HUMAN sa pipila ka adlaw nga paghangin ug pag-ulan, misidlak ra gyod ang adlaw niadtong Lunes, Septiyembre 1, 1919. Nianang hapona, halos 1,000 ka delegado ang nagtigom sa awditoryum nga masudlag 2,500 ka tawo alang sa pangbukas nga sesyon sa kombensiyon sa Cedar Point, Ohio, U.S.A. Pagkagabii, 2,000 pa ang nangabot sakay sa barko, awto, ug mga tren. Sa Martes, misamot ka daghan ang mga tawo maong ang ulahing bahin sa kombensiyon didto na gihimo sa gawas sa awditoryum, ilalom sa kakahoyan.

Tungod sa silaw sa adlaw, ang mga anino sa dahon nahisamag lace diha sa amerkanang gisul-ob sa mga brader. Ang balhibo sa kalo sa mga sister gihuyop sa huyohoy gikan sa Lake Erie. “Nindot kaayo ang samag parke nga palibot, layo sa kabanha sa kalibotan. Mora nag paraiso,” nahinumdom ang usa ka brader.

Pero ang kanindot sa palibot nahawngan sa kalipay nga makita diha sa nawong sa mga nanambong. “Ang tanan morag relihiyoso kaayo,” miingon ang usa ka lokal nga mantalaan, “pero sila malipayon kaayo.” Ang mga Estudyante sa Bibliya nalipayng makig-uban sa ilang mga igsoon human sa grabeng mga pagsulay sa milabayng mga tuig: mga pagsupak panahon sa gubat; grabeng panagbangi diha sa mga kongregasyon; pagsira sa Brooklyn Bethel; pagkapriso sa daghang igsoon tungod sa Gingharian, apil na sa walo ka nangunang mga brader kinsa gisentensiyahag hangtod sa 20 ka tuig nga pagkapriso. *

Kay nadismayar ug naglibog kon unsay buhaton niadtong malisod nga mga tuig, ang pipila ka Estudyante sa Bibliya mihunong na sa pagsangyaw. Pero ang kadaghanan mihimo sa ilang maarangan aron makapadayon bisan pa sa pagsupak sa gobyerno. Pananglitan, ang usa ka imbestigador mitaho nga bisan pa sa mga hulga, ang mga Estudyante sa Bibliya nga gisukitsukit miinsistir nga sila “magpadayon sa pagsangyaw sa pulong sa Diyos hangtod sa kataposan.”

Niini nga yugto sa pagsulay, ang matinumanong mga Estudyante sa Bibliya “naghulat sa pagtultol sa Ginoo, . . . nga kanunayng nag-ampo alang sa giya sa Amahan.” Karon sila nahiusa pag-usab diha sa makapalipayng asembliya sa Cedar Point. Gisulti sa usa ka sister ang gibati sa kadaghanan. Naghunahuna sila kon unsaon nila pagpauswag ang ilang buluhaton ug pagsangyaw na usab sa organisadong paagi. Labaw sa bisan unsa pa, gusto na nilang mosangyaw!

Sa tibuok semana, ang mga delegado naghunahuna kon unsa kahay ipasabot sa mga letrang “GA” nga makita sa programa sa kombensiyon, welcome card, ug mga karatula sa palibot sa kombensiyon. Sa Biyernes, “Co-Laborer’s Day,” gipahibalo ra gyod ni Joseph F. Rutherford ang kahulogan niini ngadto sa 6,000 ka kombensiyonista. Ang “GA” nagtumong sa The Golden Age—ang bag-ong magasin para sa pagsangyaw. *

Sa paghisgot bahin sa iyang kaubang mga dinihogan, si Brader Rutherford miingon: “Bisan sa kasamok, tungod sa ilang pagtuo, ilang nakita ang Bulawanong Panahon sa mahimayaong pagmando sa Mesiyas. . . . Giisip nila nga ilang pangunang katungdanan ug pribilehiyo ang pagpahibalo sa kalibotan sa pag-abot sa Bulawanong Panahon. Kini maoy bahin sa sugo nga gihatag sa Diyos kanila.”

Ang The Golden Age, “usa ka Magasin sa Kamatuoran, Paglaom, ug Pagtuo,” gamiton sa pagsugod sa usa ka bag-ong paagi sa pagpakaylap sa kamatuoran—ang balaybalay nga kampanya sa suskrisyon. Dihang gipangutana kon kinsay gustong moapil sa maong buluhaton, ang tanang nanambong nanindog. Dayon, “uban ang kadasig ug kasibot nga nasinati lamang niadtong nagsunod sa tunob ni Jesus,” sila miawit: “Ipadan-ag ang kahayag ug kamatuoran, Oh Ginoo.” “Dili gyod nako makalimtan nga daw nauyog ang kakahoyan,” miingon si J. M. Norris.

Human sa sesyon, ang mga delegado milinyag pipila ka oras aron mahimong usa sa mga unang makakuhag suskrisyon sa magasin. Daghan ang mibatig sama kang Mabel Philbrick, kinsa miingon: “Makapahinam gayong mahibaloan nga may buluhaton na sab mi nga angayng himoon!”

Mga 7,000 ka Estudyante sa Bibliya ang nangandam para sa buluhaton. Ang handbill nga Organization Method ug ang pulyetong To Whom the Work Is Entrusted naghatag niini nga detalye: Ang bag-ong Service Department sa hedkuwarter maoy magdumala sa buluhaton. Ang kongregasyon angayng magpormag Komite sa Pag-alagad ug magtudlog direktor nga maoy magpasa sa instruksiyon. Ang mga teritoryo bahinon ngadto sa mga seksiyon nga may tag-150 ngadto sa 200 ka balay. Magpahigayon silag Tigom sa Pag-alagad kada Huwebes sa gabii aron ang mga igsoon makapaambit sa ilang mga eksperyensiya ug makahatag sa ilang mga report sa pagsangyaw.

“Pag-uli namo sa balay, napuliki dayon mi sa kampanya sa suskrisyon,” matod ni Herman Philbrick. Daghan silag nakaplagang mga interesado. “Human sa gubat ug sa grabeng kagul-anan, daw ganahan ang tanan bisan sa paghunahuna lang bahin sa usa ka bulawanong panahon,” miingon si Beulah Covey. Si Arthur Claus misulat: “Ang tibuok kongregasyon natingala sa kadaghan sa nagsuskribir.” Duha pa lang ka bulan human sa unang gula niini, halos tunga sa milyong sampol nga kopya sa The Golden Age ang napahimutang, ug 50,000 ang nagsuskribir.

Sa ulahi, si A. H. Macmillan miingon nga ang artikulong “Ebanghelyo sa Gingharian,” sa Hulyo 1, 1920 nga gula sa The Watch Tower, mao ang unang higayon nga gidasig sa organisasyon ang mga igsoon sa tibuok kalibotan sa pagsangyaw sa Gingharian. Kana nga artikulo nagdasig sa tanang dinihogang Kristohanon sa “paghatag ug pamatuod sa kalibotan nga haduol na ang gingharian sa langit.” Karon, ang mga igsoon ni Kristo, nga mao “ang mga piniyalan sa buluhaton,” giduyogan sa minilyon nga madasigong nagsangyaw sa Gingharian samtang naghulat sa Mesiyanikong bulawanong panahon.