1-3. Unsa tingali ang pipila ka rason kon nganong mausab ang asaynment sa bug-os panahong mga alagad?

HUMAN sa 21 ka tuig nga malipayong pag-alagad ni Robert ug Mary Jo ingong misyonaryo, parehong nasakit ang ilang mga ginikanan. Sila miingon: “Nalipay mi nga atimanon sila. Bisan pa niana, naguol mi nga biyaan ang lugar nga gimahal na namo pag-ayo.”

² “Mihilak mi dihang nahibaloan namo nga tungod sa problema sa panglawas, dili na mi makabalik sa among asaynment,” miingon si William ug Terrie. “Ang among pangandoy nga mag-alagad kang Jehova sa laing nasod natapos na.”

³ “Nahibalo mi nga gustong ipasira sa mga maglulutos ang sangang buhatan diin ko nag-alagad,” miingon si Aleksey. “Pero nakurat gihapon ko dihang nahitabo ni ug kinahanglan ming mobiya sa Bethel.”

4. Unsang mga pangutana ang atong hisgotan niining artikuloha?

⁴ Dugang pa, linibo ka bug-os panahong mga alagad, apil niadtong nag-alagad sa Bethel, ang nakadawat ug bag-ong mga asaynment. * Mahimong malisdan kining matinumanong mga igsoon sa pagbiya sa asaynment nga gimahal nila pag-ayo. Unsay makatabang nila sa pag-adyas niini nga kausaban? Unsaon nimo sila pagtabang? Ang tubag niana nga mga pangutana makatabang natong tanan dihang mausab ang atong sirkumstansiya.

5. Sa unsang paagi mahimong makaapektar nato ang kausaban sa asaynment?

⁵ Nag-alagad man ta sa field o sa Bethel, makakat-on ta sa pagmahal pag-ayo sa mga tawo ug bisan sa lugar diin ta nag-alagad. Busa, maguol kaayo ta kon kinahanglan na tang mobiya sa atong asaynment. Mingawon ta sa mga igsoon, ug mabalaka ta nila, ilabina kon mobiya ta tungod sa paglutos. (Mat. 10:23; 2 Cor. 11:28, 29) Dugang pa, ang pagdawat ug laing asaynment​—o bisan ang pagpauli sa atong lugar—​sagad magpasabot nga kinahanglan tang moadyas sa bag-ong kultura. “Wala na mi maanad sa among kultura ug bisan sa pagsangyaw sa among kaugalingong pinulongan,” miingon si Robert ug Mary Jo. Gibati nila nga mora na silag mga langyaw sa ilang kaugalingong nasod. Ang pipila nga nakadawat ug bag-ong asaynment lagmit makaatubang ug wala damhang mga galastohan. Basin mabalaka kaayo sila ug mawad-ag kadasig. Unsay makatabang?

6. Sa unsang paagi makapabilin tang suod kang Jehova?

⁶ Magpabiling suod kang Jehova. (Sant. 4:8) Sa unsang paagi mahimo nato kana? Pinaagi sa pagsalig kaniya ingong “Tigpatalinghog sa pag-ampo.” (Sal. 65:2) “Ibubo ang inyong kasingkasing kaniya,” nag-ingon ang Salmo 62:8. Si Jehova “makahimo gayod ug labaw pa kay sa atong gipangayo o gihunahuna.” (Efe. 3:20) Siya dili lang magtagana sa espesipiko natong gipangayo diha sa pag-ampo. Mahimong buhaton sab niya ang wala nato damha, nga labaw pa sa bisan unsa nga ato tingaling gihunahuna, aron masulbad ang atong mga problema.

7. (a) Unsay makatabang nato sa pagpabiling suod kang Jehova? (b) Sumala sa Hebreohanon 6:10-12, unsay resulta kon padayon tang moalagad kang Jehova nga matinumanon?

⁷ Aron makapabilin kang suod kang Jehova, basaha ang Kasulatan kada adlaw ug palandonga kini. Usa ka kanhing misyonaryo nag-ingon: “Himoa gihapong regular ang inyong pamilyahanong pagsimba ug ang pagpangandam sa tigom, sama sa inyong ginahimo sa inyong asaynment kaniadto.” Dugang pa, padayong himoa ang imong maarangan sa pagsangyaw sa maayong balita diha sa imong bag-ong kongregasyon. Hinumdoman ni Jehova kadtong padayong nag-alagad kaniya nga matinumanon, bisan pag dili na nila mahimo  ang sama sa nahimo nila kaniadto.​—Basaha ang Hebreohanon 6:10-12.

8. Sa unsang paagi ang giingon sa 1 Juan 2:15-17 makatabang nimo sa pagpabiling simple?

⁸ Magpabiling simple. Ayaw tugoti nga ang mga kabalaka sa kalibotan ni Satanas ‘motuok’ sa imong espirituwal nga kalihokan. (Mat. 13:22) Ayawg papresyur sa kalibotan o sa mga higala o paryente nga tingali motambag nimo nga kinahanglan kang mokitag dako aron moarang-arang ang imong kinabuhi. (Basaha ang 1 Juan 2:15-17.) Salig kang Jehova, kinsa nagsaad nga itagana ang tanan natong panginahanglan sa espirituwal, emosyonal, ug materyal ‘dihang manginahanglan ta’ niana.​—Heb. 4:16; 13:5, 6.

9. Sumala sa Proverbio 22:3, 7, nganong dili maayong mangutang kon wala kinahanglana, ug unsay makatabang nato sa paghimog maalamong mga desisyon?

⁹ Likayi ang wala kinahanglanang pagpangutang. (Basaha ang Proverbio 22:3, 7.) Posibleng dakog galastohan ang pagbalhin, ug dali ra tingaling magkautang-utang. Busa aron dili ka maputos sa utang, ayaw pangutang aron mopalit ug mga butang nga wala gyod nimo kinahanglana. Kon naa tay problema, sama pananglitan dihang mag-atiman ta sa masakiton nga mga minahal, basin malisdan ta sa pagdesisyon kon pilay utangon. Sa maong mga situwasyon, hinumdomi nga ang “pag-ampo ug pangamuyo” makatabang nimo sa paghimog maalamong mga desisyon. Agig tubag sa imong mga pag-ampo, mahimong ihatag ni Jehova kanimo ang kalinaw nga ‘magbantay sa imong kasingkasing ug hunahuna,’ nga makatabang nimo sa pagpabiling kalmado aron makahunahuna ka kon unsay kinamaayohang buhaton.​—Filip. 4:6, 7; 1 Ped. 5:7.

10. Unsaon nato pagpangitag bag-ong mga higala?

¹⁰ Makigsuod sa maayong mga higala. Isulti ang imong gibati ug mga eksperyensiya ngadto sa maayong mga higala, ilabina niadtong parehas nimog gibating kalipay ug kalisdanan. Mahimong makatabang ni nga moarang-arang ang imong gibati. (Eccl. 4:9, 10) Ang mga nahigala nimo sa kanhing asaynment higala gihapon nimo. Karon, sa imong bag-ong asaynment, kinahanglan kang mangitag bag-ong mga higala. Hinumdomi nga aron makabaton ug higala, kinahanglang mahigalaon ka. Unsaon nimo ni paghimo? Isulti ang imong nindot nga mga eksperyensiya sa pag-alagad kang Jehova, ug ipakita ang imong kalipay sa pag-alagad. Bisag ang pipila sa kongregasyon dili makasabot kon nganong gimahal nimo pag-ayo ang bug-os panahong pag-alagad, ang uban lagmit madasig sa imong ehemplo ug mahimong maayong mga higala. Pero ayaw pagsigeg estorya bahin sa imong mga kalamposan, ug ayaw pagpokus sa imong negatibong mga pagbati.

11. Sa unsang paagi magpabiling malipayon ang inyong kaminyoon?

¹¹ Kon kinahanglan kang mobiya sa imong asaynment tungod sa dili maayong panglawas  sa imong kapikas, ayaw siyag basola. Sa laing bahin, kon ikaw mismo ang nasakit, ayawg kakonsensiya, nga maghunahunang gipakyas nimo ang imong kapikas. Hinumdomi nga kamo “usa ka unod,” ug misaad mo kang Jehova nga atimanon ang usag usa bisag unsa pay mahitabo. (Mat. 19:5, 6) Kon mibiya mo sa asaynment tungod sa pagmabdos nga wala sa plano, seguroa nga mahibalo ang inyong anak nga mas importante siya kay sa inyong asaynment kaniadto. Pasaligi ang bata nga giisip ninyo siya ingong “ganti” sa Diyos. (Sal. 127:3-5) Dugang pa, sultihi siya sa nindot ninyong mga eksperyensiya sa inyong asaynment kaniadto. Ang pagbuhat niana magpalihok sa inyong anak sa paggamit sa iyang kinabuhi sa malipayong pag-alagad kang Jehova sama kaninyo.

12. (a) Sa unsang paagi makatabang ta aron makapadayon kadtong naa sa bug-os panahong pag-alagad? (b) Sa unsang paagi makatabang ta nila nga mas daling makaadyas sa ilang bag-ong asaynment?

¹² Ikalipay nga daghang kongregasyon ug indibiduwal ang nagtabang niadtong naa sa bug-os panahong pag-alagad aron makapabilin sila sa ilang asaynment. Gibuhat nila kini pinaagi sa pagdasig kanila nga magpadayon diha sa ilang buluhaton, paghatag sa ilang materyal nga panginahanglan, o pagtabang kanila sa pag-atiman sa mga membro sa ilang pamilya nga tua sa layo. (Gal. 6:2) Kon kadtong naa sa bug-os panahong pag-alagad maasayn sa inyong kongregasyon, ayawg hunahunaa nga nareasayn sila kay sila dili epektibo sa ilang asaynment o kaha gidisiplina. * Tabangi hinuon sila nga mas daling makaadyas. Abiabiha sila pag-ayo ug komendahi sa ilang nahimo, bisan pag limitado lang  ang ilang mahimo karon tungod sa dili maayong panglawas. Suora sila. Pagkat-on sa tanan nilang nahibaloan, kahanas, ug eksperyensiya.

13. Unsay atong ikatabang niadtong nakadawat ug bag-ong asaynment?

¹³ Sa sinugdan, kadtong nakadawat ug bag-ong asaynment magkinahanglan tingalig tabang sa pagpangitag kapuy-an ug trabaho, sa transportasyon, ug sa ubang panginahanglan. Basin magkinahanglan pod silag bag-ong impormasyon bahin sa ubang butang, sama sa pagbayad ug buhis ug pagkuhag insyurans. Labaw sa tanan, nagkinahanglan silag pagsabot, dili kaluoy. Tingali sila o ang membro sa ilang pamilya nag-atubag problema sa panglawas. Basin nagbangotan sila tungod sa kamatayon sa usa ka minahal. * Ug basin naguol kaayo sila, bisan sa tago lang, tungod kay gimingaw sila sa mga igsoon sa ilang asaynment kaniadto. Nagkinahanglan silag panahon sa pag-atubang niining nagsagol nga pagbati.

14. Sa unsang paagi natabangan sa mga igsoon ang usa ka sister aron makaadyas siya sa bag-ong asaynment?

¹⁴ Sa kasamtangan, ang imong pagsuportar ug ehemplo makatabang nila sa pag-adyas. “Sa akong asaynment kaniadto, nagdumala kog mga Bible study kada adlaw,” miingon ang usa ka sister nga nag-alagad sa laing nasod sa daghang katuigan. “Sa akong bag-ong asaynment, halos dili gani ko makaablig Bibliya o makapakitag video diha sa ministeryo. Pero paubanon ko sa mga igsoon sa ilang mga balikduaw ug study. Tungod sa kadasig ug kaisog sa mga igsoon sa pagdumalag mauswagong mga Bible study, nakabaton kog mas positibong panglantaw. Nakakat-on ko sa pagsugod ug panaghisgot dinhi sa bag-ong teritoryo. Kining tanan nakatabang nga mahibalik ang akong kalipay.”

15. Sa unsang paagi magmalamposon ka sa imong bag-ong asaynment?

¹⁵ Mahimong magmalamposon ka sa imong bag-ong asaynment. Ayawg hunahunaa nga nausab ang imong asaynment kay dili ka epektibo  sa imong kanhing asaynment o wala na kaayo ka kinahanglana. Hunahunaa ang daghang paagi nga gitabangan ka ni Jehova karon, ug padayon sa pagsangyaw. Sundoga ang matinumanong mga Kristohanon sa unang siglo. Bisag asa sila, “milibot [sila] sa kayutaan nga nagpahayag sa maayong balita bahin sa pulong.” (Buh. 8:1, 4) Ang imong paningkamot nga magpadayon sa pagsangyaw mahimong magpatunghag maayong mga resulta. Pananglitan, ang mga payunir nga gipapahawa sa usa ka nasod mibalhin sa silingang nasod diin gikinahanglan kaayo ang mga magsasangyaw nga nagsulti sa ilang pinulongan. Sulod sa pipila ka bulan, daghang grupo ang naporma ug paspas ang pag-uswag niini.

16. Sa unsang paagi magmalipayon ka sa imong bag-ong asaynment?

¹⁶ “Ang kalipay nga gikan kang Jehova mao ang inyong kusog.” (Neh. 8:10, footnote) Angay nga ang makahatag natog kinadak-ang kalipay mao ang atong relasyon kang Jehova dili ang atong asaynment, bisan pag gimahal nato kini. Busa, magpabiling suod kang Jehova, nga mosalig kaniya alang sa kaalam, giya, ug tabang. Hinumdomi nga gimahal nimo ang imong kanhing asaynment tungod kay gihimo nimo ang tanan sa pagtabang sa mga tawo didto. Himoa sab ang tanan diha sa imong asaynment karon ug tan-awa kon unsaon ka pagtabang ni Jehova nga mahalon pod kana.​—Eccl. 7:10.

17. Unsay angay natong hinumdoman bahin sa atong presenteng asaynment?

¹⁷ Angay natong hinumdoman nga ang atong pag-alagad kang Jehova way kataposan, pero ang atong presenteng asaynment temporaryo lang. Sa bag-ong kalibotan, kitang tanan mahimong makadawat ug bag-ong asaynment. Si Aleksey, nga gihisgotan sa sinugdan, nagtuo nga ang iyang naeksperyensiyahan karon nag-andam niya para sa umaabot. “Segurado ko nga tinuod si Jehova ug ang bag-ong kalibotan, pero mibati ko nga morag layo siya ug dili pa ingon ana ka duol ang bag-ong kalibotan,” miingon si Aleksey. “Karon gibati nako nga si Jehova anaa kanunay sa akong atubangan ug duol na kaayo ang bag-ong kalibotan.” (Buh. 2:25) Bisag unsay atong asaynment, hinaot magpabilin tang suod kang Jehova. Dili gyod ta niya biyaan, kondili tabangan ta niya nga magmalipayon sa paghimo sa atong maarangan sa pag-alagad kaniya​—bisan asa man kana.​—Isa. 41:13.