Gitagna ni Jesus nga ang maayong balita sa Gingharian sa Diyos isangyaw sa tibuok kalibotan. (Mateo 24:14) Gihisgotan sa basahon sa Daniel nga kini nga Gingharian maoy gobyerno sa Diyos. Ang kapitulo 2 sa maong basahon naghisgot ug tagna bahin sa sunodsunod nga gamhanang mga gobyerno o gingharian sa tawo, gikan sa karaang Babilonya hangtod sa atong panahon karon. Bahin sa mahitabo sa umaabot, ang bersikulo 44 nag-ingon:

“Ang Diyos sa langit magtukod ug gingharian nga dili gayod malaglag. Ug kini nga gingharian dili ipasa ngadto sa laing katawhan. Dugmokon ug taposon niini kining tanang gingharian, ug kini ray mobarog hangtod sa hangtod.”

Kini ug ang ubang mga tagna sa Bibliya nagpakita nga pulihan sa Gingharian sa Diyos ang tanang gobyerno sa tawo. Dayon, kini maghatag ug kasegurohan ug kalinaw sa katawhan. Unsa kahay kahimtang kon magmando na ang Gingharian dinhi sa yuta? Matikdi ang nindot nga mga saad nga hapit nang matuman.

• WALA NAY GIYERA

  Salmo 46:9: “Gipahunong [sa Diyos] ang mga gubat sa tibuok yuta. Gibali niya ang pana ug giputolputol ang bangkaw; gisunog niya ang mga karomata nga panggubat.”

  Hunahunaa kon unsay kahimtang sa kalibotan kon ang kuwarta ug abilidad nga gigamit sa paghimog mga armas gamiton na sa paghimog mga butang nga makahatag ug kaayohan sa mga tawo imbes sa pagpatayg tawo! Kanay mahitabo kon magmando na ang Gingharian sa Diyos dinhi sa yuta.

• WALA NAY SAKIT

  Isaias 33:24: “Walay residente nga moingon: ‘Masakiton ko.’”

  Hunahunaa ang kalibotan nga wala nay kanser, sakit sa kasingkasing, malarya, ug uban pa. Dili na kinahanglan ang mga ospital ug tambal. Ang tanang tawo perpekto nag panglawas sa umaabot.

• ABUNDA NA ANG PAGKAON

  Salmo 72:16: “Duna unyay dagayang lugas sa yuta; mosugwak unya kini sa tumoy sa kabukiran.”

  Daghan nag pagkaon, ug kini mabatonan sa tanan. Wala nay gutomon ug mag-antos sa malnutrisyon.

• WALA NAY KASAKIT, KAGUOL, UG KAMATAYON

  Pinadayag 21:4: “Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”

   Perpekto ug wala nay kataposan ang kinabuhi sa paraisong yuta! Kini ang saad sa atong mapinanggaong Maglalalang, si Jehova nga Diyos.

Posible ba gyong matuman kining tanan? Bisag daghan ang mouyon nga nindot kaayo ang kinabuhi nga gisaad sa Bibliya, daghan sab ang miingon nga lisod imadyinon ang kinabuhing walay kataposan. Dili na ikatingala kay wala pay tawo nga nakasinati niini.

Sulod sa dugay nang panahon, ang katawhan naulipon sa sala ug kamatayon, nakasinatig kasakit, pag-antos, ug kalisdanan maong naghunahuna sila nga normal kana o natural nga bahin sa kinabuhi. Pero dili kana ang katuyoan sa atong Maglalalang, si Jehova nga Diyos.

Aron makaseguro ta nga tinuod ang iyang mga saad, ang Diyos nagpasalig: “Kini dili mobalik kanako nga walay resulta, apan tumanon gayod niini ang bisan unsa nga akong gikalipayan, ug segurado kining molampos sumala sa kon unsay akong katuyoan sa pagpadala niini.”​—Isaias 55:11.

Ang Bibliya nag-ingon nga si Jehova maoy Diyos nga “dili gyod mamakak.” (Tito 1:2) Kay iya mang gisaad kining tanang nindot nga mga butang sa umaabot, maayong pamalandongon kining mga pangutanaha: Posible ba gyod nga ang tawo mabuhi sa walay kataposan sa Paraisong yuta? Unsay atong himoon aron makabenepisyo sa mga saad sa Diyos? Ang mga tubag niana hisgotan sa sunod nga mga artikulo.