Daghang tawo sa tibuok kalibotan ang walay pagkaon ug kapuy-an. Ang uban sab mibati nga wala na silay kaugmaon. Sa unsang paagi ang atong mga paningkamot sa pagtabang niadtong nanginahanglan moresulta sa pag-uyon ug panalangin sa Diyos?

“Kadtong magpakitag kaluoy sa mga pobre nagpahulam kang Jehova, ug bayran Niya siya sa iyang gibuhat.”​—PROVERBIO 19:17.

Si Jesus nag-asoy bahin sa usa ka tawo nga gitulis ug gibiyaan nga himalatyon. (Lucas 10:29-37) Usa ka matinabangong tawo ang mihunong aron atimanon ang tawo nga grabeng naangol. Iya kining gitabangan bisag dili sila parehog kagikan.

Kining buotang tawo wala lang basta nagtambal sa samad ug naghatag ug pinansiyal nga tabang sa tawong gitulis, kondili nagtagana pod siyag paghupay kaniya.

Unsay atong makat-onan niini nga asoy? Gipakita ni Jesus nga angay natong tabangan ang mga nanginahanglan kutob sa atong maarangan. (Proverbio 14:31) Ang Balaang Kasulatan nagtudlo nga hapit nang wad-on sa Diyos ang kakabos ug pag-antos. Pero basig makapangutana ta: Sa unsang paagi ug kanus-a kini himoon sa Diyos? Hisgotan sa sunod nga artikulo ang mga panalangin nga giandam sa mahigugmaong Diyos para kanimo.