“Kinahanglang sa Diyos Ako Mosalig”

Ang mosunod nga sulat gibilin sa usa ka Kingdom Hall sa mga Saksi ni Jehova sa Edmonton, Alberta, Canada.

“Minahal nga Mensahero:

“Nagasulat ako sa pagpasalamat sa tawo nga lagmit dili-tinuyong mimugnag usa ka milagro sa akong kinabuhi.

“Sa ubay-ubayng mga semana nga miagi, ang akong bana ug ako may mainitong panaglalis. Bag-o pa nakong nasulti ang mga pulong, ‘Dako kaayo kini nga ambot kon mahikalimtan ko kini.’ Dihadiha dayon ang timbre sa pultahan mikiring. Sa maong higayon diha sa akong pultahan ang usa sa mga Saksi ni Jehova, ug ulahi na kaayo aron motago.

“Sa pagbukas ko sa pultahan, ako linga kaayo aron makadungog kon unsay gisulti. Akong mahinumdoman ang mga pulong ‘mga anak’ ug ‘pamilya.’ Ang lalaki mihulbot ug usa ka libro nga gitawag Ang Sekreto sa Kalipay sa Pamilya. Sa pagkakita nako sa titulo, misugod lang ako sa paghilak ug dili ako makahunong. Siya mihangad, ug dayon siya nangayog pasaylo tungod sa pagdisturbo kanako, nga mitunol kanako sa libro, ug milakaw.

“Ang milagro? Kini mao ang pahinumdom nga sa dihang dili ako mahibalo kon unsay buhaton, dili kinahanglang mabalaka kay ang Diyos nahibalo. Kinahanglang sa Diyos ako mosalig. Siya nagpadala pa ganig usa ka mensahero. Salamat kaninyo.”

Ang librong Ang Sekreto sa Kalipay sa Pamilya makahatag ug kaayohan sa matag membro sa pamilya. Nahiapil sa matulon-anong mga kapitulo niini maoy “Panalipdi ang Inyong Pamilya Gikan sa Makadaot nga mga Impluwensiya,” “Mentinaha ang Kalinaw sa Inyong Panimalay,” ug “Masagubang Nimo ang mga Suliran nga Magdaot sa Usa ka Pamilya.”

Alang sa imong kopya, palihog pagpil-ap ug ipadala sa koreyo ang nag-ubang kupon ngadto sa adres nga gipakita sa kupon o ngadto sa nahiangay nga adres nga gilista sa panid 5 niining magasina. Makadawat kag tinong mga sugyot nga makatabang kanimo sa pagsulbad sa mga suliran ug paghimo sa pamilyahanong kinabuhi nga kahimut-anan sumala sa katuyoan sa Maglalalang nga maingon kini.

□ Padad-i ako ug usa ka kopya sa librong Ang Sekreto sa Kalipay sa Pamilya.

□ Palihog kontaka ako mahitungod sa usa ka walay-bayad nga pagtuon sa Bibliya sa balay.