Gikan sa Among mga Magbabasa

Vasco da Gama Nalingaw kaayo ako sa artikulong “Ang Talagsaong Panaw ni Vasco da Gama.” (Marso 22, 1999) Daghan kadto ug ilustrasyon ug matulon-anon. Inyong giingon nga siya may tulo ka gagmayng mga barko sa iyang panaw, apan sa pagkatinuod upat kadto. Gawas pa, kamo nag-ingon nga si Da Gama mipauli sa Lisbon sa Septiyembre 8, 1499. Apan, siya miabot sa hinapos ang Agosto.

P. N., Kenya

Tinuod nga ang panaw ni Da Gama nagsugod nga may upat ka barko. Bisan pa niana, ang bahin sa panaw nga gibatbat sa introduksiyon nahitabo human sa pagkaguba sa ikaupat nga barko. Bahin sa petsa sa iyang pag-abot sa Lisbon, ang kadaghanang basahon nagbutang niana sa sayo sa Septiyembre. Makaiikag, ang “Portugal and the Discoveries” nag-ingon: “Si Vasco da Gama miabot sa o duol sa ika-29 sa Agosto, kay gidawat sa Hari uban sa tanang nahiangayng seremonya sa ika-8 sa Septiyembre.” Basin kini makahusay sa morag pagkasumpaki.​—ED.

Mga Crossword Puzzle Buot kong mosulat kaninyo bahin sa mga crossword puzzle sa Awake! Malingaw ako kanila tungod kay kana makapapuliki sa akong utok, ug sa edad 78, ang usa kinahanglang magpalihok sa kaisipan. Sa dihang mobasa kita sa Bibliya, ang atong mga kaisipan kasagarang dili magpondo nianang detalyadong impormasyon sama nianang gipahayag diha sa mga pulongbay. Busa mogahin akog panahon sa pagsusi sa tanang gisitar nga mga kasulatan. Salamat sa maong bahin.

J. W., Tinipong Bansa

Comenius Ako nagtudlo sa usa ka grupo sa dagko nang mga tawo sa pagbasa. Ang inyong ekselenteng artikulong “Comenius​—Ang Magmumugna sa Modernong Edukasyon” (Mayo 8, 1999) nakatabang kanako sa pagsabot kon nganong ang pipila may suliran sa pagkakat-on. Ang impormasyon diha sa nag-uban nga kahon, “Pipila sa mga Prinsipyo sa Pagtudlo ni John Comenius,” mahimong mapuslanon kaayo.

N. A. F., Brazil

Salamat sa matulon-anong artikulo. Mas daghan ang akong nakat-onan bahin kang Comenius gikan sa upat ka panid sa Pagmata! kay sa akong nakat-onan gikan sa napulo ka lektyur sa panahon sa akong pagtungha sa unibersidad.

H. P., Alemanya

Bibliya sa Nitibong Amerikano Sa dihang akong nabasa ang artikulong “Mga Nitibong Amerikano ug ang Bibliya” (Mayo 8, 1999), ang akong interes napukaw ilabina sa inyong mga pagpunting sa Bibliya ni John Eliot alang sa Massachusett nga mga Indian. Ang akong bana ug ako nakakitag kopya nianang Bibliyaha sa usa ka pagduaw sa Huntington Library, sa San Marino, California. Gibuksan kadto sa basahon sa Mga Salmo, ug ang ngalang Jehova balikbalik nga makita. Pagkadako sa among kalipay nga makakita sa ngalan sa Diyos diha niining ika-17ng-siglo nga Bibliya!

B. J., Tinipong Bansa

Pagpanarbaho sa mga Bata Salamat sa seryeng “Pagpanarbaho sa mga Bata​—Ang Kataposan Niini Haduol Na!” (Mayo 22, 1999) Sa una kong nakita ang hapin, ang akong matinud-anong opinyon mao nga ang mga artikulo walay kalabotan sa akong nasod. Apan sa dihang gisugdan ko kini pagbasa, wala ako makaundang. Sa pagpahayag nga mas pintok, ako nalisang. Bag-o pa akong nakapalit ug tinahi-sa-kamot nga dulaang oso sa tipik sa prisyo kon ginama pa kana sa Hapon. Makapagun-ob sa kasingkasing ang paghunahuna nga ang way-kasingkasing nga pagtratar sa gagmayng kabataan basin nakaamot sa baratong prisyo niana.

S. O., Hapon

Timbang Diyes anyos ako. Salamat sa artikulong “Mga Batan-on Nangutana . . . Sa Unsang Paagi Mabuntog Ko ang Akong Sobrang Kabalaka sa Timbang?” (Mayo 22, 1999) Ako naghunahuna kanunay nga bug-at kaayo ako. Sa pagbasa niining artikuloha, nasabtan ko nga ang lawas sa usa ka tawo dili ang labing hinungdanon. Labawng hinungdanon mao ang mga kinaiya sa usa ka tawo.

M. S., Rusya