Gikan sa Among mga Magbabasa

Timbang Buot kong pasalamatan kamo nga kinasingkasing tungod sa artikulong “Mga Batan-on Nangutana . . . Sa Unsang Paagi Mabuntog Ko ang Akong Sobrang Kabalaka sa Timbang?” (Mayo 22, 1999) Dugaydugay na karon, ang akong gihunahuna mao na lang ang bahin sa akong porma sa lawas ug akong timbang. Maulaw ako sa akong kaugalingon sa dihang ako manamin, ug halos wala na akoy ganang magpatimbang. Human sa pagbasa niining artikuloha, hinunoa, akong naamgohan nga ang sulod nga pagkatawo mao ang hinungdanon.

L. R., Pransiya

Mga Depekto Kadaghanan sa akong panahon gigugol nako sa wheelchair. Ang akong asawa adunay grabeng chronic fatigue syndrome ug nag-antos sa grabeng depresyon. Ang seryeng “Paglaom Alang sa Baldado” (Hunyo 8, 1999) naghisgot nga ang pagkaguol maoy normal nga reaksiyon gumikan sa grabeng kapildihan. Dugang pa, ang mga hulagway sa artikulo nga “Sa Dihang ang Tanang Depekto Mahanaw Na” nakatabang sa paghimong mas tinuod alang kanako nga ayohon sa umaabot ang atong mga kaluyahon.

C. W., Tinipong Bansa

Napungkol ang akong wala nga tiil sa usa ka aksidente sa dihang ako kuwatro anyos pa lamang. Ang inyong serye mitabang kanako sa pagsagubang sa akong kanunay nga mga pagsugmat sa depresyon. Palihog padayona ang maayong trabaho sa pagpakigbugno sa pagpihig.

A.J.T.P., Brazil

Angayng mahibaloan sa mga tawo nga ang mga baldado adunay mga pagbati ug emosyon sama ni bisan kinsa ug nga kami mahimong masakitan. Ang mga tawo usahay motan-aw kanimo nga daw ikaw usa ka abnormal ug mohimog walay-tahod nga mga komento, o sila dili manumbaling kanimo. Ang mga baldado dili mga hungog ni tapolan ni way-mahimo. Kon hatagag higayon, daghan kanamo makahimo sa pagluto, paghinlo, pagpamalit, pagpatunghag mga pamilya, paghupot ug trabaho, ug bisan gani sa pagmaneho ug sakyanan. Usa ka butang nga nakatabang kanako sa pagpadayon mao ang akong pagkakat-on bahin kang Jehova ug sa iyang mahigugmaon ug malulotong mga paagi. Ako dili pa usa sa mga Saksi ni Jehova, apan ako naglaom nga mahimong usa ka Saksi sa umaabot.

A. G., Tinipong Bansa

Bililhon sa mga Mata sa Diyos Sagad akong mobating masulub-on ug walay-pulos, usahay maghunahuna nga dili ako angayng mahimong bug-os-panahong ebanghelisador tungod kay kulang pa ang akong mga paningkamot. Ang artikulong “Ang Hunahuna sa Bibliya: Ikaw Bililhon sa mga Mata sa Diyos!” (Hunyo 8, 1999) nagpaarang-arang sa akong gibati. Mitabang kini kanako sa pagsabot nga si Satanas naningkamot pag-ayo sa pagpabati kanato nianang paagiha aron pahunongon kita sa pag-alagad kang Jehova.

L. W., Canada

Ang artikulo makapahupay kaayo. Hangtod karon, gibati ko nga daw si Jehova wala maminaw sa akong mga pag-ampo. Apan sukad sa pagbasa sa inyong artikulo, ako mas masaligon kang Jehova ug sa akong kaugalingon. Palihog padayon sa pagpatik ug makapahupay nga mga artikulo sama niini.

R.V.T., Belgium

Ako adunay mga ulat sa masakit nga mga kasinatian​—mga sayop nga naghikaw kanako sa akong pagtamod-sa-kaugalingon. Karon ang akong relasyon kang Jehova ug ang kahibalo nga ang iyang gugma dili matugkad sa tawo naghatag kanakog pagbati sa kalipay ug kasegurohan.

V.S.C., Brazil

Mao pa lamay akong pagkatapos sa pagpaminaw sa artikulo diha sa audiocassette. Nabuta ako sulod na sa mga 44 ka tuig, ug bisan human nga mabawtismohan ingong usa ka Kristohanon, wala gayod ako maghunahuna nga ako bililhon kaayo. Kining artikuloha nakatandog kaayo kanako. Gipasalamatan gayod nako ang Diyos nga siya wala maglantaw kanato sama sa atong paglantaw sa atong kaugalingon.

A. K., Italya

Ako nag-antos sa makapaluyang mga emosyon. Apan samtang akong gibasa ang artikulo, maorag si Jehova malumong nakigsulti kanako. Lisod kaayo ang pag-usab sa mga panghunahuna, apan akong paningkamotan nga dili malimot kon unsay giingon sa artikulo: “Si Jehova, sama sa usa ka mahigugmaong ginikanan, ‘anaa sa duol’​—kanunayng mabinantayon, atentibo, ug andam nga motabang.​—Salmo 147:​1, 3.”

K. F., Hapon