Minahal nga mga Igsoong Nahigugma Kang Jehova:

Kadto maoy tuig 1971. Ang mga nanambong sa “Divine Name” District Assembly nianang tuiga nalipay pag-ayo kay nakadawat silag bag-ong mga publikasyon. Ang 1972 Yearbook nag-ingon nga ang maong mga publikasyon maoy “sobra pa sa gidahom.” Bahin sa usa sa mga bag-ong gi-release, ang usa ka brader miingon: “Sukad masukad, kini ang pinakaeksayting nga impormasyon bahin sa kon unsay mahitabo sa umaabot!” Unsay iyang gipasabot? Mao kadto ang librong “The Nations Shall Know That I Am Jehovah”​—How? Nganong nalipay kaayo sila sa maong basahon? Kay kini naghatag ug kinabag-ohang eksplinasyon sa mga tagna sa basahon sa Bibliya nga Ezequiel​—mga tagna nga makaapektar sa umaabot sa tanang tawo.

Sa mga tuig sukad gi-release ang librong ‘Know Jehovah,’ ang katawhan sa Diyos midaghan pag-ayo​—gikan sa mga 1.5 ka milyon ngadto sa kapig 8 ka milyon. (Isa. 60:22) Ang minilyong alagad ni Jehova nagsultig kapin sa 900 ka pinulongan. (Zac. 8:23) Daghan ang wala makasulay sa pagtuon ug libro nga detalyadong nagpatin-aw sa mga tagna gikan sa Diyos nga gisulat ni propetang Ezequiel.

Dugang pa, sa mga dekada sukad sa 1971, ang atong pagsabot sa daghang kamatuoran sa Bibliya miuswag pag-ayo samtang ang kahayag nagkasanag. (Prov. 4:18) Sugod sa 1985, nagkatin-aw ang atong pagsabot kon sa unsang paagi ang “ubang mga karnero” gipahayag nga matarong ingong mga higala sa Diyos. (Juan 10:16; Roma 5:18; Sant. 2:23) Dayon sa 1995, nasabtan nato sa unang higayon nga ang kataposang paghukom sa “mga karnero” ug sa “mga kanding” mahitabo sa “dakong kasakitan.” (Mat. 24:21; 25:31, 32) Kining tanan nga kausaban nakaapektar sa atong pagsabot sa basahon sa Ezequiel.

Sa di pa dugayng katuigan, padayon pang misanag ang kahayag. Matikdi ang mga leksiyon nga atong nakat-onan sa mga ilustrasyon ni Jesus. Daghan sa maong mga leksiyon tin-aw na kaayo karon sa atong hunahuna ug kasingkasing. Daghan sa maong mga ilustrasyon nagtumong sa mga hitabo sa dakong kasakitan nga hapit na gyong moabot. Sa susama, ang atong pagsabot sa pipila ka tagna sa basahon sa Ezequiel nahimong tin-aw. Kini ang mga tagna bahin kang Gog sa Magog (kapitulo 38 ug 39), sa buluhaton sa lalaki nga may tintiro sa sekretaryo (kapitulo 9), ug sa walog sa uga nga mga bukog ug sa simbolikong pagtapo sa duha ka estik (kapitulo 37). Kining tanan nga katin-awan maoy kausaban sa kon unsay gisulat sa librong ‘Know Jehovah’ katuigan kanhi.

Busa dili ikatingala nga daghan sa katawhan ni Jehova ang nangutana, “Kanus-a mi makabaton ug libro nga maghatag ug mas bag-ong eksplinasyon sa mga tagna ni Ezequiel?” Ang tubag niana mao ang librong Putli nga Pagsimba Kang Jehova—Napasig-uli Na Gyod! Samtang imong basahon ang 22 ka kapitulo ug pamalandongon ang nindot nga mga hulagway niini, makaingon gyod ka nga grabe ang pag-research nga gihimo para niini. Daghang pag-ampo ug pagpamalandong ang gihimo aron masabtan kon nganong gihatag ni Jehova kining makapahinganghang basahon sa Bibliya nga Ezequiel. Gikonsiderar pag-ayo ang mga pangutanang sama sa: Unsang mga leksiyon ang gitudlo sa basahon sa Ezequiel para niadtong nabuhi sa panahon ni Ezequiel ug para nato karon? Unsang mga tagna ang matuman pa sa umaabot? Angay  ba tang mangitag simbolo ug gisimbolohan diha sa mga tagna ni Ezequiel? Ang mga tubag niini maghatag ug pinakatin-aw nga pagsabot sukad niining nindot kaayo nga basahon sa Bibliya.

Samtang imong basahon ang Ezequiel gikan sa sinugdanan hangtod sa kataposan, mahingangha gyod ka sa langitnong bahin sa organisasyon ni Jehova. Seguradong mahingangha sab ka sa taas nga mga sukdanan ni Jehova para niadtong tua sa langit ug nia dinhi sa yuta nga gustong mosimba niya sa dalawatong paagi. Ang librong Putli nga Pagsimba makatabang nga modako ang imong apresasyon sa nahimo na ni Jehova para sa iyang katawhan ug sa himoon pa niya sa dili na madugay. Mamatikdan nimo nga kining libroha balikbalik nga nagpasiugda sa duha ka tema. Una, aron mapalipay si Jehova, kinahanglang makaila ta niya ug ilhon nato siya ingong Soberano sa Uniberso. Ikaduha, kinahanglang atong simbahon si Jehova sa paagi nga iyang giuyonan, nga ipahiuyon ang atong kinabuhi sa iyang taas nga mga sukdanan.

Nanghinaot gyod mi nga kining publikasyona makapalig-on sa inyong determinasyon nga simbahon si Jehova sa paagi nga makapasidungog sa iyang bantogan ug balaan nga ngalan. Hinaot nga kini makadasig sab ninyo nga padayong magpaabot sa panahon dihang ang tanang kanasoran makaila nga siya si Jehova.​—Ezeq. 36:23; 38:23.

Hinaot nga ang atong mahigugmaong Amahan, si Jehova, dagayang magpanalangin sa inyong paningkamot nga sabton ang basahon nga iyang gipasulat kang propetang Ezequiel.