Sumaryo sa mga Katin-awan
Sulod sa daghang katuigan, gihisgotan sa Ang Bantayanang Torre ang mga kausaban sa atong pagsabot sa daghang bahin sa tagna ni Ezequiel. Ug kini nga publikasyon, Putli nga Pagsimba Kang Jehova—Napasig-uli Na Gyod!, dunay daghang dugang nga katin-awan. Sulayi kon matubag nimo ang mosunod nga mga pangutana.
Unsay gisimbolohan sa upat ka nawong sa buhing mga linalang?
Pagsabot kaniadto: Ang matag usa sa upat ka nawong sa buhing mga linalang, o kerubin, nagsimbolo sa usa sa upat ka pangunang mga hiyas ni Jehova.
Katin-awan: Bisag ang matag usa sa upat ka nawong sa buhing mga linalang nagrepresentar sa usa sa upat ka pangunang hiyas ni Jehova, kon lantawon sa katibuk-an ang upat ka nawong naglangkob sa tanan niyang hiyas. Dugang pa, ang upat ka nawong seguradong nakapahunahuna nato sa dili hitupngang gahom ug himaya ni Jehova.
Kon nganong giusab: Sa Pulong sa Diyos, ang numero kuwatro sagad nagtumong sa pagkakompleto, apil tanan o walay kulang. Busa dihang ang upat ka nawong lantawon sa katibuk-an, kini dili lang upat ka lainlaing hiyas—kini mismo ang pundasyon sa makapahinganghang personalidad ni Jehova. Dugang pa, ang matag nawong iya sa linalang nga nagsimbolo sa kahalangdon, kusog, ug gahom. Bisan pa niana, ang upat ka gamhanang representante sa kalalangan nahimutang ubos sa trono ni Jehova. Kana nga pagkahulagway nagpasiugda nga si Jehova ang Kinalabwang Magmamando sa tanan.
Kang kinsa nagrepresentar ang lalaki nga dunay tintiro sa sekretaryo?
Pagsabot kaniadto: Ang lalaki nga dunay tintiro nagrepresentar sa dinihogang nanghibilin. Pinaagi sa buluhatong pagsangyaw ug paghimog tinun-an, ang mga dinihogan nagabutang na karon ug simbolikong marka sa mga agtang niadtong mahimong bahin sa “dakong panon.”—Pin. 7:9.
Katin-awan: Ang lalaki nga dunay tintiro sa sekretaryo nagrepresentar kang Jesu-Kristo. Markahan niya ang dakong panon dihang sila hukman ingong karnero panahon sa “dakong kasakitan.”—Mat. 24:21.
Kon nganong giusab: Gisalig ni Jehova ang pagpanghukom ngadto sa iyang Anak. (Juan 5:22, 23) Sumala sa Mateo 25:31-33, si Jesus ang mohimo sa kataposang paghukom kon kinsa ang “mga karnero” ug kon kinsa ang “mga kanding.”
Ang pampam ba nga magsoon, si Ohola ug Oholiba, nagsimbolo sa Kakristiyanohan, ilabina sa duha ka pangunang dibisyon niini nga mao ang Katoliko ug Protestante?
Pagsabot kaniadto: Ang magulang nga si Ohola (ang Samaria, kaulohan sa Israel) nagsimbolo sa Katoliko; ang manghod nga si Oholiba (ang Jerusalem, kaulohan sa Juda) nagsimbolo sa Protestante.
Katin-awan: Kining pampam nga magsoon wala magsimbolo sa Kakristiyanohan. Pero ang paghisgot sa Bibliya bahin kanila nagtudlo nato sa kon unsay bation ni Jehova dihang ang iyang mga alagad nga maunongon niya sa sinugdan mohimog espirituwal nga prostitusyon. Ingon sab niana ang iyang pagbati sa tanang bakak nga relihiyon.
Kon nganong giusab: Walay basehanan sa Kasulatan nga si Ohola ug Oholiba nagsimbolo sa Kakristiyanohan. Ang Israel ug Juda maoy samag maunongong asawa ni Jehova sa sinugdan, pero ang Kakristiyanohan wala gyod sukad mahimong asawa ni Jehova. Dugang pa, ang pagtandi sa dili matinumanong katawhan sa Diyos ngadto sa mga pampam diha sa Ezequiel kapitulo 16 ug 23 naghatag ug paglaom sa pagpasig-uli. Ang Kakristiyanohan, ingong bahin sa Bantogang Babilonya, walay ingon niana nga paglaom.
Ang karaang apostatang Jerusalem ba nagsimbolo sa Kakristiyanohan?
Pagsabot kaniadto: Ang dili matinumanong Jerusalem nagsimbolo sa Kakristiyanohan. Busa ang kalaglagan sa Jerusalem nagsimbolo sa mahitabong kalaglagan sa Kakristiyanohan.
Katin-awan: Ang kahimtang sa dili matinumanong Jerusalem—apil ang idolatriya ug kaylap nga pagkadaotan—makapahunahuna nato sa nagakahitabo sa Kakristiyanohan, pero dili na ta moingon nga ang Jerusalem nagsimbolo sa Kakristiyanohan.
Kon nganong giusab: Walay tin-awng basehanan sa Kasulatan ang pagsabot kaniadto. Dili sama sa karaang Jerusalem, ang Kakristiyanohan wala gyod sukad magsimba sa putli nga paagi. Ug dili sama sa Jerusalem nga dihay higayon nga gipasaylo ni Jehova, ang Kakristiyanohan wala gyoy kapasayloan.
Sa unsang paagi natuman ang panan-awon bahin sa patag sa uga nga mga bukog?
Pagsabot kaniadto: Sa 1918, ang gilutos nga mga dinihogan gibihag sa Bantogang Babilonya, nga nakasinatig samag patay nga kahimtang kay halos nahunong ang ilang buluhaton. Kanang kadiyot nga pagkabihag natapos sa 1919 dihang gipasig-uli sila ni Jehova ingong mga magmamantala sa Gingharian.
Katin-awan: Ang samag patay nga kahimtang diha sa espirituwal nga pagkabihag nagpadayon sa taas nga panahon ug dugay nang nagsugod una pa sa 1918. Kini nagsugod sa ikaduhang siglo C.E. ug natapos sa 1919 C.E. ug halos parehas sa gitas-on sa panahon sa pagtubo sa mga trigo ug mga bunglayon sa ilustrasyon ni Jesus.
Kon nganong giusab: Ang karaang Israel nabihag sa taas nga panahon, sugod sa 740 B.C.E. hangtod sa 537 B.C.E. Gihisgotan sa tagna ni Ezequiel nga ang mga bukog “uga” o “uga kaayo,” nga nagpakitang ang girepresentahan sa mga bukog maoy patay sa taas kaayong panahon. Ug gihisgotan nga ang pagpasig-uli sa mga bukog anam-anam nga mahitabo sa taas nga panahon.
Unsay kahulogan sa pagtapo sa duha ka estik?
Pagsabot kaniadto: Human sa kadiyot nga pagkabahinbahin panahon sa Gubat sa Kalibotan I, ang matinumanong mga membro sa dinihogang nanghibilin nagkahiusa pag-usab sa 1919.
Katin-awan: Gipasiugda sa tagna nga si Jehova ang magpahinabo nga mahiusa ang iyang mga magsisimba. Human sa 1919, sa paglabay sa panahon, nakig-uban niining mga sakop sa dinihogang nanghibilin ang nagkadaghang tawo nga dunay yutan-ong paglaom. Kining duha ka grupo nagsimba kang Jehova ingong usa ka katawhan.
Kon nganong giusab: Ang tagna wala maghisgot ug usa ka estik nga nabahin sa duha ug gitapo sa ulahi. Busa ang tagna wala maghisgot ug usa ka grupo nga nabahin ug nahiusa sa ulahi. Hinuon, kini naghisgot kon sa unsang paagi ang duha ka grupo mahimong usa.
Kinsa si Gog sa Magog?
Pagsabot kaniadto: Ang Gog sa Magog maoy matagnaong ngalan ni Satanas human siya pahawaa sa langit.
Katin-awan: Ang titulong Gog sa Magog nagtumong sa mag-alyansang kanasoran nga moatake sa putling mga magsisimba panahon sa dakong kasakitan.
Kon nganong giusab: Ang gitagna bahin kang Gog—nga siya ipakaon sa mga langgam nga mandadagit ug hatagag lubnganan sa yuta—nagpakita nga si Gog dili espiritung linalang. Dugang pa, ang pag-atake ni Gog susama sa giingon sa basahon sa Daniel ug Pinadayag bahin sa pag-atake sa mga nasod sa yuta batok sa katawhan sa Diyos.—Dan. 11:40, 44, 45; Pin. 17:14; 19:19.
Ang nakita ug gilibot ni Ezequiel mao ba ang dakong espirituwal nga templo nga gipatin-aw ni apostol Pablo sa ulahi?
Pagsabot kaniadto: Ang templo sa panan-awon ni Ezequiel mao ra pod ang espirituwal nga templo nga gipatin-aw ni apostol Pablo.
Katin-awan: Ang nakita ni Ezequiel dili mao ang espirituwal nga templo nga nagsugod paglungtad sa 29 C.E., kondili usa ka hingpit nga ehemplo sa putling pagsimba sumala sa Moisesnong Balaod. Ang giniyahan sa Diyos nga eksplinasyon ni Pablo sa espirituwal nga templo nagpokus sa buluhaton nga gihimo ni Jesus gikan sa 29 hangtod sa 33 C.E. ingong ang Mas Dakong Hataas nga Saserdote. Ang panan-awon ni Ezequiel bahin sa templo, nga wala gyod maghisgot ug hataas nga saserdote, nagpokus sa espirituwal nga pagpasig-uli nga nagsugod sa 1919 C.E. Busa dili ta mangitag simbolikong kahulogan sa tanang detalyadong bahin ug sukod sa templo sa panan-awon ni Ezequiel. Hinuon, mas magpokus ta sa mga leksiyon sa panan-awon ni Ezequiel bahin sa mga sukdanan ni Jehova sa putling pagsimba.
Kon nganong giusab: Dunay dakong kalainan ang templo sa panan-awon ni Ezequiel ug ang espirituwal nga templo. Pananglitan, ang templo nga nakita ni Ezequiel dunay daghang halad nga hayop; sa espirituwal nga templo, usa lang ka halad ang gitanyag, “kausa alang sa tanang panahon.” (Heb. 9:11, 12) Sa kasiglohan sa wala pa moanhi ang Kristo, dili pa panahon nga ipadayag ni Jehova ang lalom nga mga kamatuoran bahin sa espirituwal nga templo.
