La Bambouseraie—Usa ka Damgo nga Natuman

SINULAT SA KORESPONSAL SA PAGMATA! SA PRANSIYA

HALOS 150 ka tuig kanhi sa habagatan sa Pransiya, si Eugène Mazel, usa ka tig-importar ug Asianhong mga lamas, nagsugod sa paghimo sa kinadak-ang semilyahan ug kawayan sa kalibotan, nga adunay duolag 200 ka klase niining kusog-motubo, daghag-gamit nga tanom. Hangtod sa 1855, ang ambisyon ni Mazel napugngan sa usa ka dakong babag: Ang kawayan niadto dili motubo sa Uropa.

Ang mga paninguha sa pag-importar sa tanom gikan sa Asia napakyas. Bisan pag ang kawayan may pagkalig-on diha sa kaugalingong puy-anan niini (ang pila ka klase makasugakod sa mga temperatura ingon ka ubos sa -24 grado Celsius ug makatubo sa gihabogon nga 5,000 metros), imposible ang pagpabuhi sa mga gamot panahon sa dugayng biyahe tabok sa mga kontinente. Hinuon, tungod sa pag-abot sa mas tulin nga mga barko, ang mga espesimen sa kawayan malamposong naimportar paingon sa Inglaterra niadtong 1827 ug, sa ulahi, paingon sa Pransiya. Ang damgo ni Mazel usa ka lakang nga mas duol sa katumanan!

Ang sunod nga suliran ni Mazel mao ang pagkaplag ug angayng dapit alang sa iyang semilyahan. Sa 1855 gipalit niya ang 84-akre nga propiedad duol sa lungsod sa Anduze, sa habagatan sa Pransiya, nga nakapahimulos sa klima sa Mediteranyo ug napanalanginan ug nahiangayng yuta. Gikinahanglan ang dakong trabaho aron paagoson niana ang tubig gikan sa usa ka suba sa duol. Apan milampos ang dakong panlimbasog ni Mazel.

Ikasubo, pagka-1890, si Mazel nahapay ug kinahanglang ibaligya niya ang iyang bililhong hardin. Bisan pa niana, hinunoa, gipadayon sa uban ang nabiyaan niya, mao nga karon sa matag tuig ang gibanabanang 350,000 ka tawo motan-aw sa La Bambouseraie​—ang damgo ni Mazel nga natuman.

[Picture Credit Line sa panid 31]

Tanang hulagway: La Bambouseraie de Prafrance