Kon sa Unsang Paagi Ikaw Makahunong

SAMA sa pagkat-on sa pagbisikleta, ang paghunong sa pagpanabako talagsa rang makab-ot sa unang higayon sa pagsulay. Busa kon determinado kang mohunong, kinahanglang andam kang mohimog sublisubling mga pagsulay hangtod nga molampos ka. Ayaw isipa ang pagbalik sa pagpanabako ingong kapildihan. Isipa kana ingong kasinatian sa pagkat-on, usa ka diyutayng kapildihan sa mahimo unyang malamposong programa. Aniay pipila ka sugyot nga misaler sa uban. Mahimong mosaler usab kini kanimo.

Andama ang Imong Hunahuna nga Mohunong

■ Una, kinahanglang kombinsihon nimo ang imong kaugalingon nga ang paghunong takos sa paningkamot. Ilista ang imong mga rason kon nganong gusto nimong mohunong, lakip ang tanang kaayohan. Human sa imong paghunong, ang pagrepaso niining listahana magpalig-on sa imong hukom. Ang tinguha nga pahimut-an ang Diyos mao ang kinakusgang motibo sa paghunong. Matod sa Bibliya angay natong higugmaon ang Diyos uban ang atong bug-os hunahuna, kasingkasing, kinabuhi, ug kusog. Dili nato kana mahimo kon kita nagiyan sa tabako.​—Marcos 12:30.

■ Susiha ang imong mga batasan sa pagpanabako aron matino kon kanus-a ug kon nganong ikaw nanabako. Tingali makaplagan mong makatabang ang pagtala sa papel kon kanus-a ug kon diin ka nanabako sa matag sigarilyo sulod sa usa ka kasagarang adlaw. Makatabang kini kanimo nga makitang daan ang mga kahimtang nga tingali makatental nimo nga manabako human ka mohunong.

Planoha ang Petsa nga Mohunong

■ Pagpili ug petsa nga mohunong, ug markahi kini sa imong kalendaryo. Labing maayong mopilig adlaw sa dihang ikaw dili mailalom sa dili angayng mga kapit-os gikan sa gawas. Inig-abot nianang adlawa, hunong sa bug-os​—sa kalit ug hingpit nga paagi.

■ Sa dili pa moabot ang petsa nga mohunong, ipanglabay ang mga ashtray, posporo, ug mga lighter. Labhi ang tanan nimong mga sininang nanimahong upos.

■ Pangayog pagpaluyo sa mga kauban sa trabaho, mga higala, ug pamilya aron dasigon ka sa imong mga paningkamot nga mohunong. Ayawg kahadlok nga hangyoon ang uban nga dili manabako sa imong atubangan.

■ Pagplanog mga kalihokan sa adlaw nga ikaw mohunong. Mahimong moadto ka sa lugar nga gidili ang pagpanabako, sama sa museyo o sa sinehan. Mahimo kang mag-ehersisyo​—maglangoylangoy  o magbisikleta o maglakawlakaw ug dugay.

Pagdumala sa mga Epekto sa Paghunong

Kon ikaw grabe ka hinabako, lagmit masinati nimo ang mga epekto sa paghunong, nga magsugod sa pipila ka oras human matabako ang kataposang sigarilyo. Maglakip tingali kini sa pagkadaling-masuko, pagkawalay-pailob, pagkamakiawayon, kabalaka, depresyon, pagkadi-makatulog, pagkadi-mahimutang, nagdakong gana sa pagkaon, ug pagpangandoy nga manigarilyo. Lagmit resetahan kag tambal sa imong doktor nga motabang sa paghupay niini nga mga simtomas. Dugang pa, duna kay mahimo nga matabangan ka nga madaog ang gubat.

■ Sulod sa unang pipila ka lisod nga mga semana, kaon ug mga pagkaong ubos ug kaloriya, ug inom ug daghang tubig. Nakaplagan sa uban nga makatabang ang pag-esnak ug hilaw nga mga utanon, sama sa karot o kintsay. Kon mag-ehersisyo ka, makatabang ka nga makunhoran ang pagdugang sa timbang ug mahupayan ang nagkurogkurog nga kaugatan.

■ Likayi ang mga dapit ug mga kahimtang nga makatental nimo nga manabako.

■ Pakigbisogi ang sayop nga pangatarongan nga makatental nimo nga manabako. Aniay pipila sa komong mga hunahuna panahon sa paghunong: ‘Karong adlawa na lang ko manigarilyo aron masagubang ko kining lisod nga panahon.’ ‘Panabako ra may akong bisyo!’ ‘Di man gyod ingon niana ka daotan ang tabako; ang ubang grabe ka hinabako nabuhi man ug kapig 90 anyos.’ ‘Lain ang makapatay kanako.’ ‘Walay kalipay ang kinabuhi kon walay tabako.’

■ Kon hapit ka nang matental, paghulat. Pinaagig paghulat ug diyes minutos lamang, ang grabeng pangandoy mawala. Usahay ang paghunahuna nga dili na gayod manigarilyo pag-usab maora tingalig sobra ra kaayo. Kon mobati kag ingon niana, isentro ang hunahuna nga mohunong karong adlawa lamang.

■ Kon gusto nimong moalagad sa Diyos, pag-ampo alang sa tabang. Makatagana ang atong mahigugmaong Maglalalang ug “tabang sa hustong panahon” alang niadtong nanlimbasog nga ipahiuyon ang ilang mga kinabuhi sa iyang kabubut-on. (Hebreohanon 4:16) Apan ayaw pagdahom ug milagro. Kinahanglang ikaw molihok uyon sa imong mga pag-ampo.

Pagpabilin nga Hinabako-Kanhi

■ Lisod kaayo ang unang tulo ka bulan, apan bisan human niana kinahanglang ikaw, kon posible, maglikay sa mga hinabako ug mga kahimtang nga tingali makatental nimo nga manabako.

■ Ayawg limbongi ang imong kaugalingon nga maghunahunang mahimo kang panalagsang hinabako, bisag nakahunong ka na pagpanabako sa usa ka tuig o kapin pa.

■ Pakigbisogi ang tentasyon nga manabako ug “usa lang ka sigarilyo.” Ang usa lamang daling motultol sa lain pa, ug sa dili madugay imong mabalewala ang tanang paningkamot nga imong gihimo aron mohunong. Hinuon, kon ikaw matental ug makapanigarilyog kausa, walay rason nga sundan kanag lain. Kon makabalik ka pagpanigarilyo, hunong na usab.

Malamposong nakahunong ang milyonmilyong hinabako. Uban ang determinasyon ug pagkamalahutayon, ikaw makahunong usab!