1. Unsay kinahanglang buhaton sa mga Kristohanon aron mahuman nila ang lumba sa kinabuhi?

ANG mga Kristohanon anaa sa lumba sa kinabuhi. Bag-o man tang nagsugod sa lumba o dugay na, kinahanglan nga padayon tang modagan hangtod makaabot sa finish line. Ang tambag ni Pablo sa mga Kristohanon sa Filipos makadasig nato nga humanon ang lumba. Ang pipila ka membro nianang unang siglong kongregasyon dugay nang nag-alagad kang Jehova dihang nadawat nila ang sulat ni Pablo. Matinumanon na silang nag-alagad kang Jehova, pero gipahinumdoman sila ni Pablo nga kinahanglan silang molahutay. Gusto niya nga padayon nilang sundogon ang iyang ehemplo sa ‘pagpaningkamot pag-ayo nga makab-ot ang iyang tumong.’​—Filip. 3:14.

2. Nganong haom kaayo ang tambag ni Pablo sa mga taga-Filipos?

² Haom kaayo ang tambag ni Pablo sa mga taga-Filipos. Ang kongregasyon gilutos sukad sa pagkatukod niini. Nagsugod ang tanan dihang si Pablo ug Silas miabot sa Filipos niadtong mga 50 C.E., agig sanong sa pagdapit sa Diyos kanila nga moadto sa Macedonia. (Buh. 16:9) Didto nahibalag nila si Lydia, kinsa “naminaw [kanila] . . . , ug gibuksan pag-ayo ni Jehova ang iyang kasingkasing” sa maayong balita. (Buh. 16:14) Wala madugay, siya ug ang iyang panimalay nabawtismohan. Pero milihok dayon ang Yawa. Ang mga tawo sa siyudad nagdala kang Pablo ug Silas ngadto sa mga mahistrado ug sayop silang giakusahan nga nagpahinabog kagubot. Ingong resulta, si Pablo ug Silas gibunalan, gibilanggo, ug sa ulahi gihangyo nga mobiya sa siyudad. (Buh. 16:16-40) Misurender ba sila? Wala gayod! Ug komosta ang mga igsoon sa bag-ong natukod  nga kongregasyon? Ikalipay, sila milahutay sab! Walay duhaduha, nadasig kaayo sila sa maayong ehemplo ni Pablo ug Silas.

3. Unsay naamgohan ni Pablo, ug unsang mga pangutana ang atong hisgotan?

³ Si Pablo determinado nga dili moundang. (2 Cor. 4:16) Pero nahibalo siya nga aron matapos niya ang lumba, kinahanglang magpokus siya sa iyang tumong. Unsay atong makat-onan kang Pablo? Unsang modernong adlaw nga mga ehemplo sa pagtuo ang nagpakita nga makalahutay ta bisan pa sa mga kalisdanan? Ug sa unsang paagi ang atong paglaom makapalig-on sa atong determinasyon nga dili gyod moundang?

4. Sa unsang paagi si Pablo nakapabiling aktibo sa pag-alagad bisan pa sa iyang kahimtang?

⁴ Tagda kon unsay gihimo ni Pablo dihang misulat siya sa mga taga-Filipos. Gipriso siya diha sa usa ka balay sa Roma. Dili siya makagawas aron mosangyaw. Bisan pa niana, puliki siya sa pagsangyaw sa mga bisita ug sa pagsulat ngadto sa lagyong kongregasyon. Karon sab, daghang Kristohanon nga dili makabiya sa balay ang naningkamot sa pagsangyaw niadtong mobisita nila. Magpadala pod silag makapadasig nga mga sulat ngadto sa mga tawo nga dili personal nga maduaw.

5. Sumala sa Filipos 3:12-14, unsay nakatabang kang Pablo sa pagpokus sa iyang tumong?

⁵ Wala tugoti ni Pablo nga malinga siya sa iyang nangaging mga kalamposan o kasaypanan. Gani, siya miingon nga kinahanglang ‘kalimtan ang mga butang sa luyo’ aron ‘makapangab-ot sa mga butang sa unahan,’ sa ato pa, mahuman ang lumba. (Basaha ang Filipos 3:12-14.) Unsa ang pipila sa mga butang nga makalinga unta kang Pablo? Una, daghan siyag nahimong kalamposan sa Judaismo. Pero giisip to niya nga “mga basura.” (Filip. 3:3-8) Ikaduha, bisan tingalig nakonsensiya siya sa paglutos niya kaniadto sa mga Kristohanon, wala niya tugoti nga makapugong kana sa iyang pag-alagad. Ug ikatulo, wala siya maghunahuna nga igo na ang iyang nahimo para kang Jehova. Si Pablo daghag nalampos sa ministeryo bisan pag siya gibilanggo, gibunalan, gibato, ug nakasinatig pagkalunod, kagutom, ug kahubo. (2 Cor. 11:23-27) Pero bisag unsa pay iyang nalampos ug giantos, nahibalo si Pablo nga kinahanglan siyang mopadayon sa pag-alagad. Mao man usab kita.

6. Unsa ang pipila sa “mga butang sa luyo” nga kinahanglan tingali natong kalimtan?

⁶ Agig pagsundog kang Pablo, sa unsang paagi nato ‘kalimtan ang mga butang sa luyo’? Ang pipila tingali kanato makonsensiya gihapon tungod sa nangaging kasal-anan. Kon mao, puwede natong tun-an ang mga topiko bahin sa halad lukat sa Kristo. Ang pagtuon, pagpamalandong, ug pag-ampo bahin nianang makapadasig nga topiko dakog ikatabang aron mahupayan ta sa walay basehanang pagbati nga sad-an gihapon ta. Makatabang pa gani ni nga dili na ta mobating sad-an sa mga sala nga gipasaylo na ni Jehova. Tagda ang laing leksiyon nga atong makat-onan kang Pablo. Ang pipila tingali kanato mibiya sa trabaho nga posibleng makapadato kay gusto natong unahon ang Gingharian. Kon mao, kalimtan nato ang mga butang sa luyo pinaagi sa dili paghunahuna sa mga butang nga ato untang mabatonan. (Num. 11:4-6; Eccl. 7:10) Ang “mga butang sa luyo” nag-apil sab sa mga butang nga atong nahimo sa pag-alagad o sa mga pagsulay nga atong nalahutay. Siyempre, ang  paghunahuna kon giunsa ta pagpanalangin ug pagtabang ni Jehova sa nanglabayng katuigan mas makapasuod nato kaniya. Pero, dili gyod nato gustong maghunahuna nga igo na ang atong nahimo para kang Jehova.​—1 Cor. 15:58.

7. Sumala sa 1 Corinto 9:24-27, unsay gikinahanglan aron makadaog sa lumba sa kinabuhi? Iilustrar.

⁷ Si Pablo nakasabot gayod sa giingon ni Jesus: “Paningkamot [mo] pag-ayo.” (Luc. 13:23, 24) Nahibalo si Pablo nga, sama sa Kristo, kinahanglan siyang maningkamot pag-ayo hangtod sa kataposan. Busa, gikomparar niya ang Kristohanong kinabuhi sa usa ka lumba. (Basaha ang 1 Corinto 9:24-27.) Ang magdadagan sa usa ka lumba magpokus sa finish line ug dili magpalinga sa bisan unsa. Pananglitan kon ang lumba himoon sa siyudad, maagian sa mga magdadagan ang mga tindahan ug ang ubang butang nga posibleng makalinga nila. Sa imong hunahuna, mohunong kaha ang usa ka magdadagan aron motan-aw sa mga baligya nga gidispley? Dili, kon gusto niyang modaog! Sa lumba sa kinabuhi, dili sab ta angayng magpalinga. Kon magpokus ta sa atong tumong, nga maningkamot sama kang Pablo, atong madawat ang ganti!

8. Unsang tulo ka kalisdanan ang atong hisgotan?

⁸ Hisgotan nato ang tulo ka kalisdanan nga makapaluya nato. Kini ang wala dayon matuman nga mga pagdahom, pagkaluya sa pisikal, ug mga pagsulay nga dugay mawala. Makakat-on ta kon sa unsang paagi ang uban nakalahutay niana.​—Filip. 3:17.

9. Unsay posibleng epekto kanato sa wala dayon matuman nga mga pagdahom?

⁹ Wala dayon matuman nga mga pagdahom. Siyempre, naglaom ta sa maayong mga butang nga gisaad ni Jehova. Gani, dihang misulti ang propetang si Habacuc nga gusto niyang taposon na ni Jehova ang daotang kahimtang sa Juda, giingnan siya ni Jehova nga ‘magpadayon sa pagpaabot niini.’ (Hab. 2:3) Pero, kon morag nalangan ang pagkatuman sa atong mga pagdahom, mahimong mawad-an tag kadasig, maluya pa gani. (Prov. 13:12) Nahitabo ni dihang nagsingabot ang 1914. Nianang panahona, daghang dinihogang Kristohanon ang  nagdahom nga moadto na sila sa langit pagka-1914. Sa dihang wala nâ mahitabo, unsay gibuhat sa mga matinumanon?

10. Unsay gibuhat sa usa ka magtiayon dihang wala dayon matuman ang ilang gidahom?

¹⁰ Tagda kon unsay gibuhat sa duha ka matinumanong Kristohanon. Si Brader Royal Spatz nabawtismohan niadtong 1908 sa edad nga 20. Segurado siya nga sa dili madugay moadto na siya sa langit. Gani, niadtong 1911 giingnan niya ang iyang pangasaw-onon, si Pearl: “Nahibalo ka na kon unsay mahitabo sa 1914. Kay magminyo man gyod ta, mas maayong dili na nato dugayon!” Mihunong ba ang maong magtiayon sa lumba sa kinabuhi dihang wala nila madawat ang ilang langitnong ganti niadtong 1914? Wala, kay nagpokus sila sa matinumanong pagbuhat sa kabubut-on sa Diyos, dili sa pagdawat sa ganti. Determinado silang molahutay sa lumba. Tuod man, si Royal ug Pearl nagpabiling aktibo ug matinumanon hangtod nga natapos nila ang ilang kinabuhi sa yuta daghang katuigan sa ulahi. Walay duhaduha, nangandoy pod kang makita nga ibindikar ni Jehova ang iyang ngalan ug pagkasoberano ug tumanon ang tanan niyang saad. Makaseguro ka nga mahitabo kini sa panahon nga gitakda ni Jehova. Sa dili pa kana mahitabo, hinaot magmapuliki ta sa pag-alagad sa Diyos, nga dili gayod tugotan nga maluya ta tungod sa wala dayon matuman nga mga pagdahom.

11-12. Nganong makapadayon gihapon ta sa pag-alagad nga matinumanon bisag nagkaluya ta? Paghatag ug pananglitan.

¹¹ Pagkaluya sa pisikal. Dili sama sa literal nga magdadagan, dili kinahanglan nga lig-on ka sa pisikal aron padayon kang molig-on sa espirituwal. Gani, daghan niadtong luya na sa pisikal ang determinado gihapon nga himoon ang ilang kinamaayohan para kang Jehova. (2 Cor. 4:16) Pananglitan, pag-edad ni Brader Arthur Secord * ug 88, siya nakaalagad na sa Bethel ug 55 ka tuig. Nianang panahona, siya luya na ug dili maayog panglawas. Usa ka adlaw niana, may nars nga miduol sa iyang higdaanan aron atimanon ang iyang mga panginahanglan. Ang sister mitan-aw niya ug mabinationg miingon: “Brader Secord, daghan na kaayo kag nahimo sa pag-alagad kang Jehova.” Pero si Arthur wala magpokus sa iyang nahimo kaniadto. Siya mitan-aw sa nars, mipahiyom, ug miingon: “Tinuod nâ. Pero dili ang nahimo na nato ang importante, kondili ang atong himoon sukad karon.”

¹² Tingali dugay ka nang nag-alagad kang Jehova ug karon tungod sa dili maayong panglawas dili na nimo mahimo ang parehas kaniadto. Kon mao, ayawg kaluya. Magmasaligon nga dili kalimtan ni Jehova ang imong  matinumanon nga pag-alagad kaniadto. (Heb. 6:10) Ug sa pagkakaron, hinumdomi nga dili ang gidaghanon sa atong mahimo sa pag-alagad kang Jehova ang magpakita sa kalalom sa atong gugma kaniya. Hinunoa, mapakita nato kana pinaagi sa pagbaton ug positibong panghunahuna ug paghimo sa tanan nga atong maarangan. (Col. 3:23) Masabtan ni Jehova ang atong mga limitasyon ug wala siya magdahom ug labaw pa kay sa atong mahimo.​—Mar. 12:43, 44.

13. Sa unsang paagi ang eksperyensiya ni Anatoly ug Lidiya magdasig nato sa pagpadayon bisan pa sa daghang pagsulay?

¹³ Mga pagsulay nga dugay mawala. Ang pipila ka alagad ni Jehova milahutay sa kalisdanan ug paglutos sulod sa daghang katuigan. Pananglitan, si Anatoly Melnik * 12 anyos lang dihang ang iyang papa gidakop, gipriso, ug gipadala ngadto sa Siberia, nga kapig 7,000 kilometros ang gilay-on gikan sa ilang pamilya sa Moldova. Paglabayg usa ka tuig, si Anatoly, iyang mama, ug iyang mga apohan gipadala sab ngadto sa Siberia. Sa ngadtongadto, nakatambong silag tigom sa laing baryo, pero kinahanglan silang mobaktas ug 30 kilometros diha sa snow, ug tugnaw kaayo. Sa ulahi, si Brader Melnik giprisog tulo ka tuig, nga layo sa iyang asawang si Lidiya ug sa ilang anak nga babaye nga usa ka tuig pa lang ang edad. Bisan pa sa kalisdanan sulod sa katuigan, si Anatoly ug ang iyang pamilya padayong nagmatinumanon. Karon 82 anyos na siya ug nag-alagad sa Komite sa Sangang Buhatan sa Central Asia. Sama kang Anatoly ug Lidiya, hinaot buhaton nato ang tanan sa pag-alagad kang Jehova, nga padayong molahutay sama sa atong gihimo sa miagi.​—Gal. 6:9.

14. Unsay naamgohan ni Pablo nga kinahanglan niyang buhaton aron makab-ot ang iyang tumong?

¹⁴ Si Pablo masaligon nga iyang mahuman ang lumba ug makab-ot ang iyang tumong. Ingong dinihogang Kristohanon, naglaom siya nga madawat ang “ganti nga kinabuhi sa langit nga ihatag sa Diyos.” Pero aron makab-ot ang maong tumong, naamgohan niya nga kinahanglan siyang ‘maningkamot pag-ayo.’ (Filip. 3:14) Si Pablo migamit ug makapainteres nga ilustrasyon aron tabangan ang mga taga-Filipos sa pagpokus sa ilang tumong.

15. Giunsa paggamit ni Pablo ang ilustrasyon sa pagkalungsoranon aron dasigon ang mga taga-Filipos nga padayong ‘maningkamot pag-ayo’?

¹⁵ Gipahinumdoman ni Pablo ang mga taga-Filipos nga ang ilang pagkalungsoranon maoy  langitnon. (Filip. 3:20) Nganong angay nâ nilang hinumdoman? Niadtong panahona, gipabilhan pag-ayo ang Romanhong pagkalungsoranon. * Pero, mas labaw ang pagkalungsoranon sa dinihogang mga Kristohanon kay kini mas daghag benepisyo. Wala ra sa kumingking ang mga benepisyo sa Romanhong pagkalungsoranon! Tungod niini, gidasig ni Pablo ang mga taga-Filipos nga ‘magpadayon sila ingong lungsoranon nga takos sa maayong balita bahin sa Kristo.’ (Filip. 1:27, footnote) Ang dinihogang mga Kristohanon karon nagpakitag maayong ehemplo samtang naningkamot sila pag-ayo sa pagkab-ot sa ilang tumong, ang walay kataposang kinabuhi sa langit.

16. Naglaom man ta nga mabuhi sa langit o sa yuta, unsay padayon natong himoon sumala sa Filipos 4:6, 7?

¹⁶ Bisag unsay atong paglaom​—kinabuhing walay kataposan man sa langit o sa paraisong yuta—​kinahanglan nga padayon tang maningkamot pag-ayo nga makab-ot ang maong tumong. Bisan unsay atong kahimtang, kinahanglang dili ta molingi sa mga butang sa luyo ug dili sab nato tugotan ang bisan unsa nga makababag sa atong pag-alagad. (Filip. 3:16) Morag nalangan tingali ang katumanan sa atong mga gidahom, o kaha nagkaluya na ta. Basin nakasinati tag kalisdanan ug paglutos sulod sa daghang katuigan. Bisag unsay imong kahimtang, “ayawg kabalaka sa bisan unsa.” Hinunoa, ipahibalo sa Diyos ang imong mga hangyo pinaagi sa pag-ampo ug pangamuyo, ug ihatag niya kanimo ang kalinaw nga labaw pa sa imong gidahom.​—Basaha ang Filipos 4:6, 7.

17. Unsay atong hisgotan sa sunod nga artikulo?

¹⁷ Sama sa magdadagan nga naningkamot pag-ayo samtang gidagan niya ang kataposang hugna sa lumba, hinaot magpokus ta pag-ayo sa tumong nga matapos nato ang lumba sa kinabuhi. Kutob sa atong maarangan ug sa itugot sa atong kahimtang, hinaot maningkamot ta pag-ayo ug padayong magpokus sa nindot nga mga butang sa unahan. Sa unsang paagi padayon tang makalahutay? Tabangan ta sa sunod nga artikulo kon unsaon pagtakdag hustong mga prayoridad ug kon unsaon ‘pagseguro ang mas importanteng mga butang.’​—Filip. 1:9, 10.