1, 2. (a) Ipatin-aw kon nganong ang pagpabawtismo usa ka seryosong desisyon. (b) Unsay kinahanglang seguroon sa usa una magpabawtismo?

IKAW ba usa ka batan-on nga nagplanong magpabawtismo? Kon mao, matagamtam nimo ang kinadak-ang pribilehiyo nga puwedeng mabatonan. Pero sa gihisgotan sa miaging artikulo, ang bawtismo usa ka seryosong desisyon. Kini nagsimbolo sa imong pahinungod—usa ka seryosong panaad kang Jehova nga alagaron siya sa walay kataposan pinaagi sa pag-una sa iyang kabubut-on. Makataronganon lang nga ayha ka pa magpabawtismo kon kuwalipikado ka nang mohimo sa maong desisyon, kon personal nimo kana nga desisyon, ug kon nasabtan na nimo ang kahulogan sa pagpahinungod.

² Komosta kon gibati nimo nga dili ka pa andam magpabawtismo? O komosta kon gusto ka nang magpabawtismo pero gibati sa imong ginikanan nga angay ka pang maghulat, tingali hangtod nga mas daghan ka nag kasinatian sa Kristohanong pagkinabuhi? Bisan unsa may kahimtang, ayawg kaluya. Hinunoa, gamita kini nga kahigayonan nga mouswag aron, sa dili madugay, puwede ka nang magpabawtismo.  Bahin niana, makatakda kag mga tumong maylabot sa (1) imong baroganan, (2) imong binuhatan, ug (3) imong apresasyon.

3, 4. Unsay makat-onan sa mga batan-on sa ehemplo ni Timoteo?

³ Hunahunaa kon unsaon nimo pagtubag kining mga pangutanaha: Nganong nagtuo ko nga dunay Diyos? Unsay nakapakombinsir nako nga ang Bibliya maoy inspiradong Pulong sa Diyos? Nganong gibati nako nga ang pagkinabuhi subay sa moral nga mga sukdanan sa Diyos mas maayo kay sa pagsunod sa paagi sa pagkinabuhi sa kalibotan? Ang maong mga pangutana wala ipatungha aron magduhaduha ka. Hinunoa, kana makatabang nimo sa pagsunod sa tambag ni apostol Pablo: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ (Roma 12:2) Pero nganong kinahanglang pamatud-an sa mga Kristohanon sa Roma sa ilang kaugalingon ang butang nga ila nang gidawat?

⁴ Tagda ang usa ka pananglitan sa Bibliya. Si Timoteo sinati kaayo sa Kasulatan. Gitudloan siya sa iyang inahan ug apohan “sukad pa sa pagkamasuso.” Bisan pa niana, si Pablo nag-awhag kang Timoteo: “Magpadayon ka sa mga butang nga imong nakat-onan ug nakakombinsir kanimo sa pagtuo.” (2 Tim. 3:14, 15) Sumala sa usa ka reperensiya, ang orihinal nga pulong alang sa ‘nakombinsir’ nagkahulogan nga ang usa “kombinsido ug segurado nga tinuod ang usa ka butang.” Si Timoteo kombinsido nga iyang nakaplagan ang kamatuoran. Iya kining gidawat, dili tungod kay giingnan siya sa iyang inahan ug apohan nga buhaton kana, kondili tungod kay gisusi niya ang mga katarongan niini ug nakombinsir.—Basaha ang Roma 12:1.

5, 6. Nganong importante ang pagkat-on sa paggamit sa imong “gahom sa pagpangatarongan” samtang batan-on ka pa?

⁵ Komosta sa imong bahin? Tingali dugay ka nang nahibalo sa kamatuoran sa Bibliya. Kon mao, nganong dili himoong tumong nga susihog maayo ang mga katarongan sa imong gituohan? Kana makapalig-on sa imong pagtuo ug makatabang nimo nga dili mahaylo sa pagpangdani sa isigkabatan-on, sa propaganda sa kalibotan, ug bisan sa imong kaugalingong pagbati.

⁶ Ang pagkat-on sa paggamit sa imong “gahom sa pagpangatarongan” samtang batan-on ka pa mag-andam nimo sa pagtubag sa mga pangutana sa imong isigkabatan-on, sama sa: ‘Nganong segurado ka nga dunay Diyos? Nganong gitugotan sa usa ka mahigugmaong Diyos ang pagkadaotan? Nganong nakaingon ka nga ang Diyos kanunayng naglungtad?’ Kon andam ka, ang maong mga pangutana dili makapahuyang sa imong pagtuo kondili makadasig nimo sa paghimog dugang nga personal nga pagtuon.

7-9. Isaysay kon sa unsang paagi ang online nga serye sa mga giya sa pagtuon, ang “Unsay Tinuod nga Gitudlo sa Bibliya?,” makatabang sa pagpalig-on sa imong pagtuo.

⁷ Ang makugihong personal nga pagtuon makatabang nimo sa pagtubag sa mga pangutana, pagwagtang sa mga pagduhaduha, ug pagpalig-on sa imong pagtuo. (Buh. 17:11) Kita gitagan-ag mga publikasyon nga makatabang nimo sa paghimo niana. Daghan ang natabangan dihang gitun-an nila ang brosyur nga The Origin of Life—Five Questions Worth Asking ug ang librong Is There a Creator Who Cares About You? Dugang pa, daghang batan-on ang nakabenepisyo sa online nga seksiyong “Unsay Tinuod nga Gitudlo sa Bibliya?” Kini nga serye sa mga giya sa pagtuon makita sa jw.org/ceb. Tan-awa ubos sa GITUDLO SA BIBLIYA. Ang matag giya sa pagtuon makatabang nimo sa pagpalig-on sa imong baroganan bahin sa usa ka pagtulon-an sa Bibliya.

⁸ Tungod kay sinati ka na sa Bibliya, lagmit makatubag ka dayon sa pipila ka pangutana sa maong mga giya sa pagtuon. Pero nganong segurado man ka sa imong tubag? Ang mga giya sa pagtuon nag-awhag nimo sa pagpangatarongan pinasukad sa pipila ka teksto ug  sa pagsulat sa imong hunahuna bahin niana. Kini makatabang nimo sa pagpangandam kon unsaon pagpatin-aw ang imong gituohan ngadto sa uban. Ang online nga seksiyong “Unsay Tinuod nga Gitudlo sa Bibliya?” nakatabang sa daghang batan-on sa pagpalig-on sa ilang pagtuo. Kon duna kay Internet, nganong dili nimo kini himoong bahin sa imong personal nga pagtuon?

⁹ Pinaagi sa pagpalig-on sa imong pagtuo, mas mahimo kang andam sa pagpabawtismo. Usa ka batan-ong sister miingon: “Sa wala pa ko modesisyon nga magpabawtismo, akong gitun-an ang Bibliya ug napamatud-an nako nga kini ang matuod nga relihiyon. Ug sa matag adlaw sa akong kinabuhi, nag-anam ka lig-on ang akong pagtuo.”

10. Nganong makataronganong dahomon nga ang usa ka bawtismadong Kristohanon magpakitag binuhatan nga kaharmonya sa iyang pagtuo?

¹⁰ Ang Bibliya nag-ingon: “Ang pagtuo patay, kon kini walay binuhatan.” (Sant. 2:17) Kon lig-on ang imong pagtuo, makataronganong dahomon nga ipakita nimo kana sa imong binuhatan. Unsang matanga sa mga binuhatan? Ang Bibliya naghisgot bahin sa “balaang mga buhat sa panggawi ug mga buhat sa diyosnong pagkamahinalaron.”—Basaha ang 2 Pedro 3:11.

11. Ipatin-aw ang ekspresyong “balaang mga buhat sa panggawi.”

¹¹ Aron makahimog “balaang mga buhat sa panggawi,” kinahanglang magmahinlo ka sa moral. Komosta ka nianang bahina? Pananglitan, hunahunaa ang milabayng unom ka bulan. Giunsa nimo pagpakita nga ang imong “gahom sa pagsabot” nabansay sa pag-ila sa maayo ug sa daotan? (Heb. 5:14) May mahunahunaan ka bang higayon nga nasuklan nimo ang tentasyon o pagpangdani sa imong isigkabatan-on? Maayo ba ang imong panggawi sa eskuylahan? Mibarog ka ba sa imong pagtuo imbes mopahiuyon sa imong mga klasmet aron dili ka bugalbugalan? (1 Ped. 4:3, 4) Tinuod, walay tawong hingpit. Bisan ang dugay nang mga alagad ni Jehova usahay maulaw ug mahadlok nga mosangyaw. Apan ang usa ka tawo nga napahinungod kang Jehova mapasigarbohon gayod sa pagdala sa ngalan sa Diyos, ug ipakita niya kini sa iyang panggawi.

12. Unsay pipila sa “mga buhat sa diyosnong pagkamahinalaron,” ug unsay angay nimong panglantaw niana?

¹² Unsa ang “mga buhat sa diyosnong pagkamahinalaron”? Kini naglakip sa imong mga kalihokan sa kongregasyon, sama sa pagtambong sa mga tigom ug pagsangyaw. Lakip usab niini ang espirituwal nga mga kalihokan nga dili makita sa uban, sama sa imong pribadong mga pag-ampo ug personal nga pagtuon. Ang usa nga nagpahinungod sa iyang kaugalingon kang Jehova dili gyod mag-isip niini nga mga buhat ingong kabug-at. Hinunoa, ang iyang tinamdan susama nianang kang Haring David, kinsa miingon: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.”—Sal. 40:8.

13, 14. Unsang mga tabang ang gitagana aron makahimo kitag “mga buhat sa diyosnong pagkamahinalaron,” ug sa unsang paagi ang pipila ka batan-on nakabenepisyo niini?

¹³ Aron matabangan ka sa pagtakdag mga tumong, dunay worksheet sa panid 308 ug 309 sa librong Mga Pangutanang Gisukna sa mga Batan-on—Mga Tubag nga Mosaler, Tomo 2. Sa worksheet, puwede nimong isulat ang imong tubag sa mga pangutana sama sa “Unsa ka espesipiko ang imong mga pag-ampo, ug unsay gipadayag niini maylabot sa imong gugma kang Jehova?” “Unsa pay imong ilakip sa imong pagtuon?” “Mosangyaw ka ba bisan dili mosangyaw ang imong ginikanan?” Diha sa worksheet, duna pod kay kasulatan sa imong mga tumong maylabot sa imong pag-ampo, personal nga pagtuon, ug pagsangyaw.

¹⁴ Daghang batan-on nga nagplanong magpabawtismo  ang natabangan niini nga mga worksheet. Usa ka batan-ong sister nga si Tilda miingon: “Akong gigamit ang worksheet sa pagtakdag mga tumong. Anam-anam nakong gikab-ot ang maong mga tumong, ug paglabay sa usa ka tuig, andam na kong magpabawtismo.” Ang batan-ong brader nga si Patrick nakabenepisyo usab niini. “Nahibalo na ko kon unsay akong mga tumong,” matod niya, “pero dihang gisulat nako kana, mas naningkamot ko sa pagkab-ot niana.”

15. Ipatin-aw kon nganong ang pagpahinungod maoy personal nga desisyon.

¹⁵ Usa sa makapainteres nga pangutana sa worksheet mao kini: “Moalagad ka ba gihapon kang Jehova bisan mohunong na sa pag-alagad ang imong ginikanan ug mga higala?” Hinumdomi, ingong dedikado ug bawtismadong Kristohanon, ikaw mismo ang moatubang kang Jehova. Ang imong pag-alagad kaniya dili angayng magdepende sa uban, bisan sa imong ginikanan. Ang imong balaang mga buhat sa panggawi ug mga buhat sa diyosnong pagkamahinalaron magpamatuod nga ikaw nagkinabuhi subay sa kamatuoran ug mahimo nang kuwalipikado sa bawtismo.

16, 17. (a) Unsay angayng magpalihok sa usa sa pagkahimong Kristohanon? (b) Sa unsang paagi ikailustrar ang imong apresasyon sa lukat?

¹⁶ Usa ka tawo nga sinati sa Moisesnong Balaod ang nangutana kang Jesus: “Unsa ang kinadak-ang sugo?” Si Jesus mitubag: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mat. 22:35-37) Gipakita ni Jesus dinhi kon unsay angayng motibo sa Kristohanong mga buhat, lakip ang pagpabawtismo—ang kinasingkasing nga gugma kang Jehova. Usa sa kinamaayohang mga paagi aron molalom ang imong gugma kang Jehova mao ang pagpamalandong sa iyang kinalabwang gasa—ang halad lukat sa iyang Anak. (Basaha ang 2 Corinto 5:14, 15; 1 Juan 4:9, 19.) Kon imong pamalandongon ang lukat ug ang kahulogan niini alang kanimo, madasig ka sa pag-apresyar niini.

¹⁷ Ang imong apresasyon sa lukat ikailustrar niining paagiha: Hunahunaa nga hapit ka nang malumos, ug may miluwas nimo. Igo ra ba kang mouli sa balay, mag-ilis, ug kalimtan ang iyang gihimo? Siyempre dili! Seguradong mobati kag utang kabubut-on sa tawo nga nagluwas nimo. Ang tinuod, utang nimo sa maong tawo ang imong kinabuhi! Apan labaw pa niana ang atong utang kang Jehova nga Diyos ug kang Jesu-Kristo. Kon wala ang lukat, kitang tanan, sa diwa, mangalumos sa sala ug kamatayon. Tungod sa ilang dakong gugma, atong nabatonan ang paglaom nga mabuhi sa walay kataposan sa paraisong yuta!

18, 19. (a) Nganong dili ka angayng mahadlok nga mahimong iya ni Jehova? (b) Sa unsang paagi ang pag-alagad kang Jehova makahatag nimog kaayohan?

 ¹⁸ Giapresyar ba nimo ang nahimo ni Jehova alang kanimo? Kon mao, haom lang nga imong ipahinungod ang imong kinabuhi kang Jehova ug magpabawtismo. Hinumdomi, ang pahinungod maoy usa ka seryosong panaad kang Jehova nga buhaton ang iyang kabubut-on sa walay kataposan, bisag unsa pay mahitabo. Angay ka bang mahadlok sa paghimo niana nga panaad? Dili gayod! Hinumdomi nga si Jehova naghunahuna sa imong kaayohan, ug siya ang “tigganti sa mga matinuorong nagapangita kaniya.” (Heb. 11:6) Ang pagpahinungod sa imong kinabuhi kang Jehova ug pagpabawtismo dili makadaot kanimo. Hinunoa, ang pag-alagad kang Jehova makahatag nimog kaayohan. Usa ka 24 anyos nga brader nga nabawtismohan sa wala pa siya matin-edyer miingon: “Mas lalom tingali ang akong kahibalo kon dako-dako na kog edad nga nagpabawtismo, pero ang pagdesisyon nga ipahinungod ang akong kinabuhi kang Jehova nanalipod nako gikan sa kalibotanong mga pangagpas.”

¹⁹ Lahi ra gyod si Jehova kang Satanas, kinsa hakog ug wala maghunahuna sa imong kaayohan! Si Satanas walay ikahatag nga ganti niadtong modapig niya. Wala siyay maayong balita nga mapaabot ug walay masanag nga kaugmaon. Nan, unsaon man niya paghatag sa usa ka butang nga wala niya mabatoni? Ang ikahatag lang ni Satanas kanimo maoy dulom nga kaugmaon, kay mao nay iyang kaugmaon!—Pin. 20:10.

20. Unsay mahimo sa usa ka batan-on aron mouswag ngadto sa pagpahinungod ug pagpabawtismo? (Tan-awa usab ang kahon nga “ Tabang Aron Mouswag Ka sa Espirituwal.”)

²⁰ Tin-aw, ang pagpahinungod sa imong kinabuhi kang Jehova mao ang kinamaayohang desisyon. Andam ka na bang mohimo niana? Kon mao, ayaw pagduhaduha. Sa laing bahin, kon nagkinahanglan ka pag panahon, gamita ang mga sugyot niining artikuloha aron mouswag ka. Si Pablo misulat sa mga taga-Filipos: “Sa unsa mang sukod nga kita nakahimo na ug pag-uswag, magpadayon kita sa paglakaw nga mahusay niining samang rutina.” (Filip. 3:16) Kon imong sundon ang maong tambag, sa dili madugay, mapalihok ka sa pagpahinungod sa imong kinabuhi kang Jehova ug sa pagpabawtismo.