Noah—He Walked With God—Kon Giunsa Paggama ang Video

“SIYA mobangon sa buntag nga maghisgot bahin niana. Tan-awon niya kana katulo o kaupat sa maadlaw ug unya sa dili pa siya matulog sa gabii.” Unsa bay gihisgotan niining inahan nga taga-California? Ang iyang dos-anyos nga batang lalaki ug ang iyang pagkagusto sa video nga Noah​—He Walked With God. * Siya midugang: “Sa dihang magdula siya sa gawas, siya maghisgot bahin sa pagtukod sa usa ka arka nga makaluwas sa kinabuhi, nga magkupot ug martilyo.”

Ang laing inahan misulat: “Kinahanglang magpasalamat ako ug dako kaninyo alang sa tanang kahago, panahon, ug gugma nga inyong gigugol sa paggama sa Noah nga video. Ako adunay tres-anyos nga nakasag-ulo na sa tibuok video, bisan ang mga paningog niana! Kini ang iyang paboritong video, ug siya mohangyo nga motan-aw niini kada adlaw, kaduha o katulo sa usa ka adlaw.”

Usa ka batang babaye, si Danielle, misulat: “Nakaangay ako niini, ug gusto kong sundon ang mga gihimo ni Noe. Nanghinaot ako nga mogama kamog dugang mga video alang sa mga bata.”

Hinuon, gikinahanglan ang panahon sa paggamag mga video sa Bibliya. Ngano man?

Giunsa Paggama ang Noah nga Video?

Dugay pa una magsiyoting sa usa ka serye sa mga esena o idibuho ang mga hulagway, ang usa ka tagsulat sa drama maghan-ay sa usa ka estorya nga gibase sa asoy sa Bibliya. Kini ngadtongadto mahimong usa ka storyboard ug dayon usa ka sinulat nga dula. Ang storyboard maoy serye sa gagmayng mga krokis nga motabang sa mga tigdibuho sa pagtino sa mga esena ug disenyo sa usa ka estorya. Ang ubay-ubayng mga tawo, lakip ang mga tigdibuho, naghisgot kon sa unsang paagi ang kasaysayan ni Noe ikailustrar​—kon unsang mga bahina ang mogamit ug mga aktor ug kon unsa ang labing maayo nga ihulagway pinaagig mga dibuho. Ang mga esena nga may mga aktor motabang sa pagpamatuod sa usa ka asoy diha sa kaisipan sa usa ka bata. Kana magpadayag nga ang Bibliya naghisgot bahin sa tinuod nga mga tawo nga nag-alagad kang Jehova libolibo ka katuigan kanhi. Unsay sunod nga lakang sa paggama sa video?

Ang mga magdudula gipili aron maghawas kang Noe ug sa iyang pamilya. Ang ilang besti sa dula gidisenyo, ug ang han-ay sa mga kolor alang sa matag esena gidesisyonan. Kanang tanan gikinahanglan kay ang mga tigdibuho dili makadibuho ug makapintal kang Noe ug sa iyang asawa ug mga anak lalaki ug mga umagad-nga-babaye hangtod nga hisayran nila kon unsay hitsura sa mga aktor nga nagsul-ob sa ilang mga besti sa dula. Ang mga dibuho kinahanglang mahiuyon sa tinuod-kinabuhing mga esena. Apan diin ba isiyoting ang maong mga esena?

Ang Denmark maoy napili, sanglit ang sangang-buhatan sa Watch Tower Society nianang nasora may hanas nga mga magbubuhat ug mga kasangkapan sa dula ug igong hawanan sa pabrika nga magamit alang sa gikinahanglang mga esena sa sulod sa balay. Ang usa ka grupong tiggamag pelikula gikan sa Audio/Video Services Department sa Watchtower Educational Center sa Patterson, New York, nangadto didto aron magsiyoting, nga naglangkit usab sa Danes nga mga trabahante. Ang estorya giasoy pinaagi sa pagsaysay. Kana nakapasayon kaayo sa paggama sa programa diha sa ubang mga pinulongan kay nagwagtang kana sa lisod nga paagi sa pagkabildohay diha sa laing pinulongan, nga mao, pagsukip ug sibo nga hubad sa kabildohay. Apan giunsa pagbuhat ang lisod nga mga dibuho?

Arte ug Espesyal nga Kamera

Ang mga tigdibuho nagbuhat ug ginatos ka dibuho sa watercolor nga gibase sa storyboard nga gigama sa pundok sa mga magmumugna. Kini sila dili lamang kuwadrado o rektanggulo nga mga dibuho. Usahay kini sila gikurba o itlogon ug porma, depende sa anggulo sa kamera nga gamiton. Walay mausa sa mga dibuho ang labaw sa 56 sentimetros por 76 sentimetros, ug ang kadaghanan maoy ingon ka gamay sa 28 sentimetros por 38 sentimetros.

Ang espesyal nga kontrolado-ang-lihok nga kamera gikinahanglan aron ipelikula ang mga dibuho. Aron mahatagan kanag three-dimensional nga epekto, ang dibuho gihan-ay sa tulo ka lebel​—sa atubang, sa tungatungang distansiya, ug sa luyo. Niining paagiha ang mga hulagway maletratohan lahos  sa mga kahoy, lahos sa mga tiil sa usa ka elepante, o lahos sa bisan unsa pang gikinahanglan aron hatagan ug pasiugda ang giladmon. Ang kamera gikontrolar sa usa ka kompiyuter ug makatuyok sa pagkuha sa usa ka esena o mapokus aron mamugna ang usa ka espesyal nga hulagway. Kini makahatag sa impresyon nga ang esena naglihok sa dihang, sa tinuod, ang kamera lamang ang naglihok.

Sanglit ang Watch Tower Society walay mga kahanas o kahinguhaan aron himoon ang tinuod nga pelikulang kartuning, ang paagi nga mixed-media nga gamiton ang mga esenang gidula duyog sa mga dibuho nahimong malamposong kombinasyon. Nagustohan sa mga bata nga 3- ngadto 12-anyos ang panuigon, nga alang kanila gidisenyo ang video, ang maong paagi sa salida. Ug ang video tin-awng nagpunting sa daghang pagtulon-an nga hikat-onan gikan sa panig-ingnan ni Noe. Dugang pa, ang pasulit diha sa hapin sa video motabang sa mga ginikanan sa pagsubli sa pangunang mga punto sa estorya uban sa ilang mga anak.

Ang ubang espesyal nga mga paningog ug hulagway, sama sa nagkakusog nga pagbunok sa ulan sa panahon sa Lunop, nahimo tungod sa teknolohiya sa kompiyuter. Hisabtan dayon nga nalangkit ang dakong panahon ug mamugnaong paningkamot aron magama ang Noah nga video.

Sanglit ang mga asoy sa Bibliya dili man mausob, ang video nga Noah​—He Walked With God dili makaraan ug makatabang sa matag bag-ong kaliwatan sa mga batan-on. Ang mga bata ug mga ginikanan nakasulat ug ginatos ka sulat sa pagpasalamat nga nanghangyo ug dugang nga mga video. Usa ka tawo misulat: “Ako 50 anyos na ug nagmatuto sa akong mga anak dugay na kanhi. Apan sa akong hunahuna bililhon kaayong galamiton karong adlawa alang sa mga ginikanan nga may gagmayng mga anak ang pagbaton ug librarya sa mga video sa mga estorya sa Bibliya.”

[Footnote]

 [Diagram/Hulagway sa panid 25]

(Alang sa aktuwal nga pagkahan-ay, tan-awa ang publikasyon)

Ang kontrolado-ang-lihok nga kamera maggamag pelikula samtang naglihok, nga makapabuhi sa mga dibuho

[Mga hulagway sa panid 22, 23]

Ang paggama nagsugod sa storyboard

[Mga hulagway sa panid 23]

Ang kadaghanang gidula nga mga esena gisiyoting sa Denmark

[Mga hulagway sa panid 24, 25]

 Ang mga tigdibuho nagdibuho ug nagpintal ug 230 ka separadong mga esena

[Mga hulagway sa panid 25]

Ang pag-edit sa kompiyuter, espesyal nga mga paningog ug hulagway, pagsaysay, honi, ug tingog nagkompleto sa video