Nganong gusto man kaayo sa tawo nga mabuhi hangtod sa hangtod? Ang Bibliya nag-ingon nga gibutang sa Diyos ang maong tinguha sa atong kasingkasing. (Ecclesiastes 3:11) Kini sab nag-ingon nga “ang Diyos gugma.” (1 Juan 4:8) Makataronganon ba nga ang usa ka mahigugmaong Diyos magbutang sa atong kasingkasing ug tinguha nga mabuhi sa walay kataposan pero imposible man diay nang mahitabo?

Siyempre, dili gyod ta gustong mamatay. Gani, ang kamatayon gitawag sa Bibliya nga “kaaway.” (1 Corinto 15:26) Ang uban mubog kinabuhi; ang uban taastaas ug kinabuhi. Pero sa ngadtongadto, ang tanan mamatay. Daghan ang mahadlok ug dili ganahan nga maghisgot bahin niini. Mapildi pa kaha ni nga kaaway? Posible ba gyod na?

Dili katuyoan sa Diyos nga mamatay ang tawo. Gani, ang basahon sa Genesis nagpamatuod nga katuyoan sa Diyos nga ang tawo mabuhi sa yuta hangtod sa hangtod. Giandam ni Jehova nga Diyos ang yuta aron puy-an sa tawo. Dayon iyang gibuhat ang unang tawo, si Adan, ug gibutang siya sa usa ka paraiso, ang hardin sa Eden. Human niana, “nakita sa Diyos nga maayo kaayo ang tanan niyang gibuhat.”​—Genesis 1:26, 31.

 Si Adan gilalang nga hingpit, sumala sa larawan sa Diyos. (Deuteronomio 32:4) Ang asawa ni Adan nga si Eva hingpit pod, ug walay bisan unsang depekto sa hunahuna ug lawas. Si Jehova miingon kanila: “Panganak mo ug pagdaghan, pun-a ang yuta ug gamhi kini. Gamhi sab ang mga isda sa dagat, ang nagalupad nga mga mananap sa kalangitan, ug ang matag buhing linalang sa yuta.”​—Genesis 1:28.

Nagkinahanglag panahon aron ang yuta mapuno sa ilang mga kaliwat. Si Eva manganak, ug ang iyang mga anak manganak pod hangtod nga mapuno ang yuta sumala sa katuyoan sa Diyos. (Isaias 45:18) Makataronganon kaha nga hatagan ni Jehova si Adan ug Eva niana nga kahigayonan kon sila mabuhi kutob ra sa panahon sa ilang mga anak o apo, ug dili nila makita ang resulta?

Hunahunaa sab ang sugo nga gamhan, o mandoan, nila ang mga hayop. Si Adan gisugo sa pagngalan sa mga hayop, ug nagkinahanglan nag taas nga panahon. (Genesis 2:19) Pero aron magamhan ang mga hayop, kinahanglan siyang magtuon bahin nila ug mahibalo kon unsaon sila pag-atiman. Kana nagkinahanglag mas taas pa gyod nga panahon.

Busa ang sugo sa Diyos nga pun-on ang yuta ug gamhan ang mga hayop nagpakita nga ang unang magtiayon gidisenyo nga mabuhi sa taas nga panahon. Gani, si Adan nabuhi sa taas kaayong panahon.

Gipakita sa Bibliya nga ang mga tawo kaniadto tag-as kaayog kinabuhi kon ikompara karon. Kini nag-ingon: “Si Adan nabuhi ug 930 ka tuig.” Dayon kini naghisgot ug unom pa ka lalaki nga nabuhig kapin sa 900 ka tuig! Sila mao si Set, Enos, Kenan, Jared, Matusalem, ug Noe. Sila nabuhi sa wala pa ang Lunop sa panahon ni Noe, ug si Noe nag-edad ug 600 dihang nahitabo ang Lunop. (Genesis 5:5-27; 7:6; 9:29) Nganong tag-as man kaayo silag kinabuhi?

Silang tanan nabuhi sa panahon nga duol pa sa kahingpitan ang tawo. Kana tingali ang pangunang hinungdan nga taas silag kinabuhi. Pero nganong ang pagkahingpit konektado sa taas nga kinabuhi? Ug sa unsang paagi mapildi o mawala ang kamatayon? Aron matubag kana, kinahanglan una natong masabtan kon nganong matigulang ta ug mamatay.