Paghatag sa mga Tawo ug Tinuod nga Paglaom

USA ka 17-anyos nga batan-on nga nagpuyo sa kanhing Sobyet nga republika sa Moldova misulat sa sangang buhatan sa mga Saksi ni Jehova didto aron sa pagpahayag ug apresasyon alang sa Septiyembre 8, 1998, Pagmata! nga seryeng “Unsay Paglaom Alang sa mga Batan-on Karon?” Ang magsusulat misaysay:

“Halos dili nako kapugngan ang akong mga luha, ug kinahanglang mosulat ug magpasalamat ako kaninyo. Ang mga artikulo nagpahinumdom kanako sa akong gibati di pa dugay. Sa dihang hapit na kong maghikog, giluwas ako sa mga Saksi ni Jehova, nga wala nila maamgohi. Ang pagpakigsulti kanila bahin sa paglaom sa umaabot ug pagpalig-on sa akong pagsalig sa kaluoy sa Maglalalang nakatabang kanako nga maulian sa hinayhinay sa akong kawalay-paglaom. . . .

“Ang inyong pagtabang sa mga tawo nga makakat-on bahin sa katuyoan sa Diyos sa pagpatungha ug mas maayong kahimtang sa kinabuhi maoy tinuod nga kapasundayagan sa gugma ngadto sa inyong silingan. Dayag nga kining maong mga paningkamot dunay mga sangpotanan. Ang inyong mga paningkamot sa pagpunting sa labing hinungdanong mga suliran sa katilingban maoy dalayegon. Padayona pagbuhat kining mapuslanong buluhaton. Maghulat ako sa matag bag-ong isyu niining magasina.”

Sa parapong “Kon Nganong Gipatik ang Pagmata!,” nga makita sa panid 4 sa matag isyu, kini nag-ingon: Kining magasina mougmad sa pagsalig sa saad sa Maglalalang sa usa ka makigdaiton ug may-kasegurohang bag-ong kalibotan nga hapit nang mopuli sa tuman-kadaotan, malapasong sistema sa mga butang karon.” Ang pinasukad-sa-Bibliya nga saad sa Diyos naghatag sa minilyong tawo sa tibuok yuta ug kalig-on sa pag-atubang sa mga suliran niining masamok nga kapanahonan.

Makaplagan nimong nindot nga pagkahubit ang tinuod nga paglaom nga gitanyag sa atong Maglalalang diha sa 32-panid nga brosyur nga Unsa ang Katuyoan sa Kinabuhi? Sa Unsang Paagi Makaplagan Nimo Kini? Susiha ilabina ang mga seksiyong “Katuyoan sa Diyos Hapit Nang Matuman” ug “Mabuhing Walay Kataposan sa Yutang Paraiso.” Makapangayo ka niini nga brosyur pinaagi sa pagpil-ap ug pagpadala sa kauban nga kupon ngadto sa adres nga makita diha sa kupon o sa angayng direksiyon nga nalista sa panid 5 niining magasina.

◻ Padad-i ako ug kopya sa brosyur nga Unsa ang Katuyoan sa Kinabuhi? Sa Unsang Paagi Makaplagan Nimo Kini?

◻ Palihog kontaka ako bahin sa libre nga pagtuon sa Bibliya sa balay.