ANG nag-unang mga artikulo naghisgot ug lainlaing hitabo nga makapalisod pag-ayo sa kinabuhi. Samtang nagsagubang ka sa imong mga problema, lagmit maghunahuna ka kon naa pa bay rason nga mabuhi o naa bay bisan usa nga nagmahal nimo. Makaseguro ka nga gimahal ka sa Diyos ug nahibalo siya sa imong mga problema. Importante ka kaniya.

Ang magsusulat sa Salmo 86 mipahayag sa iyang pagsalig sa Diyos: “Motawag ko kanimo sa adlaw sa akong kasakitan, kay ikaw motubag kanako.” (Salmo 86:7) Pero basig maghunahuna ka, ‘Unsaon man ko pagtubag sa Diyos “sa adlaw sa akong kasakitan”?’

Bisag dili dayon sulbaron sa Diyos ang imong mga problema, ang iyang Pulong, ang Bibliya, nagpasalig nga hatagan ka niyag kalinaw sa hunahuna nga makatabang nimo sa pagsagubang sa mga problema: “Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat; ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna.” (Filipos 4:6, 7) Palihog konsideraha ang mosunod nga mga teksto sa Bibliya nga nagpasalig nato nga gimahal ta sa Diyos.

“Walay usa [ka goryon] nga gipasagdan sa Diyos. . . . Mas labaw mog bili kay sa daghang goryon.”​—Lucas 12:6, 7, footnote.

HUNAHUNAA KINI: Ang gagmayng langgam morag walay bili sa tawo, pero ang Diyos may pagtagad kanila. Walay bisan usa ka gamayng goryon ang dili mamatikdan sa Diyos; ang matag usa niini bililhon. Para sa Diyos, ang mga tawo mas bililhon kay sa mga goryon. Ang mga tawo mao ang pinakaespesyal sa tanang gihimo sa Diyos dinhi sa yuta. Sila gihimo sumala sa iyang “larawan” ug may abilidad sa pag-ugmad ug pagpakita sa iyang nindot nga mga hiyas.​—Genesis 1:26, 27.

“Oh Jehova, gisusi mo ako, ug nakaila ka kanako. . . . Nahibalo ka sa akong mga hunahuna . . . Susiha ko, ug sayra ang akong mga kabalaka.”​—Salmo 139:1, 2, 23.

HUNAHUNAA KINI: Ang Diyos nakaila pag-ayo nimo. Nahibalo siya sa imong tinuod nga gibati ug mga gikabalak-an. Bisag dili masabtan sa uban ang imong mga problema ug kabalaka, gimahal ka sa Diyos ug gusto ka niyang tabangan. Busa naa gyoy pulos ang imong kinabuhi.

“Oh Jehova, dungga ang akong pag-ampo; hinaot makaabot kanimo ang akong pagtuaw alang sa tabang. . . . Ikiling ang imong igdulungog kanako; palihog tubaga dayon ko dihang motawag ko. . . . Hatagan niyag pagtagad ang pag-ampo sa mga kabos.”​—Salmo 102:1, 2, 17.

HUNAHUNAA KINI: Kini nagpakita nga sukad sa sinugdan sa pag-antos sa tawo, samag gilista ni Jehova ang matag luha sa mga tawo. (Salmo 56:8) Apil niana ang imong mga luha. Dili kalimtan sa Diyos ang tanan nimong pag-antos ug mga luha kay importante ka kaniya.

“Ayawg kabalaka, kay ako imong Diyos. Ako magpalig-on kanimo, oo, ako magtabang kanimo. . . . Ako, si Jehova nga imong Diyos, . . . ang Usa nga nag-ingon kanimo, ‘Ayawg kahadlok. Ako motabang kanimo.’”​—Isaias 41:10, 13.

HUNAHUNAA KINI: Ang Diyos andam motabang nimo. Kon nahugno ka, iya kang bangonon.

“Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.”​—Juan 3:16.

HUNAHUNAA KINI: Gimahal kaayo ka sa Diyos maong gihatag niya ang iyang Anak, si Jesus, ingong halad lukat para nimo. Ang lukat naghatag nimog kahigayonan nga makabatog malipayon ug may katuyoan nga kinabuhi hangtod sa hangtod. *