ANG karaang mga propeta nagpakitag pagtuo sa Diyos. Sila nagtuo sa iyang mga saad ug nagpabili niana diha sa ilang kinabuhi. Unsay pipila sa maong mga saad?

Human makasala si Adan ug Eva, dihadiha ang Diyos nagsaad nga aduna siyay itudlo nga maoy magdugmok sa ulo sa “halas,” nga nagtumong sa “dakong dragon, ang orihinal nga halas, ang usa nga gitawag Yawa ug Satanas,” nga maglaglag kaniya sa walay kataposan. (Genesis 3:14, 15; Pinadayag 12:9, 12) Kinsa ang Usa nga Moanhi nga gitudlo sa Diyos?

Mga 2,000 ka tuig human ihatag ang unang tagna, si Jehova nagsaad kang propeta Abraham nga ang Usa nga Moanhi maoy usa sa iyang mga kaliwat. Ang Diyos miingon kang Abraham: “Pinaagi sa imong binhi [o, kaliwat] ang tanang nasod sa yuta tinong magapanalangin sa ilang kaugalingon tungod kay ikaw namati sa akong tingog.”—Genesis 22:18.

Niadtong 1473 B.C.E., ang Diyos naghatag kang propeta Moises ug dugang impormasyon bahin sa “binhi.” Giingnan ni Moises ang mga anak ni Israel: ‘Usa ka manalagna gikan sa inyong taliwala, gikan sa inyong mga igsoon, sama kanako, mao ang patindogon ni Jehova nga inyong Diyos alang kaninyo—ngadto kaniya kamo magpatalinghog.’ (Deuteronomio 18:15) Sama kang Moises, ang maong propeta maggikan sa kaliwat ni Abraham.

Ang maong propeta maoy kaliwat usab ni Haring David ug mahimong usa ka dakong hari. Ang Diyos nagsaad kang Haring David: “Ako magbangon gayod sa imong binhi sunod kanimo, [ug] tukoron ko gayod nga malig-on ang trono sa iyang gingharian hangtod sa panahong walay tino.” (2 Samuel 7:12, 13) Gipadayag usab sa Diyos nga ang maong kaliwat ni David pagatawgong “Prinsipe sa Pakigdait,”  ug siya midugang: “Sa kadagaya sa prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron kini matukod nga lig-on ug mapatunhay kini pinaagi sa hustisya ug pinaagi sa pagkamatarong, sukad karon ug hangtod sa panahong walay tino.” (Isaias 9:6, 7) Oo, ang maong matarong nga Pangulo magpasig-uli sa kalinaw ug hustisya sa tibuok yuta. Apan kanus-a siya moabot?

Ang anghel nga si Gabriel miingon sa ulahi ngadto sa propeta sa Diyos nga si Daniel: “Angay kang mahibalo ug magbaton sa hait nga salabotan nga sukad sa paggula sa sugo sa pagpasig-uli ug sa pagtukod pag-usab sa Jerusalem hangtod sa Mesiyas nga Pangulo, adunay pito ka semana, ingon man kan-umag-duha ka semana.” (Daniel 9:25) Kana maoy 69 ka semana sa mga tuig—nga matag semana maoy 7 ka tuig—nga mototal sa 483 ka tuig. Kana magsugod sa 455 B.C.E. ug matapos sa 29 C.E. *

Ang Mesiyas, ang propeta nga sama kang Moises ug ang dugay-nang-gipaabot nga “binhi,” miabot ba gayod niadtong 29 C.E.? Atong tan-awon.