Usa ka Seguradong Paglaom
Usa ka Seguradong Paglaom
DUOLAG 2,000 ka tuig kanhi, si Jesus, kinsa subsob nga gitawag ang labing bantogang tawo nga nabuhi sukad, sa kawalay-hustisya gisentensiyahan ug kamatayon. Samtang siya nagbitay sa kahoy sa pagsakit, usa ka mamumuhat ug daotan nga nagbitay sa iyang tupad mabiaybiayong miingon kaniya: “Ikaw mao ang Kristo, dili ba? Luwasa ang imong kaugalingon ug kami.”
Niana, ang laing mamumuhat ug daotan nga gihukman usab ug kamatayon nagbadlong sa lalaki: “Wala ka ba gayod mahadlok sa Diyos, karon nga ikaw anaa sa samang paghukom? Ug kita, sa pagkatinuod, angayan sa ingon, kay kita nagadawat sa bug-os kon unsay takos nato tungod sa mga butang nga atong gibuhat; apan kining tawhana walay bisan unsang gibuhat nga tipas.” Dayon siya miliso ngadto kang Jesus ug nangaliyupo: “Hinumdomi ako sa dihang mahiadto ka na sa imong gingharian.”
Si Jesus mitubag: “Sa pagkamatuod ako magasulti kanimo karong adlawa, Ikaw mahiuban kanako sa Paraiso.”—Lucas 23:39-43.
Gibutang ni Jesus ang katingalahang paglaom sa iyang atubangan. Gihisgotan ni apostol Pablo ang epekto niining paglaoma diha kang Jesus, nga nag-ingon: “Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw.”—Hebreohanon 12:2.
Lakip sa “kangaya” nga gibutang sa atubangan ni Jesus mao ang pagkinabuhi pag-usab uban sa iyang Amahan sa langit ug sa kapulihay sa pag-alagad ingon nga Magmamando sa Gingharian sa Diyos. Dugang pa, makabaton usab siyag kangaya sa pag-abiabi ngadto sa langit sa iyang nasulayan ug sinaligang mga sumusunod nga magmando uban kaniya ingong mga hari ibabaw sa yuta. (Juan 14:2, 3; Filipos 2:7-11; Pinadayag 20:5, 6) Nan, unsay gipasabot ni Jesus sa iyang pagsaad sa mahinulsolong mamumuhat ug daotan nga siya mahiadto sa Paraiso?
Unsay Paglaom Alang sa Mamumuhat ug Daotan?
Kadtong tawhana dili kuwalipikado nga magmando uban kang Jesus sa langit. Wala siya mahilakip niadtong giingnan ni Jesus: “Kamo mao ang mga mitapot kanako diha sa akong mga pagsulay; ug ako nagahimo ug kasabotan uban kaninyo, maingon nga ang akong Amahan naghimo ug kasabotan uban kanako, alang sa usa ka gingharian.” (Lucas 22:28, 29) Apan, misaad si Jesus nga ang mamumuhat ug daotan mahiadto sa Paraiso uban kaniya. Unsaon pagkatuman nianang saara?
Ang unang lalaki ug babaye, si Adan ug Eva, gibutang ni Jehova nga Diyos sa Paraiso, usa ka hardin sa kalipay nga gitawag ug Eden. (Genesis 2:8, 15) Dinhi sa yuta ang Eden, ug katuyoan sa Diyos nga ang tibuok yuta mahimong paraiso. Ugaling lang, gisupak ni Adan ug Eva ang Diyos ug gipapahawa sa ilang nindot nga pinuy-anan. (Genesis 3:23, 24) Apan gibutyag ni Jesus nga ipasig-uli ang Paraiso ug nga kini maglakip sa tibuok yuta.
Sa dihang si apostol Pedro nangutana kang Jesus kon unsay ganti nga iyang madawat ug sa iyang mga isigkaapostol sa pagsunod kaniya, si Jesus nagsaad: “Sa paglalang-pag-usab, sa dihang ang Anak sa tawo molingkod sa iyang mahimayaong trono, kamo nga misunod kanako manglingkod usab sa inyong kaugalingon sa napulog-duha ka trono.” (Mateo 19:27, 28) Sa katalagsaon, sa asoy ni Lucas niini nga kolokabildo, inay sa pag-ingong “sa paglalang-pag-usab,” si Jesus gikutlo nga nag-ingon “sa umaabot nga sistema sa mga butang.”—Lucas 18:28-30.
Busa, iniglingkod ni Jesu-Kristo sa langit diha sa iyang mahimayaong trono, duyog niadtong magmando unya uban kaniya, iyang tukoron ang matarong bag-ong sistema sa mga butang. (2 Timoteo 2:11, 12; Pinadayag 5:10; 14:1, 3) Pinaagi sa langitnong pagmando ni Kristo, ang orihinal nga katuyoan sa Diyos alang sa tibuok yuta nga mahimong paraiso mamatuman!
Panahon niining pagmando sa Gingharian, tumanon ni Jesus ang iyang saad ngadto sa kriminal nga namatay sa iyang tupad. Iyang banhawon siya, ug kadtong tawhana mahimong yutan-ong sakop ni Jesus. Dayon ang mamumuhat ug daotan hatagag kahigayonan nga makatuman sa mga kinahanglanon sa Diyos ug mabuhi sa walay-kataposan ilalom sa pagmando sa Gingharian. Sa tinuoray kita malipay sa gipasukad-sa-Bibliyang palaaboton nga magkinabuhing walay-kataposan sa Paraiso sa yuta!
Ang Kinabuhi Mahimong Makabatog Kahulogan
Handurawa ang kahulogan nga ikahatag sa maong dakong paglaom sa atong mga kinabuhi. Makatabang kini sa pagpanalipod sa atong mga hunahuna gikan sa makamatayng mga resulta sa negatibong panghunahuna. Gipakasama ni apostol Pablo ang maong paglaom ngadto sa hinungdanong bahin sa espirituwal nga hinagiban. Siya miingon nga “ang paglaom sa kaluwasan” kinahanglang atong isul-ob “ingong helmet.”—1 Tesalonica 5:8; Salmo 37:29; Pinadayag 21:3, 4.
Makapatunhay sa kinabuhi ang maong paglaom. Sa umaabot nga Paraiso, ang kamingaw pulihan sa mga luha sa kalipay sa dihang ang pinanggang mga minahal sa kinabuhi mabuhi pag-usab pinaagi “sa Diyos kinsa nagabangon sa mga patay.” (2 Corinto 1:9) Dayon ang kahigawad gumikan sa kaluyahon sa lawas, sakit, ug pagkalulid mahikalimtan na, kay “ang bakol mokatkat ingon sa laking osa.” Ang ‘unod sa tawo mabaskog labi pa kay sa pagkabatan-on,’ ug siya “mahibalik sa mga adlaw sa iyang batan-ong kabaskog.”—Isaias 35:6; Job 33:25.
Nianang panahona, sa dihang “walay molupyo nga moingon: ‘Ako masakiton,’” ang kasubo gumikan sa laygay nga sakit mahimo na lamang unya nga nagkahanaw nga handomanan. (Isaias 33:24) Ang kahaw-ang tungod sa dugayng depresyon mahimo unyang “pagmaya hangtod sa panahong walay tino.” (Isaias 35:10) Ang kawalay-paglaom sa makamatayng sakit mawala na unya lakip sa kamatayon mismo, ang karaang kaaway sa tawo.—1 Corinto 15:26.
[Hulagway sa panid 8, 9]
Itisok sa hunahuna ang kahibulongang paglaom sa bag-ong kalibotan sa Diyos