Gibuhat sa Diyos ang atong lawas nga may talagsaong katakos nga moayo sa kaugalingon niini. Dihang ang himsog nga lawas masamdan, kini “maghimog komplikadong proseso sa pag-ayo sa samad, gamay man o dako.” (Johns Hopkins Medicine) Ang lawas mohimo dayog paagi aron pahunongon ang pagdugo, palapdon ang mga blood vessel o ugat, ayohon ang samad, ug palig-onon ang tissue.

HUNAHUNAA KINI: Kay gidisenyo sa atong Maglalalang ang atong lawas nga may katakos nga moayog pisikal nga samad, makasalig ta sa iyang saad nga tabangan ta niya sa atong emosyonal nga mga problema. Ang salmista miingon: “Giayo niya ang mga dugmok ug kasingkasing; gibugkosan niya ang ilang mga samad.” (Salmo 147:3) Pero kon nag-antos ka tungod sa emosyonal nga problema, nganong makaseguro ka nga tabangan ka ni Jehova—karon ug sa umaabot?

Ang Diyos nagsaad: “Ayawg kahadlok, kay ako nagauban kanimo. Ayawg kabalaka, kay ako imong Diyos. Ako magpalig-on kanimo, oo, ako magtabang kanimo.” (Isaias 41:10) Ang tawong nahibalo nga si Jehova nahigugma niya dunay kalinaw sa hunahuna ug dunay kusog sa pag-atubang sa mga kalisdanan. Gitawag ni apostol Pablo kini nga kalinaw ingong “kalinaw nga gikan sa Diyos, nga labaw sa tanang pagsabot.” Si Pablo midugang: “Naa koy kusog sa pag-atubang sa tanang butang tungod kaniya nga naghatag nakog gahom.”—Filipos 4:4-7, 9, 13.

Ang Bibliya motabang nato aron molig-on ang atong pagtuo sa mga saad ni Jehova bahin sa paglaom sa katawhan. Pananglitan, ang Pinadayag 21:4, 5 nag-ingon kon unsay buhaton sa Diyos ug kon nganong makasalig ta nga iya nang buhaton:

• “Iyang pahiran ang matag luha” sa mga tawo. Wagtangon ni Jehova ang tanan natong pag-antos ug kabalaka, bisan ang mga problema nga para sa uban gamay ra nga butang.

• Kay “naglingkod sa trono” sa langitnong himaya, gamiton sa Labing Gamhanang Hari sa tanang kalalangan ang iyang gahom ug awtoridad aron dili na ta makasinatig pag-antos ug aron tabangan ta.

• Si Jehova nagpasalig nga ang iyang mga saad “kasaligan ug matuod.” Sa ato pa, ang iyang ngalan ug reputasyon maoy pasalig nga tumanon niya ang iyang mga saad.

“‘Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.’ Ug ang Usa nga naglingkod sa trono miingon: ‘Tan-awa! Ginabag-o nako ang tanang butang.’ Siya usab miingon: ‘Isulat kini, kay kining mga pulonga kasaligan ug matuod.’”—Pinadayag 21:4, 5.

Ang uniberso ug ang Bibliya nagpadayag sa personalidad ug kinaiya sa atong langitnong Amahan. Samtang ang kalalangan naghatag ug dili direktang pagdapit nga makigsuod sa Diyos ingong Higala, ang Bibliya naghatag ug direktang pagdapit: “Duol sa Diyos, ug siya moduol kaninyo.” (Santiago 4:8) Ang Buhat 17:27 nag-ingon: “Siya dili layo sa matag usa kanato.”

Samtang mas mailhan nimo ang Diyos, mas mahimo kang kombinsido nga ‘gimahal ka niya.’ (1 Pedro 5:7) Unsay mga kaayohan kon kombinsido ka sa gugma ni Jehova?

Tagda pananglit si Toru nga taga-Japan, nga gipadako sa iyang Kristohanong inahan. Pero nalangkit siya sa pintas nga kalibotan sa yakuza, usa ka dakong sindikato sa Japan. Siya miingon, “Nagtuo ko nga ang Diyos nasuko nako, ug para nako ang kamatayon niadtong mga suod nako maoy silot kanako.” Si Toru miingon nga tungod sa bayolenteng palibot ug panghunahuna, siya nahimong “tawong way kaluoy ug way pagbati.” Kon bahin sa iyang pangandoy, siya miingon, “Una ko mamatay, gusto nakong makapatayg tawo nga mas sikat pa  nako aron makahimo kog kasaysayan sa akong ngalan.”

Pero dihang nagtuon ug Bibliya si Toru ug ang iyang asawa nga si Hannah, si Toru mihimog dakong kausaban sa iyang kinabuhi ug panglantaw. Si Hannah miingon, “Nakita gyod nako ang kausaban sa akong bana.” Karon, si Toru kombinsido: “Duna gyoy Diyos nga nagmahal sa matag usa nato. Dili niya gustong mamatay si bisan kinsa, ug andam siyang mopasaylo niadtong tinuod nga naghinulsol sa ilang mga sala. Siya mamati sa mga butang nga dili nato kayang isulti sa uban ug sa mga butang nga dili masabtan sa uban. Sa dili madugay, wagtangon ni Jehova ang tanang problema, pag-antos, ug kasakit. Bisan karon, siya motabang nato sa talagsaong mga paagi nga wala nato damha. Siya nahigugma ug andam motabang kanato.”—Salmo 136:23.

Sumala sa gipakita sa eksperyensiya ni Toru, ang pagkahibalo nga ang Diyos hapit nang magwagtang sa tanang pag-antos maghatag natog seguradong paglaom sa umaabot ug motabang sab nato nga makabatog malipayong kinabuhi karon. Bisag nagpuyo sa kalibotan nga punog problema, tabangan ka sa Diyos kay siya nahigugma nimo.