Gipabilhan sa mga Ruso ang Kagawasan sa Pagsimba

SUKAD SA PAGKABUNGKAG SA UNYON SOBYET SA 1991, ANG MGA TAWO DIDTO NAKATAGAMTAM UG MAS DAKONG KAGAWASAN SA PAGSIMBA SA DIYOS. ANG MAONG KAGAWASAN GIPABILHAN USAB NIADTONG MILALIN SA UBANG KANASORAN.

ALANG sa daghan nga nagpuyo sa kanhing Unyon Sobyet, ang kagawasan sa pagtigom nga dayag sa pagsimba sa Diyos gikalipay pag-ayo​—kalipay nga gihikaw kanila sulod sa daghang dekada.

Human sa Bolshevik nga Rebolusyon sa 1917, nahimong peligroso sa Rusya ang pagbasa sa Bibliya, ug pipila lang ka tawo ang nagrisgo sa ilang kagawasan sa pagbuhat sa ingon. Ang mga Saksi ni Jehova maoy eksepsiyon. Sa pagkamatuod, ang magasing Newsweek sa Abril 16, 1956​—duolan sa 44 ka tuig kanhi​—mikutlo sa usa ka batan-on sa Sidlakang Alemanya nga nag-ingon: “Walay si bisan kinsa kondili mga Saksi ni Jehova ang nagbasa sa Bibliya.” Bisan pa niana, tungod sa pagpahigayon sa mga tigom sa pagtuon sa Bibliya ug tungod sa pagsangyaw sa mensahe sa Bibliya, ang mga Saksi gibalhog sa mga bilanggoan ug mga kampo sa pinugos nga trabaho. Apan, bisan asa sila moadto ilang gisentro ang pagtagad diha sa ilang pinasukad-sa-Bibliyang paglaom, sumala sa gipakita sa kaubang kahon.

Sa dihang ang Unyon Sobyet nabungkag sa 1991, ang mga Saksi didto nagpahigayon ug pito ka kombensiyon nga nagpasiugda sa programa sa instruksiyon sa Bibliya. Tanantanan, 74,252 ang nanambong. Sa 1993, duha ka tuig lamang sa ulahi, 112,326 ang nagtigom sa walo niana nga kombensiyon sa 4 sa 15 ka kanhing mga republika sa Unyon Sobyet. * Daghan niadtong linibo nakagugol ug daghang katuigan sa mga bilanggoan ug mga kampo sa pinugos nga trabaho sa Sobyet. Kining matinumanong mga Kristohanon mapasalamaton kaayo sa ilang kagawasan sa pagsimba sa Diyos nga walay babag.

Matag tuig sukad sa 1993, gipabilhan sa mga tawo gikan sa kanhing Sobyet nga mga republika ang pribilehiyo sa pagtigom nga gawasnon diha sa Kristohanong mga panagkatigom sa ilang yutang natawhan. Sa miaging tuig, pananglitan, ang total nga 282,333 ka Saksi ni Jehova ug ilang mga higala ang nalipay sa pagsimba sa tingob sa 80 ka “Matagnaong Pulong sa Diyos” nga Distritong mga Kombensiyon nga  gipahigayon sa kanhing Sobyet nga mga republika. Ug adunay total nga 13,452 nga nabawtismohan.

Bisag daw katingad-an, sa miaging tuig dihay Rusog-pinulongan usab nga mga kombensiyon sa ubang mga nasod sa kalibotan. Ang total nga 6,336 ka tawo nanambong sa upat nianang maong mga panagkatigom sa mga nasod sa gawas sa kanhing Unyon Sobyet! Diin man kini gipahigayon? Ug nganong daghan kaayong nagsultig-Ruso nga mga tawo ang adunay dakong kaikag sa Bibliya? Ato unang tagdon sa mubo ang ulahing pangutana.

Ilang Naamgohan ang Espirituwal nga Panginahanglan

Ang Rusya adunay dagayang relihiyosong kasaysayan. Ang kuntodo nga pagkadayandayang mga simbahan niini, nga gitukod kasiglohan kanhi, naapil sa labing ilado sa Kakristiyanohan. Bisan pa niana, ang Rusong Ortodoksong Iglesya, sama sa Romano Katolikong Iglesya, padayong naghimo sa mga tawo nga ignorante sa Bibliya.

“Ang Bibliya,” nagsaysay ang dili pa dugayng libro nga The Russian Tragedy​—The Burden of History, “wala pa gayod mahimong pangunang bahin sa Rusong Ortodoksiya.” Ang resulta, sumala sa Rusong relihiyosong eskolar nga si Sergei Ivanenko, mao nga “ang kakulang sa kahibalo sa Bibliya sa Ortodoksong mga magtutuo nagpahinabo sa kamatuoran nga daghang parokyano sa Ortodoksong mga iglesya ang mas daling maimpluwensiyahan sa mga patuotuo, okultismo, ug salamangka kay sa dili mga magtutuo.”

Ang iladong Rusong magsusulat nga si Tolstoy mihimog susamang obserbasyon. Siya misulat: “Akong gikombinsir ang akong kaugalingon nga ang doktrina sa [Rusong Ortodokso] iglesya maoy sa teoriya usa ka minarama ug makadaot nga panglimbong, ug sa binuhatan usa ka koleksiyon sa daghan kaayong patuotuo ug pamarang, nga sa bug-os nagtago sa tibuok nga kahulogan sa Kristohanong pagtulon-an.”

Kining kahimtanga napamatud-ang mabungahong natad alang sa pag-uswag sa Sobyet nga Komunismo uban sa ateyistikanhong propaganda ug ilado kaayong garay niini nga: “Ang relihiyon mao ang opyum sa katawhan.” Bisan pa niana, ang Komunismo mismo sa wala madugay nahimong usa ka porma sa relihiyon, nga kasagarang gitawag ug Pulang Relihiyon. Apan ang Pulang Relihiyon wala magdugay. Sa dihang ang Sobyet nga Estado nabungkag sa 1991, milyonmilyong tawo ang nalibog ug naghunahuna kon asa modangop. Sa pagdasig sa mga Saksi ni Jehova, libolibo sa mga Ruso ang nangita sa mga tubag diha sa Bibliya.

Ingong resulta sa maayong sistema sa edukasyon, ang mga Ruso nalakip sa labing edukadong mga tawo sa kalibotan. Busa, daghang mga Ruso nahimong dili lamang mga magbabasa sa Bibliya kondili mga mahigugmaon usab sa mga pagtulon-an niini. Sa samang panahon, ilabina panahon sa dekada sa katuigang 1990, gatosan ka libong tawo gikan sa kanhing Unyon Sobyet  milalin sa ubang mga nasod, sama sa Alemanya, Gresya, ug sa Tinipong Bansa. Uban sa unsang mga resulta?

May Kagawasan sa Pagsimba sa Alemanya

Sa ika-18 ug ika-19ng kasiglohan, daghang Aleman ang namalhin sa Rusya. Ang labing ilado mao ang 15-anyos nga si Sophie, kinsa sa 1762 mipuli sa iyang bana ingong magmamando sa Rusya. Panahon sa iyang dugayng pagmando, si Sophie, sa ulahi nailhan ingong Catherine nga Bantogan, nagdapit sa Alemang mga mag-uuma sa pagpuyo sa Rusya. Dayon, sa dihang miatake ang Alemanya sa Unyon Sobyet panahon sa Gubat sa Kalibotan II, kadaghanan niadtong Aleman ug kagikan gidala ngadto sa Siberia ug ngadto sa Sobyet nga mga republika sama sa Kazakhstan, Kyrgyzstan, ug Uzbekistan. Dili pa dugay daghang nagsultig-Ruso nga mga Aleman, maingon man usab sa uban gikan sa kanhing Unyon Sobyet, namalhin sa Alemanya sa pagtagamtam sa mas maayong mga kahimtang sa ekonomiya.

Sa Disyembre 1992 ang unang nagsultig-Ruso nga kongregasyon sa Alemanya naporma sa Berlin. Sa miaging tuig, 52 ka kongregasyon ug 43 ka gagmayng mga grupo ang naporma ngadto sa tulo ka nagsultig-Rusong mga sirkito sa Alemanya. Dihay kinatas-ang ihap sa nanambong nga 4,920 diha sa Rusog-pinulongan nga “Matagnaong Pulong sa Diyos” nga Distritong Kombensiyon sa Cologne, nga gipahigayon gikan sa Hulyo 30 hangtod sa Agosto 1, diin 164 ang nabawtismohan sa pagpasimbolo sa ilang dedikasyon kang Jehova. Mas sayosayo pa, sa Abril 1, sa Rusog-pinulongan nga mga kongregasyon sa Alemanya, 6,175 ang presente sa pagsaulog sa Memoryal sa kamatayon ni Jesus.

Mga Ruso sa Tinipong Bansa

Nangabot usab sa Tinipong Bansa ang nagsultig-Ruso nga mga tawo gikan sa kanhing Unyon Sobyet. Ang The New York Times nagtaho: “Tali sa 1991 ug 1996, ang mga Ruso mao ang kinakusgang-nagdaghang grupo sa mga lalin sa Brooklyn. Sa mao gihapong yugto, ang Immigration and Naturalization Service midawat ug kapin sa 339,000 ka lalin ngadto sa Tinipong Bansa gikan sa kanhing Unyon Sobyet.”

Sa ulahi, ang Times sa Enero 1999 miingon nga sulod sa milabayng dekada, mga 400,000 ka Hudiyo gikan sa kanhing Unyon Sobyet milalin sa New York City ug sa palibot nga dapit. Dugang pa, libolibong Ruso ang mipuyo sa ubang mga dapit sa Tinipong Bansa sa dili pa dugayng katuigan. Pananglitan, dihay nangabot nga mga 35,000 ka bag-ong Rusong mga lalin sa amihanang California, nga naghimo niini nga ikatulong-kinadak-ang sentro sa mga lalin gikan sa kanhing Unyon Sobyet sunod sa New York ug  Los Angeles. Kining nagsultig-Ruso nga mga tawo misanong usab sa kahigayonan nga magtuon sa Bibliya, ug gatosan kanila nahimong mga magsisimba sa matuod nga Diyos, si Jehova.

Sa Abril 1, 1994, ang unang Rusog-pinulongan nga kongregasyon sa mga Saksi ni Jehova ning bag-o pa sa Tinipong Bansa naporma sa Brooklyn, New York. Ngadtongadto, ang Rusong mga kongregasyon gitukod sa Pennsylvania, California, ug Washington. Ang mga grupo sa pagtuon giporma diha sa daghang ubang dapit sa nasod.

Ang Una sa Tinipong Bansa

Sa miaging Agosto 20 hangtod sa 22, ang kinatas-ang ihap sa nanambong nga 670 gikan sa tibuok Tinipong Bansa ug Canada nahinam sa pagtambong sa unang Rusog-pinulongan nga distritong kombensiyon nga gipahigayon sa New York City. Ang tanang pakigpulong gipahayag diha sa Ruso, ug ang may-kostyum nga drama, nga nagpasiugda sa asoy sa Bibliya bahin kang Jacob ug Esau, gipresentar sa mga membro sa Rusong kongregasyon sa Los Angeles, California. Kadto sa pagkatinuod maoy usa ka hinungdanong bahin sa kombensiyon.

Ang laing hinungdanong bahin sa kombensiyon mao ang pagbawtismo sa 14 ka tawo, ang tanan makita sa kaubang letrato. Ubay-ubay ang mibiyaheg mga 4,000 kilometros gikan sa Portland, Oregon, ug gikan sa Los Angeles ug San Francisco, California, aron magpabawtismo sa kombensiyon sa New York City. Sa miagi, kining 14 nagpuyo sa kanhing Sobyet nga mga republika sa Armenia, Azerbaijan, Belarus, Moldova, Rusya, ug Ukraine. Ang ilang mga eksperyensiya nagbutyag kon unsa ka dako ang ilang pagpabili sa kahibalo sa Diyos ug sa kagawasan sa pagsimba kaniya.

Si Svetlana (atubangan nga laray, ikatulo gikan sa wala) gimatuto sa Moscow. Sa edad 17 siya naminyo sa usa ka iladong mag-aawit nga magulang niya ug daghang tuig, ug sa 1989 sila miabot sa Tinipong Bansa uban sa ilang masusong anak nga lalaki. Ang iyang bana nagsigeg biyahe, ug lima ka tuig sa ulahi sila nagbulag.

Sa dihang si Svetlana nakahibalag ug usa ka Saksing kauban sa trabaho, ang iyang mga higala nagpasidaan kaniya bahin sa pagkalangkit sa ilang gisulti kaniya nga “usa ka sekta nga mokontrol sa [iyang] kinabuhi ug mokuha sa tanang [iyang] salapi.” Bisan pa niana, buot niyang mahibalo kon unsay gitudlo sa Bibliya. Sa gipakitaan sa ngalan sa Diyos diha sa Bibliya, siya miingon: “Ako nakadayeg pag-ayo nga ang mga Saksi mao lamang ang mga tawo nga nagpaila niana.”

Sa batan-on pa, si Andrei (likod nga laray, ikatulo gikan sa wala) mibiya sa iyang balay sa Siberia alang sa dugang pagbansay ingong usa ka atleta sa gitawag karon nga St. Petersburg. Wala madugay human niana, ang Unyon Sobyet nabungkag, ug sa 1993, si Andrei, sa edad nga 22, milalin ngadto sa Tinipong Bansa. Siya misaysay: “Misugod ako sa paghunahuna bahin sa  Diyos ug misugod sa pagtambong sa Rusong Ortodoksong Iglesya. Kas-a, panahon sa Rusong Easter nga pagsaulog, ako nagpabilin sa simbahan sa tibuok gabii nga nagtinguha nga masuod sa Diyos.”

Niining panahona nahibalag ni Svetlana si Andrei, ug gisuginlan niya siya bahin sa iyang nakat-onan sa iyang pagtuon sa Bibliya. Si Andrei miuyon nga mouban niya sa tigom sa mga Saksi ni Jehova, ug human niadto siya midawat ug pagtuon sa Bibliya. Sa Enero 1999 sila naminyo. Human sa ilang bawtismo sa kombensiyon, sila malipayon.

Si Pavel (likod nga laray, ikaupat gikan sa wala) natawo duol sa Qaraghandy, Kazakhstan, apan sa ulahi mibalhin ngadto sa Nal’chik, Rusya. Kining dakong siyudad haduol sa Chechnya ug Dagestan, diin daghan kaayong paggubatay ang nahitabo. Unang nahibalag ni Pavel ang mga Saksi didto sa Agosto 1996, apan siya milalin sa San Francisco pagkasunod bulan. Nagumon siya sa droga ug nakabaton ug usa ka anak nga babaye, nga nabilin sa Rusya uban sa iyang inahan.

Dihadiha pag-abot sa Tinipong Bansa, gikontak ni Pavel ang mga Saksi ni Jehova ug midawat ug pagtuon sa Bibliya. Iyang gitul-id ang iyang kinabuhi ug misulat sa inahan sa iyang anak bahin sa iyang bag-ong kaplag nga tinuohan. Ang inahan sa pagkakaron nagtuon uban sa mga Saksi, ug adunay mga plano nga paadtoon siya sa Tinipong Bansa aron siya ug si Pavel makapakasal ug duyog nga mag-alagad kang Jehova sa California uban sa ilang anak.

Si George (likod nga laray, ikaduha gikan sa wala) natawo ug gimatuto sa Moscow. Siya miabot sa Tinipong Bansa sa 1996, ug sa pagkasunod tuig siya naminyo kang Flora nga taga-Azerbaijan. Si George mitambong sa Rusong Ortodoksong iglesya, apan human mabasa ang usa ka kopya sa magasing Bantayanang Torre, siya dihay mga pangutana bahin sa doktrinang Trinidad. Agig tubag sa iyang sulat ngadto sa Watch Tower Society, iyang nadawat ang brosyur nga Angay ba Nimong Tuohan ang Trinidad? Sa 1998 siya ug si Flora misugod sa pagtuon sa Bibliya. Karon si Flora nagplano usab nga magpabawtismo.

Ang laing hinungdanong bahin sa kombensiyon mao ang pagdawat sa pangomosta gikan sa Moscow, diin dihay 15,108 nga nagtigom alang sa ilang kombensiyon sulod sa mao gihapong hinapos  sa semana. Pagkamalipayon sa mga delegado sa New York City sa pagkadungog sa pahibalo nga 600 ang nabawtismohan didto! Kadto ilabinang makalipay tungod sa makalilisang nga mga balita sa mantalaan ug telebisyon nga misugod sa pagtumaw sa Tinipong Bansa ug sa laing dapit sa semana dayon na sa petsa sa kombensiyon.

Kon Unsay Nahitabo sa Moscow

Sa Hulyo 21, 1999, ang mga Saksi mipirma ug kontrata alang sa paggamit sa Olympic Stadium nga nahimutang duol sa sentro sa Moscow ug tapad gayod sa usa ka dakong Rusong Ortodoksong Simbahan. Apan usa ka semana sa wala pa magsugod ang kombensiyon, tataw nga dihay pagsupak. Sa pagka-Miyerkoles, Agosto 18, ang permiso sa paggamit sa estadyum wala pa gihapon ihatag, bisan kon ang abang nabayran na. Gipasiugda ngadto sa mga opisyal nga, sumala sa gipakita sa kahon sa panid 28, ang mga Saksi ni Jehova maoy legal nga giilang relihiyosong organisasyon sa Rusya.

Tungod kay mga 15,000 ka delegado sa kombensiyon ang nangandam nga motambong sa Biyernes sa buntag, ang mga hawas sa mga Saksi nabalaka na. Ang pipila ka delegado mibiyahe ngadto sa Moscow gikan sa mga siyudad ug mga lungsod nga daghang milya ang gilay-on. Sa kataposan, human sa pipila ka oras nga panaghisgot, mga alas 8:​00 s.g., sa Huwebes, Agosto 19, ang mga tagdumala sa estadyum nalipay sa pagpahibalo sa mga hawas sa mga Saksi nga ang kombensiyon mahimong ipadayon. Ang administrasyon sa siyudad nagpahibalo nga sila walay pagtutol sa kombensiyon.

Pagkasunod buntag libolibo ang mihugop ngadto sa estadyum. Ang mga boluntaryong Saksi nagtrabaho sa tibuok gabii sa pag-andam sa ilang pag-abot. Presente usab nianang unang buntag mao ang mga membro sa prensa, kinsa gipahibalo nga sayo pa bahin sa pagsupak sa pagpahigayon sa kombensiyon. “Mga pahalipay!” usa kanila mipatugbaw. “Kami nalipay sa pagkadungog nga ang inyong kombensiyon magpadayon.”

Panig-ingnan sa Hapsay nga Panggawi

Ang mga tagdumala sa estadyum mibating maalamon ang paghimog mga kahikayan alang sa seguridad. Busa, ang mga guwardiya nga may kahimanan sa pagtiktik ug metal sama sa gigamit sa pagsusi sa mga pasahero diha sa mga erport nagbantay sa tanang pultahan. Ang mga  polis nagbantay usab sa tanang dapit sulod sa estadyum. Ang kombensiyon nagpadayon sa hapsay nga paagi bisan pa sa seryosong hulga.

Sa Sabado sa hapon may nagtelepono nga nag-ingon nga usa ka bomba ang gitago sa estadyum. Ang hulga nadawat sa dayon nang matapos ang sunod-sa-kataposang pakigpulong sa adlaw. Busa, tungod sa hangyo sa mga tagdumala sa estadyum, usa ka mubong pahibalo ang gihimo sa pagbiya sa estadyum gilayon. Sa dihang gibuhat sa tanan ang ingon diha sa hapsay nga paagi, ang mga opisyal sa estadyum ug ang kapolisan nahingangha. Wala pa gayod sila makakita ug bisan unsa nga sama niini! Sila nangutana kon kaha kini giensayo nang daan.

Walay bombang nakaplagan, ug pagkasunod adlaw ang programa gilugwayan aron iapil ang wala mapresentar sa Sabado. Ang mga tagdumala sa estadyum nahimuot sa kombensiyon.

Sa Gresya ug sa Laing Dapit

Sulod sa kataposang hinapos-sa-semana sa Agosto ug sa unang hinapos-sa-semana sa Septiyembre, ang Rusog-pinulongan nga distritong mga kombensiyon gipahigayon usab sa Gresya​—sa Atenas una ug dayon sa Tesalonica. Dihay total nga 746 ang nanambong, ug 34 ang nabawtismohan. Adunay 8 ka nagsultig-Ruso nga mga kongregasyon sa Gresya ug 17 ka gagmayng mga grupo nga gilangkoban sa mga lalin gikan sa kanhing habagatang mga republika sa Unyon Sobyet. Sila adunay ilang mga tigom diha sa Ruso ug sa ubang mga pinulongan nga gisulti sa mga lalin.

Usa niadtong nabawtismohan sa Atenas mao si Victor. Siya kanhi usa ka ateyista, apan sa Agosto 1998 siya mitambong sa internasyonal nga kombensiyon sa mga Saksi ni Jehova sa Atenas, diin ang iyang asawa gibawtismohan. Siya miingon nga siya nakadayeg kaayo sa gugma nga gipasundayag sa mga delegado nga siya natukmod sa pagtuon sa Bibliya.

Usa ka lalaki nga ginganlag Ighor nakadawat ug kopya sa librong Ikaw Mabuhing Walay Kataposan sa Paraiso sa Yuta ug human sa pagbasa niana gilabay ang iyang mga imahen. Siya misugod pa gani sa pagpaila sa iyang kaugalingon ingong usa sa mga Saksi ni Jehova. Human mosulat sa sangang buhatan sa Atenas ug maduaw sa mga Saksi sa Nobyembre 1998, siya mitambong gilayon sa iyang unang tigom sa kongregasyon ug walay napaltahan sukad niadto. Karon, human sa iyang bawtismo, ang tumong ni Ighor mao ang pagkahimong usa ka bug-os-panahong ministro sa mga Saksi ni Jehova.

Ang nagsultig-Ruso nga mga tawo milalin ngadto sa daghang ubang kanasoran sa kalibotan nga wala nato mahisgoti. Daghan niining mga tawhana usab nagmaya sa ilang kagawasan sa pagtuon sa Bibliya ug sa pagtigom nga dayag sa pagsimba sa Diyos. Gikalipay kaayo nila kining pribilehiyoa!

[Footnote]

[Kahon sa panid 22]

Mga Rusong Nahigugma sa Bibliya

Si propesor Sergei Ivanenko, usa ka tinahod nga Rusong relihiyosong eskolar, naghubit sa mga Saksi ni Jehova ingong mga tawong tinuod nga debotado sa pagtuon sa Bibliya. Diha sa iyang dili pa dugayng libro sa Rusong pinulongan, O lyudyakh, nikogda nye rasstayushchikhsya s bibliey (Katawhang Dili Mahimong Walay Bibliya), siya misulat bahin sa ilang sayong kasaysayan sa Unyon Sobyet: “Bisan sa dihang sila nabilanggo tungod sa ilang pagkamatinumanon sa ilang gituohan, ang mga Saksi ni Jehova nakakaplag ug mga paagi sa paggamit sa Bibliya.” Sa pag-ilustrar niini, siya nag-asoy sa mosunod nga kasinatian.

“Gidili alang sa mga binilanggo ang pagbaton ug Bibliya. Ang mga Bibliya gikompiskar panahon sa mga pagrekisa. Sa usa sa amihanang mga kampo sa pinugos nga trabaho, usa sa mga Saksi ni Jehova maoy usa ka elektrisyan ug iyang gitago ang mga basahon sa Bibliya diha sa usa ka transformer nga taas kaayo ug boltahe. Ang matag bahin sa Bibliya gihigot ug hilo ngadto sa usa ka partikular nga alambre, ug kana lamang tawhana ang nahibalo kon unsang hiloa ang kinahanglang birahon aron makuha kana​—pananglitan, ang Ebanghelyo ni Mateo​—nga dili makoryentehan. Siyempre bisan giunsa pag pangita sa mga guwardiya, walay nakit-an, ug busa kining talagsaong Bibliya wala madiskobrehi.”

[Kahon sa panid 28]

Ang mga Saksi ni Jehova Narehistro Pag-usab sa Rusya

Ang mga Saksi ni Jehova aktibong nagmantala sa Gingharian sa Diyos sa Rusya sulod na sa kapin sa usa ka siglo. Apan, tungod sa mga pagdili sa gobyerno ang mga Saksi wala una makadawat ug legal nga pag-ila hangtod sa Marso 27, 1991. Nianang panahona, sila narehistro ilalom sa ngalang Administratibong Sentro sa Relihiyosong mga Organisasyon sa mga Saksi ni Jehova sa U.S.S.R.

Sa Septiyembre 26, 1997, usa ka balaod nga nag-ulohang “Bahin sa Kagawasan sa Konsensiya ug Relihiyosong Asosasyon” gipatuman. Kining bag-ong balaod gibalita sa prensa sa tibuok kalibotan. Ngano? Tungod kay gilantaw sa daghan ang pagpasaka niining balaora ingong usa ka pagsulay sa pagpig-ot sa relihiyosong mga kalihokan sa minoriya nga mga relihiyon sa Rusya.

Busa, bisan pag sa kataposan narehistro na gayod ang mga Saksi ni Jehova sa 1991, ang bag-ong Kagawasan sa Konsensiya nga balaod sa Rusya nagbaod kanila, maingon man sa tanang ubang relihiyosong organisasyon, sa pagrehistro pag-usab. Kini nagpatungha ug pipila ka pangutana. Kini ba nagpaila nga ang mga awtoridad sa Rusya nagsunod na usab sa polisa sa pagpanglupig sa mga Saksi ni Jehova? O ituboy ba ang relihiyosong pagkamatugoton ug kagawasan sa pagsimba nga gigarantiya ubos sa Konstitusyon sa Rusong Pederasyon?

Ang tubag sa kataposan miabot. Pagkamalipayon sa mga Saksi sa pagdawat sa legal nga pag-ila sa makausa pa sa dihang ang Ministri sa Hustisya sa Rusya miisyu ug sertipiko sa rehistro alang sa “Administratibong Sentro sa mga Saksi ni Jehova sa Rusya,” sa Abril 29, 1999!

[Hulagway sa panid 23]

Ang unang Rusog-pinulongan nga distritong kombensiyon sa Tinipong Bansa

[Hulagway sa panid 24]

Drama sa Bibliya nga gipresentar sa New York pinaagi sa Rusong Kongregasyon sa Los Angeles

[Hulagway sa panid 25]

Kining 14 nga gibawtismohan sa New York gikan sa unom ka kanhing mga republika sa Unyon Sobyet

[Hulagway sa panid 26, 27]

Kapin sa 15,000 nagtigom sa Olympic Stadium sa Moscow