DAGHANG tawo karon ang nag-angkon nga sila adunay pagtuo. Apan si Jesus nagtudlo nga diyutay lamang ang makabatog tinuod nga pagtuo. Siya miingon: “Halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.”—Mateo 7:13, 14.

Sa unsang paagi gipakita sa mga tawo karon nga sila adunay tinuod nga pagtuo? “Pinaagi sa ilang mga bunga kamo makaila kanila,” miingon si Jesus. “Ang matag maayong kahoy mamungag maayong bunga, apan ang matag daot nga kahoy mamungag walay pulos nga bunga.” (Mateo 7:16, 17) Busa, ang tinuod nga pagtuo mamungag “maayong bunga.” Kini magtukmod sa mga tawo sa pagpakitag diyosnong mga hiyas. Sa unsang paagi ginahimo nila kini?

Ang mga tawong may tinuod nga pagtuo naggamit sa ilang gahom ug awtoridad alang sa kadungganan sa Diyos ug sa kaayohan sa uban. Si Jesus nagtudlo: “Si bisan kinsa nga buot mahimong dako sa inyong taliwala kinahanglang mahimong inyong alagad.” (Marcos 10:43) Sa susama, ang mga lalaki nga may tinuod nga pagtuo dili madaogdaogon, sa sulod o gawas man sa panimalay. Sila nagmahal sa ilang mga asawa, nagpasidungog kanila, ug mahigugmaong nagtagana sa ilang mga panginahanglan. Ang Kasulatan nag-ingon: “Kamong mga bana, magpadayon sa paghigugma sa inyong mga asawa ug ayaw pagkasuko nga hilabihan kanila.” (Colosas 3:19) “Mga bana, magpadayon sa pagpuyo sa samang paagi uban kanila sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye, sanglit kamo mga manununod man usab uban kanila sa dili-takos nga pabor sa kinabuhi, aron nga dili mababagan ang inyong mga pag-ampo.”—1 Pedro 3:7.

Sa laing bahin, ang asawa nga may tinuod nga pagtuo “angay nga adunay halawom nga pagtahod sa iyang bana.” (Efeso 5:33) Ang mga asawa angayng ‘mahigugma sa ilang mga bana’ ug ‘mahigugma sa ilang mga anak.’ (Tito 2:4) Ang mga ginikanan nga may tinuod nga pagtuo mohatag ug panahon sa ilang mga anak ug magtudlo kanila sa mga balaod ug prinsipyo sa Diyos. Sila magtratar sa mga tawo uban ang dignidad ug pagtahod, dili lang sa balay kondili sa trabahoan ug sa bisan asa usab. Ilang gisunod ang tambag sa Kasulatan: “Manguna sa pagpakitag pasidungog sa usag usa.”—Roma 12:10.

Gisunod sa mga alagad sa Diyos ang Kasulatanhong sugo: “Dili ka magdawat ug hiphip.” (Exodo 23:8) Dili gayod nila gamiton ang ilang posisyon sa kaugalingong interes. Hinunoa, mangita silag kahigayonan sa pagtabang sa uban, ilabina sa mga nanginahanglan. Ilang gisunod ang tambag: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.” (Hebreohanon 13:16) Busa, nasinati nila ang kamatuoran sa giingon ni Jesus: “Adunay labaw nga kalipay sa paghatag kay sa pagdawat.”—Buhat 20:35.

Ang mga tawong may pagtuo andam mosunod sa mga balaod sa Diyos, ug para  nila “ang iyang mga sugo dili mabug-at.” (1 Juan 5:3) Sila nahibalo nga “ang balaod ni Jehova hingpit . . . Ang mga sugo ni Jehova matul-id, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata.”—Salmo 19:7, 8.

Ang tinuod nga pagtuo magtukmod usab kanila sa pagsalikway sa tanang matang sa pagpihigpihig. Dili sila maghunahuna nga ang usa ka rasa, nasod, o kahimtang sa tawo labaw kay sa uban, hinuon, ilang gisundog ang Diyos. “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”—Buhat 10:34, 35.

Ang tinuod nga pagtuo magtukmod sa mga tawo nga “magmaminatud-on sa tanang butang.” (Hebreohanon 13:18) Ang tawo nga may tinuod nga pagtuo molikay usab sa makadaot nga mga tabi ug pagbutangbutang. Bahin sa matang sa tawo nga giuyonan sa Diyos, si salmista David misulat: “Wala siya magbutangbutang pinaagi sa iyang dila. Wala siyay gihimong daotan sa iyang kauban.”—Salmo 15:3.

Ang gituohan sa mga tawong may tinuod nga pagtuo gibase lamang sa Balaang Kasulatan. Sila nagtuo nga ang “tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong.” (2 Timoteo 3:16) Sa ilang relasyon sa uban, sila nagpasundayag sa “kaalam nga gikan sa itaas,” nga maoy “putli, unya makigdaiton, makataronganon, andam mosunod, tugob sa kaluoy ug maayong mga bunga.” (Santiago 3:17) Ilang gisalikway ang dili-diyosnong mga tradisyon ug espiritismo ug ‘nagbantay sila gikan sa mga idolo.’—1 Juan 5:21.

Si propeta Moises miingon: “Higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog.” (Deuteronomio 6:5) Ang mga tawo nga adunay pagtuo nagpakita nianang matanga sa gugma ngadto sa Diyos. Sila nagtahod sa ngalan sa Diyos, nga Jehova. Sila ‘nagpasalamat kang Jehova,’ ug ‘nagsangpit sa iyang ngalan’ uban ang pagtuo. (Salmo 105:1) Ang mga alagad sa Diyos nagsunod usab sa iyang sugo: “Higugmaon mo ang imong isigkatawo sama sa imong kaugalingon.” (Levitico 19:18) Sila nagsalikway sa kapintasan ug naningkamot nga “makigdinaitay sa tanang tawo.” (Roma 12:18) Sa simbolikong pagkasulti, sila ‘nagsalsal sa ilang mga espada nga mga punta sa daro ug sa ilang mga bangkaw nga mga galab.’ (Isaias 2:4) Ingong resulta, sila “adunay gugma sa [ilang] taliwala” ug nagtagamtam sa tibuok-kalibotang panag-igsoonay. (Juan 13:35) Mailhan ba nimo ang maong katawhan karon?