MGA TAWO

Ang giingon sa Bibliya: Ang Diyos “wala maglalang [sa yuta] sa wala lamay kapuslanan, apan nag-umol niini aron puy-an.”—ISAIAS 45:18.

PLANETANG YUTA

Ang giingon sa Bibliya: “Ang usa ka kaliwatan molabay, ug ang laing kaliwatan moabot, apan ang yuta magpabilin hangtod sa hangtod.”—ECCLESIASTES 1:4.

KAHULOGAN: Sumala sa Bibliya, ang yuta dili gayod malaglag ug kanunay kining puy-an. Busa, unsay gipasabot sa kataposan sa kalibotan?

HUNAHUNAA: Gitandi sa Bibliya ang umaabot nga kataposan sa kalibotan sa nahitabo sa panahon ni Noe. Niadtong panahona, ang yuta “napuno sa kapintasan.” (Genesis 6:13) Pero si Noe matarong nga tawo. Busa giluwas sa Diyos si Noe ug ang iyang pamilya, apan Iyang gilaglag ang daotang mga tawo pinaagig lunop. Kon bahin sa nahitabo niadtong panahona, ang Bibliya nag-ingon: “Ang kalibotan niadtong panahona nakaagom ug kalaglagan dihang kini gilunopan sa tubig.” (2 Pedro 3:6) Busa dunay usa ka kalibotan nga natapos niadtong panahona. Pero, unsay gilaglag? Dili ang yuta, kondili ang daotang mga tawo sa yuta. Busa, dihang ang Bibliya maghisgot ug kataposan sa kalibotan, wala kini magtumong sa pagkalaglag sa planeta. Kini nagtumong sa kalaglagan sa daotang mga tawo sa yuta ug sa sistema sa mga butang nga ilang gihimo.

MGA PROBLEMA UG PAGKADAOTAN

Ang giingon sa Bibliya: “Sa dili na madugay, ang daotan mawala na; pangitaon nimo sila sa ilang nahimutangan, apan wala sila didto. Apan ang mga maaghop manag-iya sa yuta, ug mabatonan nila ang tumang kalipay tungod sa dagayang pakigdait.”—SALMO 37:10, 11.

KAHULOGAN: Ang Lunop sa panahon ni Noe wala bug-os makahanaw sa pagkadaotan. Human sa Lunop, ang daotang mga tawo nagpahinabo na sab ug kadaot sa tanan. Sa dili madugay, taposon sa Diyos ang pagkadaotan. Sama sa giingon sa salmista: “Ang daotan mawala na.” Taposon sa Diyos ang pagkadaotan pinaagi sa iyang Gingharian—usa ka gobyerno sa langit nga magmando sa matarong nga mga tawo sa tibuok yuta.

HUNAHUNAA: Ang mga lider ba sa kalibotan karon mosuportar sa pagmando sa Gingharian sa Diyos? Gipakita sa Bibliya nga dili. Ila hinuong supakon ang Gingharian sa Diyos. (Salmo 2:2) Unsa unyay resulta? Pulihan sa Gingharian sa Diyos ang tanang gobyerno sa tawo, ug “kini ray mobarog hangtod sa hangtod.” (Daniel 2:44) Pero nganong kinahanglang taposon ang pagmando sa tawo?

Ang giingon sa Bibliya: “Dili iya sa tawong naglakaw bisan ang pagtultol sa iyang lakang.”—JEREMIAS 10:23.

KAHULOGAN: Ang mga tawo wala himoa aron magmando sa ilang kaugalingon. Pakyas sila sa ilang pagmando sa ubang tawo ug sa pagsulbad sa ilang mga problema.

HUNAHUNAA: Ang Britannica Academic nag-ingon nga morag dili kaya sa mga gobyerno nga “sulbaron ang mga problema sa kalibotan sama sa kakabos, kagutom, sakit, kalamidad, ug gubat o ubang kapintasan.” Kini midugang: “Ang uban . . . nagtuo nga masulbad lang ang maong mga problema kon usa lang ka gobyerno ang magmando sa tibuok kalibotan.” Pero bisan pag magkahiusa ang tanang gobyerno sa tawo, ang kalibotan mandoan gihapon ug dili hingpit nga mga tawo nga dili makasulbad sa maong mga problema. Ang Gingharian sa Diyos mao lamang ang gobyerno nga makahatag ug permanenteng solusyon sa tanang problema sa kalibotan.

Busa sumala sa Bibliya, dili angayng kahadlokan sa maayong mga tawo ang kataposan sa kalibotan—ang presenteng daotang sistema sa mga butang. Gani, makapalipay ni kay pulihan kining daot nga kalibotan sa nindot kaayo nga bag-ong kalibotan sa Diyos!

Kanus-a kini mahitabo? Ipakita sa sunod nga artikulo ang tubag sa Bibliya.