1. Unsay gusto nato para sa atong pamilya?

“SUKAD nga nakakat-on ko sa kamatuoran, gusto nakong makauban sa Paraiso ang tibuok nakong pamilya,” miingon ang sister nga si Pauline. * “Ilabinang gusto nakong makauban sa pag-alagad kang Jehova ang akong banang si Wayne, ug ang among batang lalaki.” Duna bay mga membro sa imong pamilya nga wala pa makaila ug mahigugma kang Jehova? Tingali mibati ka sama sa gibati ni Pauline sa iyang pamilya.

2. Unsang mga pangutana ang hisgotan niining artikuloha?

² Dili nato mapugos ang atong pamilya nga modawat sa maayong balita, pero makahimo ta sa pagdasig nila nga ablihan ang ilang hunahuna ug kasingkasing sa mensahe sa Bibliya. (2 Tim. 3:14, 15) Nganong angay tang mosangyaw sa atong pamilya? Nganong kinahanglan tang magpakitag empatiya? Unsay atong mahimo aron matabangan ang atong pamilya nga mahigugma kang Jehova sama kanato? Ug sa unsang paagi makatabang kanato ang tibuok kongregasyon?

3. Sumala sa 2 Pedro 3:9, nganong angay natong sangyawan ang atong pamilya?

³ Hapit nang taposon ni Jehova kining sistemaha. Kadto lang “nakiling sa pagdawat sa kamatuoran nga motultol sa kinabuhing walay kataposan” ang maluwas. (Buh. 13:48) Mogahin tag dakong panahon ug kusog sa pagsangyaw sa mga tawo sa atong  komunidad nga dili nato kaila, busa natural lang nga gusto sab nato nga ang atong pamilya moduyog nato sa pag-alagad kang Jehova. Ang atong mahigugmaong Amahan, si Jehova, “dili . . . gusto nga naay malaglag kondili gusto niya nga ang tanan maghinulsol.”​—Basaha ang 2 Pedro 3:9.

4. Unsang sayop ang usahay mahimo nato dihang mosangyaw ta sa atong pamilya?

⁴ Kinahanglang hinumdoman nato nga dunay husto ug sayop nga paagi sa pagpaambit sa mensahe sa kaluwasan. Bisan tuod mataktikanhon tingali ta dihang mosangyaw sa dili nato kaila, basin prangka ra kaayo ta dihang mosangyaw sa atong pamilya.

5. Unsay angay natong hinumdoman sa dili pa ipaambit ang kamatuoran sa atong pamilya?

⁵ Kon hinumdoman nato ang unang higayon nga misangyaw ta sa atong pamilya, daghan tingali kanato ang magbasol sa atong paagi sa pagsangyaw, ug maghunahuna ta nga unta dili ingon niadto ang atong gihimo. Si apostol Pablo nagtambag sa mga Kristohanon: “Himoa ang inyong sinultihan nga kanunayng maayo, tinimplahag asin, aron mahibalo mo kon unsaon pagtubag ang matag tawo.” (Col. 4:5, 6) Maayong hinumdoman ning tambaga dihang makig-estorya ta sa atong pamilya. Kay kon dili, basin masuko sila imbes maminaw.

6-7. Paghatag ug pananglitan kon nganong kinahanglang pakitaag empatiya ang dili magtutuong kapikas.

⁶ Pagpakitag empatiya. Si Pauline, nga bag-o pang gihisgotan, miingon: “Sa primero, espirituwal lang nga mga butang ang gusto nakong iestorya sa akong bana. Dili mi mag-estoryag laing butang.” Pero ang bana ni Pauline, si Wayne, diyutay rag nahibaloan sa Bibliya ug wala niya masabti ang ginasulti ni Pauline. Para niya, ang gisigehan lag hunahuna ni Pauline mao ang iyang relihiyon.  Nabalaka si Wayne nga mianib si Pauline sa usa ka peligrosong sekta ug nalimbongan.

⁷ Miadmitir si Pauline nga taudtaod pod nga mogugol siyag daghang oras uban sa mga igsoon panahon sa gabii ug hinapos sa semana​—sa tigom, pagsangyaw, ug mga tapoktapok. “Usahay inig-uli ni Wayne, walay tawo sa balay ug magmingaw siya,” miingon si Pauline. Siyempre, gusto ni Wayne nga kauban niya ang iyang asawa ug anak. Wala siya makaila sa mga tawo nga kauban ni Pauline ug sa ilang anak, ug morag mas importante na kang Pauline ang bag-ong mga higala niini. Tungod niana, gibaharan ni Wayne si Pauline nga makigdiborsiyo siya. Makahunahuna ba kag mga paagi nga mas makapakita unta si Pauline ug empatiya?

8. Sumala sa 1 Pedro 3:1, 2, unsa tingali ang mas mamatikdan sa atong pamilya?

⁸ Pagpakitag maayong ehemplo. Sagad, mas mamatikdan sa atong pamilya ang atong gihimo kay sa atong gisulti. (Basaha ang 1 Pedro 3:1, 2.) Sa ngadtongadto, naamgohan ra kana ni Pauline. “Nahibalo ko nga gimahal mi ni Wayne, ug dili gyod niya gustong makigdiborsiyo,” miingon siya. “Pero ang iyang pagbahad nakapaamgo nako nga kinahanglan gyod nakong sundon ang paagi ni Jehova. Imbes magsigeg sulti, kinahanglan kong magpakitag maayong ehemplo pinaagi sa buhat.” Wala na pugsa ni Pauline si Wayne sa pag-estorya bahin sa Bibliya, ug makig-estorya na siya sa iyang bana bahin sa adlaw-adlawng kalihokan. Nakita ni Wayne nga dili na pugoso si Pauline, ug mas buotan na ang ilang anak. (Prov. 31:18, 27, 28) Dihang nakita ni Wayne nga maayog epekto sa iyang pamilya ang mensahe sa Bibliya, gibuksan niya ang iyang hunahuna ug kasingkasing sa mensahe sa Pulong sa Diyos.​—1 Cor. 7:12-14, 16.

9. Nganong kinahanglan tang mopadayon sa pagtabang sa atong pamilya?

 ⁹ Padayon sa pagtabang sa imong pamilya. Si Jehova naghatag natog ehemplo. “Balikbalik” niyang gihatagag kahigayonan ang mga tawo nga modawat sa maayong balita ug makabatog kinabuhi. (Jer. 44:4) Ug giingnan ni apostol Pablo si Timoteo nga magpadayon sa pagtabang sa uban. Ngano? Kay sa pagbuhat niana, maluwas niya ang iyang kaugalingon ug kadtong maminaw niya. (1 Tim. 4:16) Gimahal nato ang atong pamilya, maong gusto nato nga mahibalo sila sa kamatuoran sa Pulong sa Diyos. Sa ngadtongadto, ang mga pulong ug buhat ni Pauline maayog epekto sa iyang pamilya. Karon, malipayon siyang nag-alagad kang Jehova uban sa iyang bana. Silang duha payunir na, ug si Wayne ansiyano na.

10. Nganong kinahanglan tang magmapailobon?

¹⁰ Magmapailobon. Dihang ipahiuyon nato ang atong kinabuhi sa mga sukdanan sa Diyos, lagmit malisdan ang atong pamilya sa pagdawat sa atong bag-ong pagtuo ug pagkinabuhi. Sagad, una nilang mamatikdan nga dili na ta moapil sa ilang relihiyosong mga selebrasyon ug sa politika. Sa sinugdan, ang pipila kanila lagmit masuko kanato. (Mat. 10:35, 36) Pero dili ta angayng maghunahuna nga dili na gyod sila mausab. Kon moundang ta sa pagtabang nila nga masabtan ang atong pagtuo, sama rag gihukman nato sila nga dili sila takos modawat sa kinabuhing walay kataposan. Wala ihatag ni Jehova kanato ang katungod nga mohukom​—gihatag nâ niya kang Jesus. (Juan 5:22) Kon mapailobon ta, basin maminaw ra ang atong pamilya.​—Tan-awa ang kahong “ Gamita ang Atong Website sa Pagtudlo.”

11-13. Unsay imong nakat-onan sa pagtratar ni Alice sa iyang ginikanan?

¹¹ Magmalig-on pero pagpakitag kaayo. (Prov. 15:2) Tagda pananglitan si Alice. Nakakat-on siya bahin kang Jehova dihang nagpuyo siya layo sa iyang ginikanan, kinsa mga ateyista ug aktibo sa politika. Naamgohan niya nga kinahanglan dayon niyang sultihan sila bahin sa maayong mga butang nga iyang nakat-onan. Si Alice miingon: “Kon maghulat pa kag dugay ayha nimo isulti ang kausaban sa imong pagtuo ug kalihokan, mas makuratan ang imong pamilya.” Iyang sulatan ang iyang ginikanan, nga mangutana nila kon unsay ilang opinyon sa gitudlo sa Bibliya bahin sa mga topiko nga gihunahuna niyang makapainteres nila, sama sa gugma. (1 Cor. 13:1-13) Gipasalamatan niya sila sa pagpadako ug pag-atiman kaniya, ug gipadalhan niya silag mga regalo. Kon mobisita siya nila, himoon niya ang tanan sa pagtabang sa iyang mama sa mga buluhaton sa balay. Sa sinugdan, wala malipay ang iyang ginikanan dihang gisultihan niya sila sa iyang bag-ong pagtuo.

¹² Kon mouli si Alice sa ilaha, sundon gihapon niya ang iyang eskedyul sa pagbasag Bibliya. “Nakatabang ni nga masabtan ni Mama nga importante kaayo nako ang Bibliya,” miingon si Alice. Ang papa sab ni Alice midesisyon nga mokat-on bahin sa Bibliya aron masabtan niya kon nganong nausab ang hunahuna sa iyang anak. Gusto sab niyang mangitag sayop sa Bibliya. Si Alice miingon: “Gihatagan nako siyag Bibliya, ug gisulatan nako nig mensahe para niya.” Unsay resulta? Imbes makakitag sayop, ang amahan ni Alice natandog pag-ayo sa iyang nabasa sa Pulong sa Diyos.

¹³ Kinahanglan tang magmalig-on pero magpakitag kaayo, bisan pag makaatubang tag mga pagsulay. (1 Cor. 4:12b) Pananglitan, kinahanglang lahutayon ni Alice ang pagsupak sa iyang mama. “Dihang nabawtismohan ko, gitawag ko ni Mama ug ‘supakera nga anak.’” Unsay gibuhat ni Alice? “Imbes likayan ang paghisgot bahin sa akong bag-ong relihiyon,  matinahoron nakong gipatin-aw nga nakadesisyon na ko nga mahimong Saksi ni Jehova ug dili na mabag-o ang akong desisyon. Gipasaligan nako si Mama nga gimahal gyod nako siya. Nanghilak mi, ug gilutoan nako siyag lami nga pagkaon. Sukad niadto, nakaamgo si Mama nga nahimo kong mas buotan tungod sa Bibliya.”

14. Nganong dili ta magpadala sa presyur nga mokompromiso?

¹⁴ Tingali dili dayon masabtan sa atong pamilya kon unsa ka importante kanato ang pag-alagad kang Jehova. Pananglitan, dihang nakadesisyon si Alice nga magpayunir imbes unahon ang karera nga gusto sa iyang ginikanan, mihilak na pod ang iyang mama. Pero lig-on gihapon si Alice. Siya miingon: “Kon magpadala ka sa presyur sa imong pamilya bahin sa usa ka butang, lagmit presyuron ka nila sa laing butang. Pero kon pakitaan nimo silag kaayo ug magpabilin kang lig-on, basin maminaw ra ang pipila kanila.” Mao nay nahitabo kang Alice. Ang iyang ginikanan mga payunir na karon, ug ang iyang papa ansiyano na.

15. Sumala sa Mateo 5:14-16 ug 1 Pedro 2:12, sa unsang paagi ang “maayong mga buhat” sa uban makatabang sa atong pamilya?

¹⁵ Si Jehova nagkabig sa mga tawo pinaagi sa “maayong mga buhat” sa Kristohanong kongregasyon. (Basaha ang Mateo 5:14-16; 1 Pedro 2:12.) Kon ang imong kapikas dili Saksi ni Jehova, may nakaila na ba siya sa inyong kongregasyon? Si Pauline, nga gihisgotan ganina, nangimbitar ug mga igsoon sa ilang balay aron mailaila sila sa iyang bana nga si Wayne. Nahinumdom si Wayne kon sa unsang  paagi gitabangan siya sa usa ka brader nga makasabot kon unsa gyod ang mga Saksi: “Mibakasyon siya sa trabaho aron ubanan kog tan-aw ug esport diha sa TV. Nakaingon ko, ‘Normal ra diay siya!’”

16. Nganong angay natong imbitahon sa tigom ang atong pamilya?

¹⁶ Ang usa ka maayong paagi nga atong matabangan ang atong pamilya mao ang pag-imbitar nila nga motambong sa tigom. (1 Cor. 14:24, 25) Ang unang tigom nga gitambongan ni Wayne mao ang Memoryal kay human na kadto sa tingtrabaho ug mubo ra ang programa. “Wala ko kasabot sa pakigpulong, pero nakadayeg ko sa mga tawo,” miingon siya. “Sila miduol ug miabiabi nako, ug hugot ko nilang gilamano. Nakita nako nga sinsero sila.” Dihay magtiayon nga ilabinang nagpakitag kaayo kang Pauline, nga nagtabang niya ug sa iyang anak panahon sa tigom ug sa ministeryo. Busa dihang nakadesisyon na si Wayne nga kinahanglang mas masabtan niya ang bag-ong pagtuo ni Pauline, gihangyo niya ang bana nga estadihan siya.

17. Sa unsa dili nato angayng basolon ang kaugalingon, pero nganong dili gyod ta moundang sa pagtabang sa atong pamilya?

¹⁷ Naglaom ta nga ang tanang membro sa atong pamilya moduyog nato sa pag-alagad kang Jehova. Pero, bisan pa sa tanan natong paningkamot sa pagtabang sa atong pamilya nga mahimong alagad sa Diyos, basin dili gihapon sila makadangat sa kamatuoran. Kon mahitabo nâ, dili nato angayng basolon ang atong kaugalingon sa ilang desisyon. Sa pagkatinuod, dili nato mapugos si bisan kinsa sa pagdawat sa atong pagtuo. Pero, kon makita sa imong pamilya nga malipayon kaayo ka sa pag-alagad kang Jehova, basig dako nig epekto kanila. Iampo sila. Magmataktikanhon sa pagpakigsulti kanila. Ayawg hunong! (Buh. 20:20) Magmasaligon nga panalanginan ni Jehova ang imong mga paningkamot. Ug kon ang imong pamilya modesisyon nga maminaw nimo, sila maluwas!