1. Sa unsang paagi kita magmasinugtanon sa Diyos ug, sa samang higayon, sa gobyerno sa tawo?

ANG Pulong sa Diyos nagsugo kanato nga magmasinugtanon kita sa mga gobyerno sa tawo, apan nagtudlo usab kini nga angay natong sugton ang Diyos inay ang mga tawo. (Buh. 5:29; Tito 3:1) Nagkasumpaki ba kini? Wala! Ang prinsipyo sa relatibong pagpasakop makatabang nato sa pagsabot ug pagtuman niini nga mga sugo. Gisumaryo ni Jesus kining prinsipyoha dihang siya miingon: “Busa, ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” ^[1] (Mat. 22:21) Sa unsang paagi nato sundon ang sugo ni Jesus? Magpasakop kita sa awtoridad sa gobyerno sa nasod diin kita nagpuyo pinaagi sa pagsunod sa mga balaod, pagtahod sa mga opisyales, ug pagbayad sa mga buhis. (Roma 13:7) Apan, kon ang mga awtoridad sa kagamhanan magsugo kanato nga supakon ang Diyos, kita matinahorong modumili sa pagsunod niana.

2. Unsaon nato pagpakita nga wala tay gidapigan sa politikal nga mga kalihokan sa kalibotan?

² Atong ibayad sa Diyos ang nahiangay kaniya pinaagi sa pagpabiling neyutral sa politikal nga kalihokan sa kalibotan. (Isa. 2:4) Busa, dili kita mosupak sa mga gobyerno sa tawo nga gitugotan ni Jehova  nga magmando; ni kita magpasiugdag patriotiko o nasyonalistikong kalihokan. (Roma 13:1, 2) Dili kita mangampanya, mobotar o mokandidato sa eleksiyon, o mosulay pag-usab sa gobyerno.

3. Nganong angay tang magpabiling neyutral?

³ Ang Bibliya naghatag ug ubay-ubayng rason kon nganong gisugo kita sa Diyos sa pagpabiling neyutral. Pananglitan, atong gisunod ang pagtulon-an ug ehemplo sa iyang Anak, si Jesu-Kristo, pinaagi sa pagkahimong “dili bahin sa kalibotan,” nga dili mag-apil-apil sa politika ug gubat. (Juan 6:15; 17:16) Kinahanglan kitang magpabiling neyutral aron mahimong maunongong mga sakop sa Gingharian sa Diyos. Kay kon dili, makabaton kaha kitag hinlo nga konsensiya dihang isangyaw nato nga ang Gingharian lamang sa Diyos ang makasulbad sa mga problema sa tawo? Dugang pa, dili sama sa bakak nga mga relihiyon diin nagkabahinbahin ang mga membro niini tungod sa pag-apil-apil sa politika, ang matuod nga pagsimba nagpreserbar sa atong tibuok kalibotang panag-igsoonay pinaagi sa pagtabang kanato nga magpabiling neyutral.—1 Ped. 2:17.

4. (a) Giunsa nato pagkahibalo nga magkaanam ka lisod ang pagpabiling neyutral? (b) Nganong angay tang mangandam karon sa pagpabiling neyutral?

⁴ Tingali nagpuyo kita sa dapit diin ang politikal nga kahimtang malinawon, nga daw nagtugot sa matuod nga pagsimba. Bisan pa niana, samtang magkaduol ang kataposan sa sistema ni Satanas, makadahom kita nga mahimong hagit ang pagpabiling neyutral. Ang kalibotan karon punog mga tawo nga “dili-ikasabot” ug “gahig ulo,” busa mas mosamot pa ang pagkabahinbahin ug panagsumpaki. (2 Tim. 3:3, 4) Sa pipila ka nasod, ang atong mga igsoon nakasinati nag wala damhang mga hagit sa ilang neyutralidad tungod sa kalit nga kausaban sa politikal nga kahimtang. Nasabtan ba nimo kon nganong kinahanglan natong palig-onon ang atong determinasyon nga magpabiling neyutral? Kon ayha pa nato kana palig-onon dihang mag-atubang na kitag malisod nga kahimtang, basig ikompromiso nato ang atong neyutralidad. Busa, sa unsang paagi kita makapangandam aron mahuptan ang atong neyutralidad niining nabahin nga kalibotan? Atong hisgotan ang upat ka paagi nga makatabang nato nga molampos.

5. Unsay panglantaw ni Jehova sa mga gobyerno sa tawo?

⁵ Ang usa ka paagi nga makapabiling neyutral mao ang pagsundog sa panglantaw ni Jehova labot sa politikal nga mga sistema. Bisag ang pipila ka gobyerno morag maayo ra, dili gayod katuyoan ni Jehova nga ang tawo momando sa iyang isigkatawo. (Jer. 10:23) Ang gobyerno sa tawo nagpasiugdag nasyonalismo, nga makapabahin sa tawhanong pamilya. Bisan ang kinamaayohan nga tawhanong lider dili makasulbad sa tanang problema. Dugang pa, sukad sa 1914, ang mga gobyerno sa tawo nahimong karibal sa Gingharian sa Diyos, nga hapit nang maglaglag sa maong mga gobyerno.—Basaha ang Salmo 2:2, 7-9.

6. Unsay angay natong pagtratar niadtong may awtoridad diha sa gobyerno?

⁶ Gitugotan sa Diyos nga magpabilin ang politikal nga sistema sa kalibotan kay nakatabang kini sa pagpatunhay sa kalinaw ug kahusay, nga sa baylo, nakatabang nato sa pagsangyaw sa maayong balita sa Gingharian. (Roma 13:3, 4) Gani, ang Diyos nagsugo kanato sa pag-ampo alang niadtong anaa sa awtoridad, ilabina kon ang ilang mga desisyon mahimong makaapektar sa atong pagsimba. (1 Tim. 2:1, 2) Kita moapelar sa mga awtoridad sa gobyerno alang sa patas nga pagtratar, sama sa gibuhat ni apostol Pablo. (Buh. 25:11) Bisag nagtudlo ang Bibliya nga ang kaaway sa Diyos, si Satanas, may awtoridad ibabaw sa politikal nga mga sistema, wala kini mag-ingon nga siya direktang nagkontrolar sa matag lider o opisyal. (Luc. 4:5, 6) Busa, dili ta angayng mohatag ug ideya kang bisan kinsa nga ang usa ka opisyal gikontrolar sa Yawa. Hinunoa, dihang makiglabot kita sa “mga kagamhanan ug sa mga awtoridad,” kita “dili magsultig  daotan mahitungod kang bisan kinsa.”—Tito 3:1, 2.

7. Unsang panghunahuna ang angay natong likayan?

⁷ Kita nagmasinugtanon sa Diyos kon wala tay gipaborang kandidato o politikal nga partido, makahatag man silag kaayohan kanato o dili. Sa unsang paagi masulayan ang atong neyutralidad niining bahina? Ibutang ta nga may mga tawong nagprotesta aron palagpoton ang usa ka madaogdaogong rehimen, nga tingali nagpahinabo usab ug pag-antos sa katawhan sa Diyos. Bisag dili kita moduyog sa mga nagprotesta, posible kaha nga diha sa atong kasingkasing, kita misuportar kanila? (Efe. 2:2) Kinahanglan kitang magpabiling neyutral dili lang sa pulong ug buhat kondili diha usab sa atong kasingkasing.

8. Dihang lisod ang pagpabiling neyutral, sa unsang paagi kita “magmabinantayon” apan “inosente”?

⁸ Ang ikaduhang paagi nga mahuptan nato ang atong neyutralidad mao ang pagkahimong ‘mabinantayon ingon sa mga halas apan inosente ingon sa mga salampati’ dihang mag-atubag mga hagit. (Basaha ang Mateo 10:16, 17.) Kita magmabinantayon kon atong ilhong daan ang mga kapeligrohan, ug kita magpabiling inosente pinaagi sa dili pagkompromiso sa atong baroganan. Tagda ang pipila ka potensiyal nga mga hagit ug kon unsaon nato kana pag-atubang.

9. Unsay angay natong bantayan dihang makigsulti sa uban?

⁹ Diha sa pagpakigsulti. Kinahanglan tang magmabinantayon dihang ang mga tawo maghisgot ug politikal nga mga isyu. Pananglitan, dihang makigsulti sa mga tawo bahin sa Gingharian, likayi ang pagdayeg o kaha pagsaway sa mga opinyon sa usa ka politikal nga partido o lider. Paningkamoti nga makakitag topiko nga pareho ninyong giuyonan sa tagbalay pinaagi sa pagpokus diha sa hinungdan sa problema imbes sa giduso nga politikal nga solusyon. Dayon, ipakita gikan sa Bibliya kon sa unsang paagi ang gobyerno sa Diyos bug-os nga magsulbad sa problema. Kon motungha ang kontrobersiyal nga mga isyu sama sa aborsiyon o pagminyo sa parehas ug sekso, depensahi ang mga sukdanan sa Diyos ug ipatin-aw kon sa unsang paagi nato kini gisunod. Panahon sa panaghisgot, magpabiling neyutral sa politikal nga bahin niini nga mga isyu. Dili ta mohatag ug opinyon kon unsang mga balaora ang angayng ipatuman, wagtangon, o ilisan, ug dili nato pugson ang uban sa pag-uyon kanato.

10. Sa unsang paagi nato maseguro nga kita magpabiling neyutral dihang magtan-aw o magbasag bisan unsa diha sa media?

¹⁰ Ang media. Usahay, ang usa ka “balita” ipresentar sa paagi nga nagdapig sa usa ka isyu. Usahay ang media gamiton sa politikal nga sistema. Sa mga nasod nga kontrolado sa gobyerno ang media, ang mga balita tingali dayag nga may gidapigan. Apan bisan sa gitawag nga gawasnong mga nasod, ang mga Kristohanon kinahanglang mag-amping nga dili maimpluwensiyahan sa opinyon sa usa ka komentarista. Pangutan-a ang imong kaugalingon: ‘Ganahan ba kong mamati sa usa ka komentarista tungod kay uyon ko sa iyang opinyon bahin sa politika?’ Kon mao, maayong mangita kag mga balita nga walay gidapigan. Bisan unsa pa man, likayi ang pagtan-aw o pagbasag mga balita nga may gidapigang politikal nga mga isyu. Ug itandi ang imong madungog ngadto sa “sumbanan sa makapahimsog nga mga pulong” nga makita sa Bibliya.—2 Tim. 1:13.

11. Nganong malisdan tingali kita sa pagpabiling neyutral kon importante kaayo kanato ang atong kabtangan?

¹¹ Materyalismo. Kon gihatagan natog dakong importansiya ang atong kabtangan, posibleng mokompromiso ta dihang sulayan ang atong neyutralidad. Nakita ni Ruth nga taga-Malawi ang ubay-ubayng Saksi nga mikompromiso dihang gilutos sila sa katuigan sa 1970. Siya nahinumdom: “Nawili sila sa ilang komportableng kinabuhi. Ang pipila miduyog namo dihang gipalayas mi sa among nasod apan sa ulahi sila mianib sa politikal nga partido ug mipauli kay dili nila gustong masinati ang kalisod sa  kinabuhi diha sa kampo sa mga kagiw.” Sa kasukwahi, ang kadaghanan sa katawhan sa Diyos nagpabiling neyutral bisan pa sa kalisod sa ekonomiya o pagkawala pa gani sa tanan nilang kabtangan.—Heb. 10:34.

12, 13. (a) Unsay panglantaw ni Jehova sa mga tawo? (b) Unsaon nato pagkahibalo kon sobra na ang atong pagpasigarbo sa atong nasod?

¹² Sobrang pagpasigarbo. Ang mga tawo sagad magpasigarbo sa ilang rasa, tribo, kultura, siyudad, o nasod. Apan, nahibalo kita nga ang sobrang pagpasigarbo sa atong tribo, kultura, o nasod kasumpaki sa panglantaw ni Jehova sa tawhanong pagmando ug sa pamilya. Siyempre, dili gusto sa Diyos nga isalikway nato ang atong kultura. Sa pagkatinuod, gilalang kita ni Jehova nga lahi sa usag usa, ug kita nalipay ug nakadayeg sa pagkadaiya sa tawhanong pamilya. Bisan pa niana, angay natong hinumdoman nga sa panglantaw sa Diyos, ang tanang tawo managsama ra.—Roma 10:12.

¹³ Ang sobrang pagpasigarbo sa atong nasod maoy gamot sa nasyonalismo ug mahimong unang tikang nga motultol sa pagkompromiso. Ang mga Kristohanon mahimong maapektohan sa maong matang sa garbo, kay bisan ang pipila sa unang siglong kongregasyon nagpihig sa ilang mga igsoon tungod sa nasyonalidad niini. (Buh. 6:1) Unsaon nato pagkahibalo nga nagsugod na paggamot diha kanato ang sayop nga matang sa garbo? Ibutang ta nga ang usa ka igsoon gikan sa laing nasod mihatag ug sugyot. Isalikway ba dayon nimo kana, nga maghunahuna, ‘Mas maayo ang among paagi dinhi’? Imbes himoon kana, angay natong ipadapat ang inspiradong tambag: ‘Uban sa pagpaubos sa hunahuna isipa nga ang uban labaw kay kaninyo.’—Filip. 2:3.

14. Sa unsang paagi makatabang kanato ang pag-ampo, ug unsang ehemplo sa Bibliya ang nagpamatuod niini?

¹⁴ Ang ikatulong paagi nga mahuptan nato ang atong neyutralidad mao ang pagpangayog kusog kang Jehova. Pag-ampo alang sa balaang espiritu, nga makatabang nimo sa pagpailob ug pagpugong sa kaugalingon, mga hiyas nga gikinahanglan aron makasagubang sa usa ka gobyerno nga tingali korap o dili makataronganon. Makapangayo sab ka kang Jehova ug kaalam sa pag-ila ug pag-atubang sa mga situwasyon nga mahimong makapakompromiso nimo sa imong neyutralidad. (Sant. 1:5) Kon napriso ka o kaha gisilotan sa laing paagi tungod sa imong pagbarog dapig sa matuod nga pagsimba, pag-ampo alang sa kusog aron maisogon nimong madepensahan ang imong pagtuo ug maantos ang bisan unsang paglutos nga moabot.—Basaha ang Buhat 4:27-31.

15. Sa unsang paagi ang Bibliya makatabang nato sa pagpabiling neyutral? (Tan-awa usab ang kahon nga “Ang Pulong sa Diyos Nagpalig-on sa Ilang Baroganan.”)

¹⁵ Si Jehova makapalig-on kanimo pinaagi sa iyang Pulong. Palandonga ang mga teksto nga makatabang nimo sa paghupot sa imong neyutralidad ilalom sa pagsulay. Memoryaha na kana karon, aron kana makapalig-on nimo bisag wala kay Bibliya nianang panahona. Ang Pulong sa Diyos makapalig-on sa imong paglaom sa umaabot nga mga panalangin sa Gingharian. Hinungdanon kini nga paglaom aron makalahutay kita sa paglutos. (Roma 8:25) Pagpilig mga teksto nga naghubit sa mga panalangin nga ilabinang gilaoman nimo nga matagamtam, ug handurawa ang imong kaugalingon nga nagtagamtam na sa maong mga panalangin sa Paraiso.

16, 17. Unsay atong makat-onan sa ehemplo sa matinumanong mga alagad sa Diyos nga nagpabiling neyutral? (Tan-awa ang hulagway sa sinugdan sa artikulo.)

¹⁶ Ang pagpamalandong sa ehemplo sa matinumanong mga alagad ni Jehova mao ang ikaupat nga paagi nga mahuptan nato ang atong neyutralidad. Ang ilang ehemplo makahatag kanato sa kaalam ug kusog nga gikinahanglan aron makalahutay. Pananglitan, si Sadrak, Mesak,  ug Abednego midumili sa pagsimba sa larawan nga nagrepresentar sa nasod sa Babilonya. (Basaha ang Daniel 3:16-18.) Ang pagbasa bahin sa ilang determinasyon nakahatag sa mga Saksi karon ug kaisog sa pagdumili sa pagsimba sa bandera sa ilang nasod. Dugang pa, si Jesus wala gayod mag-apil-apil sa mga panagbangi sa politika ug sa katilingban. Kay nahibalo siya sa epekto sa iyang ehemplo nganha sa uban, gidasig niya ang iyang mga tinun-an: “Magmaisogon! Gidaog ko na ang kalibotan.”—Juan 16:33.

¹⁷ Daghang Saksi sa modernong panahon ang naghupot sa ilang neyutralidad. Ang pipila nag-antos ug pisikal nga pag-abuso ug pagkabilanggo ug namatay pa gani tungod sa ilang pagtuo. Ang ilang ehemplo makatabang nimo sama sa nasinati ni Barış, nga taga-Turkey, kinsa miingon: “Si Franz Reiter maoy usa ka batan-ong brader nga gipatay tungod kay midumili siya sa pag-anib sa kasundalohan ni Hitler. Ang sulat niya sa iyang inahan sa gabii una siya mamatay nagpakita sa kadako sa iyang pagtuo ug pagsalig kang Jehova, ug gusto nakong sundogon ang iyang ehemplo kon makaatubang kog susamang pagsulay.” ^[2]

18, 19. (a) Sa unsang paagi ang mga membro sa kongregasyon makatabang nimo sa pagpabiling neyutral? (b) Unsay determinado nimong buhaton?

¹⁸ Ang mga igsoon sa inyong kongregasyon makatabang nimo sa pagpabiling neyutral. Pahibaloa ang mga ansiyano sa mga pagsulay sa neyutralidad nga imong giatubang, ug pangayoa ang ilang binase sa Bibliyang tambag. Ang mga membro sa kongregasyon makadasig kanimo kon nahibalo sila sa mga hagit nga imong giatubang. Hangyoa sila nga iampo ka nila. Siyempre, kon buot nato nga tabangan ug iampo kita sa atong mga igsoon, angay sab natong buhaton kana kanila. (Mat. 7:12) Ang artikulo sa jw.org nga “Jehovah’s Witnesses Imprisoned for Their Faith—By Location” nga makita ubos sa NEWSROOM > LEGAL DEVELOPMENTS makatabang nimo nga mahimong espesipiko sa imong mga pag-ampo. Kini naglakip ug mga link sa listahan sa mga Saksi nga napriso karon tungod sa ilang pagtuo. Pagpili ug pipila ka ngalan, ug iampo nga ang maong mga igsoon maisogong makahupot sa ilang integridad.—Efe. 6:19, 20.

¹⁹ Samtang talitapos na ang mga gobyerno sa tawo, dili ikatingala nga mas pit-oson nila kita tungod sa atong pagkamaunongon kang Jehova ug sa iyang Gingharian. Busa, hinaot nga palig-onon nato karon ang atong determinasyon nga magpabiling neyutral niining nabahin nga kalibotan.