Ang ubang tawo naghunahuna kon nausab ba ang sinulat nga Pulong sa Diyos. Si propetang Isaias miingon nga ang pulong sa Diyos “molungtad hangtod sa hangtod.” (Isaias 40:8) Nganong makaseguro ta nga ang mga saad sa Diyos tukmang napreserbar?

Ang Diyos dunay gahom sa pagpreserbar sa iyang Pulong ug iyang giseguro nga dili kini mausab. Sa karaang panahon, dihang mohimog sinulat nga mga kopya sa Balaang Kasulatan, iphon sa mga tigkopya ang matag letra niini aron maseguro nga walay nadugang, nausab, o natangtang nga letra. Pero kay dili man hingpit, ang ubang tigkopya nakahimog ginagmayng sayop.

Dunay linibo ka kopya sa karaang mga manuskrito sa Balaang Kasulatan. Pinaagi sa pagtandi sa lainlaing kopya niini, dali rang makita ang bisan unsang sayop.​—Para sa dugang impormasyon, tan-awa ang artikulong “Nausab ba ang Mensahe sa Bibliya?” sa jw.org.

Tagda pananglitan ang karaang mga sinulat nga gitawag ug Dead Sea Scrolls. Nadiskobrehan kini sa mga bedouin diha sa mga langob duol sa Patayng Dagat niadtong 1947. Kining karaang mga sinulat, nga naundan sa pipila ka bahin sa Balaang Kasulatan, gisulat mga 2,000 ka tuig na ang milabay. Gitandi sa mga eksperto kining karaang mga manuskrito ug ang Balaang Kasulatan karon. Unsay ilang namatikdan?

Nakita sa mga eskolar nga ang Pulong sa Diyos nga atong nabatonan karon parehas ra sa orihinal nga mga sinulat. * Ang ilang maampingong pagsusi sa mas karaang mga manuskrito nagpamatuod nga ang atong mabasa diha sa Balaang Kasulatan mao ang orihinal nga mensahe sa Diyos. Seguradong gipreserbar gyod sa Diyos ang katukma sa iyang Balaang mga Sinulat para kanato karon.

Busa dihang atong basahon ang Pulong sa Diyos, makasalig ta nga kini tukma ug wala mausab. Karon, atong susihon kon unsay atong makat-onan bahin sa Diyos gikan sa iyang mga propeta.