Husto ug Sayop: Desisyon nga Angay Nimong Himoon
Ang atong ginasunod nga sukdanan sa kon unsay husto ug sayop dakog epekto sa atong kinabuhi. Si Jehova nga Diyos nahibalo niana, maong gusto niya nga atong sundon ang iyang mga sukdanan.
Gusto ni Jehova nga naa tay malinawon ug malipayong kinabuhi.
“Ako, si Jehova, ang imong Diyos, ang Usa nga nagtudlo kanimo aron makabaton kag kaayohan, ang Usa nga naggiya kanimo sa dalan nga angay nimong laktan. Kon mamati lang unta ka sa akong mga sugo! Ang imong kalinaw mahisama gayod sa suba, ug ang imong pagkamatarong mahisama sa mga balod sa dagat.”—Isaias 48:17, 18.
Ingong atong Maglalalang, ang Diyos nahibalo kon unsay pinakamaayo para nato. Gusto niya nga atong sundon ang iyang giya kay makahatag nig kaayohan nato. Kon mosunod ta sa mga sugo sa Diyos, dili na ta angayng mabalaka kon maayo ba nig resulta o dili. Makaseguro ta nga kanunayng husto ang atong desisyon, nga moresultag kalinaw ug kalipay.
Si Jehova wala magdahom ug labaw sa atong makaya.
“Kini nga sugo nga akong gihatag kaninyo karon dili sobra ka lisod ug dili sab layo kaninyo.”—Deuteronomio 30:11.
Dihang atong sundon ang mga sukdanan sa Diyos, kinahanglan tingali tang mohimog mga kausaban sa atong hunahuna ug panggawi. Pero si Jehova wala magdahom ug labaw sa atong makaya. Ingong atong Maglalalang, nahibalo siya sa atong mga limitasyon. Ug dihang mas mailhan nato si Jehova, atong makita nga “dili bug-at ang iyang mga sugo.”—1 Juan 5:3.
Si Jehova nagsaad nga iyang tabangan kadtong mosunod sa iyang mga sukdanan.
“Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayawg kahadlok. Ako motabang kanimo.’”—Isaias 41:13.
Masunod nato ang mga sukdanan sa Diyos kay siya motabang nato. Pinaagi sa iyang Pulong, ang Bibliya, dasigon ta niya ug hatagag paglaom.
Minilyon sa tibuok kalibotan ang miingon nga ang pagsunod sa mga sukdanan sa Bibliya nakatabang sa ilang kinabuhi. Gusto ba nimong makat-onan ang maayong mga tambag nga naa sa Bibliya? Tan-awa ang binase sa Bibliya nga brosyur nga Mabuhi Ka Hangtod sa Hangtod! nga libre nimong mabatonan diha sa jw.org. Makita ni nimo nga mga leksiyon:
-
Sa Unsang Paagi ang Bibliya Makatabang Kanimo?
-
Ang Bibliya Naghatag ug Paglaom
-
Makasalig ba Ka sa Bibliya?
Dihang imong tun-an ang Pulong sa Diyos, ang Bibliya, imong makita nga ang mga tambag niini dili kinaraan; “kanunay kining kasaligan, karon ug hangtod sa hangtod.” (Salmo 111:8) Ang pagsunod sa mga sukdanan nga naa sa Bibliya makatabang gyod nato nga magkinabuhi sa pinakamaayong paagi. Pero dili ta pugson sa Diyos sa paghimo niana. (Deuteronomio 30:19, 20; Josue 24:15) Kini usa ka desisyon nga angayng himoon sa matag usa kanato.
