1. Kinsay mitabang sa pagtukod sa kongregasyon sa Filipos?

PAG-ABOT ni apostol Pablo, Silas, Lucas, ug Timoteo sa Filipos, nga kolonya sa Roma, daghan ang interesado sa mensahe sa Gingharian. Kining upat ka madasigong igsoon mitabang sa pagtukod ug kongregasyon, ug ang tanang bag-ong tinun-an nagsugod sa pagtigom, lagmit diha sa balay sa maabiabihong magtutuo nga si Lydia.​—Buh. 16:40.

2. Unsang kalisdanan ang nasinati dayon sa kongregasyon?

² Kining bag-ong kongregasyon nakasinati dayog kalisdanan. Giaghat ni Satanas ang mga kaaway sa kamatuoran aron babagan ang pagsangyaw niining maunongong mga Kristohanon. Si Pablo ug Silas gidakop, gibunalan, ug gibilanggo. Human sila buhii, gibisita nila ang bag-ong mga tinun-an ug gidasig sila. Dayon si Pablo, Silas, ug Timoteo mibiya sa siyudad samtang si Lucas dayag nga nagpabilin didto. Unsay gibuhat sa bag-ong natukod nga kongregasyon? Sa tabang sa espiritu ni Jehova, ang bag-ong mga tinun-an nagpadayon sa pag-alagad nga madasigon. (Filip. 2:12) Duna gyoy maayong rason si Pablo nga ipasigarbo sila!

3. Sumala sa Filipos 1:9-11, unsay giampo ni Pablo?

³ Mga 10 ka tuig sa ulahi, si Pablo misulat sa kongregasyon sa Filipos. Sa imong pagbasa niini nga sulat, makita dayon nimo kon unsa ka dako ang gugma ni Pablo sa mga igsoon. Siya misulat: “Gimingaw gyod ko ninyong tanan, ug gimahal mo nako sama sa pagmahal kaninyo ni Kristo Jesus.” (Filip. 1:8) Sa iyang sulat, siya miingon nga giampo niya sila. Gihangyo niya si Jehova nga tabangan sila nga modagaya ang  ilang gugma, maseguro ang mas importanteng mga butang, mahimong walay ikasaway, dili makapandol sa uban, ug padayong mamungag matarong nga bunga. Seguradong mouyon ka nga makabenepisyo ta sa kinasingkasing nga mga pulong ni Pablo. Busa atong basahon ang gisulat ni Pablo ngadto sa mga taga-Filipos. (Basaha ang Filipos 1:9-11.) Dayon atong hisgotan ang mga punto nga iyang giingon ug kon unsaon nato pagpadapat ang matag usa niini.

4. (a) Sumala sa 1 Juan 4:9, 10, giunsa pagpakita ni Jehova ang iyang gugma kanato? (b) Unsa ka dako ang angay natong paghigugma sa Diyos?

⁴ Gipakita ni Jehova ang iyang dakong gugma kanato pinaagi sa pagpadala sa iyang Anak dinhi sa yuta aron mamatay para sa atong mga sala. (Basaha ang 1 Juan 4:9, 10.) Ang gugma sa Diyos magpalihok nato sa paghigugma kaniya. (Roma 5:8) Unsa ka dako ang angay natong paghigugma sa Diyos? Gitubag ni Jesus kanang pangutanaha dihang giingnan niya ang usa ka Pariseo: “Higugmaa si Jehova nga imong Diyos sa tibuok mong kasingkasing, sa tibuok mong kalag, ug sa tibuok mong hunahuna.” (Mat. 22:36, 37) Gusto natong higugmaon ang Diyos sa tibuok natong kasingkasing. Ug gusto natong mas modako ang atong gugma kaniya kada adlaw. Giingnan ni Pablo ang mga taga-Filipos nga ang ilang gugma angayng “modagaya pa.” Unsay atong mahimo aron modako ang atong gugma sa Diyos?

5. Sa unsang paagi modako ang atong gugma?

⁵ Kinahanglang makaila ta sa Diyos aron mahigugma niya. Ang Bibliya nag-ingon: “Bisan kinsa nga wala mahigugma wala makaila sa Diyos, kay ang Diyos gugma.” (1 Juan 4:8) Gipakita ni apostol Pablo nga ang atong gugma sa Diyos modako dihang makabaton tag “tukmang kahibalo ug bug-os nga pagsabot” bahin Kaniya. (Filip. 1:9) Dihang nagsugod ta pagtuon sa Bibliya, nakakat-on ta sa paghigugma sa Diyos bisag diyutay ra tag nahibaloan bahin sa iyang nindot kaayong mga hiyas. Pero samtang nagkalawom ang atong kahibalo kang Jehova, nagkadako sab ang atong gugma kaniya. Maoy hinungdan nga importante kaayo kanato ang regular nga pagtuon sa Bibliya ug ang pagpamalandong sa Pulong sa Diyos!​—Filip. 2:16.

6. Sumala sa 1 Juan 4:11, 20, 21, unsaon nato pagpadagaya ang atong gugma?

⁶ Ang dakong gugma sa Diyos kanato magpalihok nato sa paghigugma sa atong mga igsoon. (Basaha ang 1 Juan 4:11, 20, 21.) Maghunahuna tingali ta nga sayon rang higugmaon ang atong mga igsoon. Tungod kini kay nagsimba ta kang Jehova ug naningkamot nga sundogon ang iyang maayong mga hiyas. Nagsunod ta sa ehemplo ni Jesus, nga sa kadako sa iyang gugma gihatag niya ang iyang kinabuhi para nato. Pero usahay lisod ang pagsunod sa sugo nga maghigugmaay. Tagda ang usa ka pananglitan sa kongregasyon sa Filipos.

7. Unsay atong makat-onan sa tambag ni Pablo ngadto kang Euodia ug Sintique?

⁷ Si Euodia ug Sintique maoy madasigong mga sister nga nag-alagad uban kang Pablo. Pero tingali kay wala sila magkasinabot, nadaot ang ilang maayong relasyon. Sa sulat ni Pablo ngadto sa kongregasyon diin nag-alagad ang maong mga sister, espesipiko niyang ginganlan si Euodia ug Sintique ug gihatagan silag prangkang tambag nga ‘magbaton ug samang panghunahuna.’ (Filip. 4:2, 3) Gibati sab ni Pablo nga kinahanglan niyang tambagan ang tibuok kongregasyon: “Padayon sa pagbuhat sa tanang butang nga walay pagbagulbol ug  panaglalis.” (Filip. 2:14) Segurado nga ang prangkang tambag ni Pablo nakatabang dili lang niining maunongong mga sister kondili sa tibuok kongregasyon usab aron molig-on ang ilang gugma sa usag usa.

8. Nganong usahay malisdan kaayo ta sa paghigugma sa atong mga igsoon, pero unsay makatabang nato?

⁸ Sama ni Euodia ug Sintique, usahay malisdan kaayo ta sa pagpakitag gugma sa uban kay nagpokus ta sa kasaypanan. Kitang tanan masayop kada adlaw. Kon magpokus ta sa kasaypanan sa uban, mobugnaw ang atong gugma kanila. Pananglitan, kon ang usa ka igsoon malimot sa pagtabang nato sa paghinlo sa Kingdom Hall, basig maglagot ta. Kon magsugod tag hunahuna sa uban pang sayop sa maong brader, basin mosamot tag kalagot ug ang atong gugma niya mobugnaw. Kon ingon niana ang imong kahimtang, maayong pamalandongon kini: Nakita ni Jehova ang atong kasaypanan ug nianang sa atong igsoon. Bisan pa niana, gihigugma gihapon ta niya ug ang atong igsoon. Busa kinahanglan natong sundogon ang gugma ni Jehova ug magpokus sa maayong mga hiyas sa atong mga igsoon. Kon maningkamot ta sa paghigugma sa atong mga igsoon, atong mapalig-on ang atong panaghiusa.​—Filip. 2:1, 2.

9. Unsay pipila sa “mas importanteng mga butang” nga gihisgotan ni Pablo sa iyang sulat sa mga taga-Filipos?

⁹ Si Pablo gigiyahan sa balaang espiritu nga tambagan ang mga igsoon sa Filipos​—ug ang tanang Kristohanon—​nga ‘seguroon ang mas importanteng mga butang.’ (Filip. 1:10) Apil sa importanteng mga butang ang pagbalaan sa ngalan ni Jehova, ang katumanan sa iyang mga katuyoan, ug ang kalinaw ug panaghiusa sa kongregasyon. (Mat. 6:9, 10; Juan 13:35) Kon kining mga butanga ang pinakaimportante sa atong kinabuhi, atong gipakita nga gihigugma nato si Jehova.

10. Unsay atong himoon aron isipon tang walay ikasaway?

¹⁰ Si Pablo miingon sab nga kinahanglang “walay ikasaway” kanato. Wala ni magpasabot nga kinahanglang perpekto ta. Dili nato perpektong masundog ang pagkawalay-ikasaway ni Jehova. Pero isipon ta ni Jehova nga walay ikasaway kon himoon nato ang atong kinamaayohan aron mapalalom ang atong gugma ug maseguro ang mas importanteng mga butang. Ang usa ka paagi nga ikapakita nato ang atong gugma mao ang pagpaningkamot nga dili makapandol sa uban.

11. Nganong likayan nato nga makapandol sa uban?

¹¹ Ang tambag nga likayan nga makapandol sa uban sa pagkatinuod maoy pasidaan. Sa unsang paagi makapandol ta sa uban? Tingali pinaagi sa atong gipili nga kalingawan, sinina, o trabaho. Basin dili ra sayop ang atong gibuhat. Pero kon kana makahasol sa konsensiya sa uban ug makapandol niya, seryoso kaayo nâ. Si Jesus miingon nga kon makapandol ta sa usa sa iyang mga karnero, mas maayo pang higtan ug dakong galingan nga bato ang atong liog ug itambog ta sa dagat.​—Mat. 18:6.

12. Unsay atong makat-onan sa ehemplo sa usa ka magtiayong payunir?

¹² Matikdi kon giunsa pagpadapat sa usa ka magtiayong payunir ang pasidaan ni Jesus. Kauban nila sa kongregasyon ang usa ka bag-ong nabawtismohan nga magtiayon nga gikan sa konserbatibo kaayong mga pamilya. Kining bag-ohan nga magtiayon nagtuo nga ang mga Kristohanon dili angayng motan-awg sine​—bisag maayo ang salida. Nalain sila dihang ilang nahibaloan nga ang magtiayong payunir nanan-awg sine. Tungod niana, ang magtiayon wala na motan-aw ug sine hangtod nga nabansay sa bag-ohang magtiayon ang  ilang konsensiya nga mahimong mas balanse. (Heb. 5:14) Niining paagiha, gipakita sa magtiayong payunir nga gihigugma nila ang bag-ohan nga magtiayon dili lang sa pulong kondili sa buhat usab.​—Roma 14:19-21; 1 Juan 3:18.

13. Sa unsang paagi maaghat nato ang uban sa pagpakasala?

¹³ Ang laing paagi nga makapandol ta sa uban mao ang pag-aghat nila nga makasala. Sa unsang paagi nâ mahitabo? Imadyina kini nga situwasyon. Human sa dugayng pakigbisog, nahunong ra gyod sa usa ka Bible study ang iyang pagkaalkoholiko. Naamgohan niya nga kinahanglan gyod siyang maglikay sa alkoholikong ilimnon. Kusog ang iyang pag-uswag ug ngadtongadto siya nabawtismohan. Sa ulahi, may brader nga nangimbitar niya sa usa ka tapoktapok ug gitanyagan siyag ilimnon, ug miingon: “Saksi na man ka; naa na nimo ang espiritu ni Jehova. Ang usa ka bahin sa bunga sa balaang espiritu mao ang pagpugong sa kaugalingon. Kon naa kay pagpugong sa kaugalingon, kaya ra nimong moinom ug diyutay.” Makapaguol gyod kon ang bag-ohang brader maminaw nianang sayop nga tambag ug mahimo na pong alkoholiko!

14. Sa unsang paagi ang atong mga tigom makatabang nato sa pagpadapat sa tambag sa Filipos 1:10?

¹⁴ Ang atong mga tigom makatabang nato sa pagpadapat sa tambag sa Filipos 1:10 sa daghang paagi. Una, ang abundang espirituwal nga pagkaon diha sa mga tigom magpahinumdom nato kon unsay mas importante kang Jehova. Ikaduha, makakat-on ta kon unsaon pagpadapat ang atong nakat-onan aron walay ikasaway kanato. Ug ikatulo, madasig ta sa  “pagpakitag gugma ug sa paghimog maayong mga buhat.” (Heb. 10:24, 25) Dihang dasigon ta sa mga igsoon, mas modako ang atong gugma sa Diyos ug sa mga igsoon. Kon mapuno ang atong kasingkasing niining duha ka talagsaong gugma, maningkamot ta pag-ayo nga dili makapandol sa atong mga igsoon.

15. Unsay ipasabot sa ekspresyong ‘mapuno sa matarong nga bunga’?

¹⁵ Si Pablo kinasingkasing nga nag-ampo nga ang mga taga-Filipos ‘mapuno sa matarong nga bunga.’ (Filip. 1:11) Segurado nga apil niining “matarong nga bunga” ang ilang gugma kang Jehova ug sa iyang katawhan. Apil sab niini ang ilang pagsulti sa uban bahin sa ilang pagtuo kang Jesus ug sa ilang nindot nga paglaom. Ang Filipos 2:15 naggamit ug laing ekspresyon​—“nagasidlak nga samag kahayag sa kalibotan.” Haom kini kay gitawag ni Jesus ang iyang mga tinun-an ingong “kahayag sa kalibotan.” (Mat. 5:14-16) Gisugo sab niya ang iyang mga sumusunod nga ‘maghimog mga tinun-an,’ ug siya miingon nga sila ‘mahimong mga saksi hangtod sa kinalay-ang bahin sa yuta.’ (Mat. 28:18-20; Buh. 1:8) Nagapamunga tag “matarong nga bunga” kon aktibo tang makigbahin niining importante kaayong buluhaton.

16. Giunsa pagpakita sa Filipos 1:12-14 nga puwede tang mosidlak nga samag kahayag bisan sa lisod nga mga kahimtang? (Tan-awa ang hulagway sa atubangan sa magasin.)

¹⁶ Bisan unsay atong kahimtang, puwede tang mosidlak nga samag kahayag. Usahay, ang mga butang nga morag makababag nato sa pagsangyaw mahimo diay nga kahigayonan sa pagsangyaw. Pananglitan, si Pablo gipriso diha sa usa ka balay sa Roma dihang gisulatan niya ang mga taga-Filipos. Pero bisag napriso, padayon siyang nagsangyaw sa mga guwardiya ug mga bisita. Madasigon siyang nagsangyaw  bisan niini nga kahimtang, ug nakahatag ni sa mga igsoon ug kompiyansa ug kaisog sa “pagsulti sa pulong sa Diyos nga walay kahadlok.”​—Basaha ang Filipos 1:12-14; 4:22.

17. Paghatag ug modernong pananglitan sa pagpamunga bisan sa lisod nga mga kahimtang.

¹⁷ Daghan sa atong mga igsoon ang nagpakitag kaisog nga sama nianang gipakita ni Pablo. Nagpuyo sila sa mga nasod diin wala silay kagawasan nga mosangyaw sa publiko o sa balay ug balay, busa nangita silag laing mga paagi sa pagsangyaw sa maayong balita. (Mat. 10:16-20) Sa usa niana nga mga nasod, misugyot ang usa ka tigdumala sa sirkito nga himoon sa kada magmamantala nga personal nga “teritoryo” ang iyang mga paryente, silingan, eskolmet, kauban sa trabaho, ug mga kaila. Sulod sa duha ka tuig, miuswag pag-ayo ang gidaghanon sa mga kongregasyon nianang sirkitoha. Tingali wala ta magpuyo sa nasod nga gidili ang pagsangyaw. Pero makakat-on ta sa gihimo sa atong mga igsoon: Pangita pirmeg mga paagi nga bug-os kang makapakigbahin sa ministeryo, nga masaligon nga hatagan ka ni Jehova sa kusog nga imong gikinahanglan aron makapadayon ka sa pagsangyaw bisan pa sa mga babag.​—Filip. 2:13.

18. Unsay angay natong determinasyon?

¹⁸ Ilabina gyod karon, hinaot nga magmadeterminado ta sa pagpadapat sa tambag sa Diyos nga mabasa diha sa sulat ni Pablo sa mga taga-Filipos. Kinahanglang seguroon nato ang mas importanteng mga butang, paningkamotan nga walay ikasaway kanato, likayan nga makapandol sa uban, ug mamungag matarong nga bunga. Pinaagi niana, modagaya ang atong gugma ug makapasidungog ta sa atong mahigugmaong Amahan, si Jehova.