Giingnan sa Diyos si Adan, “Sa adlaw nga mokaon ka [sa bunga] niini mamatay gyod ka.” (Genesis 2:17) Kon gibuhat sa Diyos si Adan nga matigulang ug mamatay, walay pulos nga ihatag ang maong sugo. Nahibalo si Adan nga kon dili siya mokaon sa bunga sa kahoy, dili siya mamatay.

Dili kinahanglang mokaon si Adan ug Eva sa bunga sa maong kahoy aron mabuhi, kay daghan mag prutas sa hardin. (Genesis 2:9) Kon dili nila kaonon ang bunga sa maong kahoy, pagpakita kana sa ilang pagkamatinumanon sa Diyos nga naghatag nilag kinabuhi. Pagpakita sab kana nga ilang giila ang katungod sa Diyos sa pagmando kanila.

Aron masabtan kon nganong namatay si Adan ug Eva, kinahanglan natong susihon ang usa ka panag-estoryahay nga nakaapektar natong tanan. Si Satanas nga Yawa migamit ug halas sa pagsultig bakak. Ang Bibliya nag-ingon: “Sa tanang ihalas nga mananap sa yuta nga gibuhat ni Jehova nga Diyos, ang halas mao ang labing mabinantayon. Busa miingon kini sa babaye: ‘Tinuod ba nga miingon ang Diyos nga dili mo angayng mokaon sa bunga sa tanang kahoy sa tanaman?’”​—Genesis 3:1.

Si Eva mitubag: “Makakaon mi sa bunga sa mga kahoy sa tanaman. Apan bahin sa kahoy nga naa sa tunga sa tanaman, ang Diyos nag-ingon: ‘Ayaw gayod ninyog kan-a o hikapa ang bunga niini, kay kon himoon ninyo kini, kamo mamatay.’” Dayon ang halas miingon kaniya: “Dili tinuod nga mamatay mo. Kay nahibalo ang Diyos nga sa mismong adlaw nga mokaon mo sa bunga niini, ang inyong mga mata mabuka ug maparehas mo sa Diyos, nga mahibalo sa maayo ug daotan.” Busa gipasabot ni Satanas nga si Jehova bakakon ug naay maayong butang nga dili Niya gustong ihatag sa atong unang ginikanan.​—Genesis 3:2-5.

Mituo si Eva sa iyang nadungog. Gitan-aw niya ang bunga sa kahoy, ug kini lami kaayong tan-awon ug kaonon! Mikab-ot siya sa bunga ug mikaon. Dayon ang Bibliya nag-ingon: “Dihang kauban na niya ang iyang bana, iya kining gihatagan ug mikaon sab kini.”​—Genesis 3:6.

Seguradong naguol ang Diyos nga ang iyang minahal nga mga anak tinuyong misupak kaniya! Unsay iyang gihimo? Si Jehova miingon kang Adan: “Ikaw mobalik sa yuta, kay gikan ka sa yuta. Kay abog ka ug sa abog ka mobalik.” (Genesis 3:17-19) Tungod niana, “si Adan nabuhi ug 930 ka tuig, ug siya namatay.” (Genesis 5:5) Wala siya moadto sa langit o sa kalibotan sa mga espiritu. Una siya buhata ni Jehova gikan sa abog, siya wala maglungtad. Busa dihang siya namatay, siya mibalik sa pagkaabog nga walay kinabuhi. Siya wala na maglungtad. Makapasubo gyod nga kahimtang!

Tungod sa ilang tinuyo nga pagsupak, nawala ni Adan ug Eva ang ilang pagkahingpit ug ang kahigayonan nga mabuhi sa walay kataposan. Nausab ang ilang pisikal nga kahimtang; sila dili na hingpit ug nahimong makasasala. Pero dili lang sila ang naapektohan sa ilang sala. Ilang napasa ang ilang makasasalang kahimtang ngadto sa ilang mga kaliwat. Ang Roma 5:12 nag-ingon: “Sama nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ang kamatayon mikaylap sa tanang tawo tungod kay silang tanan nakasala man.”

Sa Bibliya, ang sala ug kamatayon gihubit ingong “ang tabon nga naglimin sa tanang katawhan ug ang hinablon nga tela nga nagputos sa tanang kanasoran.” (Isaias 25:7) Ang maong tabon nga nagputos sa katawhan maoy samag makahilo nga yamog nga walay bisan usa nga makaikyas. Tinuod gyod nga “diha kang Adan ang tanan nangamatay.” (1 Corinto 15:22) Kini ang pangutana nga motungha, nga gisulat ni apostol Pablo: “Kinsay moluwas nako gikan niining lawasa nga maoy hinungdan sa akong kamatayon?” Duna bay makaluwas nato?​—Roma 7:24.