Ang Hunahuna sa Bibliya

Tinuod nga Pagtuo​—Unsa ba Kini?

“KON WALAY PAGTUO IMPOSIBLE ANG PAGPAHIMUOT KANIYA PAG-AYO, KAY SIYA NGA NAGADUOL SA DIYOS KINAHANGLANG MOTUO NGA SIYA MAO UG NGA SIYA MAOY TIGGANTI SA MGA MATINUORONG NAGAPANGITA KANIYA.”—HEBREOHANON 11:6.

UNSA ba ang pagtuo? Ang uban nagbatbat sa pagtuo ingong relihiyosong pagtuo sa Diyos bisan pag walay lig-ong pamatuod sa iyang paglungtad. Ang Amerikanong magsusulat nga si H. L. Mencken nagbatbat sa pagtuo ingong “dili-makataronganong pagtuo sa pagkahitabo sa butang nga lagmit dili tinuod.” Tinuod ba kini nga pagtuo sumala sa pagkabatbat diha sa Bibliya? Hinungdanon nga magbaton ug tin-awng pagsabot kon unsa ang pagtuo tungod kay, sumala sa gikutlo sa ibabaw, ‘kon walay pagtuo imposible ang pagpahimuot sa Diyos.’

Ang Bibliya nag-ingon: “Ang pagtuo mao ang pagkanakatino sa mga butang nga atong gilaoman.” (Hebreohanon 11:​1, The New Testament in the Language of Today) Busa, ang pagtuo gipasukad sa tukmang kahibalo, sa tinuod nga mga hitabo nga niana ikapasukad ang hustong mga desisyon. Nagkinahanglan kini dili lang sa pagtuo kondili sa katarongan sa pagtuo.

Ingong ilustrasyon: Tingali ikaw adunay usa ka higala nga bahin kaniya ikaw makaingon: “Mosalig ako nianang tawhana. Makasalig ako nga iyang tumanon ang iyang saad. Nahibalo ako nga kon ako adunay suliran, siya motabang kanako.” Lagmit nga dili nimo kana isulti bahin sa usa ka tawo nga nailhan nimo sa usa o duha ka adlaw lamang, dili ba? Kinahanglang siya usa ka tawo nga kanunayng nakapamatuod sa iyang pagkakasaligan. Sama gayod niana ang relihiyosong pagtuo, nga angayng magpatunghag paglaom ug kombiksiyon nga gipasukad sa lig-on, kasaligang ebidensiya.

Pagtuo o Pagkadali-Motuo?

Ang kadaghanan sa giingong pagtuo karong adlawa sa pagkatinuod maoy pagkadali-motuo​—pagkaandam motuo bisan pag walay lig-ong pasikaranan o katarongan. Ang pagkadali-motuo subsob gipasukad sa mabalhinong emosyon ug sa patuotuo. Kini dili maayog-pasikaranang pagtuo kay wala kiniy kasaligang pasikaranan aron katuohan.

Ang pagkadali-motuo makapahinabo nga ang usa makakab-ot dayon ug mga desisyon nga tingali wala mahiuyon sa kamatuoran sa Bibliya. Busa, ang Bibliya nagpasidaan batok sa way-pasikaranan  nga pagtuo: “Ang bisan kinsa nga walay kasinatian nagatuo sa tagsatagsa ka pulong, apan ang usa nga utokan nagapalandong sa iyang mga lakang.” (Proverbio 14:15) Si apostol Pablo misulat: “Tinoa ang tanang butang; pangupot pag-ayo sa kon unsay maayo.” (1 Tesalonica 5:21) Ang Bibliya wala magpasiugda sa pagkadali-motuo. Kini nagdasig gayod sa pagtuo nga gipasukad sa ebidensiya.

Ang pagkaarang sa pag-ila sa tinuod nga pagtuo gikan sa pagkadali-motuo maoy usa ka ugdang nga butang. Ang usa ka tawo mahimong relihiyoso apan walay tinuod nga pagtuo. Si Pablo mipahayag: “Ang pagtuo dili man panag-iya sa tanang katawhan.” (2 Tesalonica 3:2) Apan ang pinasukad-sa-Bibliya nga pagtuo mao ang gipanag-iya sa pipila ka tawo, ug kini nag-apektar gayod sa ilang mga kinabuhi.

Ang Tinuod nga Pagtuo Maglambigit sa Tawo Ngadto sa Diyos

Ang pagtuo ikapanig-ingon sa usa ka talikala nga may mga likong nga mao ang kompiyansa ug pagsalig nga maglambigit sa tawo ngadto sa Diyos. Apan kining matanga sa pagtuo maoy pagaugmaron; kini dili dala sa pagkatawo. Sa unsang paagi makaugmad ka sa tinuod nga pagtuo? Ang Bibliya nagsaysay: “Ang pagtuo mosunod sa butang nadungog. Sa baylo ang butang nadungog maoy pinaagi sa pulong mahitungod kang Kristo.”​—Roma 10:17.

Busa, kinahanglang mogahin kag panahon aron makaila sa Diyos ug masayran ang mga pagtulon-an sa iyang Anak, si Jesu-Kristo. Ang maong kahibalo dili maangkon kon walay panlimbasog. (Proverbio 2:​1-9) Kinahanglang manlimbasog ka sa pagsusi kon unsay ginaingon sa Bibliya aron makombinsir sa pagkakasaligan niini.

Bisan pa niana, ang tinuod nga pagtuo naglangkit ug labaw pa kay sa pagbaton lamang ug kahibalo o pagtuo nga ang usa ka butang maoy tinuod. Naglangkit usab kini sa kasingkasing​—ang sentro sa panukmod. Ang Roma 10:10 nag-ingon: “Pinaagi sa kasingkasing ang usa nagapasundayag ug pagtuo.” Unsay ipasabot niini? Samtang ikaw mamalandong sa diyosnong mga butang, nga ugmaron ang pagpabili niini, imong gipatidlom ang mensahe sa Bibliya sa imong kasingkasing. Ang pagtuo motubo ug mahimong mas lig-on samtang ikaw matukmod sa paglihok pinasukad sa mga saad sa Diyos ug samtang makita nimo ang ebidensiya sa iyang pagpanalangin.​—2 Tesalonica 1:3.

Pagkabililhong kabtangan ang tinuod nga pagtuo! Kita makabatog kaayohan tungod kay makaarang sa pag-atubang sa lisod nga mga kahimtang nga may kompiyansa sa Diyos, nga nagsalig sa iyang katakos nga giyahan ang atong mga tikang ug sa iyang kaandam nga itagana ang atong mga panginahanglan. Dugang pa, ang Anak sa Diyos, si Jesu-Kristo, mipunting ngadto sa usa ka malungtarong kaayohan sa pagtuo: ‘Gihigugma pag-ayo sa Diyos ang kalibotan mao nga iyang gihatag ang iyang bugtong nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.’ (Juan 3:16) Kinabuhing walay kataposan​—pagkatalagsaong gasa ngadto niadtong adunay pagtuo!

Ang pagtuo sa saad sa Diyos nga gantihan ang iyang mga alagad maghatag sa usa ug bag-ong panglantaw sa kinabuhi. Ang Hebreohanon 11:6 nag-ingon nga ang tinuod nga pagtuo naglangkit sa pagtuo sa katakos sa Diyos nga gantihan “ang mga matinuorong nagapangita kaniya.” Nan, tin-awng ang tinuod nga pagtuo maoy dili pagkadali-motuo, ug kini labaw pa kaayo kay sa pagtuo lamang nga ang Diyos naglungtad. Naglangkit kini sa pagtuo sa katakos sa Diyos nga mahimong tigganti sa mga matinuorong nagapangita kaniya. Tinuod ba gayod ug tim-os nga gusto nimong mailhan ang Diyos? Kon mao, nan batoni ang tukmang kahibalo gikan sa iyang Pulong, ang Bibliya, ug ang imong pagtuo pagagantihan.​—Colosas 1:​9, 10.

[Picture Credit Line sa panid 26]

Mga dibuho ni Albrecht Dürer/Dover Publications, Inc.