“Oh Tigpatalinghog sa pag-ampo, moduol kanimo ang tanang matang sa katawhan.”​—Salmo 65:2.

Ang ubang tawo moampo aron moarang-arang ang ilang gibati, bisan pag dili sila motuo nga naa gyoy naminaw nila. Pero ang pag-ampo dili lang basta makapagaan sa atong gibati dihang naa tay mga problema. Ang Bibliya nagpasalig nato nga “si Jehova * duol sa tanang nagatawag kaniya, sa tanang nagatawag kaniya sa kamatuoran. . . . Iyang dunggon ang ilang pagtuaw alang sa tabang.”​—Salmo 145:18, 19.

Busa makaseguro ta nga si Jehova nga Diyos maminaw sa mga pag-ampo niadtong nagasimba kaniya. Siya mahigugmaong nag-ingon: “Kamo motawag kanako ug moanhi ug moampo kanako, ug ako mamati kaninyo.”​—Jeremias 29:12.

“Ayawg hunong sa pag-ampo.”​—Roma 12:12.

Ang Bibliya nagdasig nato nga “mag-ampo kanunay” ug ‘mag-ampo sa matag higayon.’ Busa gusto gyod ni Jehova nga Diyos nga moampo ta kaniya.​—Lucas 18:1; Efeso 6:18.

Nganong gusto sa Diyos nga moampo ta kaniya? Hunahunaa kini: Ang usa ka ginikanan seguradong malipay kon ang iyang bata mohangyo, “Pa, tabangi ko.” Siyempre, ang amahan nahibalo na kon unsay gikinahanglan o gibati sa iyang anak, pero kon madungog niya ang hangyo sa iyang anak, nagpakita na nga ang iyang anak misalig niya ug suod kaniya. Sa samang paagi, dihang mag-ampo ta kang Jehova nga Diyos, atong gipakita nga may pagsalig ta niya ug gusto natong masuod kaniya.​—Proverbio 15:8; Santiago 4:8.

“Itugyan kaniya ang tanan ninyong kabalaka, kay gimahal mo niya.”​—1 Pedro 5:7.

Gusto sa Diyos nga moampo ta kaniya kay siya nagmahal ug may pagtagad kanato. Nahibalo siya sa tanan natong problema ug kabalaka, ug gusto ta niyang tabangan.

Sa tibuok kinabuhi ni Haring David, siya nag-ampo kang Jehova nga Diyos alang sa tabang ug gisulti niya ang iyang hunahuna ug pagbati. (Salmo 23:1-6) Naminaw ba ang Diyos sa mga pag-ampo ni David? Oo, kay iyang gimahal si David. (Buhat 13:22) Ang Diyos maminaw sab sa atong mga pag-ampo kay gimahal ta niya.

Gisulti kana sa usa ka magsusulat sa Bibliya. Segurado siya nga naminaw ang Diyos sa iyang mga pag-ampo, ug dako kanag epekto kaniya. Mas nasuod siya sa Diyos ug nakabatog kusog sa paglahutay sa mga kasakit ug kagul-anan.​—Salmo 116:1-9.

Kon kombinsido ta nga naminaw ang Diyos sa atong mga pag-ampo, dili gyod ta mohunong sa pagpakig-estorya kaniya. Konsideraha ang kasinatian ni Pedro nga taga-Spain. Naaksidente sa dalan ang iyang 19 anyos nga anak ug namatay. Sa iyang grabeng kaguol, gipahungaw ni Pedro sa Diyos ang tanan niyang gibati, ug balikbalik siyang nag-ampo alang sa paghupay ug suporta. Unsay resulta? Si Pedro miingon: “Gitubag gyod ni Jehova ang akong mga pag-ampo. Kami sa akong asawa gihupay ug gisuportahan sa mga isigka-Kristohanon.”

Bisag wala mabalik ang kinabuhi sa iyang anak pinaagi sa pag-ampo, dako nig natabang kang Pedro ug sa iyang pamilya. Ang iyang asawa nga si María Carmen nahinumdom: “Ang pag-ampo nakatabang nako nga masagubang ang akong kaguol. Nahibalo ko nga nakasabot si Jehova nga Diyos sa akong gibati kay dihang mag-ampo ko niya, mobati kog kalinaw ug mokalma ko.”

Gipakita sa Bibliya ug sa personal nga mga eksperyensiya nga maminaw gyod ang Diyos sa mga pag-ampo. Pero naa poy mga pag-ampo nga wala tubaga sa Diyos. Nganong gitubag sa Diyos ang ubang pag-ampo, pero ang uban wala?