Gikan sa Among mga Magbabasa

Teolohiya sa Kauswagan Gihunahuna ko nga ang usa ka ulohan sa “Pagpaniid sa Kalibotan” nga “Teolohiya sa Kauswagan” (Hunyo 22, 1999) makapahisalaag kaayo, sa pagpahayag niana sa matinahorong paagi. Ang mga iglesyang Pentekostal ug karismatik sa bisan diin nagdasig sa pagpanghatag binase sa maayong mga prinsipyo sa Bibliya. Ang artikulo gisulat uban ang mahukmanong tinamdan.

C. B., Tinipong Bansa

Ang among ulohan sa tukma ug dili-madapigon nagkutlo sa mga pulong sa Luteranong teologo nga si Wanda Deifelt sumala sa pagpatim-aw niana diha sa “ENI Bulletin,” ang sulat-balita sa Konsilyo sa mga Iglesya sa Kalibotan. Sumala sa giingon, ang artikulo sa maong sulat-balita maoy dili bahin sa Pentekostal ug karismatik nga mga iglesya sa katibuk-an kondili maoy kabahin sa pipila ka iglesya sa Latin Amerika.​—ED.

Vinland Buot kong pasalamatan kamo tungod sa artikulong “Hain Kining Kasugirang Vinland?” (Hulyo 8, 1999) Dugay na akong interesado sa Vikings ug naglaom nga inyong hisgotan ang maong ulohan. Sa kataposan ang akong pangandoy natuman.

S. S., Hapon

Matulon-anon ang inyong mga artikulo. Bisan pa niana, gibati ko nga kinahanglang tin-awon ang usa ka punto. Daghang historyano nagagamit sa popular nga terminong “Vikings” alang lamang sa mga piratang Norwego nga miatake sa kabaybayonan sa Uropa.

J. S., Tinipong Bansa

Ang “Pagmata!” mikonsultag ubay-ubayng tinahod nga mga historyano sa Norway ug Greenland bahin niining ulohana. Ang gituohan sa kadaghanan mao nga bisan pag tingali may panagsumpaki taliwala sa mga historyano bahin sa paggamit sa terminong “Viking,” ang mga terminong “Vikings” ug “Norsemen” samag kahulogan diha sa mga dapit nga nagagamit ug Iningles.​—ED.

Naluwas sa Bilanggoan Buot kong pasalamatan kamo gikan sa kahiladman sa akong kasingkasing tungod sa artikulong “Ang Diyos Nahimong Among Magtatabang.” (Hunyo 22, 1999) Mitubod ang mga luha sa kalipay sa akong mga mata samtang gibasa nako kon sa unsang paagi si Francisco Coana nakakat-on sa kamatuoran ug naghimo sa pag-alagad kang Jehova nga pangunang butang sa iyang kinabuhi. Ang pagbasa bahin sa mga pagsulay nga naagian sa akong Kristohanong mga igsoon sa Mozambique tinuod nga makapalig-on sa pagtuo.

J. H., Tinipong Bansa

Masakitong mga Ginikanan Natandog ako sa artikulong “Mga Batan-on Nangutana . . . Nganong Masakiton Kaayo si Mama?” (Hulyo 22, 1999) Wala ako maghunahuna nga daghan kaayong ubang batan-on nga, sama nako, nakapribilehiyo sa pag-atiman ug usa ka masakitong minahal. Ang akong lola nagpuyo ipon namo, ug siya naghigda na lang sa banig sulod na sa upat ka bulan. Misugod ako sa pagbating nabug-atan ug gikapoy sa pag-atiman kaniya. Akong nabatonan ang gikinahanglan pag-ayong kusog tungod sa pagbasa sa artikulo. Kadto mipabati kanakong masaligon sa pagpaluyo ni Jehova.

J. P., Pilipinas

Ang artikulo nakapahupay pag-ayo kanako, ug kana mihatag kanakog kusog sa pagpaluyo sa akong inahan, nga nagaantos sa depresyon. Nakagamit ako sa mga sugyot nga gihimo sa artikulo sa pagsabot sa kahimtang nga mas matinud-anon ug sa pagpakitag labawng pagkamabination, pagsabot, ug pagkamataktikanhon.

G. L., Italya

Ang artikulo miabot nga tukma gayod sa panahon. Ako may kanser, ug ang akong anak lalaki nagpuyo ipon nako. Ang akong anak nag-antos pag-ayo nga ako wala na mahibalo kon unsay buhaton sa paghupay kaniya. Ang artikulo tukmang nagbatbat sa iyang mga gibati. Kining mga artikuloha dili lamang alang sa mga batan-on. Kini sila maoy bahin sa kinabuhi mismo.

R. Z., Alemanya

Kining artikuloha nakatabang nako sa pagkaamgo kon unsa ka hinungdanon ang pagpabiling aktibo sa espirituwal. Akong naamgohang makatabang ka lang sa usa ka masakitong tawo kon ang imong kinabuhi mismo napunting sa Gingharian sa Diyos.

P. E., Austria