Ang Dakong Tigdisenyo Gibutyag

BISAN ang mga siyentipiko mouyon nga ang ginaingong basahon sa kinaiyahan dili magpaduhaduha sa usa nga makataronganon ug hunahuna nga adunay usa ka Tigdisenyo, usa ka Maglalalang. Sa dugay na kaayong panahon kanhi ang Kristohanong si apostol Pablo nagsulat nga ang iya sa Diyos nga “dili-makita nga mga hiyas tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos.” (Roma 1:20) Apan ang basahon sa kinaiyahan dili kompleto sa pagpadayag niini sa Diyos ug sa iyang kabubut-on. Pananglitan, kini wala magbutyag sa katuyoan sa kinabuhi. Sa mapasalamaton, ang Awtor sa kalalangan nagbutyag sa iyang kaugalingon diha sa laing basahon​—iyang dinasig nga Pulong, ang Bibliya.​—2 Timoteo 3:16.

Bisan tuod dili usa ka basahon sa siyensiya, ang Bibliya nagtubag sa tanang hinungdanong mga pangutana nga dili matubag sa kinaiyanhon nga kalibotan. Kini nagtubag sa usa sa unang mga pangutana nga kasagarang isukna sa mga tawo sa dihang magtuon sa batid nga butang nga  binuhat​—Kinsay nagbuhat niini? Mahitungod sa kalalangan, matikdi kon unsay giingon sa Bibliya diha sa Pinadayag 4:​11: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Oo, ang Dakong Tigdisenyo mao si Jehova nga Diyos, ug ang iyang ngalan makita duolan sa 7,000 ka higayon sa orihinal nga mga manuskrito sa Bibliya.

Mga 3,500 ka tuig una pa sa atong siyentipikanhong panahon, usa ka tawo nga ginganlan ug Job, nga dayag nga maayong maniid sa kinaiyahan ug tawong may kaisipan, nagpasidungog kang Jehova nga maoy tuboran sa kalalangan. Si Job nangutana: “Pangutan-a, palihog, ang mga mananap nga binuhi, ug sila motudlo kanimo; usab ang pak-an nga mga linalang sa kalangitan, ug sila mosugilon kanimo. O magpakita sa imong pagtagad sa yuta, ug kini motudlo kanimo; ug ang mga isda sa kadagatan mopahayag kanimo.” Unsay gitudlo nilang tanan bahin sa kalalangan? Si Job nagtubag pinaagig pangutana: “Kinsa taliwala kanilang tanan ang wala mahibalo nga ang kamot ni Jehova mismo maoy nagbuhat niini?”​—Job 12:​7-9.

Ang Katuyoan ni Jehova Alang sa mga Tawo

Ang Bibliya nagpadayag usab sa katuyoan ni Jehova alang sa mga tawo. Unsang katuyoana kana? Ang katuyoan nga tagamtamon sa matarong nga mga tawo ang gasa nga kinabuhing walay kataposan diha sa Paraiso​—dinhi mismo sa yuta. “Ang matarong magapanunod sa yuta, ug sila magapuyo niana sa walay kataposan,” nag-ingon ang Salmo 37:29. Sa susama, si Jesus miingon: “Bulahan ang mga maaghop; kay sila magapanunod sa yuta.”​—Mateo 5:​5, King James Version.

Dugang pa, tungod sa usa ka linain nga kahibalo, ang yuta magpabiling usa ka malinawong paraiso. Nag-ingon ang Isaias 11:​9: “Dili nila pagadaoton ni pagagub-on ang tibuok ko nga bukid nga balaan; tungod kay ang yuta mapuno gayod sa kahibalo ni Jehova ingon sa tubig nga nagatabon sa dagat.” Sa pagkatinuod, “ang kahibalo ni Jehova” mao ang yawi sa walay kataposang kinabuhi, pakigdait, ug kalipay. Gilig-on kini ni Jesus sa dihang siya miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Sa dihang makabaton ug kinabuhing walay kataposan, ang mga tawo sa kataposan makapahimulos sa yuta sumala sa orihinal nga katuyoan sa Diyos. Imbes makalaay, ang kinabuhing walay kataposan maoy usa ka walay pagkatapos nga adbentura sa pagdiskobre ug kalipay.

Usa ka Kulbahinam nga Hagit!

Ang Ecclesiastes 3:​11 nag-ingon: “Gihimo [sa Diyos] ang tanang butang nga matahom sa iyang panahon. Bisan ang panahong walay kinutoban gibutang niya sa ilang kasingkasing, aron ang mga tawo dili makatugkad sa buhat nga nahimo sa matuod nga Diyos gikan sa sinugdan bisan hangtod sa kataposan.” Sa dili madugay, uban sa kinaiyanhong tinguha sa tawo nga mabuhi sa “panahong walay kinutoban,” o walay kataposan, nga bug-os nga matagbaw, atong ‘matugkad unya ang buhat nga nahimo sa Diyos gikan sa sinugdan hangtod sa kataposan.’ Oo, ang tibuok yuta mahimong atong klasehanan, si Jehova mao ang atong Magtutudlo, ug ang kinabuhi mahimong usa ka kulbahinam, walay pagkatapos nga panaw sa pagdiskobre.

Handurawa ang imong kaugalingon diha sa Paraiso, nga hingpit sa hunahuna ug lawas. Imong dawaton ang mga hagit nga wala gayod sa imong hunahuna nga dawaton karon​—ug ikaw nahibalo nga matapos mo kini, kaha nagkinahanglan man kini ug usa ka gatos ka tuig o usa ka libo ka tuig. Tingali magamit mo pa ang imong hingpit nga mga hiyas sa pagsundog sa pipila sa mga disenyo ni Jehova​—apan sa mga paagi nga mas maayo kay sa mga paningkamot karon sa mga tawo, nga sagad mohatag ug kadaot ug polusyon. Oo, sama kang Jehova, ikaw pagagamhan sa gugma sa tanan nimong pagabuhaton.​—Genesis 1:​27; 1 Juan 4:8.

Nganong nahibalo kita nga kini dili usa lamang ka maanindot nga damgo? Tungod sa duha ka talagsaong mga “basahon” ni Jehova. Oo, ang Bibliya ug kalalangan naghatag ug di-ikalalis nga pamatuod nga walay imposible sa atong Dakong Tigdisenyo ug Maglalalang. Busa nganong dili magtinguha nga masinati pa ug maayo siya ug ang iyang Anak, si Jesu-Kristo, karon? Dili ka na makapakigbahin pa ug mas makaiikag, mapuslanon, ug masaarong pangagpas.

[Mga hulagway sa panid 10]

Ang Bibliya ug ang basahon sa kinaiyahan nagbutyag sa Dakong Tigdisenyo