Gikan sa Among mga Magbabasa

Dili-Himsog nga mga Estilo sa Kinabuhi Sa miaging pipila ka bulan, nagdaot pag-ayo ang akong panglawas, busa makapadasig gayod ang pagkasayod nga atong mapahimsog ang atong panglawas pinaagig pag-usab sa atong estilo sa kinabuhi. Ang pagbasa sa seryeng “Ang Imo Bang Estilo sa Kinabuhi Nagapatay Kanimo?” (Hulyo 8, 1999) nakapahigmata kanako nga kinahanglang pakubsan ko ang pagkaon sa pipila ka pagkaon ug pagbaton ug mas timbang nga diyeta nga maglakip sa dugang mga prutas ug mga utanon.

E.P.M., Brazil

Ulahing Reaksiyon Nadasig ako sa artikulong “Mga Binhi nga Namunga Daghang Tuig sa Ulahi.” (Hulyo 8, 1999) Kini ang akong ikatulong tuig sa pag-alagad ingong bug-os-panahong tig-ebanghelyo, ug sa dihang dili nako mabatonan ang mga resultang akong gilaoman, ako mahigawad ug mawad-ag kasibot sa pagpadayon. Ang pagbasa niining artikuloha nakatabang nako sa pagbuhat sa akong kinamaayohan karon, nga nagtugyan sa mga resulta diha kang Jehova.

T. N., Hapon

Gitamay Nalingaw ako sa Hunyo 22, 1999, nga artikulong “Mga Batan-ong Nangutana . . . Unsaon Nako Pagsagubang ang Pagtamay?” Sukad sa kindergarten, ang mga eskolmet nangutana kanako bahin sa akong mga tinuohan. Usahay ang ilang paagi sa pagpangutana nakapasilo kanako. Daghang higayon nga diriyot na ako kawad-i sa akong pailob. Karon akong naamgohan nga kini maoy mga pagsulay lamang sa pagtuo. Gawas pa, may uban pa sa eskuylahan nga akong gisangyawan nga malamposon.

L. C., Tinipong Bansa

Gibiaybiay usab ako sa dili pagsaulog sa tinong relihiyosong mga pangilin o sa pagpakigbahin sa patriotikanhong mga seremonyas. Gihasi usab ako tungod sa pagkahimong matinud-anon ug sa paghupot sa moral nga mga sukdanan sa Bibliya. Ang pagkuha sa tukmang kahibalo nakatabang nako sa pagdepensa. Nakatabang kini kanako sa pagpahayag nga dili maulaw bahin sa pagbutyag sa akong mga tinuohan.

H. C., Zambia

Bisag dugay na akong milapas sa pagkatin-edyer​—kapin na akog 50 anyos!​—akong giapresyar ang artikulo. May mga panahong ang pagsupak nga among mahibalag sa ministeryo makapalagot kanamo ug kami mobating lami kaayong ibalos. Mao nga akong gipabilhan ang pahinumdom nga “ang mainsultohong pagsumbalik, bisag unsa ka matistison, makapagrabe lamang sa kahimtang ug mag-awhag pa gani ug dugang mga pagtamay.” Naningkamot ako sa pagdepensa nga dili kay mora bag mibalos, ug kini nga pahinumdom nakapakombinsir kanako sa panginahanglan nga mopadayon pagbuhat sa ingon.

A. F., Tinipong Bansa

Pagkinabuhing Mas Hataas Nadasig ako nga mosanong tungod sa inyong nindot kaayong serye nga nag-ulohang “Kon Unsaon sa Pagkinabuhing Mas Hataas ug Mas Maayog Panimati sa Panglawas.” (Hulyo 22, 1999) Sa kataposan akong nabatonan ang katin-awan sa kalainan tali sa aberids nga gitas-on sa kinabuhi ug gidahom nga gitas-on sa kinabuhi nga dali ra nakong masabtan. Usab, ang maayong tambag kon unsaon pagsanta ang mga kadaot sa pagkatigulang maoy mga pahinumdom nga akong magamit aron matabangan sa mataktikanhong paagi ang akong 88-anyos nga apohang lalaki, nga nakigbisog sa pagbati sa pagkaluoy sa kaugalingon.

T. N., Tinipong Bansa

Tigpaminaw nga Iro Gusto kong pasalamatan kamo sa artikulong “Ang Akong Iro Maoy Akong Tigpaminaw!” (Hulyo 22, 1999) Ang pagkasayod nga ang mga tawong may suliran sa pagpaminaw masugamak sa maong seryosong mga kalisdanan nakatabang nako nga mas magmasinabtanon kanila. Ganahan usab akog mga iro, ug nalipay ako sa pagkasayod kon sa unsang paagi sila makatabang ug makapaluyo sa daghang tawo.

L. B., Italya

Ako usab adunay tabang nga iro. Akong gigugol ang dako nakong panahon diha sa wheelchair, kay ako dunay gipikit nga taludtod ug fibromyalgia. Dili igo ang mga pulong sa pagbatbat sa tanang butang nga mahimo sa akong iro alang kanako. Iya akong tabangan kon ako mamalit o manghinlo sa balay. Iya pa gani akong tabangan sa Kristohanong ministeryo pinaagi sa pagdala sa akong literatura.

K. W., Tinipong Bansa