Itugot ba ang Mas Dakong Kagawasan sa Konsensiya sa Mexico?

SINULAT SA KORESPONSAL SA PAGMATA! SA MEXICO

ANG relihiyosong kagawasan sa Mexico gigarantiya sa balaod. Bisan pa niana, ang balaod duna gihapoy pipila ka limitasyon diha sa kagawasan sa pagsimba. Pananglitan, ang ideya bahin sa pagsupak sa serbisyo militar tungod sa konsensiya wala pa kaayo hisayri niining nasora. Kanay hinungdan nga ang Institute of Legal Investigations, sa National Autonomous University of Mexico (UNAM), mihukom nga himoon ang usa ka internasyonal nga panagkatigom nga nag-ulohang “Pagsupak Tungod sa Konsensiya sa Mexico ug sa Kalibotan.” Ang Institute of Legal Investigations sa UNAM manubag sa gobyerno, apan ang katuyoan niini mao ang pag-usisa sa establisadong mga balaod ug ilang kapadapatan. Ang mga Saksi ni Jehova sa Mexico gidapit nga magpadalag usa ka hawas aron mohatag ug pakigpulong bahin sa ulohang “Mga Saksi ni Jehova ug Pagsupak Tungod sa Konsensiya.”

Mga Propesor Nagpahayag

Ang pakigpulong nga “Pagsupak Tungod sa Konsensiya Diha sa Internasyonal nga Balaod,” nga gipahayag ni Dr. Javier Martínez Torrón, propesor sa Granada University of Law, sa Espanya, mipunting nga ang kagawasan sa konsensiya ug ang katungod sa pagsupak sa kapadapatan sa pipila ka balaod o mga obligasyon tungod sa konsensiya giila na sa tibuok kalibotan. Gihisgotan niya ang kahimtang sa mga Saksi ni Jehova sa Espanya ug ang kasong Kokkinakis sa Gresya. *

Si Dr. José Luis Soberanes Fernández, usa ka propesor sa Institute of Legal Investigations sa UNAM, mipahayag bahin sa topikong “Mexicanong Kasinatian Bahin sa Ulohan.” “Kinahanglang ipunting nato nga ang Mexicanong Balaod sa Relihiyosong mga Asosasyon ug Publikong Pagsimba halos nagdili sa pagsupak tungod sa konsensiya,” matod niya, nga nagtumong sa Unang Artikulo, nga nag-ingon: “Walay higayon nga ang relihiyosong mga pagtuo magpahigawas ni bisan kinsa sa pagsunod sa mga balaod niining nasora. Walay usa ang makagamit sa relihiyosong mga hinungdan ingong pasikaranan aron molikay sa mga responsibilidad ug mga katungdanang gilagda sa mga balaod.” Sa paghinapos, si Dr. Soberanes miingon: “Kami nagtuo nga kinahanglang maghimog balaod bahin sa pagsupak tungod sa konsensiya sa Mexico.”

Gihisgotan niya ang kamatuorang matag tuig ginatos ka bata sa mga Saksi sa Mexico mag-atubang ug mga suliran labot sa ilang edukasyon tungod sa ilang gibase-sa-Bibliya nga pagdumili sa pagsaludar sa bandera. Ang pipila ka bata sa mga Saksi dili gani tugotang magpalista aron moeskuyla. Bisan pa niana, pinaagi sa mga paghangyo sa Komisyon sa Tawhanong mga Katungod, daghan kanila ang gipasig-ulian sa ilang katungod nga maedukar. Ang pipila ka opisyales sa eskuylahan naghimog mga tikang aron mapugngan ang pagpalagpot sa mga bata gikan sa eskuylahan, apan ang pipila ka magtutudlo wala manumbaling sa maong mga singkamot. Ang mga awtoridad nagmatinugoton bahin sa baroganan sa mga Saksi, apan walay usa ka sukdanan nga mahimong sundon sa mga eskuylahan sa Mexico.

Ang panagkatigom naghisgot usab sa mga pagsupak tungod sa konsensiya nga gipahayag sa ubang mga relihiyon, sama sa pagpugos nga patrabahoon sa mga adlawng giisip nga balaan, pagkaobligado nga magbesti diha sa trabahoan sa paagi nga molapas sa ilang relihiyosong mga tinuohan, ug uban pa. Ang mga pagsupak sa  serbisyo militar ug sa pipila ka pagtambal gihisgotan usab.

Mga Saksi ni Jehova ug si Cesar

Usa ka membro sa mga kawanihan sa sangang-buhatan sa mga Saksi ni Jehova sa Mexico nagpahayag sa usa ka sumaryo sa panguna nilang mga tinuohan. Gisaysay niya ang ilang pagsunod sa maong mga prinsipyo sa Bibliya sama sa usa nga gipahayag diha sa Lucas 20:​25, nga nagsugo sa mga Kristohanon nga “ibayad ang mga butang ni Cesar ngadto kang Cesar.” Siya naghisgot usab sa Roma 13:​1, nga nag-ingon nga ang mga Kristohanon kinahanglang motahod sa sekular nga mga awtoridad. Gipasiugda niya nga ang mga Saksi ni Jehova maoy normal, masinundanon-sa-balaod nga mga lungsoranon nga naningkamot sa pagbayad sa ilang mga buluhisan, pagkinabuhing malinawon, paghupot ug hinlong mga balay, ug pagpaeskuyla sa ilang mga anak.

Unya iyang gipasiugda ang usa ka Kasulatanhong pasikaranan sa pagdumili sa mga Saksi sa pagsaludar sa bandera, nga hikaplagan diha sa Napulo ka Sugo, sa Exodo 20:​3-5: “Dili ka gayod magbaton ug laing mga diyos batok sa akong nawong. Dili ka gayod magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka gayod magyukbo kanila ni maaghat sa pag-alagad kanila.”

Ang mga Saksi ni Jehova nagsimba sa Diyos lamang, ug sa bisan unsang kahimtang sila dili mosimba sa larawan. Bisan pa niana, sila dili gayod mobuhat sa bisan unsang dili-matinahorong buhat batok sa usa ka nasodnong emblema o mosulting dili-matinahoron bahin niana.

Aron ipasiugda ang punto de bista sa mga Saksi ni Jehova bahin sa maong isyu, ang video nga Purple Triangles gipasundayag. Ang maong video nagpakita sa lig-ong baroganan nga gipadayag sa mga Saksi ni Jehova sa Nazi nga Alemanya (1933-45). Kini nagpasundayag sa sugilanon sa mga Kusserow, usa ka pamilyang mibarog nga lig-on sa ilang mga tinuohan panahon sa pagmandong Nazi. *

Unya gipahayag ang Kasulatanhong pasikaranan sa pagdumili sa mga Saksi ni Jehova nga mopaabono ug dugo. (Genesis 9:​3, 4; Buhat 15:​28, 29) Ang kahikayan sa mga Hospital Liaison Committee sa tibuok kalibotan gipatin-aw. Dugang pa, ang mga nahimo sa nakigtambayayong nga mga doktor sa paghimog walay-dugo nga operasyon sa mga Saksi ni Jehova gipasiugda.

Kada adlaw mga 100 ka tawo mitambong sa panagkatigom, nga daghan kanila mga abogado. Ang mga hawas sa Opisina sa Relihiyosong mga Kahikayan sa Mexico nanambong usab. Kadtong tanan nga presente nakapamati sa punto de bista sa mga eksperto mahitungod sa pagtahod sa mga pagsupak tungod sa konsensiya. Kining ideyaha bag-o alang sa mga magbabalaod sa Mexico, bisan pag kaylap kining gidawat diha sa daghang demokratikanhong mga nasod, sama sa Espanya, Portugal, Pransiya, ug Tinipong Bansa ingon man sa pipila ka kanhi Komunistang mga nasod, sama sa Czechia ug Slovakia.

[Mga footnote]

[Hulagway sa panid 21]

Ang mga Saksi ni Jehova sa Mexico nagmahal sa ilang kagawasan sa pagsangyaw