SEKSIYON 3
Praktikal nga Tambag nga Makapabag-o sa Kinabuhi
HANDURAWA nga may bag-ong doktor nga mibalhin sa inyong lugar. Sa primero dili ka motuo nga siya maayong doktor. Apan unsa na man kon ang pipila nimo ka higala nagpatambal kaniya ug nangaayo? Lagmit magpakonsulta ka usab kaniya.
Sa pipila ka paagi, ang Balaang Kasulatan nahisama sa maong doktor. Ang pipila magpanuko sa pagkonsulta niini. Apan, sa dihang ilang ipadapat ang maalamong tambag niini, mabag-o gayod ang ilang kinabuhi. Tagda ang pipila ka pananglitan.
Pagsulbad sa mga Problema sa Kaminyoon
“Sa unang mga tuig sa among kaminyoon, gibati nako nga ang akong bana, si Dumas, wala nay pagtagad kanako,” nahinumdom si Sumiatun. “Tungod sa akong kahiubos, pirme nako siyang singgitan ug masakit nga mga pulong, labayon ug bisan unsa, ug suntokon pa gani. Usahay makuyapan ko tungod sa grabeng kasuko.
“Sa dihang nagsugod pagtuon si Dumas sa Balaang Kasulatan, ako siyang gibugal-bugalan. Apan sekreto kong naminaw sa ilang panagtuon sa pikas kuwarto. Usa ka adlaw niana, akong nadunggan nga gibasa ang pipila ka bersikulo: ‘Ang mga asawa kinahanglang magpasakop sa ilang mga bana ingon nga sa Ginoo . . . Ang asawa angay nga adunay halawom nga pagtahod sa iyang bana.’ (Efeso 5:22, 33) Kini nakapatandog kanako. Nangayo kog pasaylo sa Diyos sa akong pagtratar sa akong bana, ug miampo ko nga Iya akong tabangan nga mahimong mas maayong asawa. Wala madugay, nag-uban na mi ni Dumas sa pagtuon sa Kasulatan.”
Si Dumas ug Sumiatun
Ang Balaang Kasulatan nag-ingon usab: “Ang mga bana angay nga maghigugma sa ilang mga asawa sama sa ilang kaugalingong mga lawas.” (Efeso 5:28) Si Sumiatun miasoy: “Ang pagkahibalo niini nakapausab kanamong duha. Mag-andam na kog usa ka tasang tsa kang Dumas inig-abot niya gikan sa trabaho ug makig-estorya kaniya sa lumo nga paagi. Siya usab mas mapinanggaon na kanako ug motabang na sa mga buluhaton sa balay. Kami naningkamot nga ‘magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa.’ (Efeso 4:32) Ingong resulta, nagkalalom ang among gugma ug pagtahod sa usag usa. Malipayon kaming nag-uban ingong magtiayon sulod na sa kapig 40 ka tuig. Ang maalamong tambag sa Pulong sa Diyos nagluwas sa among kaminyoon!”
Pagpugong sa Kasuko
“Putong kaayo ko,” miingon si Tayib. “Dali ra kong makakitag away ug sagad baharan nako ang uban nga pusilon. Kon masuko ko, kulatahon nako ang akong asawa, si Kustriyah, hangtod malup-og. Gikahadlokan gyod ko sa daghang tawo.
Si Kustriyah ug Tayib mag-uban sa pag-ampo kada gabii
“Usa ka adlaw niana, akong nabasa ang giingon ni Jesus: ‘Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo.’ (Juan 13:34) Natandog gayod ko niana, ug determinado na kong magbag-o. Sa dihang morag mosilaob ang akong kasuko, ako mag-ampo sa Diyos nga magpabiling kalmado. Taudtaod, mapuypoy na ang akong kasuko. Kaming magtiayon nagpadapat sa tambag sa Efeso 4:26, 27: ‘Ayaw pasalopi sa adlaw ang inyong kasuko, ni maghatag ug luna sa Yawa.’ Kada gabii, among basahon ang Kasulatan ug mag-uban mi sa pag-ampo. Kini nakapawala sa tensiyon sa maong adlaw ug mas nakapasuod kanamo.
“Ako ilado na karon nga kalmadong tawo. Gihigugma ug gitahod ko sa akong asawa ug mga anak. Daghan kog higala, ug gibati kong suod sa Diyos. Ako malipayon gayod.”
Pagbuntog sa Pagkaadik sa Droga
Si Goin
“Membro ko sa usa ka gang sa mga batan-on, hinigarilyo kaayo ko, ug kanunay kong makatulog sa dalan tungod sa kahubog,” miingon si Goin. “Tiggamit ug tigbaligya sab kog gidiling mga droga—marijuana ug ecstasy—nga tagoan nako ilalom sa akong di-madutlag-bala nga tsaliko. Bisag isog kong tan-awon, ako nagkinabuhi sa kahadlok.
“Dayon, may nagpabasa nako niining tekstoha: ‘Anak ko, ayaw kalimti ang akong balaod . . . tungod kay ang daghan nga mga adlaw ug mga tuig sa kinabuhi Proverbio 3:1, 2) Nangandoy kog taas ug malinawong kinabuhi! Akong nabasa usab: ‘Sanglit nakabaton man kita niining maong mga saad, mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.’ (2 Corinto 7:1) Busa, mibiya ko sa droga ug sa gang, ug misugod ko pag-alagad sa Diyos.
ug pakigdait igadugang kanimo.’ (“Kapig 17 ka tuig na nga wala ko mogamit ug droga. Ako adunay himsog nga panglawas, malipayong pamilya, buotang mga higala, ug hinlong konsensiya. Ug imbes matulog sa dalan tungod sa kahubog, matulog na ko sa akong katre matag gabii.”
Pagbuntog sa Pagpihigpihig sa Rasa
“Sa tin-edyer pa ko, ako nagkinabuhi nga kriminal,” nahinumdom si Bambang, “ug kadaghanan sa akong mga biktima sakop sa tribo nga akong gidumtan.
“Apan sa kadugayan, ako misugod sa pagpangita sa Diyos ug mitultol kana ngadto sa usa ka grupo nga nagtuon sa Balaang Kasulatan. Didto, mainiton akong giabiabi sa mga tawo nga sakop mismo sa tribo nga akong gidumtan! Akong nakita usab nga sa maong grupo, malipayong nag-ubanay ang lainlaing rasa. Nahingangha kaayo ko! Dayon, nasabtan ko ang teksto nga nag-ingon: ‘Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.’—Buhat 10:34, 35.
“Karon, wala na ko magdumot sa uban. Ang pipila sa akong suod nga mga higala sakop sa tribo nga akong gidumtan kanhi. Pinaagi sa Balaang Kasulatan, ang Diyos nagtudlo kanako sa paghigugma sa uban.”
Si Bambang karon malipayong nakig-uban sa mga tawong lainlaig rasa
Pagsalikway sa Kapintasan
“Sa tin-edyer pa ko, katulo ko nabilanggo—kaduha tungod sa pagpangawat ug kas-a sa akong pagdunggab sa usa ka lalaki,”
miingon si Garoga. “Sa ulahi, ako miapil sa usa ka rebeldeng grupo ug daghan kog gipamatay. Human sa pagrebelde, nahimo kong lider sa usa ka sindikato. Bisan asa ko moadto, duna koy mga badigard. Ako mapintas ug peligroso nga tawo.Si Garoga dili na mapintason apan usa na ka tinahod nga magtutudlo sa Pulong sa Diyos
“Dayon, usa ka adlaw niana, akong nabasa kini nga teksto: ‘Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot.’ (1 Corinto 13:4, 5) Natandog ko niini. Ako mibalhin sa laing lugar, nagtuon sa Kasulatan, ug nagpadapat sa tambag niini.
“Karon, ako dili na mapintasong tawo. Ako usa na ka tinahod nga magtutudlo sa Pulong sa Diyos. Ang akong kinabuhi aduna nay direksiyon ug katuyoan.”
Ang Pulong sa Diyos Gamhanan
Kini ug ang daghan pang kasinatian nagpamatuod nga “ang pulong sa Diyos buhi ug gamhanan.” (Hebreohanon 4:12) Ang tambag niini simple, praktikal, ug makapalig-on.
Ang Balaang Kasulatan makatabang ba usab kanimo? Oo, bisag unsa pa tingali ang imong problema. “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—2 Timoteo 3:16, 17.
Busa, atong hisgotan ang pipila ka pangunang pagtulon-an sa Balaang Kasulatan.