Ang Kape Magpataas ba sa Kuwenta sa Imong Kolesterol?

SINULAT SA KORESPONSAL SA PAGMATA! SA BRAZIL

ANG MGA TIGDUKIDUKI sa Wageningen Agricultural University, sa Netherlands, nag-ingon nga ang pag-inom ug dili-sinala nga kape magpataas sa kuwenta sa imong kolesterol.

Ang hinungdanong pulong maoy “dili-sinala.” Ngano? Ang Research Reports, usa ka pulyeto gikan sa Netherlands Organization for Scientific Research, nag-ingong ang mga bunga sa kape adunay usa ka mopataas-sa-kolesterol nga substansiya nga gitawag ug cafestol. Sa dihang direktang ibubo ang init nga tubig sa pinolbos nga kape, ang cafestol makuha. Kana matuod usab sa dihang ang maayong-pagkapolbos nga kape lagaon sa tubig sa daghang beses, sama sa mahitabo sa Turko nga kape, o sa dihang gamiton ang metal nga salaan inay ang papel nga salaan, sama sa mahitabo diha sa usa ka lutoang French press. Kon dili gamiton ang papel nga salaan, ang cafestol masagol sa linagang kape.

Ang usa ka tasang kape nga dili sinala, nga mahimong adunay abot ug upat ka miligramong cafestol, makapataas sa kuwenta sa kolesterol sa mga 1 ka porsiyento. Ang kapeng espresso may cafestol usab, sanglit kini himoon nga dili gamiton ang papel nga salaan. Bisan pa niana, menos ang mopataas-sa-kolesterol nga epekto niini kon mogamit kag usa ka gamayng tasa. Kon diyutay ang espresso, diyutay ra ang cafestol​—tingali usa o duha ka miligramo lamang matag tasa. Hinunoa, ang Research Reports nagpasidaan nga lima ka gagmayng mga tasa sa espresso sa usa ka adlaw makapataas sa kuwenta sa kolesterol sa lawas sa 2 ka porsiyento.

Ang hinungdanong punto mao nga ang kape nga himoon pinaagi sa paggamit ug papel nga salaan walay cafestol.