tan-awon kon giunsa ni Jehova paghatag kanilag paglaom nga matapos ang ilang pagkabihag.

12, 13. Nganong sa ngadtongadto mapuypoy ang kasuko ni Jehova batok sa iyang nadestiyerong katawhan sa panahon ni Ezequiel?

¹² Si Jehova prangkang nagpahayag sa iyang kasuko sa iyang katawhan, apan iyang gipasaligan sila nga dili hangtod sa hangtod ang iyang kasuko. Pananglitan, matikdi ang iyang giingon: “Ang akong kasuko matapos, ug ang akong kapungot kanila mapuypoy, ug ako matagbaw. Ug sila makaila gayod nga ako, si Jehova, nagsulti tungod sa akong pagpangayog eksklusibong debosyon, dihang mapahungaw na nako ang akong kapungot kanila.” (Ezeq. 5:13) Nganong sa ngadtongadto mapuypoy ang kapungot ni Jehova?

¹³ Dihay matinumanong mga Hudiyo nga gibihag apil sa mga dili matinumanon. Dugang pa, pinaagi kang Ezequiel, ang Diyos nagtagna nga ang uban sa Iyang katawhan maghinulsol samtang nadestiyero. Ang maong mahinulsolong mga Hudiyo mahinumdom sa makauulaw nilang gihimo sa pagrebelde sa ilang Diyos, ug sila magpakiluoy kang Jehova nga sila pasayloon ug uyonan. (Ezeq. 6:8-10; 12:16) Apil si Ezequiel sa maong mga matinumanon, ug apil pod si propetang  Daniel ug ang iyang tulo ka kauban. Gani, nakita ni Daniel ang sinugdanan ug ang kataposan sa pagkadestiyero. Ang iyang kinasingkasing nga pag-ampo sa paghinulsol sa mga sala sa Israel mabasa sa Daniel kapitulo 9. Sa walay duhaduha, ang iyang pagbati mao sab ang pagbati sa linibo ka destiyero nga nangandoy sa kapasayloan ug mga panalangin ni Jehova. Makapalipay gyod ang gisulat ni Ezequiel nga mga saad bahin sa kagawasan ug pagpasig-uli!

14. Nganong ipasig-uli ni Jehova ang iyang katawhan sa ilang yutang natawhan?

¹⁴ Apan dihay mas importanteng rason sa kagawasan ug pagpasig-uli sa katawhan ni Jehova. Ang ilang taas nga pagkadestiyero matapos, dili tungod kay takos sila sa kagawasan, kondili tungod kay panahon na sab kadto ni Jehova sa pagbalaan sa iyang ngalan atubangan sa tanang nasod. (Ezeq. 36:22) Makita gyod sa maong mga Babilonyanhon nga ang ilang demonyong mga diyos, sama kang Marduk, walay bawot sa Soberanong Ginoong Jehova! Konsiderahon nato karon ang lima ka saad nga gipasulti ni Jehova kang Ezequiel ngadto sa iyang kaubang mga destiyero. Hisgotan una nato kon unsay kahulogan sa matag saad alang niadtong mga matinumanon. Dayon, atong tan-awon ang mas dakong katumanan niini nga mga saad.

15. Unsay himoong kausaban sa relihiyosong mga buhat sa mga mamalik?

¹⁵ SAAD 1. Wala nay idolatriya o makaluod nga mga buhat nga konektado sa bakak nga relihiyon. (Basaha ang Ezequiel 11:18; 12:24.) Sa gihisgotan sa Kapitulo 5 niini nga publikasyon, ang Jerusalem ug ang templo niini nahugawan sa mga buhat sa bakak nga relihiyon, sama sa idolatriya. Busa ang katawhan nahimong daotan ug nahimulag kang Jehova. Pinaagi kang Ezequiel, gitagna ni Jehova nga sa umaabot ang mga destiyero makasimba pag-usab kang Jehova sa hinlo nga paagi. Ang ubang panalangin sa pagpasig-uli magdepende niini: ang pagpasig-uli sa kahikayan sa Diyos sa putling pagsimba.

16. Unsay gisaad ni Jehova bahin sa yutang natawhan sa iyang katawhan?

¹⁶ SAAD 2. Sila makabalik sa ilang yutang natawhan. “Ihatag nako kaninyo ang yuta sa Israel,” giingnan ni Jehova ang mga destiyero. (Ezeq. 11:17) Talagsaon kini nga saad, kay ang mga Babilonyanhon,  kinsa nagtamay sa nabihag nga katawhan sa Diyos, wala gyod maghatag kanilag paglaom nga makabalik sa ilang gimahal nga yutang natawhan. (Isa. 14:4, 17) Dugang pa, basta magpabilin silang matinumanon, ang yuta mahimong tabunok ug magmabungahon, nga makahatag nilag pagkaon ug mapuslanong buluhaton. Dili na nila masinatian ang kaulawan ug kaalaotan tungod sa gutom.​—Basaha ang Ezequiel 36:30.

17. Unsay mahitabo sa mga halad para kang Jehova?

¹⁷ SAAD 3. Makatanyag na sab ug mga halad nga gasa sa halaran ni Jehova. Sama sa gihisgotan sa Kapitulo 2 niini nga publikasyon, ubos sa Balaod, ang pagtanyag ug mga halad maoy importanteng bahin sa putling pagsimba. Kon ang mamalik nga mga destiyero magpabiling masinugtanon ug hinlo sa espirituwal, ang ilang mga halad dalawaton kang Jehova. Busa ang katawhan mapasaylo sa ilang mga sala ug magpabiling suod sa ilang Diyos. Si Jehova misaad: “Mag-alagad kanako sa yuta ang tibuok panimalay ni Israel, silang tanan. Malipay ko kanila didto, ug pangayoon nako ang inyong mga amot ug ang mga unang bunga sa inyong mga halad, ang tanan ninyong balaang butang.” (Ezeq. 20:40) Ang putling pagsimba mapasig-uli gyod, nga moresultag mga panalangin sa katawhan sa Diyos.

18. Unsaon pagbantay ni Jehova sa iyang katawhan?

¹⁸ SAAD 4. Tangtangon ang daotang mga magbalantay. Ang pangunang hinungdan kon nganong ang katawhan sa Diyos nakahimog seryosong mga sayop mao ang impluwensiya sa daotang mga tawo nga nanguna kanila. Si Jehova misaad nga iya kanang tul-iron. Bahin sa maong daotang mga magbalantay, siya misaad: “Dili na nako sila tugotang mopakaon sa akong mga karnero . . . Luwason nako ang akong mga karnero gikan sa ilang baba.” Sa kasukwahi, gipasaligan ni Jehova ang iyang matinumanong katawhan: “Atimanon nako ang akong mga karnero.” (Ezeq. 34:10, 12) Unsaon niya kana paghimo? Mogamit siyag matinumanon ug maunongong mga lalaki ingong magbalantay.

19. Unsay gisaad ni Jehova bahin sa panaghiusa?

 ¹⁹ SAAD 5. Ang mga magsisimba ni Jehova magkahiusa. Hunahunaa kon unsa ka makapaguol alang sa matinumanong mga magsisimba nga makita nga walay panaghiusa ang katawhan sa Diyos sa wala pa sila madestiyero. Kay naimpluwensiyahan sa bakak nga mga propeta ug daotang mga magbalantay, ang katawhan mirebelde sa matinumanong mga propeta nga nagrepresentar kang Jehova; nagkabahinbahin pa gani ang katawhan. Busa, ang usa sa labing makapadaning mga bahin sa pagpasig-uli mao kining saara pinaagi kang Ezequiel: “Hatagan nako silag nagkahiusang kasingkasing, ug ibutang nako kanila ang usa ka bag-ong espiritu.” (Ezeq. 11:19) Kon ang mamalik nga mga Hudiyo magpabiling nahiusa kang Jehova ug sa usag usa, walay magsusupak nga makadaog kanila. Ingong usa ka nasod, makahatag sila pag-usab ug kahimayaan kang Jehova imbes pagtamay ug kaulawan.

20, 21. Sa unsang paagi ang mga saad sa Diyos natuman diha sa namalik nga mga destiyero?

²⁰ Natuman ba ang maong lima ka saad diha sa mga Hudiyo nga namalik gikan sa pagkadestiyero? Angay natong hinumdoman ang giingon sa matinumanon nga si Josue: “Walay usa ka pulong gikan sa tanang maayong saad nga gisaad kaninyo ni Jehova nga inyong  Diyos ang napakyas. Kining tanan natuman para kaninyo. Walay usa ka pulong niini ang napakyas.” (Jos. 23:14) Gituman ni Jehova ang iyang mga saad sa panahon ni Josue, ug mao man usab ngadto sa mga destiyero nga namalik sa ilang yutang natawhan.

²¹ Gibiyaan sa mga Hudiyo ang idolatriya ug ang ubang makaluod nga buhat sa bakak nga relihiyon nga nakapahilayo nila kang Jehova. Bisag daw imposible, sila nakabalik sa ilang yutang natawhan, gitikad kini, ug nagkinabuhing malipayon didto. Usa sa una nilang gipanghimo mao ang pagtukod pag-usab sa halaran ni Jehova sa Jerusalem ug ang pagtanyag pag-usab ug dalawatong mga halad didto. (Esd. 3:2-6) Gipanalanginan sila ni Jehova ug maayong espirituwal nga mga magbalantay, sama sa matinumanong saserdote ug tigkopya nga si Esdras, mga gobernador nga si Nehemias ug Zorobabel, hataas nga saserdote nga si Josue, ug maisogong mga propeta nga si Haggeo, Zacarias, ug Malaquias. Dihang ang katawhan misunod sa direksiyon ug giya sa Diyos, ilang natagamtam ang panaghiusa nga wala nila masinatii sa dugayng panahon.​—Isa. 61:1-4; basaha ang Jeremias 3:15.

22. Giunsa nato pagkahibalo nga ang unang katumanan sa mga tagna sa pagpasig-uli patilaw lang sa mas dakong katumanan?

 ²² Walay duhaduha, makapadasig gyod ang unang katumanan sa mga saad ni Jehova sa pagpasig-uli! Pero kana patilaw lang sa mas dakong katumanan. Nganong nahibalo ta? Ang maong mga saad may kondisyon; tumanon lang kini ni Jehova kon ang katawhan magpabiling masinugtanon ug daling mosunod. Sa ngadtongadto, ang mga Hudiyo nahimo na sab nga masinupakon ug rebelyoso. Apan sumala sa giingon ni Josue, matuman gyod ang mga pulong ni Jehova. Busa kini nga mga saad dunay mas dako ug mas dumalayong katumanan. Tan-awon nato kon sa unsang paagi nahitabo kana.

23, 24. Kanus-a ug sa unsang paagi nagsugod ang “mga panahon sa pagpasig-uli sa tanang butang”?

²³ Ingong mga estudyante sa Bibliya, nahibalo ta nga nagsugod ang kataposang mga adlaw niining daotang sistema sa mga butang niadtong 1914. Apan wala maguol niini ang mga alagad ni Jehova. Gani, gipakita sa Bibliya nga niadtong 1914 nagsugod ang makapalipay nga panahon​—“mga panahon sa pagpasig-uli sa tanang butang.” (Buh. 3:21) Giunsa nato pagkahibalo niana? Aw, unsay nahitabo sa langit niadtong 1914? Si Jesu-Kristo naentrono ingong Mesiyanikong Hari! Nganong makaingon ta nga ang maong hitabo usa ka pagpasig-uli? Hinumdomi nga si Jehova nagsaad kang Haring David nga ang paghari gikan sa iyang banay maoy hangtod sa hangtod. (1 Cron. 17:11-14) Kana nga pagkahari nahunong niadtong 607 B.C.E. dihang gilaglag sa mga Babilonyanhon ang Jerusalem ug gitapos ang pagmando sa mga hari nga gikan sa banay ni David.

²⁴ Ingong “Anak sa tawo,” si Jesus kaliwat ni David ug busa nahimong legal nga manununod sa pagkahari sa banay ni David. (Mat. 1:1; 16:13-16; Luc. 1:32, 33) Niadtong 1914 dihang gihatag ni Jehova kang Jesus ang langitnong trono, ang “mga panahon sa pagpasig-uli sa tanang butang” nagsugod! Panahon na nga gamiton ni Jehova kining hingpit nga Hari aron ipadayon ang buluhaton sa pagpasig-uli.

25, 26. (a) Kanus-a natapos ang taas nga pagkabihag sa Bantogang Babilonya, ug nganong nahibalo ta niana? (Tan-awa sab ang kahong “Nganong 1919?”) (b) Unsay nagsugod pagkatuman sukad sa 1919?

 ²⁵ Usa sa unang mga gihimo sa Kristo ingong Hari mao ang pagduyog sa iyang Amahan sa pagsusi sa kahikayan sa putling pagsimba sa yuta. (Mal. 3:1-5) Sama sa gitagna ni Jesus sa iyang ilustrasyon sa mga trigo ug mga bunglayon, dili mailhan sa dugayng panahon ang mga trigo gikan sa mga bunglayon, ang tinuod nga dinihogang mga Kristohanon gikan sa mga impostor. * Pero pag-abot sa ting-ani niadtong 1914, nahimong tin-aw ang kalainan. Sa mga dekada hangtod sa 1914, giyagyag sa matinumanong mga Estudyante sa Bibliya ang grabeng kasaypanan sa Kakristiyanohan ug misugod sa paglain sa ilang kaugalingon gikan sa hugaw nga organisasyon. Panahon na kadto nga bug-os silang ipasig-uli ni Jehova. Busa sa sayong bahin sa 1919, pipila pa lang ka tuig human magsugod ang “ting-ani,” ang katawhan sa Diyos bug-os nang gipagawas sa pagkabihag sa Bantogang Babilonya. (Mat. 13:30) Wala na sila mabihag!

²⁶ Ang mga tagna ni Ezequiel bahin sa pagpasig-uli nagsugod pagkatuman sa paagi nga mas labaw pa kay sa nakita sa katawhan sa Diyos sa karaang panahon. Ato karong konsiderahon ang mas dakong katumanan sa lima ka saad nga atong nahisgotan.

27. Giunsa paghinlo sa Diyos ang iyang katawhan gikan sa idolatriya?

²⁷ SAAD 1. Pagwagtang sa idolatriya ug sa ubang makaluod nga relihiyosong tulumanon. Sa hinapos sa ika-19ng siglo ug sa pagsugod sa ika-20ng siglo, ang matinumanong mga Kristohanon nagtigom na ug nagsugod sa pagwagtang sa bakak nga relihiyosong mga tulumanon. Ang Trinidad, ang pagtulon-an nga imortal ang kalag sa tawo, ug ang doktrina sa impiyernong kalayo gisalikway ingong dili Kasulatanhong mga pagtulon-an nga naggikan sa bakak nga relihiyon. Ang paggamit ug mga imahen sa pagsimba giyagyag ingong idolatriya. Anam-anam sab nga nakita sa katawhan sa Diyos nga idolatriya ang paggamit ug krus sa pagsimba.​—Ezeq. 14:6.

28. Sa unsang diwa nga ang katawhan ni Jehova napasig-uli sa ilang yuta?

²⁸ SAAD 2. Pagpasig-uli sa katawhan sa Diyos ngadto sa espirituwal nga yuta. Sa ilang pagbiya sa relihiyon nga impluwensiyado sa  Babilonya, ang matinumanong mga Kristohanon misulod sa ilang espirituwal nga yuta, usa ka kahimtang nga punog panalangin, diin dili na sila gutmon sa espirituwal. (Basaha ang Ezequiel 34:13, 14.) Sa Kapitulo 19 niini nga publikasyon, makat-onan nato nga ang maong yuta gipanalanginan ni Jehova ug abunda kaayong espirituwal nga pagkaon kay sukad masukad.​—Ezeq. 11:17.

29. Sa unsang paagi gipangusgan ang buluhatong pagsangyaw sa 1919?

²⁹ SAAD 3. Pagtanyag pag-usab ug mga halad nga gasa sa halaran ni Jehova. Balik sa unang siglo C.E., ang mga Kristohanon gitudloan nga sila kinahanglang magtanyag sa Diyos ug mga gasa nga mas bililhon pa kay sa mga hayop​—mga pulong sa pagdayeg kang Jehova ug pagsangyaw bahin kaniya. (Heb. 13:15) Sulod sa daghang siglo nga sila nabihag, walay organisadong kahikayan sa pagtanyag niana nga mga halad. Apan sa dihang hapit nang matapos ang pagkabihag, ang katawhan sa Diyos nagtanyag na niana nga mga halad sa pagdayeg.  Sila nagkugi sa pagsangyaw ug malipayong nagdayeg sa Diyos diha sa ilang mga tigom. Sukad sa 1919, mas gipasiugda sa “matinumanon ug maalamong ulipon” ang buluhatong pagsangyaw ug mas giorganisar pa kini. (Mat. 24:45-47) Busa ang halaran ni Jehova daw nag-awas-awas sa mga halad sa nagkadaghang tawo nga nagdayeg sa iyang balaang ngalan!

30. Unsay gihimo ni Jesus aron mahatag ang panginahanglan sa iyang katawhan alang sa maayong mga magbalantay?

³⁰ SAAD 4. Pagtangtang sa daotang mga magbalantay. Gibuhian sa Kristo ang katawhan sa Diyos gikan sa way konsensiya ug hakog nga bakak nga mga magbalantay sa Kakristiyanohan. Sa panon sa Kristo, ang mga magbalantay nga misundog niadtong bakak nga mga magbalantay gitangtang sa ilang katungdanan. (Ezeq. 20:38) Giseguro ni Jesus, ang Maayong Magbalantay, nga maayong pagkaatiman ang iyang mga karnero. Sa 1919, iyang gitudlo ang iyang matinumanon ug maalamong ulipon. Kanang gamayng grupo sa maunongon nga dinihogang mga Kristohanon nanguna sa pagtaganag espirituwal nga pagkaon, mao nga ang katawhan sa Diyos maayong pagkaatiman. Sa ngadtongadto, ang mga ansiyano gibansay sa pagtabang sa pag-atiman sa “panon sa Diyos.” (1 Ped. 5:1, 2) Ang giingon sa Ezequiel 34:15, 16 sagad ginagamit sa pagpahinumdom sa Kristohanong mga magbalantay sa sukdanan nga gitakda ni Jehova nga Diyos ug ni Jesu-Kristo.

31. Giunsa pagtuman ni Jehova ang tagna sa Ezequiel 11:19?

³¹ SAAD 5. Magkahiusa ang mga magsisimba ni Jehova. Sa daghang siglo, ang Kakristiyanohan nabahin sa libolibong denominasyon ug sa dili maihap nga mga grupo ug mga sekta nga nagkasumpakiay. Sa kasukwahi, si Jehova dunay gihimong milagroso kaayo ngadto sa iyang napasig-uling katawhan. Ang iyang gisaad pinaagi kang Ezequiel nga ‘hatagan silag nagkahiusang kasingkasing’ natuman gayod. (Ezeq. 11:19) Sa tibuok kalibotan, ang Kristo dunay minilyong sumusunod nga lainlaig rasa ug kahimtang sa kinabuhi ug lainlaig relihiyon kaniadto. Apan ang tanan gitudloan sa samang kamatuoran ug naghimo sa samang buluhaton uban ang talagsaong panaghiusa. Sa kataposang gabii ni Jesus sa yuta, siya kinasingkasing nga nag-ampo nga ang iyang mga sumusunod magkahiusa. (Basaha ang Juan 17:11, 20-23.) Sa atong panahon, kana nga hangyo gitubag ni Jehova sa kinalabwang paagi.

32. Unsay imong gibati bahin sa katumanan sa mga tagna sa pagpasig-uli? (Tan-awa sab ang kahong “Mga Tagna sa Pagkabihag ug Pagpasig-uli.”)

³² Nalipay ba ka nga nagpuyo niining makapahinganghang panahon sa pagpasig-uli? Atong nakita ang katumanan sa mga tagna ni Ezequiel sa tanang bahin sa atong pagsimba karon. Makasalig ta nga nalipay si Jehova sa iyang katawhan, sumala sa iyang gitagna pinaagi ni Ezequiel: “Malipay ko kaninyo.” (Ezeq. 20:41) Imo bang nasabtan nga dako kaayong pribilehiyo nga mahimo kang bahin sa katawhan nga nahiusa ug busog kaayo sa espirituwal, kinsa naghatag ug pagdayeg kang Jehova sa tibuok kalibotan​—katawhan nga gipagawas human sa daghang siglo nga pagkabihag sa espirituwal? Apan  ang mas dakong katumanan sa ubang tagna ni Ezequiel bahin sa pagpasig-uli mahitabo pa sa umaabot.

33-35. (a) Unsay kahulogan sa tagna sa Ezequiel 36:35 alang sa Hudiyong mga destiyero? (b) Unsay kahulogan nianang tagnaa sa katawhan ni Jehova karon? (Tan-awa sab ang kahong “Mga Panahon sa Pagpasig-uli sa Tanang Butang.”)

³³ Sa ato nang nakita, ang “mga panahon sa pagpasig-uli sa tanang butang” nagsugod sa pagpasig-uli sa pagkahari sa banay ni David dihang si Jesus gientrono niadtong 1914. (Ezeq. 37:24) Sunod, gihatagan ni Jehova ug gahom ang Kristo sa pagpasig-uli sa putling pagsimba diha sa Iyang katawhan human sa daghang siglo nga pagkabihag sa espirituwal. Apan, diha ba natapos ang buluhaton sa Kristo sa pagpasig-uli? Dili! Kana nga buluhaton magpadayon sa makapahinganghang paagi sa umaabot​—ug ang mga tagna ni Ezequiel naghatag kanatog makapalipayng mga detalye.

³⁴ Pananglitan, hunahunaa kini: “Ang katawhan moingon: ‘Ang biniyaang yuta nahisama sa tanaman sa Eden.’” (Ezeq. 36:35) Unsay kahulogan niana nga saad kang Ezequiel ug sa iyang kaubang mga destiyero? Dayag nga wala sila magdahom nga literal kanang matuman​—nga mora bag ang napasig-uling yuta masaypan nga mao ang orihinal nga tanaman, o Paraiso, nga gihimo mismo ni Jehova! (Gen. 2:8) Hinuon, seguradong nasabtan nila nga si Jehova nagpasalig nga mahimong nindot ug mabungahon ang ilang napasig-uling yuta.

³⁵ Unsay kahulogan sa maong saad kanato karon? Wala ta magdahom nga literal kanang matuman karon niining daotang kalibotan nga gimandoan ni Satanas nga Yawa. Hinuon, atong nasabtan nga kana natuman karon sa espirituwal nga paagi. Ingong mga alagad ni Jehova, kita nagpuyo sa napasig-uling espirituwal nga yuta, usa ka kahimtang diin kita nag-alagad nga mabungahon ug naghimo sa sagradong pag-alagad nga sentro sa atong kinabuhi. Kini nga espirituwal nga yuta nagkaanam ka nindot, morag paraiso. Apan, komosta man sa umaabot?

36, 37. Unsang mga saad ang matuman sa umaabot nga Paraiso?

³⁶ Human sa dakong gubat sa Armagedon, palapdon pa ni Jesus ang buluhaton sa pagpasig-uli nga maglakip bisan sa literal nga yuta. Sa iyang Usa ka Libo ka Tuig nga Pagmando, iyang giyahan ang katawhan sa paghimo sa atong planeta nga tibuok yutang tanaman sa Eden, usa ka paraiso, sumala gayod sa katuyoan ni Jehova! (Luc. 23:43) Unya ang tanang tawo magkahiusa na ug dili na magdaot sa yuta. Wala nay kapeligrohan o kahadlokan bisan asa. Hunahunaa ang panahon dihang matuman na bisan kining saara: “Maghimo kog pakigsaad sa pakigdait uban kanila, ug wagtangon nako sa yuta ang bangis nga ihalas nga mga mananap, aron luwas silang magpuyo sa kamingawan ug mangatulog sa kalasangan.”​—Ezeq. 34:25.

³⁷ Imo ba nang ma-imagine? Dili na ka mahadlok nga moadto bisan asa sa yuta. Walay hayop nga mangunsa nimo. Walay kapeligrohan nga motugaw sa imong kalinaw. Makalakaw ka nga nag-inusara  sa tunga sa lasang, mahingangha sa kanindot niini, ug matulog pa gani didto nga luwas, ug makaseguro ka nga makamata ka nga nakapahulayg maayo ug wa maunsa!

38. Unsay imong pagbati dihang imong makita nga matuman ang saad sa Ezequiel 28:26?

³⁸ Makita sab nato nga matuman kining saara: “Sila mopuyo [sa yuta] nga may kasegurohan ug magtukod ug mga balay ug magtanom ug mga ubasan, ug mopuyo sila sa kasegurohan dihang hukman nako ang tanang anaa sa ilang palibot nga nagtamay kanila; ug sila makaila gayod nga ako si Jehova nga ilang Diyos.” (Ezeq. 28:26) Dihang mahanaw na ang tanang kaaway ni Jehova, atong matagamtam ang kalinaw ug kasegurohan sa tibuok kalibotan. Samtang atong atimanon ang yuta, maatiman sab nato ang atong kaugalingon ug ang atong mga minahal, nga magtukod ug komportableng mga balay nga kapuy-an ug magtanom ug mga ubasan.

39. Nganong makaseguro ka nga matuman gyod ang mga tagna nga girekord ni Ezequiel bahin sa Paraiso?

³⁹ Kini ba nga mga saad mora rag damgo alang nimo? Hinumdomi kon unsa nay imong nakita niining panahon sa “pagpasig-uli sa tanang butang.” Bisan pa sa grabe kaayong pagsupak ni Satanas, si Jesus gihatagag gahom sa pagpasig-uli sa putling pagsimba niining kinalisorang panahon sa kalibotan. Pagkadakong pamatuod nga ang tanang saad sa Diyos pinaagi kang Ezequiel matuman gayod!