NANGANDOY ba kag asaynment sa kongregasyon nga karon dili nimo mahimo? Tingali usa ni ka responsibilidad nga nabatonan sa uban. O kaha kini maoy asaynment, o pribilehiyo, nga nabatonan nimo kaniadto. Pero tungod sa pangedaron, dili maayong panglawas, kalisod sa pinansiyal, o responsibilidad sa pamilya, dili na nimo kini mahimo. O tingali tungod sa kausaban diha sa organisasyon, nawad-an ka sa asaynment nga imong nabatonan sa taas nga panahon. Bisan unsa pay rason, basin mobati ka nga wala nimo mahimo ang tanan para sa pag-alagad sa Diyos. Niana nga mga kahimtang, natural lang nga madismayar ka usahay. Pero, unsay makatabang aron dili magpadayon ang negatibong mga pagbati​—sama sa pagkadismayar, kasuko, o kalagot? Sa unsang paagi makapabilin kang malipayon?

Makakat-on tag leksiyon sa pagpabiling malipayon pinaagi sa pagkonsiderar sa ehemplo ni Juan nga Tigbawtismo. Si Juan nakabaton ug talagsaong mga pribilehiyo, pero wala tingali siya magdahom sa mahitabo sa iyang pag-alagad kang Jehova. Lagmit wala siya maghunahuna nga mas taas ang iyang panahon sa prisohan kay sa pagministeryo. Bisan pa niana, si Juan padayong nagmalipayon sa tibuok niyang kinabuhi. Unsay nakatabang kaniya? Ug unsaon nato pagpabiling malipayon bisan dihang madismayar ta?

Sa tingpamulak sa 29 C.E., gisugdan ni Juan ang iyang asaynment nga mao ang pag-andam sa dalan para sa Mesiyas. Siya miingon: “Paghinulsol mo, kay ang Gingharian sa langit haduol na.” (Mat. 3:2; Luc. 1:12-17) Daghan ang misanong. Gani daghang tawo ang nangabot gikan sa lagyong lugar aron maminaw sa iyang mensahe, ug daghan ang naghinulsol ug nagpabawtismo. Maisogon sab niyang gipasidan-an ang nagpakamatarong sa kaugalingon nga mga lider sa relihiyon bahin sa paghukom nga ipahamtang kanila kon dili sila magbag-o. (Mat. 3:5-12) Ang pinakaimportanteng bahin sa ministeryo ni Juan nahitabo sa tinglarag sa 29 C.E. dihang iyang gibawtismohan si Jesus. Sukad niadto, gigiyahan ni Juan ang uban sa pagsunod kang Jesus, ang gisaad nga Mesiyas.​—Juan 1:32-37.

 Maylabot sa talagsaong papel ni Juan, si Jesus miingon: “Wala pay natawo nga molabaw kang Juan nga Tigbawtismo.” (Mat. 11:11) Seguradong nalipay si Juan sa mga panalangin nga nadawat niya. Sama ni Juan, daghan karon ang dagayang gipanalanginan. Tagda pananglitan si Terry. Sila sa iyang asawang si Sandra nakagugol ug kapig 50 ka tuig sa bug-os panahong pag-alagad. Si Terry miingon: “Daghan kog nindot nga mga pribilehiyo. Nakaalagad ko ingong payunir, Bethelite, espesyal payunir, tigdumala sa sirkito ug distrito, ug karon espesyal payunir na pod.” Makapalipay ang mga pribilehiyo sa pag-alagad, pero sama sa atong makat-onan kang Juan, gikinahanglan ang paningkamot aron magpabiling malipayon dihang mausab ang atong sirkumstansiya.

Si Juan nga Tigbawtismo nagpabiling malipayon tungod kay giapresyar niya ang iyang mga pribilehiyo. Tagda ang usa ka pananglitan. Human sa bawtismo ni Jesus, ang mga sumusunod ni Juan nagkagamay samtang ang kang Jesus nagkadaghan. Nabalaka ang mga tinun-an ni Juan maong miduol sila kaniya ug miingon: “Namawtismo siya ug ang tanang tawo nangadto kaniya.” (Juan 3:26) Si Juan mitubag: “Ang pangasaw-onon iya sa pamanhonon. Apan dihang ang higala sa pamanhonon magtindog duol kaniya ug makadungog sa iyang tingog, siya malipay pag-ayo. Busa ang akong kalipay nabug-os.” (Juan 3:29) Si Juan wala makigkompetensiya kang Jesus, ug wala sab siya maghunahuna nga ang iyang gihimo way pulos tungod lang kay mas importante ang buluhaton ni Jesus. Hinunoa, si Juan nagpabiling malipayon tungod kay iyang gipabilhan ang iyang papel ingong “higala sa pamanhonon.”

Ang maayong panghunahuna ni Juan nakatabang niya sa pagpabiling kontento bisag dili sayon ang iyang asaynment. Pananglitan, siya Nazareo sukad sa pagkatawo, mao nga dili siya puwedeng moinom ug bino. (Luc. 1:15) “Si Juan wala mokaon ug moinom,” miingon si Jesus, nga nagtumong sa simpleng pagkinabuhi ni Juan. Sa laing bahin, si Jesus ug ang iyang mga tinun-an wala mailalom sa mga restriksiyon sa usa ka Nazareo ug mahimong magkinabuhi sama sa uban. (Mat. 11:18, 19) Dugang pa, si Juan wala maghimog bisan unsang milagro, pero nahibalo siya nga ang mga tinun-an ni Jesus, apil ang iyang mga tinun-an sa sinugdan, gihatagan niana nga gahom. (Mat. 10:1; Juan 10:41) Imbes magsigeg hunahuna niana nga mga kalainan, padayong gihimo ni Juan ang iyang asaynment gikan kang Jehova.

Kon pabilhan sab nato ang atong asaynment sa pag-alagad, makapabilin tang malipayon. Si Terry, nga bag-o pang gihisgotan, miingon: “Nagpokus ko sa matag asaynment nga gihatag kanako.” Sa paghinumdom sa iyang kinabuhi sa bug-os panahong pag-alagad, siya miingon: “Wala koy pagmahay, pulos lang kalipay.”

Atong mapalalom ang atong kalipay sa pag-alagad sa Diyos kon atong pamalandongon kon unsa gyoy nakapahimong bililhon sa bisan unsang asaynment o responsibilidad gikan kang Jehova. Kini mao ang pribilehiyo nga mahimong “isigkamagbubuhat sa Diyos.” (1 Cor. 3:9) Kon pirme nimong pasinawon ang usa ka butang nga imong napanunod, magpabilin ning nindot. Sa susama, kon pamalandongon nato nga usa ka dakong kadungganan ang pag-alagad sa Diyos, magpabilin sab ang atong kalipay. Malikayan nato nga itandi ang atong mga sakripisyo nianang sa uban. Dili nato isipon nga mas ubos ang atong pribilehiyo tungod sa mga pribilehiyo nga gihatag ngadto sa uban.​—Gal. 6:4.

Si Juan lagmit nahibalo nga ang iyang ministeryo dili magdugay, pero tingali wala siya maghunahuna nga kalit ning matapos. (Juan 3:30) Niadtong 30 C.E., mga unom ka bulan human niya bawtismohi si Jesus, si Juan gipriso ni Haring Herodes. Bisan pa niana, gihimo gihapon ni Juan ang iyang maarangan sa paghatag ug pamatuod. (Mar. 6:17-20) Unsay nakatabang niya sa pagpabiling malipayon bisan pa niini nga mga kausaban? Padayon siyang nagpokus sa espirituwal nga mga butang.

Samtang didto si Juan sa prisohan, nakadawat siyag mga report bahin sa pag-uswag sa ministeryo ni Jesus. (Mat. 11:2; Luc. 7:18) Kombinsido siya nga si Jesus ang Mesiyas pero naghunahuna tingali  siya kon unsaon pagtuman ni Jesus ang tanang giingon sa Kasulatan nga himoon sa Mesiyas. Kay mahimo mang hari ang Mesiyas, magsugod ba dayon ang iyang pagmando? Pagawson kaha ni Jesus si Juan sa prisohan? Gusto ni Juan nga mahibalog dugang sa himoon ni Jesus maong gipadala niya ang duha sa iyang mga tinun-an aron mangutana kang Jesus: “Ikaw ba ang Usa nga Moanhi, o magpaabot pa mig lain?” (Luc. 7:19) Pagbalik nila, posible nga si Juan naminaw pag-ayo samtang giestorya nila nga si Jesus milagrosong nag-ayog mga sakit ug nagsugo nila nga sultihan siya: “Ang mga buta makakita na, ang mga bakol makalakaw na, ang mga sanlahon nangaayo na, ang mga bungol makadungog na, ang mga patay gibanhaw, ug ang mga kabos gisangyawan sa maayong balita.”​—Luc. 7:20-22.

Seguradong nalig-on si Juan sa ilang report. Kini nagpamatuod nga gituman ni Jesus ang mga tagna bahin sa Mesiyas. Bisag wala pagawsa ni Jesus si Juan sa prisohan, si Juan nahibalo nga ang iyang ministeryo bililhon. Bisan pa sa iyang kahimtang, may rason siya nga magmalipayon.

Sama ni Juan, kon magpokus ta sa espirituwal nga mga butang, makalahutay ta nga malipayon ug mapailobon. (Col. 1:9-11) Mahimo nato kini pinaagi sa pagbasa sa Bibliya ug pagpamalandong niini, nga magpahinumdom kanato nga bililhon ang bisan unsa nga atong himoon para sa Diyos. (1 Cor. 15:58) Si Sandra miingon: “Ang pagbasa ug usa ka kapitulo sa Bibliya kada adlaw nakatabang nako nga mas masuod kang Jehova. Nakatabang ni nako nga magpokus niya imbes sa akong kaugalingon.” Puwede pod tang magpokus sa mga report bahin sa buluhaton sa Gingharian, nga makatabang nato nga maghunahuna dili lang sa atong kaugalingon kondili sa ginahimo sab ni Jehova. Si Sandra midugang: “Ang binulang programa sa JW Broadcasting^® nakatabang namo nga mobating mas suod sa organisasyon ug sa pagpabiling malipayon sa among asaynment.”

Sa mubong panahon nga nagsangyaw si Juan nga Tigbawtismo, iya ning gihimo uban “ang espiritu ug gahom ni Elias,” ug sama ni Elias, siya “usa ka tawong may pagbati nga sama kanato.” (Luc. 1:17; Sant. 5:17) Kon atong sundogon ang iyang ehemplo sa pagpakitag apresasyon ug pagpokus sa espirituwal nga mga butang, makapabilin sab tang malipayon sa buluhaton sa Gingharian bisag unsa pay mahitabo.