1, 2. (a) Unsang desisyon ang giatubang natong tanan? (b) Unsay reaksiyon sa matinumanong anghel dihang simbahon na unta siya?

 MATAG usa kanato angayng motubag niining importante kaayong pangutana: Kinsay akong simbahon? Daghan ang moingon nga kini nga pangutana komplikado, ug makalibog kon kinsay pilion. Pero ang tinuod, klaro ug simple ra ang tubag​—si Jehova nga Diyos ba ang atong simbahon o si Satanas nga Yawa.

² Gusto kaayo ni Satanas nga simbahon siya. Naklaro kana ilabina dihang gitental niya si Jesus. Sa gihisgotan na sa Kapitulo 1 niini nga publikasyon, gitanyagan ni Satanas si Jesus ug dako kaayong ganti​—awtoridad ibabaw sa tanang gingharian sa yuta. Unsa may gusto sa Yawa ingong balos? ‘Simbaha ko,’ iyang giingnan si Jesus. (Mat. 4:9) Pero lahi kaayo ang anghel nga nagpakitag panan-awon kang apostol Juan, kay wala siya mosugot nga simbahon. (Basaha ang Pinadayag 22:8, 9.) Dihang simbahon na unta ni Juan ang anghel, ang maong mapainubsanong espiritung anak sa Diyos miingon: “Ayaw nag buhata!” Imbes moingon ug ‘Simbaha ko,’ ang anghel miingon, “Ang Diyos maoy simbaha.”

3. (a) Unsay tumong niini nga publikasyon? (b) Unsay atong hisgotan karon?

³ Tumong niini nga publikasyon nga palig-onon ang atong determinasyon nga buhaton ang gisugo sa maong anghel​—nga si Jehova  nga Diyos lang ang simbahon. (Deut. 10:20; Mat. 4:10) Repasohon nato kadiyot kon unsay atong nakat-onan bahin sa putling pagsimba gikan sa mga tagna ug panan-awon ni Ezequiel. Dayon, sa tabang sa Kasulatan, hisgotan nato ang umaabot nga panahon dihang ang matag tawo sa yuta mag-atubang ug kataposang pagsulay​—pagsulay nga mahimong basehanan sa kon kinsa unyay mabuhi aron makakita nga bug-os nang mapasig-uli ang putling pagsimba kang Jehova hangtod sa hangtod.

4. Unsa ang tulo ka tema nga gipasiugda sa basahon sa Ezequiel?

⁴ Ang basahon sa Ezequiel nagtudlo nato nga ang putling pagsimba dili lang basta paghimog mga rituwal. Kinahanglan nga (1) atong ihatag kang Jehova ang eksklusibong debosyon, (2) magpabilin tang nahiusa sa hinlong pagsimba, ug (3) magpakita tag gugma sa uban. Matikdi kon sa unsang paagi ang mga tagna ug panan-awon nga gihisgotan niini nga publikasyon nagpasiugda niining tulo ka tema.

5-9. Unsay atong nakat-onan bahin sa paghatag kang Jehova ug eksklusibong debosyon?

⁵ Kapitulo 3: * Ang makapahinganghang panan-awon bahin kang Jehova nga gilibotan ug balangaw, o rainbow, ug nagsakay ibabaw sa gamhanang espiritung mga linalang nagpasiugda nato sa importanteng kamatuoran​—ang Labing Gamhanan lang ang takos sa atong pagsimba.​—Ezeq. 1:4, 15-28.

⁶ Kapitulo 5: Makapakurat gyod nga makita diha sa panan-awon nga ang templo ni Jehova gihugawan! Gipakita sa panan-awon nga walay matago kang Jehova. Iyang makita ang dili maunongong mga buhat, sama sa dihang ang iyang katawhan misimbag mga idolo, bisan pag gibuhat kini sa tago. Masakitan siya sa maong mga buhat ug silotan niya ang nagabuhat niana.​—Ezeq. 8:1-18.

⁷ Kapitulo 7: Ang paghukom batok sa palibot nga mga nasod nga ‘grabeng nagtamay’ sa Israel nagpakita nga papanubagon ni Jehova kadtong magdaogdaog sa iyang katawhan. (Ezeq. 25:6) Pero naa pod tay makat-onan sa pagpakiglabot sa Israel sa maong mga nasod​—kinahanglang mas magmaunongon ta kang Jehova kay kang bisan kinsa o bisan unsa. Dili gyod nato ipaubos ang atong mga sukdanan aron mopahiuyon sa atong mga paryente nga wala magsimba kang Jehova; dili sab ta mosalig sa bahandi o mokompromiso sa atong neyutralidad pinaagi sa paghatag ngadto sa mga gobyerno sa tawo sa debosyon nga angay lang ihatag kang Jehova.

⁸ Kapitulo 13 ug 14: Ang panan-awon bahin sa templo diha sa habog nga bukid nagtudlo nato nga kinahanglan tang magkinabuhi uyon sa taas nga mga sukdanan ni Jehova, kay atong giila nga siya labaw sa tanang ubang diyos.​—Ezeq. 40:1–48:35.

 ⁹ Kapitulo 15: Ang pagkahulagway sa Israel ug Juda ingong mga pampam nagpahinumdom nato kon unsa ka makaluod para kang Jehova ang espirituwal nga pagpanapaw.​—Ezeq., kap. 16, 23.

10-14. Sa unsang paagi gipasiugda ang panginahanglan nga magpabilin tang nahiusa sa hinlong pagsimba?

¹⁰ Kapitulo 8: Ang mga tagna nga si Jehova magpatunghag “usa ka magbalantay” nga mag-atiman sa Iyang katawhan nagpasiugda nga sa atong pagpakiglabot sa mga igsoon, kinahanglan tang magkahiusa ug magmalinawon ubos sa pagpanguna ni Jesus.​—Ezeq. 34:23, 24; 37:24-28.

¹¹ Kapitulo 9: Ang mga tagna ni Ezequiel bahin sa pagpagawas sa katawhan sa Diyos gikan sa pagkabihag sa Babilonya ug pagpasig-uli kanila ngadto sa ilang yutang natawhan dunay mensahe para niadtong gustong mapalipay si Jehova karon. Ang hinlong mga magsisimba ni Jehova kinahanglang mobulag ug magpabiling bulag sa makadaot nga impluwensiya sa bakak nga relihiyon. Bisag naggikan sa daghang lainlaing relihiyon, kahimtang sa kinabuhi, ug rasa, kinahanglang magpabilin tang nahiusa, nga makatabang nga mailhan ta ingong katawhan sa Diyos.​—Ezeq. 11:17, 18; 12:24; Juan 17:20-23.

¹² Kapitulo 10: Ang tema sa panaghiusa gipasiugda sa panan-awon bahin sa uga nga mga bukog nga nabuhi. Pribilehiyo gyod nato nga mahimong bahin sa napasig-uling grupo sa nahinloang mga magsisimba nga nagtinabangay ingong kasundalohan!​—Ezeq. 37:1-14.

¹³ Kapitulo 12: Ang panaghiusa ilabinang napasiugda sa tagna bahin sa duha ka estik nga gitapo. Makapalig-on gyod sa pagtuo nga makita nga kanang tagnaa gituman sa mga dinihogan ug sa ubang mga karnero! Bisag nagpuyo sa kalibotan nga nabahinbahin tungod sa pagdumtanay sa relihiyon ug politika, kita pabiling nagkahiusa tungod sa gugma ug pagkamaunongon.​—Ezeq. 37:15-23.

¹⁴ Kapitulo 16: Ang panan-awon bahin sa lalaki nga dunay tintiro ug mga lalaki nga nagbitbit ug mga hinagiban nga pangdugmok dunay seryosong pasidaan​—kadto lang makasulod sa “dakong kasakitan” ingong putling mga magsisimba ang mamarkahan para sa kaluwasan.​—Mat. 24:21; Ezeq. 9:1-11.

15-18. Nganong angay tang magpadayon sa pagpakitag gugma, ug unsaon nato kana paghimo?

¹⁵ Kapitulo 4: Ang panan-awon bahin sa upat ka buhing linalang nagtudlo nato sa mga hiyas ni Jehova, nga ang kinalabwan mao ang gugma. Dihang kita mosulti ug molihok sa mahigugmaong paagi, atong gipamatud-an nga si Jehova ang atong Diyos.​—Ezeq. 1:5-14; 1 Juan 4:8.

¹⁶ Kapitulo 6 ug 11: Ang gugma sa Diyos nagpalihok niya sa pagtudlog mga tigbantay, sama kang Ezequiel. Kay ang Diyos gugma, dili niya gusto nga naay malaglag dihang taposon niya ang pagmando ni Satanas sa yuta. (2 Ped. 3:9) Duna tay pribilehiyo sa pagpakita  sa gugma sa Diyos pinaagi sa pagtuman sa atong responsibilidad nga suportahan ang buluhaton sa tigbantay karon.​—Ezeq. 33:1-9.

¹⁷ Kapitulo 17 ug 18: Si Jehova nahibalo nga daghan ang dili modawat sa iyang kaluoy ug mosulay sa pagpuo sa iyang maunongong mga magsisimba. Ang gugma magpalihok kang Jehova sa pagdepensa sa iyang katawhan dihang si “Gog sa yuta sa Magog” moatake niadtong maunongon Kaniya. Ang gugma para sa uban modasig nato nga pasidan-an ang mas daghan pang tawo kutob sa atong maarangan nga laglagon ni Jehova kadtong magdaogdaog sa iyang katawhan.​—Ezeq. 38:1–39:20; 2 Tes. 1:6, 7.

¹⁸ Kapitulo 19, 20, ug 21: Ang gugma ni Jehova sa katawhan makita gyod diha sa panan-awon sa nag-agos nga tubig nga makahatag ug kinabuhi ug sa panan-awon sa pagbahinbahin sa yuta. Ang maong mga panan-awon nagpakita sa mga resulta sa kinadak-ang buhat sa gugma ni Jehova, ang paghatag sa kinabuhi sa iyang Anak aron mapasaylo ang atong mga sala ug matagamtam nato ang hingpit nga kinabuhi ingong bahin sa pamilya sa Diyos. Ang usa sa kinamaayohang mga paagi nga mapakita nato ang atong gugma sa katawhan mao ang pagsulti kanila bahin sa nindot nga kaugmaon nga giandam ni Jehova para niadtong dunay pagtuo sa iyang Anak.​—Ezeq. 45:1-7; 47:1–48:35; Pin. 21:1-4; 22:17.

19. Unsay himoon ni Jesus panahon sa Usa ka Libo ka Tuig nga Pagmando? (Tan-awa ang kahong “Pag-atubang sa Kataposang Pagsulay.”)

¹⁹ Panahon sa Usa ka Libo ka Tuig nga Pagmando, buhion pag-usab ni Jesus ang binilyong tawo ug ayohon niya ang kasakit nga gipahinabo sa atong “kaaway, ang kamatayon.” (1 Cor. 15:26; Mar. 5:38-42; Buh. 24:15) Ang kasaysayan sa tawo nahisamag makapasakit sa dughan nga estorya nga punog kagul-anan ug pag-antos. Pero samtang buhion pag-usab ni Jesus ang matag henerasyon, iyang papason ang makaguol kaayo nga estorya ug hatagan ug kahigayonan ang mga binanhaw sa pagsulat ug mas maayong estorya. Base sa halad lukat, wad-on niya ang tanang kadaot nga gipahinabo sa sakit, gubat, ug kagutom. Labaw pa niana, iya tang tabangan nga lukahon ug wagtangon ang pangunang hinungdan sa atong kasub-anan​—ang sala nga atong napanunod kang Adan. (Roma 5:18, 19) Bug-os nga “gub-on [ni Jesus] ang mga buhat sa Yawa.” (1 Juan 3:8) Unsay sunod nga mahitabo?

20. Sa unsang paagi si Jesus ug ang 144,000 magpakitag talagsaong pagpaubos? Ipatin-aw. (Tan-awa ang hulagway sa sinugdan sa kapitulo.)

²⁰ Basaha ang 1 Corinto 15:24-28. Dihang hingpit na ang kinabuhi sa tanang tawo, dihang ang yuta mahimo na gyong Paraiso nga maoy orihinal nga katuyoan ni Jehova, si Jesus ug ang 144,000 nga kauban niyang magmamando magpakitag talagsaong pagpaubos; ilang ibalik kang Jehova ang Gingharian. Kinabubut-on ug malinawon nilang ibalik ang awtoridad nga ilang nabatonan sa 1,000 ka tuig. Ang tanang nalampos sa Gingharian magpabilin hangtod sa hangtod.

21, 22. (a) Unsay kahimtang sa kalibotan sa kataposan sa 1,000 ka tuig? (b) Nganong buhian ni Jehova si Satanas ug ang mga demonyo?

²¹ Human niana, si Jehova mohimog talagsaong butang, nga magpakita nga dako siyag pagsalig sa iyang mga sakop sa yuta. Magsugo siya nga buhian si Satanas ug ang mga demonyo gikan sa kahiladman diin sila gibilanggo sa 1,000 ka tuig. (Basaha ang Pinadayag 20:1-3.) Ang kalibotan nga ilang makita lahi kaayo sa kalibotan nga ilang nahibaloan. Sa wala pa ang Armagedon, ang kadaghanan sa mga tawo napahisalaag ni Satanas ug nagkabahinbahin ang katawhan tungod sa pagdumot ug pagpihigpihig. (Pin. 12:9) Pero sa kataposan sa 1,000 ka tuig, ang tanang tawo magsimba kang Jehova ingong nahiusa ug naghigugmaay nga pamilya. Ang yuta mahimo nang malinawon nga Paraiso.

²² Nganong buhian ni Jehova ang mga kriminal, si Satanas ug ang mga demonyo, niining hinlo nga kahimtang? Kay ang pagkamaunongon sa kadaghanan sa mga buhi sa kataposan sa 1,000 ka tuig  ingong matinumanong mga magsisimba ni Jehova wala pa masulayi. Ang kadaghanan namatay nga wala makaila kang Jehova ug dayon gibanhaw sa Paraiso. Dili lang kinabuhi ang gihatag ni Jehova kanila kondili ang tanan sab nilang pisikal ug espirituwal nga panginahanglan. Wala sila makasinatig negatibong mga impluwensiya, pulos lang positibo. Nalibotan silag mga tawo nga nahigugma ug nag-alagad kang Jehova. Si Satanas makaakusar niining mga binanhaw sa samang butang nga iyang giakusar kang Job​—nga nag-alagad lang sila sa Diyos kay iya silang giprotektahan ug gipanalanginan. (Job 1:9, 10) Busa sa dili pa permanenteng isulat ni Jehova ang atong ngalan diha sa basahon sa kinabuhi, hatagan ta niyag higayon nga pamatud-an nga dili gyod kaduhaduhaan ang atong pagkamaunongon kaniya ingong atong Amahan ug Soberano.​—Pin. 20:12, 15.

23. Unsang isyu ang atubangon sa matag indibiduwal?

²³ Sa mubong panahon, si Satanas hatagag higayon sa pagtental sa katawhan nga mohunong sa pagsimba sa Diyos. Unsa kana nga  pagsulay? Seguradong ang matag indibiduwal mag-atubang ug samang isyu nga naatubang ni Adan ug Eva​—modawat ba siya sa mga sukdanan ni Jehova, mosuportar sa iyang pagmando, ug mosimba kaniya, o kaha morebelde sa Diyos ug mosuportar kang Satanas.

24. Nganong ang maong mga rebelde gitawag nga Gog ug Magog?

²⁴ Basaha ang Pinadayag 20:7-10. Makapainteres nga kadtong morebelde sa kataposan sa 1,000 ka tuig gitawag nga Gog ug Magog. Magpakita silag mga tinamdan nga sama sa mga rebelde nga gitagna ni Ezequiel nga moatake sa katawhan sa Diyos panahon sa dakong kasakitan. Ang unang grupo, ang “Gog sa yuta sa Magog,” nabahin ngadto sa mga nasod nga mibatok sa pagmando ni Jehova. (Ezeq. 38:2) Sa susama, kadtong morebelde sa kataposan sa Milenyong Pagmando sa Kristo gihisgotan ingong “kanasoran.” Makapainteres ang paggamit niining pulonga. Ngano? Kay panahon sa Usa ka Libo ka Tuig nga Pagmando, wala nay nasodnong pagkabahinbahin; ang tanang tawo sakop na sa usa ka gobyerno, ang Gingharian sa Diyos. Mahimo na tang sakop sa usa ka espirituwal nga nasod. Pinaagi sa pagtawag niini nga mga rebelde nga Gog ug Magog ug nga  sila “kanasoran,” gipakita sa tagna nga si Satanas molampos sa pagpahinabog pagkabahinbahin sa ubang sakop sa katawhan sa Diyos. Walay pugson sa pagdapig kang Satanas. Ang matag hingpit nga indibiduwal ang mohimog desisyon.

25, 26. Unsa ka daghan ang moduyog kang Satanas, ug unsay mahitabo kanila?

²⁵ Unsa ka daghan ang moduyog kang Satanas? Ang gidaghanon niadtong morebelde maoy “sama sa balas sa dagat.” Kini nga prase wala magpasabot nga dakong bahin sa katawhan ang morebelde. Nganong nahibalo ta? Matikdi ang gisaad kang Abraham. Si Jehova miingon nga ang kaliwat ni Abraham mahimong sama sa “balas sa baybayon.” (Gen. 22:17, 18) Pero ang gidaghanon sa iyang kaliwat maoy 144,001. (Gal. 3:16, 29) Kana nga gidaghanon, bisag daghan, gamay lang kon itandi sa total nga gidaghanon sa katawhan. Sa susama, daghan ang moduyog kang Satanas, pero dili sobra ka daghan. Ang mga rebelde dili makahimog kadaot sa maunongong mga alagad ni Jehova.

²⁶ Kadtong moapil sa rebelyon laglagon dayon. Uban kang Satanas ug sa mga demonyo, sila dili na maglungtad​—nga walay paglaom nga mabuhi pa pag-usab. Ang ilang dili maayong mga desisyon  ug ang resulta sa maong mga desisyon mao na lang ang mahinumdoman hangtod sa hangtod.​—Pin. 20:10.

27-29. Unsay naghulat niadtong magmatinumanon sa kataposang pagsulay?

²⁷ Sa laing bahin, ang mga ngalan niadtong magmatinumanon sa kataposang pagsulay permanenteng masulat sa “basahon sa kinabuhi.” (Pin. 20:15) Dayon, ingong nahiusang pamilya, ang tanang maunongong anak ni Jehova maghatag niya sa pagsimba nga angay gyod kaniya.

²⁸ Hunahunaa kana nga kaugmaon. Ang imong kinabuhi puno unyag makapalipay nga buluhaton ug panaghigalaay. Ikaw o ang imong mga minahal dili na gyod mag-antos. Dili na ta magkinahanglan sa halad ni Jesus aron makabarog nga walay sala sa atubangan ni Jehova. Wala nay makababag sa matag tawo sa pagpakighigala sa Diyos. Ug labaw sa tanan, sa langit ug yuta, ang putling pagsimba mahimo na sa hingpit nga paagi. Mao kana ang bug-os nga pagpasig-uli sa putling pagsimba!

²⁹ Tua ba unya ka didto aron makita ang maong nindot kaayo nga panahon? Oo, kon padayon nimong ipadapat ang tulo ka importanteng leksiyon sa basahon sa Ezequiel​—ang paghatag kang Jehova ug eksklusibong debosyon, pagpabiling nahiusa sa hinlong pagsimba, ug pagpakitag gugma sa uban. Ang mga tagna ni Ezequiel duna pay pangataposan ug importante kaayo nga leksiyon. Unsa kana?

30, 31. Unsay ipasabot sa pahayag nga “sila makaila gayod nga ako si Jehova” ngadto sa (a) mga kaaway sa Diyos? (b) katawhan sa Diyos?

³⁰ Sa tibuok basahon sa Ezequiel, ang pahayag nga “sila makaila gayod nga ako si Jehova” kadaghan gibalikbalik. (Ezeq. 6:13; 39:28) Para sa mga kaaway sa Diyos, kini nga pahayag nagpasabot ug gubat ug kamatayon. Mapugos sila sa pag-ila nga naglungtad si Jehova, pero dili kay kana ra. Tungod sa pait nga kahimtang nga ila unyang masinati, makat-onan nila ang kahulogan sa iyang bantogang ngalan​—“Siya Nagpahinabo nga Mahimong.” Si “Jehova sa mga panon,” o kasundalohan, mahimong “gamhanang manggugubat” nga makig-away kanila. (1 Sam. 17:45; Ex. 15:3) Ulahi na ang tanan dihang masabtan nila ang importanteng kamatuoran bahin kang Jehova: Walay makapugong niya sa pagtuman sa iyang katuyoan.

³¹ Para sa katawhan sa Diyos, ang pahayag nga “sila makaila gayod nga ako si Jehova” magpasabot ug kalinaw ug kinabuhi. Ipahinabo ni Jehova nga mahimo tang iyang mga anak nga hingpit nga magpakita sa iyang mga hiyas, nga maoy orihinal niyang katuyoan para nato. (Gen. 1:26) Karon, si Jehova maoy atong mahigugmaong Amahan ug atong Magbalantay nga andam manalipod nato. Sa dili madugay, siya mahimong atong nagapangdaog nga Hari. Sa dili pa moabot kanang adlawa, atong seryosohon ang mensahe ni Ezequiel. Atong pamatud-an sa atong mga pulong ug buhat kada adlaw nga nakaila ta kon kinsa si Jehova ug kon unsa siyang klaseha sa Diyos. Dayon, dihang ang malaglagong mga hangin sa dakong kasakitan buhian, dili ta mahadlok. Hinuon, atong ihangad ang atong mga ulo, kay nahibalo ta nga duol na ang atong kaluwasan. (Luc. 21:28) Sa karon, hinaot tabangan nato ang mga tawo bisan asa nga makaila ug mahigugma sa Diyos nga mao lang ang takos simbahon, ang Usa nga nakabaton sa kinalabwang ngalan​—Jehova.​—Ezeq. 28:26.